༧གོང་ས་སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་ཕུལ་བའི་ཉིན་མོ།

ཁ་སང་ཆོས་གྲོགས་པདྨ་ཆོས་འཕེལ་གྱི་འདོད་པ་ལྟར་ཁོ་རང་གི་ནང་དུ་སོང་། དགོང་ཟས་སུ་ཞལ་ལག་གྲ་རྒྱས་པོ་ཞིག་ཁོ་རང་གི་ནང་མི་མཉམ་དུ་རོལ། ད་ནང་ཞོགས་པ་རྨི་ལམ་དུ་༧གོང་ས་སྐྱབས་མགོན་ཆེན་པོ་མཆོག་ནས་གཟན་ཤམས་དམར་སེར་འོད་འཚེར་བ་ཞིག་བརྣབས་ནས་རི་མགོ་ཞིག་ནས་མཇལ་བ་རྨིས་བྱུང་བ་མ་ཟད་ས་ཆ་རྒྱུས་མེད་མང་པོ་ཞིག་ལ་གནས་སྐོར་ལ་འདྲ་བྱས་ནས་ངེད་གཉིས་གཅིག་པོ་མཉམ་དུ་སོང་བ་རྨིས་བྱུང་། ང་ལ་ཐུགས་མཉེས་པོ་གནང་བ་དང་དགོན་པ་འདྲ་ཞིག་ནང་དུ་ཁྲིད་ནས་ཁྱེད་རང་དེར་བསྡད་དགོས་ཞེས་བཀའ་གནང་བྱུང་། དགོན་པ་དེ་ནི་ཕྱོགས་གཅིག་ནས་བལྟ་དུས་རྙིང་དགོན་རྣམ་གྲོལ་གླིང་འདྲ་བོ་དང་། དྲན་སྣང་གཅིག་ལ་ཐེའུ་ལན་ཌའི་ནང་གི་དགོན་པ་ཞིག་འདྲ་རེད་འདུག གང་ལྟར་གཉིད་སད་པའི་སྐབས་སུ་སེམས་ལ་ཧ་ཅང་སྐྱིད་པོ་འདྲ་ཞིག་བྱུང་འདུག པདྨ་ཆོས་འཕེལ་ཕ་མ་དང་བདེ་ཆེན་བཅས་ངེད་མི་བཞི་པོ་ཉ་མང་པོ་ཕྱོགས་གཅིག་ཏུ་ཡོད་སའི་མཚོ་ཁུག་ཞིག་ནང་དུ་ཉ་ལ་ཁ་ཟས་སྤྲད་ལ་སོང་། ས་ཆ་དེར་ཡོད་པའི་ཟམ་པ་ཞིག་ཡོད་པ་དེ་ཡི་མིང་ལ་ལྷ་ཡི་ཟམ་པ་ཞེས་དབྱིན་ཡིག་ཏུ་བྲིས་འདུག་ཉིན་གུང་ཟ་མ་ཚར་དུས་རྫ་རི་རྡོག་རྡོག་ཞིག་ལ་རྐང་ལམ་ཕྲ་མོ་ཞིག་ཡོད་པ་དེར་ཞུགས་ནས་རི་མགོར་སོང་བས་ས་མཐོ་རི་གཙང་མཐོང་རྒྱ་ཆེ་བ་སོགས་ཀྱི་རྐྱེན་ཧ་ཅང་སྐྱིད་པོ་བྱུང་། དགོང་མོ་ཆུ་ཚོད་དྲུག་པའི་སྐབས་བོད་ཁང་དུ་དེ་རིང་༧གོང་ས་སྐྱབས་མགོན་ཆེན་པོ་མཆོག་ལ་ཨ་རི་གཞུང་ནས་གསེར་གྱི་གཟེངས་རྟགས་དང་། ལྷག་དཀར་ཉིན་མོ་བཅས་མཉམ་དུ་ཁེལ་བས་དེར་སོང་ནས་སྔ་ནས་མཛད་འཆར་ལྟར་བོད་རིགས་ བདུན་བཅུ་ཙམ་ལ་བློ་སྦྱོང་ཚིག་བརྒྱད་མའི་འགྲེལ་བཤད་མདོར་བསྡུས་ཞིག་བྱས་ནས་ ཤེས་རབ་སྐལ་ལྡན་ནང་དུ་འབྱོར་ནས་དེ་རིང་གི་ཉིན་ཐོ་མ་ཆད་ཙམ་ཞིག་གཏང་ནས་ཉལ་སར་སོང་ནས་གཉིད་དུ་ཡུར།