གཟའ་སྤེན་པའི་བདེ་ཆེན་ཞིང་སྒྲུབས།

ཞིང་སྒྲུབ་ཚར་བའི་སྐབས་སུ་འཇའ་གུར་ཕུབ་པའི་ཟུར་པར་ཞིག

ཉིན་མོ་འདི་ནི་ནུབ་བྱང་བོད་རིགས་ཚོགས་པའི་བོད་པ་རྣམས་ལ་ཆེད་དུ་གྲ་བསྒྲིགས་བྱས་པའི་གཟའ་སྤེན་པ་དང་ཉིན་མའི་གུང་སང་སྐབས་ཀྱི་བདེ་ཆེན་ཞིང་སྒྲུབས་དེ་ཡིན། ཞོགས་པ་ཆུ་ཚོད་དྲུག་པའི་སྐབས་སུ་བོད་ཁང་དུ་སོང་ནས་བསྙེན་གནས་ཡན་ལག་བརྒྱད་པའི་གསོ་སྦྱོང་གི་སྡོམ་པ་རྣམས་ཞུས་གནང་སྤྱི་ལྟར་དུ་གྲུབ་ནས་འདོན་སྒོམ་ཁྲིད་གསུམ་སྦྲག་མ་དང་གནམ་ཆོས་འོད་ཆོག་ཉིད་བཏོན་ནས་བར་མཚམས་རྣམས་སུ་བདེ་བ་ཅན་དུ་སྐྱེ་བའི་རྒྱུ་བཞིའི་འགྲེལ་བཤད་བཅས་བྱས་ནས་ཉིན་གཅིག་ལ་ཆོ་ག་ཚར་གཉིས་གྲུབ་པར་བྱས། དགོང་མོ་ཆུ་ཚོད་ལྔ་པའི་སྐབས་སུ་ཆོས་མཚམས་གྲུབ་པར་བྱས་པས་དེ་རིང་གི་ཆོས་བཤད་དེར་མི་མང་ཧ་ཅང་ནས་ཀྱང་དགའ་བོ་བྱུང་སོང་། 
དེ་ནས་ཆོས་མཚམས་གྲུབ་པ་དང་ལྷན་དུ་ཕྱི་ལོགས་སུ་ཡོང་བས་མི་རྣམས་ནས་ནམ་མཁར་བལྟ་ནས་སྐད་ཅོར་རྒྱག་བཞིན་འདུག དེ་ནི་ནམ་མཁར་འཇའ་གུར་ཕུབ་ཡོད་པ་དེ་རེད་འདུག འཇའ་དེ་ཉིད་ཀྱང་བདེ་ཆེན་ཞིང་སྒྲུབ་འཚོགས་ཁང་གི་སྟེང་ནས་ཕལ་ཆེར་བླ་རེ་བྲེས་པ་ནང་བཞིན་འཇའ་ཧ་ཅང་གསལ་པོ་ཕྱི་ནང་གཉིས་ཤར་འདུག་པས་ང་ཚོ་མི་ཁ་ཤས་ཞིག་འཇའ་གུར་ལ་རྒྱབ་གཏད་ནས་པར་བླངས་པ་སོགས་བྱས་པ་ཡིན། དེ་ནས་རླངས་འཁོར་དུ་ཞུགས་ནས་ཤེས་རབ་སྐལ་ལྡན་ནང་དུ་འབྱོར་ནས་དགོང་ཟས་ཞིག་ཟོས་ནས་དེ་རིང་གི་ཉིན་ཐོ་མདོར་བསྡུས་ཞིག་གཏང་ནས་ཉལ་སར་སོང་ནས་གཉིད་དུ་ཡུར།