Wednesday, December 7, 2011

ཨོ་གཤང་ནས་ལྷྭམ་གོག་སྤྲད་པའི་ཉིན་མོ།

ཨོ་ཤང་ནས་སྤྲད་པའི་ལྷྭམ་གོག་དང་ཁ་སྤུ་གཞར་བྱེད།
ཞོག་པ་ཆུ་ཚོད་བདུན་པའི་སྐབས་སུ་ལངས་ནས་ཞོག་འདོན་རྣམས་ཚར་བར་བྱས། ཐབ་ཚང་ནང་དུ་སོང་ནས་ཞོག་ཟས་སྟབས་བདེ་ཞིག་ཟོས་ནས་གཟུགས་པོ་སྦྱོང་བརྡར་ཆུ་ཚོད་གཅིག་ཙམ་བྱས་ནས་རིན་ཆེན་གཏེར་མཛོད་ནང་ཐུགས་སྒྲུབས་བར་ཆད་ལམ་སེལ་གྱི་འགྲེལ་བཤད་ལ་དཔེ་མཇལ་བྱས། ཉིན་གུང་ཆུ་ཚོད་དང་པོའི་སྐབས་སུ་སུ་སིན་ལ་ཁ་པར་གཏང་བས་མོ་རང་གློ་བུར་དུ་སླེབས་བྱུང་བས་མོ་རི་ནའི་རྒྱ་མཚོའི་འགྲམ་དུ་འཆམ་འཆམ་ལ་ཁྱུགས་ཙམ་སོང་བས་གློ་ཁུག་ནང་གི་ཁ་པར་གྱི་ཏིར་སྒྲ་དེ་ནི་ཨ་ཧྥི་རི་ཀ་ནས་ཡིན་པའི་ངོས་ཀྱི་དགེ་ཕྲུག་ཨོ་གཤང་རེད་འདུག ཁོང་ནས་ངོས་ལ་འཕྲད་དགོས་ཡོད་ཟེར་བས་ངེད་གཉིས་ཤར་རྒྱགས་ཁོ་རང་གི་ནང་ལ་སོང་བས་ཁོ་རང་ནས་སྤྲད་ཆོག་ཆོག་བྱས་ནས་སྒམ་ཞིག་ཟུར་ལ་ཡོད་པ་དེ་བླངས་ནས་སྤུས་མོ་ཐང་དུ་བཙུགས་ནས་གུས་ཞབས་དང་བཅས་པས་སྤྲད་བྱུང་། ལམ་སང་ཁ་འབྱེད་དུས་ཀོ་ལྷྭམ་དམར་པོ་སྤུས་གཙང་ཞིག་དང་། ཁ་སྤུ་གཞར་བྱས་ཞིག་བཅས་འདུག་ཁ་སྤུ་གཞར་བྱས་དེ་ནི་ང་ལ་མེད་དུ་མི་རུང་བའི་ཅ་ལག་ཞིག་ཡིན། ངས་ནི་ཁོང་ལ་དེ་འདྲའི་ཅ་ལག་མང་པོ་ག་རེ་བྱས་ནས་ཉོས་པ་ཡིན་ང་ལ་ཧ་ཅང་ལྷྭམ་མང་པོ་ཡོད་ཞེས་བཤད་དུས། ཁོང་རང་ནི་ནམ་རྒྱུན་ང་ཚོའི་རྩེད་མོ་ཟེར་ས་ཡིན་པ་མ་ཟད་ཧ་ཅང་ཁ་བདེ་བོ་ཞིག་ཡིན་སྟབས་ལམ་སང་འདི་ང་ཡི་དགེ་རྒན་གྱི་རྐང་པ་ལ་ལྷྭམ་གྱི་མཆོད་པ་ཕུལ་བ་ཡིན། ཁྱོད་རང་ལ་ལྷྭམ་མང་པོ་ཡོད་པ་ངས་ཤེས་ཀྱི་ཡོད་ཡིན་ནའང་སང་ཉིན་ནས་བཟུང་སྟེ་ངོས་ཀྱི་ལྷྭམ་དེ་གྱོན་དགོས་ཞེས་ཁ་ཤོབ་ཀྱི་ཚུལ་དུ་བཤད་བྱུང་། ངས་ཀྱང་ཐུགས་རྗེ་ཟེར་བ་དང་ཆབས་གཅིག་ཏུ་ཤར་རྒྱག་མོ་རིའི་ཎའི་རྒྱ་མཚོའི་འགྲམ་དུ་སྤྲོ་སེང་ལ་སོང་། ཉིན་མོ་འདི་ནི་གཟའ་ལྷག་པ་ཡིན་སྟབས་མི་རྣམས་ཕལ་ཆེར་ལས་ཀའི་བྲེལ་ཟིང་གིས་རྒྱ་མཚོའི་འགྲམ་དུ་མི་ཐལ་ཐོལ་ལས་མཐོང་རྒྱུ་མི་འདུག་ཀྱང་། སུ་སིན་ངེད་གཉིས་རྒྱ་མཚོའི་འགྲམ་གྱི་ཕ་བོང་གི་ཐོག་ཏུ་སྒོམ་བརྒྱབ་ནས་ཆུ་ཚོད་ཕྱེད་ཀ་ཙམ་ལ་བསྡད་པས་རྒྱབ་ལོགས་ནས་རྒྱ་མཚོའི་རྦ་རླབས་ཀྱི་ཤག་སྒྲ་དེས་སེམས་ལ་ཚོར་བ་མ་འདྲ་བ་ཞིག་འདུག དེ་ནས་ཀོ་རི་ཡའི་ཚོང་ཁང་ཞིག་ནང་སོང་ནས་རྒྱ་ལུགས་ལྟར་དུ་བཟོས་པའི་མོག་མོག་ཤོག་སྒམ་གཉིས་ཉོས་ནས་ནང་དུ་སླེབས་སུ་སིན་ནས་ཐུག་པ་ཞིམ་པོ་ཞིག་བསྐོལ་བྱུང་བས་དེ་འཐུང་བཞིན་པའི་སྐབས་སུ་ཀིམ་ཡང་སླེབས་བྱུང་མོ་རང་ནས་ཀྱང་ཞིམ་ཞིམ་ལྟར་དུ་ཐུག་པ་དེ་འཐུང་བྱུང་། དེ་ནས་གློ་ཁུག་ནང་ནས་ཡང་སྐྱར་ཁ་པར་གྱི་ཏིར་སྒྲ་ཞིག་ཡོད་པ་དེ་ནི་ཉི་ཡོག་ལ་ཡོད་པའི་བུ་མོ་སྐལ་བཟང་རེད་འདུག མོ་རང་ནི་རྒྱ་གར་ལྷོ་ཕྱོགས་བེ་ལུ་ཀོ་པའི་གཞིས་ཆགས་ནས་ཡིན་པའི་སྐྱེ་དམན་ཡ་རབ་ཞིག་རེད། མོ་རང་གི་གསུངས་པ་ལྟར་དུ་བྱས་ན་ཨ་རིའི་ཤོག་གུ་མ་འགྲིག་ནས་ཁྲིམས་ཁང་ནང་དུ་ཡོད་སྟབས་དེ་ལ་མོ་རྒྱག་རོགས་ཞེས་ཟེར། མོ་སང་ཉིན་ཞོག་པ་བརྒྱབ་ན་ཡག་ཚུལ་དང་འབྲེལ་སེམས་གསོ་སོགས་སྐད་ཆ་ཉུང་ཙམ་བྱས་ནས་ཐོག་ཁར་སོང་ནས་ཟིན་བྲིས་ཀྱི་ལས་ལ་ཞུགས་ནས་ཉར་སར་སོང་ནས་གཉིད་དུ་ཡུར། 

3 comments:

  1. མཁན་རིན་པོ་ཆེ་ལགས། ཉིད་ཀྱི་ཉིན་ཐོ་དག་སྙན་མོ་བྱུང་། ཡིག་ནོར་རེ་ཟུང་འདུག་ཀྱང་དེ་ཙམ་གནད་འགག་ཅན་དེ་འདྲ་མ་རེད། མུ་མཐུད་དེ་འབྲི་རོགས། ཀླུ་སྨྱོན་ནས།

    ReplyDelete
  2. ལང་ནས། ལངས་ནས།
    ཞོག་ཟས། ཞོགས་ཟས།
    མོ་རང་གསུང་། མོ་རང་གིས་གསུངས།
    ཁོ་རང་ནང་ལ། ཁོ་རང་གི་ནང་ལ།
    སྒོམ་རྒྱབ། སྒོམ་བརྒྱབ།
    མོ་རྒྱག་རོག མོ་རྒྱག་རོགས།
    ཐུག་པ་ཞིམ་པོ་བཀོལ། བསྐོལ།
    འཆམས་འཆམས། འཆམ་འཆམ།

    ReplyDelete
  3. གསེར་སྲང་སྟོང་གིས་མི་སྒྲུན་པའི་ངོས་ཀྱི་ཡིག་ནོར་གྱི་ལེགས་བཅོས་འདི་ལ་སྙིང་ཐག་པ་ནས་ཐུགས་རྗེ་ཆེ་ཞུ།

    ReplyDelete