Monday, November 28, 2011

མཚམས་ལ་བསྡད་པའི་ཉིན་བདུན་པ།

རྒྱ་མཚོའི་འགྲམ་ནས་རྒྱབ་པའི་པར་ཞིག
ཞོགས་པ་ཆུ་ཚོད་བདུན་པའི་སྐབས་སུ་ལངས་ནས་སོ་དང་གདོང་པ་སོགས་བཀྲུས་ནས་ཡོན་ཆབ་ཕུལ་ཞིང་འོག་ཁང་ཐབ་ཚང་ནང་དུ་སོང་ནས་ཞོགས་ཟས་ལ་རོལ། སྔ་ཐུན་ལ་ཞུགས་ནས་ཅུང་མ་འགོར་བར་ཟུར་ནས་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ཉི་ཡོག་ལ་ཡོད་པའི་ངོས་ཀྱི་གྲོགས་པོ་མགོན་པོ་ལགས་རེད། བསྙེན་མཚམས་སྐབས་ཡིན་སྟབས་ཁ་པར་ལེན་ཐུབ་མ་སོང་། དེ་ནས་སྐར་ཆ་ཁ་ཤས་མཚམས་སུ་ཡང་སྐྱར་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ཀ་ལི་ཧྥོ་ཉི་ཡ་རུ་བོད་རིགས་ཚོགས་པའི་རྒྱུན་ལས་བུ་མོ་བསོད་ནམས་ལགས་རེད་དེ་ཡི་ཁ་པར་ཡང་ལེན་ཐུབ་མ་སོང་བས་རྗེས་ནས་མོ་རང་གི་ལན་ཞིག་བཞག་ཡོད་པ་དེ་ནི་ཉིས་སྟོང་བཅུ་གཉིས་ལོར་ཟླ་བ་དང་པོར་ཀི་ལི་ཧྥོ་ཉའི་བོད་པ་རྣམས་ལ་ཆོས་བཤད་དགོས་ཞེས་པ་དེ་རེད་འདུག ཉིན་གུང་ཟ་མ་སྟབས་བདེ་ཞིག་ཟོས་ནས་ཕྱི་ཐུན་རུ་ཞུགས། དགོང་ཟས་སུ་བདེ་ཆེན་ལགས་ཀྱི་ཨ་མས་བཞག་པའི་ངོས་ཀྱི་ཟ་མ་དགའ་ཤོས་རྗེ་བཙུན་མི་ལའི་ཞལ་ལག་ཟྭ་སྐམ་པོ་ཞིག་ཡོད་པ་དེ་བཙོས་ནས་ཕིང་དང་ཤ་བཅས་མཉམ་བསྲེས་ཀྱིས་དགོང་ཟས་ཞིག་བཟོས། པདྨ་ནས་རྩམ་པ་རྫིས་སོང་བས་ཟྭ་ཐུག་དེ་དང་མཉམ་དུ་སྦག་ནས་ཟོས། བདེ་ཆེན་དང་པདྨ་གཉིས་ཟ་མ་དེར་ཧ་ཅང་དགའ་བོ་བྱས་སོང་། ཁོ་རང་གཉིས་ནས་ངོས་ལ་ཁྱོད་རང་ལག་བཅུད་ཆེ་བའི་མ་བྱན་རེད་འདུག་ཅེས་ཞལ་ཤོབ་དང་སྦྲག་ནས་གསུངས་སོང། དེ་ནས་ཟིན་བྲིས་གཏང་ཚར་ནས་ཉལ་སར་སོང་ནས་གཉིད་དུ་ཡུར་། 

2 comments:

  1. ཟ་ཚོས་ཞིམ་པོ་དེ་འདྲ་ཟ་རྒྱུ་བྱུང་ན་ངོས་ཀྱང་རྗེ་བཙུན་མི་ལ་བཞིན་ལོ་མང་སྒོམ་བརྒྱབ་ཐུབ་།

    ReplyDelete
  2. ཡ་ཆོས་གྲོགས་པདྨ་ལགས། ཟྭ་ཐུག་ཞིམ་པོ་ཁ་ལ་རེག་པ་ཙམ་གྱིས་སྒོམ་རྒྱག་ཐུབ་ན་དེ་ནི་ལས་སླ་བོ་ཞིག་མ་རེད་པས།

    ReplyDelete