Saturday, October 13, 2012

བདེན་པའི་མེ་ལྕེའི་སྐོར་བསྐྱོད་འབྱོར་བའི་ཉིན་མོ།

བདེན་པའི་མེ་ལྕེའི་སྐོར་བསྐྱོད་བྱེད་བཞིན་པ།
ཞོགས་པ་ལང་ནས་ཁ་འདོན་རྣམས་གྲུབ་པ་དང་མཉམ་དུ་ཆུ་ཚོད་བཅུ་གཅིག་སྐབས་སུ་དབུས་བོད་མི་མང་སྤྱི་འཐུས་ནས་ལས་འགུལ་སྤེལ་བའ་"བདེན་པའི་མེ་ལྕེའི་སྐོར་བསྐྱོད་" ཞེས་པའི་ལས་འགུལ་འདི་བོད་རིགས་ཡོད་སའི་ས་གནས་འཛམ་བུ་གླིང་གི་རྒྱལ་ཁབ་མང་པོ་ཞིག་ནང་དུ་ལས་འགུལ་སྤེལ་བ་རེད། དེ་རིང་འདིར་འབྱོར་བའི་བདེན་པའི་མེ་ལྕེ་ཉིད་ཀྱང་ཨ་རི་ནས་བསྐོར་བསྐྱོད་བྱས་ནས་དེ་རིང་འདིར་འབྱོར་བ་ཞིག་རེད་འདུག ཤེས་རབ་སྐལ་ལྡན་ནང་མི་རྣམས་དང་ལྷན་ངོས་ཀྱང་ས་གནས་འདིར་གཏན་བསྡོད་མིན་ཀྱང་བོད་མི་ཞིག་ཡིན་པའི་ཆ་ནས་དྭངས་བླངས་ཀྱིས་མཉམ་དུ་སོང་། ངོས་ནས་བསམ་ན་དེ་རིང་གཟའ་སྤེན་པའི་གུང་སང་ཡིན་པ་དང་མ་ཟད་ལས་འགུལ་འདི་ཉིད་དབུས་བོད་མི་མང་སྤྱི་འཐུས་ནས་སྤེལ་བའི་ལས་འགུལ་གལ་ཆེན་ཞིག་ཡིན་སྟབས་མི་མང་ཙམ་འཛོམས་རྒྱུ་རེད་བསམ་བྱུང་ཡང་ལས་འགུལ་སྤེལ་སའི་ས་གནས་སུ་འབྱོར་བའི་སྐབས་སུ་ཚོད་དཔག་བྱས་ན་ཕལ་ཆེར་བོད་མི་ལྔ་བཅུ་དྲུག་བཅུ་ཙམ་ཞིག་ལས་མི་འདུག ངོས་ནས་བསམ་བློ་ཞིག་འཁོར་བྱུང་བོད་པ་རྣམས་ཀྱིས་ལོ་མང་རིང་ནུས་མེད་ཀྱི་ལས་འགུལ་ཆུང་ཙག་རིགས་སྤེལ་རྒྱུ་མང་དྲག་ནས་མི་མང་རྣམས་སུན་ནས་ལས་འགུལ་སྐབས་སུ་ལ་རྒྱབ་སྐྱོར་མེད་པ་ལས་ཡེ་ནས་སེམས་ཤུགས་མེད་པ་གཏན་ནས་མ་རེད་སྙམ་པ་བྱུང་། ད་ནི་ལས་འགུལ་ཆུང་ཙག་དུས་ཚོད་འཕྲོག་རླག་རིགས་འདི་རྣམས་མ་ཡིན་པར་འཛམ་གླིང་ས་གནས་གང་དུ་གནས་པའི་བོད་རིགས་ཡོངས་ནས་ཉིས་སྟོང་བརྒྱད་ལོའི་ནང་བཞིན་ཉིན་གཅིག་དུས་གཅིག་ལ་ལས་འགུལ་གཞི་རྒྱ་ཆེ་བ་ཞིག་སྤེལ་ཐུབ་ན་བསམ་པའི་ཡིད་སྨོན་ཙམ་བྱུང་། དེ་ནས་ལས་འགུལ་འགོ་འཛུགས་སྐབས་སུ་ས་གནས་འདིའི་བོད་པའི་རྒྱུན་ལས་སྐྱེ་དམན་ཞིག་ནས་དབྱིན་བོད་གཉིས་ཀྱི་ཐོག་ནས་དེ་རིང་གི་ལས་འགུལ་དེའི་སྐོར་གསལ་བསྒྲགས་གྲུབ་མཚམས་ས་གནས་སོ་སོའི་ལས་བྱེད་དང་སྐུ་གྲོན་རྣམས་ཀྱིས་གཏམ་བཤད་རྣམས་ཡོངས་སུ་གྲུབ་ནས་ཆོས་དགེ་བརྩོན་འགྲུས་ཀུན་དགའ་ནས་ཞལ་འདོན་འགོ་འཛུགས་བྱས་སོང་། དེ་ནས་ས་གནས་འདིའི་གཞོན་ནུའི་ཚོགས་གཙོ་དེའི་ང་ལ་བདེན་པའི་མེ་ལྕེ་ཁུར་དགོས་པའི་བརྡ་གཏང་བྱུང་། བདེན་པའི་མེ་ལྕེ་ཁུར་ནས་མི་མང་རྣམས་བང་བསྒྲིགས་ནས་ངག་ནས་བྱང་ཆུབ་སེམས་མཆོག་མ་འདོན་བཞིན་སྲང་ལམ་ནང་དུ་སྐོར་བསྐྱོད་ཆུ་ཚོད་གཅིག་ཙམ་བྱས་བྱུང་། ངོས་ལ་དེ་རིང་མ་བབས་བུ་མོའི་ལང་གཅིན་ཞེས་པའི་དཔེ་ལྟར་མི་མང་ལ་སྐད་ཆ་བཤད་དགོས་པའི་བསྐུལ་མ་གནང་བ་ནང་བཞིན་ཁམས་སྐད་དང་དབུས་སྐད་གང་ལ་ཡང་མི་ཐེ་བའི་རྒྱ་གར་ལ་ཡུན་རིང་བསྡད་པའི་ཆོལ་གསུམ་ཡུལ་སྐད་འདྲེས་མ་ར་མ་ལུག་ནང་བཞིན་དེ་རྒབ་ནས་གོ་མ་བརྡ་ཡིས་སྐད་ཆ་ཚིག་ཁ་ཤས་ཞིག་བཤད། དེ་ནས་བདེན་ཚིག་སྨོན་ལམ་དང་མི་མང་ལང་གླུ་སོགས་ཀྱིས་དེ་རིང་གི་ལས་འགུལ་དེ་མཇུག་ཡོངས་སུ་གྲུབ་པར་བྱས་ནས་ཆོས་གྲོགས་པདྨ་ཆོས་འཕེལ་དང་ཤེས་རབ་ནང་མི་བཅས་ཀྱི་ལྷན་ཇ་ཞིག་འཐུང་ནས་སྔ་ནས་ཡིད་ལ་གནག་པའི་ལག་ཁྱེར་རྩིས་འཁོར་རམ་ipad ཞིག་ཉོ་ལ་སོང་ནས་རང་གི་འདོད་པ་ལྟར་དུ་ལག་ཁྱེར་རྩིས་འཁོར་དམར་སྨུག་ཀུ་ཤུའི་མདོག་ཅན་ཞིག་ལ་ཨ་སྒོར་ལྔ་བརྒྱ་ལྷག་ཕངས་མེད་དུ་སྤྲད་ནས་ཉོས། ཤེས་རབ་ནང་དུ་འབྱོར་ནས་དགོང་ཟས་སུ་ཟྭ་ཐུག་ཞིག་འཐུང་ཞིང་དེ་རིང་གི་ཉིན་ཐོ་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།

No comments:

Post a Comment