Tuesday, December 31, 2013

སྤྱི་ལོའི་ལོ་གསར་དགུང་མོ།

དོ་ནུབ་ཀྱི་དགོང་མོ་འདི་ནི་ཕྱི་ལུགས་ལྟར་དུ་2013 ལོའི་ནང་ལོ་གཅིག་དང་། ཟླ་བ་བཅུ་གཉིས། ཞག་སུམ་བརྒྱ་དྲུག་བཅུའི་ཐ་མའི་ཉིན་མོ་དང་། སང་ཉིན་ཞོགས་པ་2014 ལོའི་གསར་ལོ་ཚུར་ལ་འཆར་བའི་ཉིན་མོ་ལོ་གཉིས་ཀྱི་བར་ཉིན་མོ་འདིར་ངོས་ཀྱི་དགེ་ཕྲུག་འགའ་དང་སློབ་མའི་གུང་སང་སྐབས་སུ་ཆེད་དུ་སླེབས་པའི་ངོས་ཀྱི་ཚ་མོ་ཆུང་བ་བདེ་ཆེན་བཅས་ང་ཚོ་མཉམ་དུ་ཕྱི་ལུགས་ལྟར་དུ་དགོང་མོའི་ཟ་མ་མཉམ་བཟའ་བྱས་པ་མ་ཚད་ཁང་སྦུགས་སུ་མེ་གཏངས་ནས་རྐང་སྐྱོང་ལག་རྒྱངས་ཀྱིས་ཕན་ཚུན་དྲན་ཚད་ཀྱི་ཁ་བརྡ་ལ་རོལ་ནས་དགོང་མོ་ཆུ་ཚོད་བཅུ་གཉིས་མ་ཟིན་ཙམ་དུ་བསྡད་པས་ཚང་མ་དགའ་བོ་བྱུང་སོང་། སྤྱིར་གཏང་བོད་ལུགས་ཀྱི་ལོ་གསར་དང་ཕྱི་ལུགས་ཀྱི་ལོ་གསར་གཉིས་ལུགས་སྲོལ་སོགས་མི་འདྲ་བ་མང་པོ་འདུག བོད་ལུགས་ཀྱི་ལོ་གསར་ལྟར་དུ་བྱས་ན་དེ་རིང་གི་ཉིན་མོ་འདི་ནི་ངོས་ཀྱི་ནང་ཆེན་བའི་གཏམ་དཔེར། མི་ཡི་གནམ་སྟོང་དེ་ཁྱི་ཡི་ཚེས་པ་གཅིག་ཞེས་དེ་རིང་ནི་ཁྱི་ཡི་ལོ་གསར་ཟེར་ནས་ཁྱི་རྣམས་ལ་ཟས་ལྷག་མ་སྟེར་བའི་དུས་ཆེན་ཞིག་ཡིན། སང་ཉིན་ཞོགས་པ་ནས་བཟུང་སྟེ་མི་ཡི་ལོ་གསར་ངོ་མ་དེ་ཡིན།  གང་ལྟར་ལུང་པ་འདིར་སླེབས་དུས་ཡུལ་པའི་ལུགས་སྲོལ་ལ་གཙི་འཇོག་དགོས་པ་ནང་བཞིན་ཕྱི་ལོའི་ལོ་གསར་ལ་མཉམ་རོལ་བྱས། ལར་ནི་ངོས་ཀྱི་དགེ་ཕྲུག་མང་ཆེ་བས་ཕྱི་ལུགས་ཀྱི་ལོ་གསར་ལས་བོད་ཀྱི་ལོ་གསར་ལ་དོ་སྣང་ཆེ་བ་ཡོད། 

Friday, December 27, 2013

བདེ་ཆེན་དབྱངས་སྐྱིད་འབྱོར་བའི་ཉིན་མོ།

བདེ་ཆེན་དང་མཉམ་དུ་གནམ་ཐང་ནས།
འདི་ལོར་ཨ་རི་ལ་སློབ་སྦྱོང་ཆེད་དུ་འབྱོར་བའི་ངོས་ཀྱི་ཚ་མོ་ཆུང་བ་བདེ་ཆེན་དབྱངས་སྐྱིད་དགུན་ཁའི་གུང་སང་དང་བསྟུན་ནས་ང་ལ་ཐུག་འཕྲད་དུ་འབྱོར་སོང་།  ངོས་ཀྱི་དགེ་ཕྲུག་ཆོས་དབྱིངས་སྒྲོལ་མ་དང་ངེད་གཉིས་གནམ་ཐང་ལ་དགོང་མོ་ཆུ་ཚོད་བརྒྱད་པའི་སྐབས་སུ་སོང་བས་ཆུ་ཚོད་བཅུ་པ་ཏག་ཏག་སྐབས་སུ་བདེ་ཆེན་དབྱངས་སྐྱིད་གནམ་ཐང་སྒོ་ཆེན་འགྲམ་ནས་བུད་སོང་། 
ལུང་པ་འདིའི་ལུགས་སྲོལ་ལྟར་དུ་ངེད་ཚ་ཞང་གཉིས་ཕན་ཚུན་འཐམ་འཁྱུད་བྱས་ཤིང་ཁམས་འདྲི་དང་ཞོར་དུ་འདྲུད་སྒམ་དེ་ཁུར་མ་དྲུད་བྱས་ནས་སྒོ་ཆེན་ཕྱི་ལོགས་སུ་ཐོན།  རླངས་འཁོར་ནང་དུ་ཞུགས་ནས་རྒྱ་གར་ལྡི་ལིའི་མཐོ་སློབ་ནང་དུ་ཡོད་པའི་ངོས་ཀྱི་ཚ་མོ་ཆེ་བ་ཆོས་དབྱིངས་དབང་མོ་དང་མཉམ་དུ་སྐད་གཏོངས་ཆ་འཕྲིན་ནང་ནས་ངེད་ཚ་ཞང་གསུམ་ད་རེས་དངོས་སུ་ས་གནས་གཅིག་ཏུ་ལྷན་འཛོམས་མ་བྱུང་ཡང་སྐད་ཆ་བཤད་རེས་བྱེད་བཞིན་ནང་དུ་འབྱོར། 
ངོས་ཀྱི་ཚ་མོ་གཉིས་པོ་འདི་དང་ཉིའུ་ཡོག་ལ་ཡོད་པའི་ཚ་བོ་བཀྲ་ཤིས་རྡོ་རྗེ་འདི་གསུམ་པོ་ནི་ངོས་ཀྱི་སྤུན་ཆེ་བའི་ཕྲུག་གུ་རྣམས་རེད། ཁོང་གསུམ་ནི་ཉིས་སྟོང་གཅིག་ལོར་སྔ་ཕྱི་རིམ་བཞིན་རྒྱ་གར་དུ་འབྱོར་ནས་ཚ་མོ་འདི་གཉིས་བོད་གཞུང་སློབ་གྲར་དམའ་རིམ་སློབ་མ་ནས་བཟུང་སྟེ་ད་བར་འཛིན་རིམ་རྣམས་ཐོད་རྒལ་བྱས་ནས་སོང་བ་ལས་ཐེངས་གཅིག་ལའང་ཡིག་རྒྱུག་རྗེས་ལུས་ཐེབ་མྱོང་མེད། 
བོང་བུའི་རང་སྟུག་གསེར་རློམ་མིན་ཏེ་ངོས་ཀྱི་ཚ་བོ་ཚ་མོ་འདི་རྣམས་ནི་གཉོམ་ཆུང་ཡ་རབ་བཟང་སྤྱོད་དང་ལྡན་པ་ཤ་སྟག་ལས་མ་རབ་ཐ་ཤལ་གཏན་ནས་མེད།  ལྷག་པར་དུ་བདེ་ཆེན་དབྱངས་སྐྱིད་འདི་ནི་རང་སྟོབས་ཀྱིས་འབུ་ནག་གྱང་ནས་འཛེག་པ་ནང་བཞིན་བོད་གཞུང་སློབ་མའི་ནང་ནས་རྒྱུགས་འབྲས་རྩེ་ཕུད་ཀྱི་བྱ་དགའ་མང་པོ་བླངས་ནས་ལོ་གསུམ་གོང་ནས་བོད་གཞུང་ནས་དབྱིན་ལན་ལ་སློབ་སྦྱོང་ལ་གཏངས་ཞིང་ལོ་གཉིས་རིང་སློབ་སྦྱོང་བྱས། འདི་ལོར་ཨ་རིའི་མཐོ་རིམ་སློབ་གྲ་ཞིག་ནང་ལོ་བཞིར་སློབ་སྦྱོང་བྱེད་རྒྱུའི་གོ་སྐབས་ཐོབ་དེ་རིང་དགུན་ཁའི་གུང་སང་དང་བསྟུན་ནས་ང་སར་ཡོང་བ་ཐེངས་མ་དང་པོ་ཡིན།  ངས་ཀྱང་ད་རེས་ཚ་མོ་ཐེངས་མ་དང་པོར་འདིར་ཡོང་བའི་སྐབས་སུ་རང་འཁོས་འཇོན་ཚོད་སྣེ་ལེན་གང་དྲག་དང་། ས་ཆ་གང་སར་སྤྲོ་བསང་ལ་ཁྲིད་པའི་གྲ་བསྒྲིགས་ཨང་སར་ཡོད། 

ཨེ་ཤ་ཡའི་རླུང་འཕྲིན་ཁང་ལ་སྐད་ཆ་བྱས་པའི་ཉིན་མོ།

ད་ནང་ཞོགས་པ་ཆུ་ཚོད་བརྒྱད་པའི་སྐབས་སུ་མགོ་སྔས་ཟུར་ནས་ཁ་པར་གྱི་ཐིར་སྒྲ་ཞིག་ཡོད་པ་དེ་ནི་ཁ་སང་དུས་ཆད་བྱས་པའི་ཨེ་ཤ་ཡའི་རླུང་འཕྲིན་ཁང་ཁམས་སྐད་སྡེ་ཚནནས་རྒན་ཚེ་དབང་ནོར་བུ་ལགས་རེད་འདུག  དེ་ནི་ཉེ་བའི་ཆར་ངོས་ཀྱི་ཕ་དགོན་ནང་ནས་མཁན་པོ་ཀར་ཚེ་རྒྱ་ནག་གཞུང་ནས་འཛིན་བཟུང་བྱས་པའི་སྐོར་སྐད་ཆ་བཤད་རྒྱུ་དེ་རེད། ཁོང་ནས་ཟེར་ན་སྐར་མ་དགུ་གཅིག་པུ་ཡོད་པས་ཚིག་ཉུང་ལ་དོན་འདུས་པ། སྒྲ་དག་ལ་སྒྲོས་གཙང་བ་ཞིག་དགོས་ཟེར། ངས་ཀྱང་དེ་བཞིན་ཁས་བླངས་ནས་མཁན་པོ་འཇུ་བཟུང་བྱེད་དགོས་དོན་ཇི་ཡིན་དང་། ད་ལྟའི་དགོན་པའི་གནས་སྟངས་སོགས་སྐར་མ་དགུ་ཡི་ནང་ནས་ཚར་བར་བྱས་ནས་བཤད། 

Tuesday, December 24, 2013

ཡེ་ཤུའི་འཁྲུངས་སྐར་ཉིན་མོ།

ཡེ་ཤུའི་འཁྲུངས་སྐར་ལ་ཤིས་ཤོག
ཉིན་མོ་འདི་ནི་ཡེ་ཤུའི་སྟོན་པ་མ་ཤི་ཀ་སྐུ་འཁྲུངས་པའི་དུས་ཚེས་ཁྱད་པར་ཅན་ཞིག་ཡིན་སྟབས་སྔ་ནས་དུས་ཆད་བྱས་པ་ནང་བཞིན་བོད་པའི་བུ་མོ་རྡོ་རྗེ་སྒྲོལ་མ་ཞེས་འདུག་རོགས་དབྱིན་ཇི་ཡིན་པའི་མི་ཚང་ཞིག་ནང་དུ་ཉིན་གུང་ཟ་མ་ལ་ངོས་ཀྱི་རླངས་འཁོར་ཁ་ལོ་བ་ཨ་མ་སུས་སིན་ངེད་གཉིས་མཉམ་དུ་སོང་།   ཁོ་རང་གཉིས་ནས་བོད་ཟས་དང་ཨ་རིའི་ཟ་མ་སོགས་ཟས་རིགས་མང་པོ་ཞིག་བཟོས་ནས་སྒུག་འདུག  ངེད་གཉིས་ནས་ཀྱང་ལམ་བར་ཚོང་ཁང་ནང་ནས་ཉོས་པའི་མེ་ཏོག་དང་ཤིས་ཤོག་བཅས་ལག་རྟགས་སུ་ཕུལ།  ཁ་བརྡ་བྱེད་བཞིན་ཉིན་གུང་ཟ་མ་ལ་མཉམ་དུ་རོལ། 
ལར་ནི་ངོས་ཀྱི་དགེ་ཕྲུག་མང་ཆེ་བས་ཡེ་ཤུའི་འཁྲུངས་སྐར་དུས་ཆེན་དང་དབྱིན་ཇིའི་ལོ་གསར་ལས་༧གོང་ས་སྐྱབས་མགོན་ཆེན་པོའི་འཁྲུངས་སྐར་དང་བོད་ཀྱི་ལོ་གསར་ལ་དགའ་བོ་བྱེད་ཀྱི་ཡོད།  དེ་ནས་དགོང་མོ་ཆུ་ཚོད་ལྔ་པའི་སྐབས་སུ་ནང་དུ་འབྱོར་བས་དགེ་ཕྲུག་ལིན་ཌེའི་དང་གཞན་ཁག་ཅིག་ནས་དགོང་ཟས་གྲ་རྒྱས་པོ་ཞིག་བཟོས་ནས་སྒུགས་འདུག་ཀྱང་དེ་རིང་ནི་སྤྲང་པོའི་སློང་ཟས་ཉིན་གཅིག་གི་དཔེ་ལྟར་བཟའ་རྒྱུ་མང་དྲགས་པས་དགོང་ཟས་ཟ་སྙིང་ཆེར་མི་འདོད་ཀྱང་ཁོང་ཚོའི་ཟ་རོགས་ཀྱི་ཚུལ་དུ་དགོང་ཟས་ཉུང་ཙམ་ཟོས། གསར་དུ་ཉོས་པའི་ཀུ་ཤུ་རྟགས་ཅན་གྱི་རྩིས་འཁོར་ལག་ཁྱེར་དེ་སྒོ་ཕྱེས་ནས་འཛམ་གླིང་གི་སྒེའུ་ཁུང་ནས་རྒྱངས་ལྟ་ཞིག་བྱས་དུས་ཉེ་ཆར་ངོས་ཀྱི་ཕ་དགོན་ནང་ནས་མཁན་པོ་ཀར་ཚེ་འཇུ་བཟུངས་བྱས་པའི་རྗེས་སུ་ཁ་སང་ཡང་སྐྱར་དགོན་པའི་དགེ་བསྐོས་དང་། གཉེར་པ་སོགས་དགེ་འདུན་པ་གཙོ་ཆེ་གྲས་མི་བཅོ་ལྔ་ཙམ་འཛིན་བཟུང་བྱས་ནས་སྐྱེ་དགུ་མདོའི་བཀག་དོམ་ཁང་དུ་ཡོད་པའི་གནས་ཚུལ་འདུག  
ང་ལ་དེང་སང་སྡུག་གི་ཁུར་པོ་སྣོན་མ་ཞིག་པ་ཡོད་པ་དེ་ནི་མིས་སྨོན་རང་སྐྱིད་ལུང་རྟོགས་གཉིས་ཀྱི་ལྟེ་གནས་ངོས་ཀྱི་ཕ་དགོན་དེ་དང་དགོན་པ་དེ་ཉིད་ནས་དཀའ་བ་བརྒྱ་དང་ངལ་བ་སྟོང་ལ་མ་འཛེམས་པར་ནང་ཆེན་ལ་ལོ་ལྟར་རེ་ཞིག་འཛམ་གླིང་ཞི་བདེའི་སྨོན་ལམ་ཆེན་མོ་དེ་གཉིས་ལ་རྒྱ་ནག་གཞུང་ནས་སྡང་པོ་བྱེད་ས་དཔེར་ན་སོ་ནང་གི་སྲིན་བུ་མིག་ནང་གི་ལིང་ཐོག་ཞིག་ཏུ་གྱུར་ནས་ཡུན་རིང་སོང་ཡོད་སྟབས་གང་འདྲ་རེད་ཡོང་ན་བསམ་པའི་སེམས་ཁྲལ་དེ་ཡིན།  


Friday, December 20, 2013

ངོས་ཀྱི་ཕ་དགོན་ནང་གི་མཁན་པོ་འཇུ་བཟུང་།

ང་ཡི་དགོན་པའི་ནང་གི་མཁན་པོ་ཀར་ཚེ་ལགས།
ཉེ་བའི་ཆར་དྲ་ཚིག་དང་ངོ་དེབ་གསར་ལམ་ཁག་སོགས་ནས་གནས་ཚུལ་ཐོན་གསལ་ལྟར་དུ་བྱས་ན། ཁམས་ནང་ཆེན་ཇ་པ་དགོན་ནམ་དགོན་ཞབས་དགོན་པའི་མཁན་པོ་ཀར་ཚེ་སི་ཁྲོན་ཁྲི་འདུ་ནསའཛིན་བཟུང་བྱས་འདུག ཇ་པ་དགོན་ནི་ཀརྨ་པ་སྐུ་ཕྲེང་བདུན་པ་ཆོས་གྲགས་རྒྱ་མཚོའི་སློབ་མ་འཇང་གྲྭ་སངས་རྒྱས་དཔལ་བཟང་དང་།  བྱ་བཏང་ཐར་པ་རྒྱལ་མཚན་གཉིས་ནས་ཕྱག་བཏབས་པའི་སྟོད་ལུང་མཚུར་ཕུའི་དགོན་ལག་ཞིག་ཡིན། དགོན་པ་འདི་ནི་ངོས་ཀྱི་ཕ་དགོན་ངོ་མ་ཡིན་པ་མ་ཟད་ལྔ་བཅུ་ང་དགུའི་ལོའི་རྗེས་ནས་ཆོས་ལུགས་སླར་གསོའི་སྐབས་ང་དང་འདྲ་བ་བན་ཆུང་རྣམས་ཆོས་ཞུགས་བྱས་ནས་དགོན་པའི་ནང་གི་ལྷ་ཁང་དང་སོ་སོའི་གྲྭ་ཤག་བཅས་ས་གནས་མི་མང་དང་མཉམ་དུ་རང་འགུལ་གྱིས་གསར་གཞེངས་བྱས། དགོན་པ་འདིར་ཁྲི་ཐོབ་ཀྱི་བླ་སྤྲུལ་དགུ་ཙམ་ཡོད་པས་ཀུན་གྱིས་དགོན་ཞབས་བླ་དགུ་མ་ཞེས་འབོད་སྲོལ་ཡོད། རིག་གནས་གསར་རྗེའི་རྗེས་སུ་དགོན་པའི་ནང་དུ་བླ་མ་གཉིས་ཡོད་པ་ནི་གཙོ་བོ་བསྟན་པའི་བདག་པོ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་དང་། དཔལ་འབར་སྤྲུལ་སྐུ་གཉིས་ཡིན་སངས་རྒྱས་བསྟན་འཛིན་རིན་པོ་ཆེ་བཙོན་ཁང་ནང་དུ་མི་ལོ་ཉེར་གཉིས་རིང་བཞུགས་དགོས་བྱུང་ཡོད།  ཁོང་ནི་ཆོས་དང་སྲིད་གང་གི་ཆ་ནས་ཡིན་ཀྱང་ནང་ཆེན་བའི་སྡེ་དགོན་རྣམས་ལ་ཧ་ཅང་དཀའ་དྲིན་ཆེན་པོ་ཡིན་པ་མ་ཟད་རྒྱ་བོད་གང་ལ་འཕྲད་ཀྱང་འཛེམས་ཟོན་མེད་པར་ངོ་གདོང་གཏུགས་ནས་ཁ་ཐུག་སྐད་ཆ་བཤད་ཐུབ་མཁན་ཞིག་ཡིན། ༡༩༩༥ ལོར་གསེར་རྟ་མཁན་ཆེན་འཇིགས་མེད་ཕུན་ཚོགས་ནང་ཆེན་ལ་ཕེབས་པའི་སྐབས་སུ་ཞལ་དྲོན་མོའི་ནང་ནས་འདི་ལྟར་གསུངས་མྱོང་ཡོད།
 ནང་ཆེན་ལ་བུ་དཔའ་བོ་རྒྱབ་ཆད་གཅིག་རང་འདུག་དེ་ནི་བླ་རྒན་སངས་རྒྱས་བསྟན་འཛིན་ཟེར་བ་དེ་རེད།
སངས་རྒྱས་བསྟན་འཛིན་རིན་པོ་ཆེ་ནས་རྒྱ་མིའི་པན་ཆེན་རྫུན་བཟོའི་གཡོ་སྒྱུ་ལ་སྐྱེ་དགུ་མདོ་ནས་མི་མང་འཚོགས་འདུའི་སྐབས་སུ་ངོས་ལེན་གཏན་ནས་མེད་པའི་སྒྲགས་གཏམ་སྤེལ་བ་དང་རྒོལ་བྱེད་ཐུབ་མཁན་ཁོང་གཅིག་པུ་ཡིན། 
 དགོན་པ་འདིར་གྲྭ་བཞི་བརྒྱ་ལྷག་ཙམ་ཡོད་དགོན་པའི་འཚོགས་གྲྭ་དང་། ཟུར་དུ་བཤད་གྲ་དང་གཞན་སྒྲུབས་སྡེ་གཉིས་ཡོད། ༡༩༩༤ ལོར་དགོན་པའི་བཤད་གྲྭ་ཐོག་མ་གསར་འཛུགས་བྱས་ཤིང་སྐབས་དེ་དུས་རིན་པོ་ཆེའི་བཀའ་ལྟར་གནའ་དཔེར། བུ་མེད་དུས་བུ་མོའི་ཧོར་འདུག་བྱེད་ཅེས་པ་ལྟར་ངས་མཁན་པོའི་མིང་ཐོག་མར་ཁུར་དགོས་བྱུང་། ང་ནི་དགོན་པ་འདི་ཡི་མཁན་པོ་དང་པོ་དེ་ཡིན་ཅེས་བཤད་ཀྱང་མི་ཆོག་པ་མེད། ད་ལྟ་འཇུ་བཟུང་བྱས་པའི་མཁན་པོ་ཀར་ཚེ་འདི་ནི་དེ་ཡི་སྐབས་སུ་གྲྭ་ཆུང་རིག་པ་རྣོན་པོ་ཅན་ཞིག་ཡོད།
ང་མི་འདོད་བཞིན་དུ་དགོན་པ་ནས་ས་མཐར་འཁྱར་བའི་རྗེས་སུ་མཁན་པོ་ཀར་ཚེ་སོགས་དགོན་པའི་གྲྭ་ཆུང་འགའ་གསེར་རྟ་ཆོས་སྒར་ལ་ཕེབས་ནས་སློབ་སྦྱོང་བྱས་རིམ་ཁྲོད་མཁན་པོ་ཀར་ཚེ་འདི་དགོན་པའི་མཁན་པོ་གཉིས་པ་རུ་ཆགས། ཁོང་ནི་ལོ་བཅུ་གྲངས་ཞིག་ནང་ནས་དགོན་ཞབས་དགོན་པ་གཅིག་པུ་ཙམ་མ་ཡིན་པར་ནང་ཆེན་བའི་སྡེ་དགོན་ཚང་མས་གཙི་བཀུར་ཧ་ཅང་ཆེ་བ་མ་ཟད་ཕན་ཐོག་ཧ་ཅང་ཆེན་པོ་བྱུང་ཡོད་སྐད་འདུག ཁོང་ནི་བོད་མི་རིགས་ཀྱི་ལ་རྒྱ་དང་རིག་གཞུང་ལ་ཧ་ཅང་ཐུགས་ཁུར་གནང་མཁན་ཞིག་ཀྱང་ཡིན། ད་རེས་ཁོང་རྒྱ་ནག་གཞུང་ནས་འཛིན་བཟུང་བྱེད་དགོས་དོན་ནི་སྔ་ལོར་ཀརྨ་དགོན་པའི་ནང་དུ་མི་ཞིག་ནས་སྐུ་ལུས་མེར་བསྲེགས་གཏང་བ་དང་། དེ་རྗེས་དགོན་པའི་ཟུར་དུ་ཡོད་པའི་རྒྱ་མིའི་ལས་དོན་རུ་ཁག་གི་ཁང་པར་འབར་རྫས་གས་སྟོར་བྱུང་བ་མ་ཟད་དགོན་པའི་མཁན་པོ་གཉིས་རྒྱ་ནག་གཞུང་ནས་མ་ཉེས་ཁ་ཡོག་གིས་བཙོན་འཇུག་བྱས་པ་སོགས་ལ་འབྲེལ་བ་ཡོད་པར་བསྙད་ནས་མཁན་པོ་ཀར་ཚེ་དགོན་པའི་གཞུང་དོན་གྱི་སྐབས་སུ་སི་ཁྲོན་ཁྲི་འདུ་ལ་ཕེབས་པའི་སྐབས་མཚན་མོ་ཆུ་ཚོད་དང་པོའི་སྐབས་སུ་མགྲོན་ཁང་ནང་ནས་འཇུ་བཟུང་བྱས་ནས་ད་ལྟ་གར་ཡོད་ཤེས་མཁན་མི་འདུག 

སྐྱབས་གཅིག་འཁོར་ལོའི་མགོན་པོ།།
དྲིན་ཅན་བུདྡྷའི་མཚན་ཅན།།
ལྟོས་བཅས་སློབ་འབངས་བཞག་ནས།།
ཞིང་དུ་ཕེབས་སྔ་བྱས་སོང་།།

ཉམ་ཆུང་སྡེ་དགོན་རྣམས་དང་།།

ཁྱེད་ཀྱི་འཁོར་དང་འབངས་མི།།
ཉིན་མཚན་འཁྱོལ་བར་དཀའ་བའི།།
དུ་ཁ་འདི་ཉིད་སུས་བཟོད།།

རིག་གསར་ཁྲག་མཚོའི་རྦ་རླབས།།

སླར་ཡང་བོད་རིགས་རྣམས་ལ།།
ཉ་མོ་སྐམ་ལ་བཏོན་འདྲའི།།
སྡུག་བསྔལ་འདི་ལ་གཟིགས་སམ།།


Thursday, December 19, 2013

སོ་ཕུད་པའི་ཉིན་མོ།

སྨན་ཁང་ནས་སོ་བཀོག་བཞིན་པ།
ཉིན་མོ་འདི་ནི་སྔ་ནས་དུས་ཆད་བྱས་པ་ནང་བཞིན་སོ་ཡི་སྨན་ཁང་ནང་དུ་འགྲོ་དགོས་པ་དེ་ཡིན།  བདུན་ཕྲག་གཉིས་གོང་ནས་འགྲམ་ཕུག་ཏུ་སོ་ལྷག་ཆེན་པོ་ཞིག་སྐྱེ་འདུག་སྟབས་སྨན་པ་ཐེངས་མ་གཉིས་ལ་བསྟེན་ཀྱང་སོ་མ་བཀོག་ན་མི་འགྲིག་ཚུལ་ལུང་པ་གང་བཤད་བྱུང་། ང་ལ་སོ་བཀོག་འདོད་གཏན་ནས་མེད་ཀྱང་ཆུ་ཆེན་པོའི་ཁ་ནས་གྲུ་བ་བཙན་ཞེས་པའི་དཔེ་ལྟར་ངོས་ཀྱི་དགེ་ཕྲུག་འགའ་དང་སྨན་པ་སོགས་ཚང་མས་འདོད་པ་ལྟར་སོ་བཀོག་རྒྱུ་བྱས། དེ་རིང་ནི་སྔར་ནས་དུས་ཆད་བྱས་པ་ནང་བཞིན་སོ་ནད་སྨན་ཁང་ནང་ཞིག་ནང་དུ་སོང་བས་སྨན་པ་ཕོ་གསར་ལྟད་གཟོ་དོད་མདོག་ཅན་དེས་སོ་ལ་ཡང་ནས་བརྟགས་དཔྱད་ཐེངས་གཅིག་བྱས་ནས་ནད་པའི་ཉལ་ཁྲིའི་སྒང་དུ་གན་རྐྱལ་དུ་བསྙལ་བྱུང་། རྐན་ཕུག་ཏུ་སྦྲིད་སྨན་རྒྱབ་ནས་སྐར་ཆ་འགའ་ཡི་རྗེས་སུ་རྐན་བཤའ་བཅོས་ཅུང་ཙམ་རྗེས་ནས་སོ་ལྷག་ཉིད་མིག་ལམ་དུ་དམར་ཙ་རེ་བཏོན་སོང་། 
སྨན་པ་དང་ནད་གཡོག་སོགས་ཚང་མས་ང་ལ་དངངས་སྐྲག་དང་སྡར་སྐད་མེད་པའི་ནད་པ་བཟང་རབ་བསྟོད་བསྔགས་he is good patient. ཞེས་ངོས་ཀྱི་རྣ་ཁུང་གཉིས་ནས་སིབ་སིབ་གོ་གི་འདུག 
དེ་ནས་ཨ་མ་སུས་སིན་དང་དེ་རིང་སྨན་ཁང་དུ་འགྲོ་སོང་གི་སྦྱིན་བདག་ཀིར་སེའུ་གཉིས་དང་མཉམ་དུ་ནང་དུ་ལོགས་ནས་ངལ་གསོ་བྱས། 

Wednesday, December 18, 2013

པདྨ་འོད་གསལ་གླིང་མཆོད་རྟེན་གཟུངས་སྒྲུབས་ལ་སོང་བའི་ཉིན་མོ།

བླ་མ་མཐར་ཕྱིན་ཕྱག་རྩལ་ལས་ཐོན་པའི་གུ་རུའི་སྣང་བརྙན།
སྔགས་པ་བླ་མ་བསོད་ནམས་དང་། པདྨ་འོད་གསལ་གླིང་སློབ་མ་འགའ་ཡི་རེ་བ་ལྟར་དུ་སྔ་ནས་དུས་ཆད་བྱས་་པ་ནང་བཞིན་པདྨ་འོད་གསལ་གླིང་ལ་སོང་། ངོས་ཀྱི་ཆོས་གྲོགས་བླ་མ་མཐར་ཕྱིན་རིན་པོ་ཆེ་ཞིང་དུ་མ་ཕེབས་གོང་ནས་བདུད་འཇོམས་ཡབ་སྲས་རྣམ་གཉིས་ལ་སྐུ་གདུང་རེ་གཞེངས་རྒྱུའི་འཆར་གཞིའི་ཡོད་པ་རེད། ད་རེས་སྐུ་གདུང་གཉིས་པོའི་གཟུངས་སྒྲུབས་ཀྱི་ཆེད་དུ་སོ་ན་བའི་ཟུག་གཟེར་ཆེ་མིན་ལ་མ་ལྟོས་པར་འགྲོ་དགོས་བྱུང་། གཟུངས་སྒྲུབས་ཉིན་གསུམ་རིང་བླ་མ་བསོད་ནམས་དང་། སྤྲུལ་སྐུ་འཇམ་དབྱངས། འབྲུག་ནས་ཡིན་པའི་མཁན་པོ་བསོད་ནམས་ཞེས་འབོད་པའི་སྐྱེ་དམན་མཉམ་དུ་ཡོད་པའི་བླ་མ་སྔགས་ཆས་ཅན་ཞིག་དང་། ཡོལ་མོ་ནས་ཡིན་པའི་སྔགས་པ་ཀུ་མར་སོགས་སྡོམས་པས་མཁན་པོ་སྔགས་འཆང་ཕོ་མོ་བདུན་བཅུ་མ་ཟིན་ཙམ་ཞིག་འདུག སྔ་དྲོ་ཀོང་སྤྲུལ་བློ་གྲོས་མཐའ་ཡས་ཀྱིས་མཛད་པའི་དྲི་མེད་རྣམ་གཉིས་ཀྱི་གཟུངས་སྒྲུབ་ཆོ་ག་དང་། ཉིན་རྒྱབ་ཏུ་པདྨའི་སྙིང་པོའི་བརྒྱུད་དང་། ཆོས་དབྱིངས་མཛོད་སོགས་བརྒྱུད་ནས་གསུངས་པ་ལྟར་ཀ་ལ་པིངྐའི་སྒྲ་དབྱངས་ལྟར་དུ་མགོ་སེར་བུ་མོ་གཞོན་ནུ་མ་འགའ་ཡིས་རྫོགས་ཆེན་སྒར་འདེབས་ཀྱི་དབྱངས་ལྟ་ལ་སྐྱོན་ནས་འཚོགས་མང་དང་མཉམ་དུ་ཀློག ངས་ནི་སྔ་ལོར་ཞིང་གཤེགས་བླ་མ་མཐར་ཕྱིན་རིན་པོ་ཆེའི་མདུན་ནས་བདུད་འཇོམས་ཕུར་པ་སྦུ་གྲི་རེག་ཕུང་དང་། གཞན་གཏེར་ཁ་བདུན་འདུས་སོགས་ཀྱི་དབང་ཁྲིད་མི་ཉུང་བ་ཞིག་ཐོབ་པའི་སློབ་མར་སོང་། ད་རེས་ངོས་ཀྱི་གའུ་ནང་དུ་སྲོག་ལྟར་གཅེས་ནས་ཉར་བའི་ཤ་རིའི་བུའི་རིང་བསྲེལ་དེ་བླ་མ་མཐར་ཕྱིན་རིན་པོ་ཆེའི་སྐུ་གདུང་ནང་ཟུང་འཇུག་གི་ཆེད་དུ་ཞལ་འདེབས་སུ་ཕུལ་བས་སྔགས་པ་བསོད་ནམས་གཙོས་དེར་ཡོད་ཀྱི་དགེ་སློབ་རྣམས་ཧ་ཅང་དགའ་བོ་བྱས་སོང་། རིང་བསྲེལ་འདི་ཉིས་སྟོང་དྲུག་ལོར་གནས་རྟེན་སྡེ་བའི་རིང་ལུགས་འཛིན་ཅིང་ལྟ་བ་རྟེན་འབྲེལ་བཅུ་གཉིས་དང་། སྒོམ་པ་བྱང་ཕྱོགས་སོ་བདུན། སྤྱོད་པ་སྦྱང་ཡོན་བཅུ་གཉིས་ལ་གནས་པའི་ནང་པའི་རྒྱལ་ཁབ་ཆེན་པོ་འབར་མ་ལ་སོང་བའི་སྐབས་སུ་ཡུལ་དེའི་སྐད་གྲགས་ཅན་གྱི་དགེ་སློང་སིན་དེན་གྷ་ནས་ཤ་རིའི་བུའི་རིང་བསྲེལ་རྡོག་མ་ལྔ་གནང་བྱུང་བས་གཅིག་༧གོང་ས་སྐྱབས་མགོན་ཆེན་པོ་ལ་ཕུལ་ཞིང་གསུམ་བོད་ལ་བསྐུར་བ་ཡིན། གཅིག་དེ་རིང་འདིར་ཞལ་འདེབས་སུ་ཕུལ་བས་ང་ཡང་དགའ་བོ་བྱུང་སོང་།

པདྨ་འོད་གསལ་གླིང་གི་དགེ་སློབ་འདི་རྣམས་ཀྱིས་ང་ལ་ར་གན་གསེར་རློམ་གྱི་དཔེ་ལྟར་ཤིན་ཏུ་ནས་ཀྱང་དགའ་བོ་བྱེད་ཀྱི་ཡོད། ཉིན་ཐ་མའི་མཛད་སྒོ་གྲོལ་བའི་སྐབས་སུ། 
ང་ཚོ་མ་བརྗེད་ཡང་ཡང་ཕེབས་རོགས། 
ཞེས་སློབ་མ་འགའ་ཡིས་ངུ་ངག་དང་བཅས་རེ་ཞུས་བྱེད་ཀྱི་འདུག  དེ་ནི་ཉེ་བའི་ཆར་བླ་མ་མཐར་ཕྱིན་རིན་པོ་ཆེ་ཞིང་དུ་ཕེབས་ནས་དཔེར་ན་བླ་མ་མེད་པའི་དགོན་པ། ཕ་རྒན་མེད་པའི་ནང་མི་ཞེས་པའི་དཔེ་ལྟར་གྱུར་འདུག་པས་ངས་ཀྱང་གནས་སྐབས་རིང་སྔགས་པ་བསོད་ནམས་ཀྱི་ཕྱག་རོགས་གང་ཐུབ་བྱེད་རྒྱུ་ཁས་ལེན་བྱས་ནས་དགོང་མོ་ཨ་མ་སུས་སིན་ངེད་གཉིས་ནང་དུ་ལོགས།

Tuesday, December 10, 2013

ཡང་སྐྱར་སོ་ཡི་སྨན་ཁང་ལ་སོང་བའི་ཉིན་མོ།

དེ་རིང་ནི་སྔ་ནས་དུས་ཆེད་བྱས་པ་ནང་བཞིན་སུས་སིན་དང་། ཀར་སེའུ་གཉིས་མཉམ་དུ་ཉིན་རྒྱབ་ཆུ་ཚོད་དང་པོའི་སྐབས་སུ་སོ་ནད་སྨན་ཁང་ནང་དུ་སོང་། སྨན་ཁང་ལས་གཡོག་གཞོན་ནུ་མ་ཞིག་ནས་ངོ་འཛུམ་ཁ་འཇམ་དང་བཅས་པའི་སྒོ་ནས་ངོ་ལེན་བྱས། ཅུང་ཙམ་འགོར་རྗེས་ངོས་ཀྱི་སོ་ཡི་སྨན་པ་དེ་སླེབས་བྱུང་བས་ཡང་སྐྱར་ངོས་ཀྱི་སོ་ལ་གློག་པར་གྱིས་བརྟག་དཔྱད་ཐེངས་མ་གཉིས་པ་བྱས་སོང་།
ཁོང་ནས་ཟེར་ན་རྐན་ཕུག་ཏུ་ཕན་ལས་གནོད་ཆེ་བའི་སོ་ལྷག་ཆེན་པོ་ཞིག་སྐྱེ་འདུག་གང་མགྱོགས་མ་བཀོག་ན་ཡག་པོ་མེད་ཚུལ་ལུང་པ་གང་བཤད་སོང་། ངས་ཀྱང་དེར་མོས་མཐུན་མི་བྱེད་ཀ་མེད་དུ་གྱུར། གང་ཡིན་ཞེ་ན་ང་ནི་ནད་པ་དང་ཁོང་ནི་སྨན་པ་ཡིན་པས་སོ། 
སྤྱོད་འཇུག་ལས་ཀྱང་། 
སྨན་པའི་ངག་མ་ཉན་ན་སྨན་དག་གིས།། 
བཅོས་དགོས་ནད་པ་སོས་པ་ག་ལ་འགྱུར།།
ཞེས་གསུངས་པའི་དེ་རིང་ང་ལ་དགོས་པའི་བསླབ་བྱ་ཉིད་སེམས་ལ་འཁོར་བཞིན་བདུན་ཕྲག་རྗེས་མའི་གཟའ་ལྷག་པ་ཉིན་རྒྱབ་ཆུ་ཚོད་གཉིས་པའི་སྐབས་སུ་རྐན་ཕུག་གི་སོ་ལྷག་ཉིད་བཀོག་རྒྱུ་དུས་ཚོད་ལ་གན་རྒྱའི་མཚན་རྟགས་སོགས་བྱས། སྔ་ཕྱི་བརྟག་དཔྱད་བྱས་པ་དང་སོ་བཀོག་གླ་སོགས་ཚང་མ་ངོས་ཀྱི་དགེ་ཕྲུག་ཀར་སེའུ་ནས་སྦྱིན་བདག་བྱེད་རྒྱུ་བྱས་སོང་། 
ཀེར་སེའུ་ནི་འབྱོར་ལྡན་སྐད་གྲགས་ཅན་རྣམས་བསྡད་ཡུལ་ཁར་མེལ་ལ་བསྡད་མཁན་འབྱོར་ལྡན་མ་ཞིག་ཡིན། སློབ་མ་བྱས་ནས་ལོ་ཕྱེད་ཀ་ལས་མ་སོང་ཡང་དེ་སྔ་ཕན་ཆོད་ཡར་འགྲོ་མར་འགྲོའི་གནམ་གྲུའི་གླ་ཆ་དང་ཟས་གོས་སོགས་ཀྱི་རིན་པ་ཨ་སྒོར་ལྔ་སྟོང་ཙམ་ཞིག་ཟོས་ཚར། ལར་ནི་ཨ་རིའི་མགོ་སེར་འདི་རྣམས་ཀྱིས་རོགས་དངུལ་སྤྲད་པ་འདི་རྣམས་ཕལ་ཆེར་དཀོར་ཟས་སུ་མི་འགྲོ་ཤས་ཆེ། གང་ཡིན་ཞེ་ན་དད་པས་ཕུལ་བའི་རྫས་ཧ་ཅང་ཉུང་བས་སོ། བོད་རིགས་དང་རྒྱ་རིགས་རྣམས་ཀྱི་ཁྲོད་ནས་ཡོང་བའི་དངུལ་འདི་རྣམས་དཀོར་རྫས་ཡིན་པ་མ་ཟད་ལྷག་པར་དུ་བོད་ནང་ལོགས་སུ་བླ་མ་རྣམས་ལ་ཕུལ་བའི་དངུལ་སོགས་ནི་རྫ་དཔའ་སྤྲུལ་གྱིས།
དཀོར་ནག་པོ་སྲོག་གི་སྤུ་གྲི་འདི།། 
ཟོས་དྲག་ན་ཐར་པའི་སྲོག་རྩ་གཅོད།། 
ཅེས་གསུངས་ལྟར་ཤི་བོ་བརྒྱ་ཡི་རྣམ་ཤེས་དང་། གསོན་པོ་བརྒྱ་ཡི་སྐྱབས་བརྟེན་བཅས་ཡིན་པས་སོ།
 

Friday, December 6, 2013

ཆེས་རླབས་ཆེན་གྱི་གཙོ་འཛིན་ཞིག་སྐུ་གྲོངས་བའི་ཉིན་མོ།

ཕུལ་བྱུང་གི་དཔའ་བོ་Nelson Mandela
དེ་རིང་ཞོགས་པ་སྔ་བོར་ལངས་ནས་བསིལ་རླུང་ཁྲོད་ནས་གཟུགས་པོའི་འཕྲོད་བསྟེན་གྱི་ཆེད་དུ་རྐང་འགྲོས་ཆུ་ཚོད་གཅིག་ཙམ་བྱས་ནས་ནང་དུ་འབྱོར་ཞིང་ཞོགས་ཟས་མདོར་བསྡུས་ཚར་མ་ཐག་འཆར་ཅན་ལྟར་ཞོགས་པའི་ཁ་འདོན་རྣམས་ཚར་བར་བྱས། ཉིན་གུང་བར་གསེང་སྐབས་སུ་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་དུས་ལྷོ་ཨ་ཧྥི་རི་ཀའི་སྲིད་འཛིན་ཟུར་པ་ནེའུ་སོན་མེན་དྷ་ལའི་མཆོག་དགུང་གྲངས་༩༥ ཐོག་ཁ་སང་སྐུ་གྲོངས་པའི་གནས་ཚུལ་མཐོང་ཐོས་བྱུང་།
ནེལ་སིན་མན་ཌ་ལཱ་མཆོག་ནི་ཕྱི་ལོ་ ༡༩༡༨ ཟླ་ ༧ ཚེས་ ༡༨ ཉིན་ལྷོ་ཨ་ཧྥི་རི་ཀའི་ཤར་ཕྱོགས་ཀད་པུ་གྲོང་ཁྱེར་( Cape town)ཞེས་པར་སྐུ་འཁྲུངས་ཤིང་ ཁོང་ནི་ལྷོ་ཨ་ཧྥི་རི་ཀའི་མི་རིགས་དཀར་ནག་རིང་ལུགས་ཀྱི་སྲིད་ཇུས་ལ་ཞི་དྲག་གང་རུང་གིས་མཐའ་གཅིག་ཏུ་ངོ་རྒོལ་བྱས་ཤིང་བཙོན་ཁང་ནང་དུ་མི་ལོ་ཉེར་བདུན་ལ་བཞུགས་དགོས་བྱུང་ཤིང་མཐར་༡༩༩༠ ལོར་སྲིད་གཞུང་ལ་འགྱུར་བ་སོང་ནས་ཁོང་གི་འཐབ་རྩོད་ལ་རྒྱལ་ཁ་ཐོབ་ནས་འཛམ་གླིང་ནང་ཆེས་སྐད་གྲགས་ཆེན་པོ་བྱུང་། ༡༩༩༣ ལོར་ཁོང་ལ་འཛམ་གླིང་ཞི་བདེའི་གཟེངས་རྟགས་ཐོབ། ༡༩༩༤ ལོར་ལྷོ་ཨ་ཧྥི་རི་ཀའི་ལོ་རྒྱུས་ཐོག་གི་མི་རིགས་ནག་པོའི་སྲིད་འཛིན་ཐོག་མ་དེ་ཆགས་ཡོད་པ་དང་། ༡༩༩༩ ལོར་ལྷོ་ཨ་ཧྥི་རི་ཀའི་མགོ་ཁྲིད་ནས་རྒན་ཡོལ་ཞུས་ཡོད།

དེ་རིང་གསར་འགྱུར་དང་གཟུགས་མཐོང་བརྙན་འཕྲིན་སོགས་ཀྱི་ནང་དུ་ཁོང་སྐུ་གྲོངས་
བའི་གནས་སྟངས་ཀྱིས་ལྷོ་ཨ་ཧྥི་རི་ཀའི་མི་རིགས་རྣམས་ཀྱིས་ཆེས་སྡུག་བསྔལ་བྱེད་པའི་
མྱོང་ཚོར་དེས་ང་ལ་ཤུགས་རྐྱེན་འདི་འདྲ་ཞིག་སླེབས་སོང་། 
ཞི་བདེའི་དེད་དཔོན་རླབས་ཆེན་གྱི་གཙོ་འཛིནNelson Mandela་ཁོང་གི་ཞེ་ཕུག་གི་
དམིགས་ཡུལ་ཉག་གཅིག་ནི་ལྷོ་ཨ་ཧྥི་རི་ཀའི་མི་རིགས་དབྱེ་འབྱེད་ཀྱི་འཐབ་རྩོད་ལས་
རྒྱལ་྄བ་དེ་རེད། དེ་རིང་ཁོང་གི་དམིགས་ཡུལ་འདོད་དོན་ཡོངས་སུ་འགྲུབ་ནས་རང་གི་
འབངས་མིའི་མཐའ་སྐོར་ཞིང་རང་གི་རྒྱལ་ཁབ་ནང་དུ་སྐུ་གྲོངས་པ་དེ་ནི་གནས་ལུགས་
དོན་མཐུན་ཤིག་ལ་ངོས་འཛིན་བྱེད་ཆོག
བོད་མི་ས་ཡ་དྲུག་པོའི་ཚེ་འདི་ཕྱི་གཉིས་ཀྱི་སྐྱབས་གནས། ང་ཡི་དམར་ཆུང་སྙིང་གི་ཚི་ལུ་
དམར་པོ་དགུང་གྲངས་བརྒྱད་བཅུ་ལ་ཉེ་བའི་༧གོང་ས་སྐྱབས་མགོན་ཆེན་པོ་མཆོག་
གམ།  ཞེ་ས་མེད་པར་ཞུས་ན་གཞི་བྱེས་བོད་མི་གཉིས་ཀྱི་ངོ་སོ་མེད་པའི་གཡོག་རྒན་
འདིའང་བོད་མི་ཁག་གཅིག་གིས་བཀའ་བཅག ཐུགས་དཀྲུགས་སོགས་ཚུལ་མིན་གྱི་བྱེད་
སྟངས་འདི་ལ་བལྟས་ན་ཉི་མ་གཅིག་ལ་དེ་རིང་ལྷོ་ཨ་ཧྥི་རི་ཀའི་མི་རིགས་རྣམས་ལ་ཤར་
བའི་ཉི་མ་ནག་པོ་འདི་འདྲ་བ་ཞིག་བསོད་ཟད་བོད་མི་རྣམས་ཀྱི་མགོ་ཐོག་ཏུ་ག་དུས་ཤར་
ན་བསམ་པའི་སྡུག་གི་ལྟ་གོན་ཞིག་ཀྱང་བྱས་ནས་སེམས་སྐྱོ་ལྷང་ལྷང་ཉིན་ཐོ་འདི་བྲིས་
ནས་གཏངས་བ་ཡིན།།
 


Thursday, December 5, 2013

ཁ་འདོན་བྱས་ནས་ནང་དུ་བསྡད་པའི་ཉིན་མོ།

ཁ་འདོན་བྱེད་བཞིན་པའི་སྐབས་སུ་ཟུར་པར་ཞིག
དེ་རིང་ནི་གནམ་གཤིས་དེ་ཙམ་ཡག་པོ་མེད་སྟབས་ཁ་འདོན་བྱས་ནས་ནང་དུ་བསྡད་པ་ཡིན། ཐུགས་སྒྲུབ་ཕྲིན་ལས་འབྲིང་པོའི་ལས་བྱང་ཉིད་བཏོན་ནས་རྩ་གསུམ་བསྙེན་དམིགས་སྐབས་སུ་བསྐྱེད་རྫོགས་གང་ཤེས་ཀྱི་དམིགས་རྣམ་བསྐྱངས་ནས་ཐུན་བཟུང་། ཐུན་བར་དུ་ཅི་ཆ་མེད་པར་ཉམས་སྣང་འདྲེས་མའི་ཚུལ་དུ་སེམས་ལ་དགའ་ཚོར་ཆེན་པོ་ཞིག་སྐྱེས་བྱུང་། ཕལ་ཆེར་ས་སྟེང་འདིར་ང་ལས་བསོད་ནམས་ཆེ་བ་དང་སྐྱིད་པ་ཞིག་ཨི་ཡོད་ན་བསམ་པའི་ཚོར་སྣང་ཞིག་བྱུང་། 
ལར་ནི་བཀའ་དྲིན་མཚུངས་ཟླ་མེད་པ་སངས་རྒྱས་རློན་པ་མི་གཟུགས་སུ་བྱོན་པའི་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་དང་། རི་ཡི་བུ་བྱས། ན་བོན་གྱི་གོས་གྱོན་ནས་མི་ཚེ་སྒྲུབ་ལ་གཞོལ་བའི་རྗེ་བཙུན་མི་ལ་གཉིས་པ་ལྷ་ཐོག་གྲུབ་ཆེན་ཀརྨ་ནོར་བུ་དང་། པཎ་ཆེན་བི་མ་ལ་མི་གཟུགས་སུ་བྱོན་པའི་ཁྲ་ཆོག་མཁན་ཆེན་ཀརྨ་ཚེ་བརྟན་སོགས་མཁས་གྲུབ་ཀྱི་སྐྱེ་བུ་མང་པོ་ཞིག་མདུན་ནས་དབང་ཁྲིད་གདམས་ངག་ཐོབ་པ་མ་ཟད་ཐོས་དོན་སྙིང་པོའི་དོན་ལ་བགྲང་བྱ་མང་པོར་ཉམས་ལེན་གང་ཐུབ་བྱས་པས་སྟོང་པ་ཉིད་ལ་དོན་སྤྱིའི་གོ་བ་རག་རིམ་ཞིག་ཆག་ནས་རང་མྱོང་ངེས་ཤེས་འདྲོངས་པ་ཞིག་བྱུང་། ལོ་ཁ་ཤས་ཡར་སྔོན་ནས་བསྡད་ན་འདུག་བཟོད་པ། སྒོམ་ན་ལམ་རྟགས་ཀྱི་ཡོན་ཏན་ཡོད་པ་ཞིག་བྱུང་བས་དེ་རིང་ཡང་སྔར་དང་མ་འདྲ་བའི་སེམས་ལ་དགའ་སྤྲོ་ཚད་མེད་ཅིག་བྱུང་། ལར་ནི་རྣལ་འབྱོར་ཉམས་ལ་མི་ཤར་མེད། དབྱར་ཁའི་སྤང་ལ་མི་སྐྱེ་མེད་གསུངས་པ་ལྟར་ཉམས་རྟོགས་ལ་ཆེད་རློམ་མི་བྱ་བ་ནི་སྒོམ་ཆེན་གྱི་ཁྱད་ཆོས་ཡིན་ཀྱང་ངོས་ནས་ཡག་སྡུག་བཟང་ངན་གང་བྱུང་ཉིན་ཐོར་འབྲི་བ་ནི་ངོས་ཀྱི་ལས་ཀ་ལྷག་མ་ཞིག་ཡིན་པས་དེ་རིང་ཡང་དེར་འབྲི་ཤོར་ཐལ་སོང་།
ཉིན་གུང་རྒྱབ་ནས་ངོས་ཀྱི་དགེ་ཕྲུག་དད་ལྡན་མ་ཨ་མ་སུས་སིན་ནས་སྒམ་ཞིག་ཁུར་ནས་སླེབས་འདུག ཁ་ཕྱེས་ནས་བལྟས་དུས་དེ་ནི་པདྨ་འོད་གསལ་གླིང་ནས་ང་ལ་གདུང་སྲས་ཕྲིན་ལས་ནོར་བུ་རིན་པོ་ཆེའི་གསུང་འབུམ་པོད་གསུམ་བརྔན་པའི་ཆེད་དུ་སྐུར་བ་དེ་རེད་འདུག པདྨ་འོད་གསལ་གླིང་ཞིང་གཤེགས་བླ་མ་མཐར་ཕྱིན་གཙོས་པའི་སྔགས་པ་ཕོ་མོ་རྣམས་ནས་ང་ལ་ར་གན་གསེར་རློམ་ཧ་ཅང་དགའ་མོས་བྱེད་ཀྱི་ཡོད།
དེ་རིང་གི་ཉིན་ཐོ་མདོར་བསྡུས་དེ་གཏངས་ནས་ཉལ་སར་སོང་ནས་གཉིད་དུ་ཡུར།

Sunday, December 1, 2013

སོ་ན་བའི་ཉིན་མོ།

སོ་ནད་སྨན་པ་དང་མཉམ་དུ་སྨན་ཁང་ནས།
ཉིན་ཤས་གོང་ནས་རྣ་ཁུང་དང་། འགྲམ་པ། སོ་སོགས་གང་དུ་ན་བའི་ངོས་འཛིན་དཀའ་བའི་ཟུག་གཟེར་ཞིག་གིས་མནར་སོང་། ངས་ནི་དེང་སང་གནམ་གཤིས་ཀྱིས་རྐྱེན་པས་མི་མང་པོ་ཞིག་ལ་ཚ་འཆམས་འདྲ་ཕོག་འདུག་པས་སྤྱི་མཚུངས་དེ་འདྲ་ཡིན་རྒྱུ་རེད་བསམ་ནས་སྨན་ཁང་ནང་དུ་འགྲོ་རྒྱུ་ཕར་ཞོག་མི་སུ་ལ་ཡང་མ་བཤད་སྡུག་སྲན་བྱས་ནས་ཉིན་གྲངས་མང་པོར་ནང་དུ་བསྡད་པ་ཡིན། ཁ་སང་གཞི་ནས་སོ་གཟེར་ཡིན་པ་ཧ་གོ་སོང་། དེ་རིང་ལ་ལྟོས་ན་ན་ཟུག་ཅུང་འཇམ་འདུག་ཀྱང་ངོས་ཀྱི་དགེ་ཕྲུག་ཞིག་ནས་མི་འདོད་བཞིན་དུ་སོ་ནད་སྨན་ཁང་ཞིག་ནང་དུ་བཙན་གྱིས་ཁྲིད་སོང་། སོ་ནད་སྨན་ཁང་ནང་དུ་སོང་བས་མི་རིགས་ཉི་ཧོང་ནས་ཡིན་པའི་ཕོ་གསར་ལྟད་བཟོ་དོད་མདོག་ཁ་བོ་ཞིག་ནས་སྣེ་ལེན་བྱས། ནད་པའི་ཉལ་ཁྲིའི་སྒང་དུ་གན་རྐྱལ་དུ་བསྙལ་ནས་སོ་ལ་བརྟགས་དཔྱད་བྱས་སོང་བས་སྨན་པས་ཟེར་ན་འགྲམ་ཕུགས་སུ་སོ་ལྷག་ཆེན་པོ་ཞིག་སྐྱེ་འདུག་སྟབས་སོ་ལྷག་དེ་ད་ལྟ་ནས་མ་བཀོག་ན་མི་འགྲིག་ཚུལ་ལུང་པ་གང་བཤད་སོང་། ང་ནི་དེ་རིང་སོ་ན་རྒྱུ་ཆུང་དུ་སོང་འདུག་སྟབས་སོ་བཀོག་འདོད་གཏན་ནས་མེད་ཚུལ་བཤད་ཀྱང་ཟུར་དུ་ཡོད་པའི་ངོས་ཀྱི་དགེ་ཕྲུག་དེས་བཙན་པོའི་བཀོག་དགོས་པའི་བསླབ་བྱས་བདུན་ཕྲག་རྗེས་མར་སོ་ལྷག་བཀོག་རྒྱུའི་དེབ་སྐྱེལ་མཚན་རྟགས་དུས་ཚེས་སོགས་བསྒྲིགས་ནས་ནང་དུ་ཡོང་། ལམ་བར་དུ་ངོས་ཀྱི་དགེ་ཕྲུག་ཨ་མ་སུས་སིན་དང་། ཀེར་སེའི་གཉིས་ནས་སྨན་པ་བཟང་རབས་དང་སོ་མ་བཀོག་ན་ནད་གཞི་གཞན་གྱི་འབྱུང་རྐྱེན་ཡོང་ཉེན་སོགས་ངོས་ཀྱི་རྣ་ཁུང་གཡས་གཡོན་གཉིས་ནས་མི་འདོད་བཞིན་དུ་ཙིར་ཙིར་བཤད་ཀྱིན་འདུག 
སོ་བཀོག་གླ་དང་དེ་རིང་གི་བརྟག་དཔྱད་སོགས་འགྲོ་སོང་ག་ཚོད་སོང་ཀྱང་དགེ་ཕྲུག་ཀར་སེའི་ནས་སྦྱིན་བདག་བྱེད་ཀྱི་ཡིན་ཟེར།
ཚོད་དཔག་བྱས་ན་ཨ་སྒོར་གཅིག་སྟོང་ཡན་སྐད་ཆ་བྱེད་བཞིན་འདུག ནང་དུ་འབྱོར་ཞིང་དེ་རིང་གི་ཉིན་ཐོ་མདོར་བསྡུས་དེ་གཏངས་ནས་ཉལ་སར་སོང་ནས་གཉིད་དུ་ཡུར།།


Thursday, November 28, 2013

ཨ་རིའི་བཀའ་དྲིན་རྗེས་དྲན་དུས་ཆེན་གྱི་ཉིན་མོ།

སྐྱིད་པའི་ཐུགས་རྗེའི་ལེགས་འབུལ་གྱི་ཤོག་ལིང་།
ཉིན་མོ་འདི་ནི་ཨ་རིའི་ལུང་པ་འདིའི་ནང་བཀའ་དྲིན་རྗེས་དྲན་གྱི་ཉིན་མོThanksgiving.ཞེས་དུས་ཆེན་ཁྱད་པར་ཅན་ཞིག་ཡིནདུས་ཆེན་འདི་ནི་ཕྱི་ལོ་1621 ཡོ་རོབ་དབྱིན་ལན་སོགས་ནས་ཡུལ་མི་མང་པོ་ཞིག་ཨ་རི་ལ་སྐྱབས་བཅོལ་དུ་ཡོང་བའི་སྐབས་སུ་གདོད་མིཨ་རིའི་མི་རིགས་རྣམས་ཀྱིས་ཡུལ་གྱར་བ་དེ་རྣམས་ལ་སོ་ནམ་འདེབས་ལས་དང་། འཚོ་ཐབས་སོགས་གང་ལེགས་བསླབ་ནས་རྗེས་སོར་སྟོན་ཐོག་ཡག་པོ་བྱུང་བའི་སྐབས་སུ་དྲིན་ལན་བཟང་མཇལ་གྱི་ཆེད་དུ་ཡོ་རོཀྱི་ཡུལ་མི་རྣམས་ཀྱིས་ཨ་རིའི་བ་རྣམས་ལ་ཐུགས་རྗེའི་ལེགས་འབུལ་གྱི་ཆེད་གསོལ་སྟོན་ཞིག་ཕུལ་ནསད་བར་ལུགས་སྲོལ་འདི་དར་སྐད་འདུག 

ལར་ནི་ཆོས་ལུགས་འདྲ་མིན་དབང་གིས་ལུགས་སྲོལ་དང་རིག་གཞུང་འདྲ་མིན་འཛམ་བུའི་གླིང་ལ་དར་ཁྱབ་བྱུང་ཞིང་ཆོས་ལུགས་ཁ་ཤས་ཀྱི་རིག་གཞུང་གིས་འཛམ་བུ་གླིང་ལ་ཞི་བདེ་དང་འཚེ་བ་མེད་པ་འདི་བདེ་ཕྱི་སྐྱིད་ལམ་སྲོལ་བཟང་པོ་བྱུང་ཡོད། ཆོས་ལུགས་འགའ་ཤས་ཀྱི་བརྒྱུད་ནས་རིག་གཞུང་འདྲ་མིན་གྱི་དབང་གིས་མཐོང་ན་སྙིང་རྩ་འདར་ཞིང་། ཉན་ན་སྐྱུག་བྲོ་བའི་དཔེར་ན་དེ་རིང་གི་ཐུགས་རྗེའི་ལེགས་འབུལ་གྱི་དུས་ཆེན་ལྟར་ཉིན་མ་གཅིག་ལ་ཁྱིམ་བྱ་ས་ཡ་མང་པོའི་ཚེ་སྲོག་རྐུམ་ཞིང་། ཡེ་ཤུའི་འཁྲུངས་སྐར་གྱི་དུས་ཆེན་ཉིན་མོར་སྔོ་ལྗངས་ཡིད་དུ་འོང་བའི་ལྗོན་ཤིང་ས་ཡ་མང་པོ་བཅད་གཏུབ་བྱེད་པ། ཧིན་དུའི་ཆོས་ལུགས་སུ་རྒྱ་གར་བལ་ཡུལ་སོགས་ནས་དྷ་སེན་ཞེས་དུས་ཆེན་ཉིན་མོར་ལྷ་དབང་ཕྱུག་ཆེན་པོར་དམར་མཆོད་ཀྱི་ཆེད་དུ་ཉིན་གཅིག་ལ་ཡུལ་ལུང་ཁྲག་མཚོར་བསྒྱུར་ནས་ར་ལུག་མ་ཧེ་སོགས་ཉམ་ཆུང་སེམས་ཅན་ས་ཡ་མང་པོ་དམར་གསོད་གཏོང་བའི་ལུགས་སྲོལ་ངན་པ་འདི་རྣམས་ལ་བསམ་ནས་ངས་ནི་དེ་རིང་གི་ཉིན་མོ་འདིར་མི་སུ་གཅིག་གི་ནང་དུ་མི་འགྲོ་རྒྱུའི་དམ་བཅའ་བྱས་ནས་ཞོགས་པ་ནས་བཟུང་བདེ་ཆེན་ཞིང་སྒྲུབས་ཆོ་ག་རྒྱས་པ་ཉིད་བཏོན་ཞིང་འོད་མཚན་དང་མ་ཎི་སོགས་བགྲངས་ནས་ནང་དུ་ཐུན་བཟུང་ནས་བསྡད་པ་ཡིན། 
དགོང་མོ་ཆུ་ཚོད་དྲུག་པའི་སྐབས་སུ་ཨ་མ་སུས་སིན་གཙོས་དད་ལྡན་གྱི་སློབ་མ་འགའ་བོས་ནས་མཉམ་དུ་དེ་རིང་གི་དུས་ཆེན་གྱི་ཆེད་དུ་ཁྱིམ་བྱ་གྲངས་ལས་འདས་པ་དེ་རྣམས་ཀྱི་ཆེད་དུ་བསྔོ་བ་དང་སྨོན་ལམ་སོགས་མཉམ་དུ་བྱས། 

ཨ་རིའི་མགོ་སེར་གནའ་བོའི་ལུགས་སྲོལ་འདིར།།
ཐུགས་རྗེའི་ལེགས་འབུལ་ཞེས་པའི་དུས་ཆེན་ཉིན།།
ཉམ་ཆུང་ཁྱིམ་བྱ་ས་ཡ་མང་པོ་ཡི།།
སྲོག་ལ་རྒོལ་བའི་ཉི་མ་ནག་པོ་ཤར།།

ཉམ་ཆུང་ཁྱིམ་བྱ་མང་པོའི་མྱ་ངན་དང་།
མགོ་སེར་མི་ཚང་མང་པོའི་ཧབ་སྒྲ་བཅས།།
རྐང་གཉིས་འགྲོ་བ་མི་ཡི་ལས་སྟངས་འདིར།།
བསམ་ན་སྙིང་ནས་མཆི་མ་དཀུ་བའི་རྒྱུ།།

 དེ་རིང་ཉེས་མེད་ཁྱིམ་བྱ་ཁྱེད་རྣམས་ཀྱི།།
འཇིག་རྟེན་ཁམས་ན་འདུག་རེས་ཐ་མ་ཡི།།
མ་ཉེས་ཐོག་ཏུ་བབས་པའི་ཁྲིམས་ཆད་འདི།།
ས་སྟེང་འདི་ན་དཔང་པོ་སུ་ཡིས་བྱེད།།

ཚེ་གང་སྐྱབས་སུ་བསྙེན་པ་ལྷག་པའི་ལྷ།།
བདེ་ཆེན་ཞིང་གི་མགོན་པོ་འོད་དཔག་མེད།།
དུང་དུང་གདུང་བས་འབོད་པ་འདི་གསན་ན།། 
ཉམ་ཆུང་བྱ་རྣམས་བདེ་ཆེན་ཞིང་དུ་དྲོངས།།


ཨོྃ་ཨ་མི་དྷེ་ཝ་ཧྲཱི༔ ཨོྃ་ཨ་མི་དྷེ་ཝ་ཧྲཱི༔
ཨོྃ་ཨ་མི་དྷེ་ཝ་ཧྲཱི༔ ཨོྃ་ཨ་མི་དྷེ་ཝ་ཧྲཱི༔ 
ཨོྃ་ཨ་མི་དྷེ་ཝ་ཧྲཱི༔ ཨོྃ་ཨ་མི་དྷེ་ཝ་ཧྲཱི༔
ཨོྃ་ཨ་མི་དྷེ་ཝ་ཧྲཱི༔ ཨོྃ་ཨ་མི་དྷེ་ཝ་ཧྲཱི༔
 

Sunday, November 24, 2013

ལྷ་བབས་དུས་ཆེན་གྱི་ཉིན་མོ།

སྟོན་པ་བླ་མེད་སངས་རྒྱས་རིན་པོ་ཆེ།
ཉིན་མོ་འདི་ནི་བདག་ཅག་གི་སྟོན་པ་ཉིད་སུམ་བཅུ་རྩ་གསུམ་ལྷ་ཡུལ་དུ་མ་ཡུམ་དང་ལྷ་རྣམས་ཀྱི་ཆེད་དུ་ཕེབས་ནས་མར་མི་ཡུལ་དུ་ཕེབས་པའི་དུས་ཆེན་གྱི་ཉིན་མོ་ལྷ་བབས་དུས་ཆེན་ཞེས་མཛད་པ་བཅུ་གཉིས་ཀྱི་ནང་ནས་ཡ་གྱལ་དུ་གྱུར་པ་གཅིག་ཡིན། དེ་རིང་གི་ཉིན་མོ་འདི་ནི་ནང་པ་ཡོངས་དང་ལྷག་པར་བོད་བརྒྱུད་ནང་བསྟན་ཆོས་ལུགས་རྣམས་ཀྱིས་ཚོགས་བསགས་སྒྲིབ་སྦྱང་ཡར་མཆོད་མར་སྦྱིན་སོགས་བྱེད་པའི་ལུགས་སྲོལ་བཟང་པོ་ཞིག་ཀྱང་ཡོད། ངས་ཀྱང་དེ་རིང་ཞོགས་པ་ནས་བཟུང་སྟེ་ད་ནུབ་བར་ཐུབ་ཆོག་དང་གནས་བརྟན་ཕྱག་མཆོད་མཛད་བཅུ་སོགས་རང་འཁོས་ཁ་འདོན་དགེ་སྦྱོར་གང་དྲག་བྱས་ནས་ནང་དུ་བསྡད།
མི་ལོ་ཉིས་སྟོང་ལྔ་བརྒྱའི་ཡར་སྔོན་ལ་འཇིག་མེད་མི་ཡི་སེངྒེ་སྟོན་པ་མཉམ་མེད་སངས་རྒྱས་བཅོམ་ལྡན་འདས་དེ་ཉིད་ཀྱི་མཛད་ཆེན་བཅུ་གཉིས་རེ་རེ་བཞིན་དུ་འདོན་བཞིན་དད་པས་མིག་ནས་མཆི་མ་འགའ་ཤོར། 
ལར་ནི་བོད་བརྒྱུད་ནང་བསྟན་ཆོས་འདི་ཆོས་ལུགས་གཞན་གྱི་མཁས་པ་འགའ་ཡིས་རྩེད་མོའི་ཚུལ་དུ་བླ་མའི་ཆོས་ལུགས་རེད་ཅེས་བཤད་མཁན་ཡོད་པར་དཔྱད་ན་དངོས་གནས་འདྲ་བོ་ཞིག་ངས་ཀྱང་སྔ་ནས་མཐོང་གི་ཡོད། རྒྱུ་མཚན་གང་ཡིན་ཟེར་ན་གསང་སྔགས་རྡོ་རྗེ་ཐེག་པའི་དབང་བསྐུར་སྐབས་ཀྱི་བླ་མའི་ཁྱད་ཆོས་རྣམས་མར་དྲུད་ཡོང་ནས་མི་མང་སྤྱི་ཚོགས་ཁྲོད་དུ་མིང་འདྲ་མི་འདྲ་ཁུར་ནས་བོད་དགོན་རེ་ཟུང་གི་བདག་པོ་རེད་ཚར་དུས་རང་ཉིད་ཀྱི་འཁྲུངས་སྐར་དང་འདས་མཆོད་སོགས་ལ་འགྲོ་སོང་འཕངས་མེད་གཏངས་ནས་སྲུང་གཙི་བྱེད་པ་ལས་བདག་ཅག་རྣམས་ཀྱི་ཆུ་མགོ་གངས་ལ་ཐུག་པའི་དཔེ་ལྟར་སངས་རྒྱས་བཅོམ་ལྡན་འདས་འདི་ཡི་འཁྲུངས་སྐར་སྲུངས་གཙི་བྱེད་རྒྱུ་ཕར་ཞོག་འཁྲུངས་ལོའི་ལོ་ཚིག་དང་། འདས་ལོ་སོགས་ཀྱང་ཕལ་ཆེར་མི་ཤེས་མཁན་ཧ་ཅང་མང་པོ་ཡོད། 
ལོ་སྔོན་མར་ངོས་ཀྱི་དྲ་གྲོགས་འགའ་ནས་སངས་རྒྱས་ཀྱི་འཁྲུངས་སྐར་ལ་Card འམ་ཤོག་བྱང་འགའ་བཟོས་ནས་ངོ་དེབ་དང་དྲ་ངོས་སུ་ཡོད་པ་ཁ་ཤས་མཐོང་བའི་སྐབས་སུ་སེམས་ནང་ལ་དགའ་སྐྱོ་གཉིས་ཀ་ཡོང་གི་འདུག གང་ཡིན་ཟེར་ན་འབྱུང་ལ་ཉེ་བའི་ཡེ་ཤུའི་སྟོན་པའི་དུས་ཆེན་Christmas འདི་འཛམ་གླིང་ནང་ནས་ཆེས་དུས་ཆེན་རྩ་ཆེ་ཤོས་ཞིག་ལ་ཆགས་ནས་མི་ལོ་ལྔ་བཅུ་དྲུག་བཅུ་ཟིན་ཚར་ཡོད།   

དེ་རིང་གི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར།

Thursday, November 21, 2013

ངོས་ཀྱི་དགེ་ཕྲུག་ཞིག་གི་སྐྱེ་སྐར་ལ་སོང་བའི་ཉིན་མོ།

ཁར་མེལ་རྒྱ་མཚོའི་འགྲམ་ཟུར་ཞིག
དེ་རིང་ནི་སྔ་ནས་ཁ་དན་བྱས་པ་ནང་བཞིན་ངོས་ཀྱི་དགེ་ཕྲུག་ཆོས་དབྱིངས་སྒྲོལ་མའི་སྐྱེ་སྐར་དུ་ཨ་མ་སུས་སིན་དང་བཅས་ང་ཚོ་ཐག་ཉེར་ཡོད་པའི་རྒྱ་གར་ཟ་ཁང་ཞིག་ནང་དུ་ཉིན་གུང་ཟ་མ་བཟའ་རུ་སོང་། ཉེ་ཆར་སངས་རྒྱས་སྨན་བླའི་ཆོས་ཚོགས་ནས་ཆེད་དུ་ཉོས་པའི་ཇ་འཐུང་སའི་བོད་ལུགས་ཀྱི་ཕོར་པ་ཞིག་ཉོས་པ་དེ་དང་མཉམ་དུ་ཁ་གཏགས་ཞིག་བཅས་སྤྲད་པས་མོ་རང་ཧ་ཅང་དགའ་བོ་བྱུང་སོང་། སུས་སིན་ནས་ཀྱང་གུ་རུའི་ས་སྐུ་སྤུས་ལེགས་སྒྲོས་གཙང་མཚོན་མདངས་ཅན་ཞིག་སྐྱེ་སྐར་གྱི་ལག་རྟགས་སུ་སྤྲད་བྱུང་། ངེད་གསུམ་ནས་མ་འགྲང་བར་དུ་གང་འདོད་ཟ་ཆོག་པའི་ཟས་རིགས་རྣམས་ནས་འགྲང་ཚད་ཟོས་ནས་ཟུར་དུ་ཡོད་པའི་སྐད་གྲགས་ཅན་གྱི་ཁར་མེལ་རྒྱ་མཚོའི་འགྲམ་དུ་ཁྱུག་ཙམ་སྤྲོ་འཁྱམས་ལ་སོང་ནས་ནང་དུ་འབྱོར། 
གློ་ཁུག་ནང་ནས་ཁ་པར་གྱི་ཐིར་སྒྲ་ཞིག་ཡོད་པ་དེ་ནི་ཉིའུ་ཡོག་ལ་ཡོད་པའི་ངོས་ཀྱི་ཆོས་གྲོགས་ནང་ཆེན་བ་ཨོ་རྒྱན་དར་རྒྱས་རེད་འདུག ཁོང་ནས་ཟེར་ན་འདི་ལོའི་ཉིའུ་ཡོག་བདེ་ཆེན་ཞིང་སྒྲུབས་ཐེངས་མ་གཉིས་པ་དེའི་སྐོར་དྲི་བ་རེད་འདུག ང་ནི་གནམ་གཤིས་གྲང་ངར་ཅན་གྱི་ས་ཆ་རུ་སྐྱེ་ཚར་བྱུང་ཡང་རྒྱ་བལ་སོགས་ཚ་རོང་ནང་དུ་ལོ་མང་རིང་གསོན་བསྲེགས་བྱེད་དགོས་བྱུང་བའི་སྟབས་ཀྱིས་ཁ་རླུང་བུ་ཡུགས་གྲང་ངར་ཕར་ཞོག་ཐ་ན་རླུང་གྲང་མོའི་རྡུང་ཀྱང་དེ་མ་ཐག་ཏུ་ཚ་འཁྱམས་འདྲས་རྐྱེན་ནས་ནད་གཞི་འཁྲུགས་ཡོང་གི་འདུག དེ་ཡི་སྟབས་ཀྱིས་ཨ་རིའི་མངའ་སྡེ་མང་པོར་ཁྱི་སྨྱོན་བཞིན་དུ་འཁྱམས་ནས་ཐ་མ་ད་ལྟ་ང་བསྡད་ས་ཀི་ལི་ཧྥོ་ཉ་ཁར་མེལ་ཞེས་འབྱོར་ལྡན་སྐད་གྲགས་ཅན་གྱི་ས་ཆ་འདིར་ར་རྒན་གད་བཅར་གྱི་དཔེ་ལྟར་དུ་འདིར་ཨུ་ཚུགས་བྱས་ནས་བསྡད་པ་ཡིན། དེང་སང་ཉིའུ་ཡོག་གནམ་གཤིས་ཧ་ཅང་གྲང་བས་ད་ལོའི་བདེ་ཆེན་ཞིང་སྒྲུབས་ལ་བླ་མ་གཞན་ནས་གདན་འདྲེན་ཞུ་རོགས་ཞེས་བཤད་པ་ཡིན། ཁོང་ནས་མི་འདོད་བཞིན་དུ་ཁས་བླངས་དགོས་བྱུང་སོང་། ལོ་རྗེས་མར་གནམ་གཤིས་བཟང་བའི་དུས་ཚོད་དང་བསྟུན་ནས་གྲ་རྒྱས་པོ་ཞིག་འཚོགས་རྒྱུའི་དམ་བཅའ་བྱས་པ་ཡིན་ཁོང་ནས་ཀྱང་མོས་མཐུན་གནང་སོང་།
དེ་རིང་གི་ཉིན་ཐོ་དེ་བྲིས་ནས་ཉལ་སར་སོང་ནས་གཉིད་ཡུར། 

Monday, November 18, 2013

གཟའ་ཟླ་བའི་བདེ་ཆེན་ཞིང་སྒྲུབས་ཀྱི་ཉིན་མོ།

བོད་པས་ཁྲིམས་ལ་སྦྱར་བའི་དམར་ཤོག་གི་འགོ་གཙོ་ལྔ།
ཉིན་མོ་འདི་ནི་འཆར་ཅན་ལྟར་དུ་ཡོད་པའི་གཟའ་ཟླ་བའི་བདེ་ཆེན་ཞིང་སྒྲུབས་དེ་ཡིན་པས་ཆུ་ཚོད་ལྔ་པའི་སྐབས་སུ་འཚོགས་ཁང་ནང་དུ་སོང་། སྐད་བསྒྱུར་བྱམས་པ་མཐར་ཕྱིན་ཀྱང་ཕེབས་འདུག་སྟབས་ཆོས་བཤད་མདོར་བསྡུས་དང་ཉེ་ཆར་ཕི་ལིའི་པེན་ལ་རྒྱ་མཚོའི་རླུང་འཚུབ་ཀྱིས་རྐྱེན་པས་མི་གྲངས་གཅིག་ཁྲི་ལྔ་སྟོང་ཙམ་རྐྱེན་འདས་སུ་གྱུར་པས་དེ་རྣམས་ཀྱི་ཆེད་དུ་འོད་ཆོག་རྒྱས་པ་ཉིད་བཏོན། མདུན་སྐྱེད་འོད་ཞུའི་སྐབས་སུ་རྫོགས་རིམ་ལ་སྟོང་ཉིད་སྐོར་འགྲེལ་བཤད་དང་སྒོམ་བྱེད་པའི་སྐབས་སུ་ཅི་ཡང་མི་དྲན་པ་ནག་ཐོམ་མེར་སོང་བ་ལྟ་བུ་མ་ཡིན་པར་སེམས་ལ་ངར་ཆ་དང་གྲུང་ཆ་སོགས་དགོས་རྒྱུ་གལ་ཆེན་ཡིན་ཚུལ་མདོར་བསྡུས་ལུང་དོན་དང་སྦྲགས་ནས་བཤད། དེ་རིང་གི་བདེ་ཆེན་ཞིང་སྒྲུབས་བསྔོ་བ་སྨོན་ལམ་གྱིས་ལེགས་པར་གྲུབ། 
ནང་དུ་འབྱོར་ནས་འཛམ་གླིང་གི་སྒེའུ་ཁུང་ནང་ནས་རྒྱངས་ལྟ་ཞིག་བྱས་དུས་ཉེ་ཆར་སི་པན་ནང་དུ་གཏན་བཞུགས་བོད་མི་འགའ་ནས་རྒྱ་ནག་གི་སྲིད་འཛིན་ཟུར་པ་ཧོས་ཅིན་ཐོའུ་རྒྱ་ནག་ནང་དུ་གྲངས་ཉུང་མི་རིགས་དང་མ་ཟད་བོད་མི་སྡེབས་གསོད་བྱས་པའི་ནག་ཉེས་ཀྱི་ཁྲིམས་གཏུགས་བྱས་པའི་དོན་འབྲས་སུ་ཧོས་ཅིན་ཐོའུ་གཙོས་པའི་རྒྱ་ནག་དམར་ཤོག་གི་འགོ་གཙོ་མི་ལྔ་ལ་ཁྲིམས་ཆད་ཕོག་ནས་ནག་ཉེས་ཅན་གྱི་མི་ལྔ་པོ་འདི་གང་དུ་སོང་ཀྱང་འཛིན་བཟུང་བྱེད་དགོས་པའི་པར་དང་མིང་སོགས་ཆ་ཚང་ངོ་དེབ་འགའ་ཡི་ནང་དུ་མཐོང་སོང་། 
ཁྲིམས་ལུགས་ཀྱི་སློབ་སྦྱོང་གང་ཡང་མེད་པའི་བོད་འབྲོག་པའི་བླ་རྒན་ངས་གནས་ཚུལ་འདི་འདི་མཐོང་བ་དང་མཉམ་དུ་རང་གིས་རང་ལ་དྲི་བ་ཧ་ཅང་མང་པོ་ཞིག་འཚང་ཁ་རྒྱབས་ནས་སླེབས་སོང་བ་མ་ཟད་ཁོག་དགད་ཀྱང་རང་དབང་མེད་པར་ཐེངས་འགའ་ཤོར་སོང་། དེ་སང་དངོས་ཡོད་གནས་ཚུལ་སྤྱིར་འཛམ་བུ་གླིང་དང་ལྷག་པར་རྒྱལ་ཁབ་ཚོགས་སྡེ་ཁག་གང་ལ་བལྟས་ཀྱང་དཔུང་། རྒྱུ། དབང་། གསུམ་གྱིས་ཁ་ལོ་བསྒྱུར་ནས་ཁྲེལ་མེད་ཁྲམ་པ་མགོ་འཕངས་མཐོ་བ་ལས། དྲང་བདེན་དང་། ཐོབ་ཐང་། གཉོམ་ཆུང་གསུམ་ནི་ཆོ་ག་མེད་པའི་ཡུགས་ས་མོ་རྒྱབ་ཆད་ལྟ་བུ་ཞིག་ཏུ་སོང་བ་ནི་ཉེ་བའི་ཆར་འཛམ་གླིང་མཉམ་འབྲེལ་འཐུས་ཚོགས་ནས་ཁ་ནས་དམངས་གཙོ་དང་ཐོབ་དང་ཞེས་གླེང་བཞིན་དུ་ཟུར་ནས་ཁྲམ་པ་ལ་དཔའ་དར་གྱི་དཔེ་ལྟར་དུ་ད་ལྟའི་རྒྱ་ནག་གཞུང་གི་བྱེད་སྟངས་ལས་སྟངས་འདི་ཕྱི་གསལ་ནང་གསལ་ཡིན་བཞིན་དུ་མཉམ་འབྲེལ་རྒྱལ་ཚོགས་ཀྱི་ཁོངས་སུ་བཅུགས་པ་འདི་ལ་བལྟས་ན་ཤེས་གསལ་རེད།
དེ་རིང་གི་ཉིན་ཐོ་དེ་གཏངས་ནས་གཉིད་དུ་ཡུར།

Saturday, November 16, 2013

སངས་རྒྱས་སྨན་བླའི་ཆོས་ཚོགས་ལ་སོང་བའི་ཉིན་མོ།

སངས་རྒྱས་སྨན་བླའི་ཆོས་ཚོགས་ནང་དུ་ཡོད་པའི་རྒྱལ་བ་བྱམས་པའི་ལྷ་ཁང་།
ཉིན་མོ་འདི་ནི་སྔ་ནས་དུས་ཆད་བྱས་པ་ནང་བཞིན་ངོས་ཀྱི་དགེ་ཕྲུག་ཨ་མ་སུས་སིན་དང་། ཁོར་ཡུག་སྲུང་སྐྱོབ་ཀྱི་ལས་བྱེད་གྲོགས་པོ་རེའི་བྷོབ་གཟའ་མི་གཉིས་བཅས་ང་ཚོ་མི་བཞི་པོ་ཞོགས་པ་ཆུ་ཚོད་དགུ་པའི་ཐོག་ནས་Santa Cruz ལ་ཡོད་པའི་དགེ་ལུགས་པའི་བླ་མ་བཟོད་པའི་སངས་རྒྱས་སྨན་བླའི་ཆོས་ཚོགས་སུ་སོང་། འདི་ནས་སྐར་མ་བཞི་ཙམ་ལ་འགྲོ་དགོས་འདུག ཆོས་ཚོགས་ཀྱི་ཁོར་ཡུག་ནི་འཇམ་ཞིང་དབེན་ལ་མཐའ་སྐོར་གྱི་ཤིང་སྡོང་གི་རྩེ་རུ་བྱ་འཇོལ་མོ་དང་། ཤིང་འབྲུ་བྱེའུ་མཆུ་རིང་སོགས་ཀྱིས་དྲུག་འགྱུར་གྱི་གླུ་དབྱངས་འཐེན་ཅིང་ལམ་ཟུར་སོགས་སུ་མ་བཏབས་ཀྱང་རང་བྱུང་གིས་སྐྱེས་པའི་མེ་ཏོག་ཁ་དོག་སྣ་ཚོགས་མིག་ལམ་ལ་མཛེས་ཤིང་གཡས་གཡོན་གྱི་ལྗོན་ཤིང་རྣམས་ནི་རླུང་གིས་ཡོམ་ཡོམ་གྱིས་གནས་དེར་ཕེབས་པའི་སྐུ་མགྲོན་རྣམས་ལ་དགའ་བའི་ཕེབས་བསུའི་སྣེ་ལེན་བྱེད་པ་དང་མཚུངས། 
ཆོས་ཚོགས་ཀྱི་ལྷ་ཁང་མདུན་ཕྱོགས་སུ་རྒྱ་སྐྱེག་གི་མདོག་ལྟར་དམར་བའི་འཁོར་དུང་ལ་གསེར་གྱི་འབུར་དོད་ཀྱིས་རྒྱ་གར་ལནྫ་དང་བོད་ཀྱི་དབུ་ཅན་སོགས་ཀྱིས་སངས་རྒྱས་སྨན་བླའི་མཚན་སྔགས་སོགས་བྲིས་པ་མཇལ་ནས་གཡས་ཕྱོགས་སུ་ཐེངས་འགའ་སྐོར། ཟུར་དུ་ཡོད་པའི་མཆོད་རྫས་ཚོང་ཁང་ཆུང་ངུ་ཞིག་ཡོད་པ་དེར་འཛུལ་བས་ནང་དུ་ཕོ་གསར་ལྟས་གཟོ་དོད་མདོག་ཅན་ཞིག་ནས་ངོས་ལ་ལག་ཕྱག་རྒྱས་གུས་ཞབས་དང་བཅས་པས་ཁམས་འདྲི་དང་ལུང་པ་འདིའི་འགྲོས་ལྟར་དུ་ལག་འཇུ་དང་མཉམ་དུ་སོ་སོའི་མིང་དང་སྡོད་གནས་སོགས་ངོ་སྤྲོད་བྱས།  ཚོང་ཁང་དེར་ཇ་འཐུང་སའི་ཕོར་པ་མུ་མེན་གྱི་མདོག་ཅན་ཞིག་ལ་ཕྱི་ལོགས་སུ་བོད་དབྱིན་སྦྱར་མ། བོད་ཡིག་ལ། སྙིང་རྗེ་སྐྱེད། དབྱིན་ཡིག་ཏུ། Love With Compassion.ཞེས་བྲིས་པ་ཅན་ཞིག་ཡོད་པ་དེ་ཆ་གཉིས་རྒྱ་གར་ལྷ་ཕྱོགས་བདེ་ཆེན་ཞིང་སྒྲུབས་ཀྱི་འཚོགས་ཁང་སྦྱིན་བཀའ་དྲིན་ཅན་རྡེའུ་རའོ་ལ་ཆེད་དུ་ཉོས། 
ཆོས་ཚོགས་ནང་དུ་དབྱིན་ཇི་མི་ལྔ་དྲུག་ཞིག་ནས་བསྒོམ་བྱེད་བཞིན་འདུག ཟུར་དུ་ཡོད་པའི་རྒྱལ་བ་བྱམས་པའི་ལྷ་ཁང་ནང་དུ་སོང་ནས་བྱམས་སྨོན་ཚར་གཅིག་དང་བདེ་སྨོན་སོགས་བཏོན་ནས་ཅུང་དེར་བསྡད། མར་སྒོ་ཁར་དོན་པ་དང་མཉམ་དུ་བོད་པའི་གྲྭ་པ་མཐོང་མྱོང་ཅན་ཞིག་ལ་ཐུག་སོང་། ལུང་པ་དང་གདན་ས་སོགས་སྐད་ཆ་དྲིས་དུས་ཁོང་ནི་སྐྱེ་ཡུལ་ལྷ་ས་དང་རྒྱ་གར་ལྷོ་ཕྱོགས་སེ་ར་དགོན་པ་རེད་འདུག མུ་མཐུད་ནས་གླེང་མོལ་བྱས་དུས་སེ་ར་བྱེས་མཁན་ཟུར་བྱམས་པ་ཐེག་མཆོག་གི་དགེ་ཕྲུག་ཀྱང་རེད་འདུག ཉིས་སྟོང་བཞི་ལོར་བཞུགས་སྒར་ནས་༧གོང་ས་སྐྱབས་མགོན་ཆེན་པོ་མཆོག་གིས་ལམ་རིམ་འབྲིང་པོའི་གསུང་ཆོས་སྐབས་སུ་མཁན་ཟུར་བྱམས་པ་ཐེག་མཆོག་དང་། བཀྲ་ཤིས་ལྷུན་པོའི་མཁན་པོ་བཀའ་ཆེན་བློ་བཟང་ཚུལ་ཁྲིམས་སོགས་དང་གྲལ་གདན་གཅིག་པ་ཡིན། ཁོང་རྣམ་པས་ང་ལ་བཀའ་བརྒྱུད་བླ་མ་ཞེས་འབོད་ཀྱི་ཡོད། རྒན་མཁན་ཟུར་ནས་ང་ལ་དཔེ་མེད་མཉེས་པོ་གནང་ཡོད། མཁན་ཟུར་བྱམས་པ་ཐེག་མཆོག་ནི་དགུང་ལོ་མཐོ་ནའང་མཁན་ཟུར་ཡིན་པ་མ་ཟད་བོད་བསྟན་སྲིད་དོན་དུ་སེམས་ཤུགས་ཧ་ཅང་ཆེན་པོ་ཅན་ཞིག་ཡིན། 
ཆོས་ཚོགས་གཡས་གཡོན་དུ་པར་དང་གློག་བརྙན་ལེན་པ་སོགས་འཁྱམས་ཉུལ་འདོད་བློ་མ་ཁེངས་བར་དུ་བྱས། རྒན་བྱམས་པ་ཐེག་མཆོག་གི་དགེ་ཕྲུག་གྲྭ་བསམ་གཏན་ལགས་ནས་ང་ཚོ་མི་བཞི་པོར་ཁོང་གི་ཁང་པར་ཁྲིད་ནས་བོད་ཇ་དང་ཁམས་ཟས་སོགས་སྤྲད་བྱུང་། དེ་ནས་དགོང་མོ་རླངས་འཁོར་དུ་ཞུགས་ནས་དེ་རིང་སྐྱིད་རབ་དང་བཟང་རབ་སོགས་སྐད་ཆ་བྱེད་བཞིན་ནང་དུ་ལོགས།
དེ་རིང་གི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར།


Friday, November 15, 2013

ཁ་འདོན་བྱས་ནས་ནང་དུ་བསྡད་པའི་ཉིན་མོ།

ནང་དུ་འཇོག་ལ་བརྩོན་ཁུལ་བྱེད་པའི་པར།
དེ་རིང་ནི་ཐི་བྱ་ཚང་དུ་འཇུག་པའི་དཔེ་ལྟར་དུ་ཞོགས་པ་ནས་བཟུང་སྟེ་ས་མ་རུབ་བར་ང་རང་གཅིག་པུར་ནང་དུ་བསྡད། ལུང་པ་འདིའི་མི་རྣམས་ནི་ལས་ཀ་ཞིག་མེད་ན་རང་གར་ནང་དུ་ལྷོད་དལ་བྱེད་ནས་འདུག་མི་སྲིད་པའམ་གཏན་ནས་འདུག་མི་ཐུབ། ཕྱག་རྫོགས་སོགས་སེམས་ནང་གི་ཉམས་ལེན་སྟོང་ཉིད་ཀྱི་ལྟ་བ་དང་བྱང་སེམས་སོགས་རྒྱ་ཆེར་མ་ཤེས་ཀྱང་། ང་ནི་ཁ་འདོན་དང་དཔེ་ལྟས་ཚུན་བྱེད་ནས་ཉི་མ་ནང་དུ་ཇ་འཐུང་བཞིན་འདུག་རྒྱུ་ཡོད་པའི་གོ་སྐབས་ལས་སྐྱིད་པ་ཞིག་མེད། 
དེ་རིང་སྔ་དྲོ་ཁ་འདོན་རྣམས་ཚར་བར་བྱས་ནས་དེ་སྔོན་པོར་ལེན་ཌི་ཆོས་གྲོགས་ཤེས་རབ་སྐལ་ལྡན་མདུན་ནས་གཡར་བའི་རི་བོ་དགེ་ལུགས་པའི་ཆོས་སྤྱོད་སྣ་ཚོགས་ཀྱི་འགྲེལ་བ་ཞེས་པའི་དེབ་དེའི་ནང་ནས་རྗེ་རིན་པོ་ཆེས་མཛད་པའི་རྟོགས་བརྗོད་མདུན་ལེགས་མ་ལ། ཞང་སྟོན་བསྟན་པ་རྒྱ་མཚོས་མཛད་པའི་འགྲེལ་བ་དེ་ལ་དཔེ་མཇལ་ཞུས་སྐབས་རྒྱུད་སྡེ་བཞིའི་སྤྱི་ཁོག་དང་། སྤྱི་འགྲོས་སོགས་ཁ་གསལ་གནང་བ་མ་ཟད་རྒྱུད་སྡེའི་ཁོང་སོགས་གསལ་པོར་གསུངས་འདུག་པས་སེམས་ལ་ཕན་པོ་བྱུང་། ང་ཡི་སྤུན་ཆེ་བ་དེ་དགེ་ལུགས་པའི་བླ་མ་ཞིག་ཡིན་པའི་སྟབས་ཀྱིས་ང་ཚོའི་ནང་མི་རྣམས་དགོང་འཚོགས་ཁ་འདོན་སྐབས་སུ་ཉིན་གཅིག་ལ་བར་ཆད་ལམ་སེལ་དང་བསམ་པ་ལྷུན་འགྲུབ་སོགས་རྙིང་མ་བཀའ་བརྒྱུད་གྱི་སྨོན་ལམ་སྐོར་དང་། ཉིན་གཅིག་ལ་དགེ་ལུགས་པའི་རྟོགས་བརྗོད་མདུན་ལེགས་མ་དང་། བདེ་སྨོན་ཕུལ་བྱུང་མ་སོགས་རེས་མོས་བྱེད་ནས་འདོན་སྲོལ་ཡོད། ང་ནི་རྗེ་རིན་པོ་ཆེའི་གསུངས་དེ་རྣམས་ལ་བརྗོད་བྱ་དང་རྗོད་བྱེད་གང་གི་ཆ་ནས་ཡིན་ཀྱང་སེམས་ཀྱི་རྟིང་ནས་དད་པ་སྐྱེ་གི་ཡོད། དགོང་མོ་ཨ་མ་སུས་སིན་དང་མཉམ་དུ་ཚོང་ཁང་དུ་སོང་ནས་ཨ་སྒོར་བརྒྱད་བཅུའི་བདུན་ཕྲག་གཅིག་གི་ཟ་མ་རྣམས་གང་དགོས་ཉོས་ནས་ནང་དུ་འབྱོར། 

Saturday, November 9, 2013

སེམས་པ་སྐྱོ་བའི་ཉིན་མོ།

པོ་ཏ་ལའི་ཐང་ཆེན་གྱི་འགྲམ་དུ་རྒྱ་ཡི་དམག་སྦྱོང་བྱེད་བཞིན་པ།
ཞོགས་པ་ལངས་གཟུགས་པོའི་འཕྲོད་བསྟེན་གྱི་ཆེད་དུ་རྐང་འགྲོས་ཐུང་ཙམ་བྱས་ནས་ནང་དུ་འབྱོར་ཞིང་ཞོགས་ཟས་ལ་རོལ་ནས་ཁ་འདོན་རྣམས་ཚར་བར་བྱས། ངོས་ནི་དེང་སང་སེམས་པ་མ་སྐྱིད་པ་འདྲ་བོ་ཞིག་བྱུང་འདུག་སྟབས་རྒྱུ་རྐྱེན་གང་ཡིན་རྩད་གཅོད་བྱས་དུས་རྒྱུ་རྐྱེན་གཉིས་རང་རྙེད་བྱུང་། གཅིག་ནི་ཉེ་ཆར་བོད་ནས་གྲོགས་པོ་ཞིག་ནས་ངོས་ཀྱི་ལུང་པ་དང་དགོན་པའི་པར་སོགས་གཏངས་བྱུང་བས་ཉིན་ལྟར་རེ་ཞིག་ཕ་དགོན་དང་། ཕ་ཡུལ་སོགས་དྲན་འདུག་པ་མ་ཟད་ངོས་ཀྱི་དགོན་པའི་ཆོས་གྲོགས་བླ་མ་ཁ་ཤས་གཅིག་རྗེས་གཉིས་མཐུད་ཕྱི་མའི་ལྔ་ལམ་དུ་གཤེགས་སོང་བས་རེད་འདུག 
རྒྱུ་རྐྱེན་གཅིག་ནི་ཉེ་ཆར་ནག་ཆུ་འབྲི་རུ་ཞན་ནང་དུ་རྒྱ་མིའི་དྲག་གནོན་ཚབ་ཆེན་བྱས་ནས་ངོས་ཀྱི་གནས་གྲོགས་རྒྱ་མིས་འཛིན་བཟུང་བྱས་ནས་ལོ་བདུན་བཙོན་འཇུག་ཁྲིམས་ཐག་བཅད་ཡོད་པའི་སྐད་ངན་དེ་གོ་བས་རེད་འདུག ༡༩༩༧ ལོར་མི་འདོད་བཞིན་དུ་ཕ་ས་དང་སྐྱིད་པའི་ཕ་དགོན་ཆོས་གྲོགས་ནང་མི་གཉེན་འབྲེལ་དང་བཅས་པ་མི་འདོད་བཞིན་དུ་བཞག་ནས་བོད་ནས་རྒྱ་གར་ལ་སྐྱབས་བཅོལ་ལ་ཡོང་བའི་སྐབས་སུ་མདོ་དབུས་ཁམས་གསུམ་ནས་འདུས་པའི་སྐྱ་སེར་བཞི་བཅུ་ཐམས་པ་ཡོད། དེའི་ནང་ནས་མང་ཤོས་ནི་ཁམས་ནང་ཆེན་དང་སྡེ་དགེ་སོགས་ནས་ཡིན། ནག་ཆུ་འབྲི་རུ་ནས་ཡིན་པའི་བཙུན་མ་གསུམ་དང་གྲྭ་གཅིག་གྲྭ་བཙུན་བཞི་ཡོད་པའི་ཁོངས་ནས་གྲྭ་བསྟན་འཛིན་རབ་བཟང་ད་རེས་ནག་ཆུའི་འབྲི་རུའི་དོན་རྐྱེན་དེ་མི་མང་ལ་སྐུལ་སློང་བྱེད་མཁན་གཏེ་བོ་ཡིན་པའི་ནག་ཉེས་ཀྱིས་རྒྱ་ནག་གཞུང་ནས་ཁོང་ལ་ལོ་བདུན་གྱི་བཙོན་འཇུག་ཁྲིམས་ཐག་བཅད་པའི་སྐད་ངན་དེ་གོ་བས་རེད་འདུག ཁོང་ནི་ངོས་ཀྱི་གནས་ཁྲ་མོ་བསྐོར་བའི་གནས་རོགས་དང་། བྱ་གོ་རྒན་བསད་པའི་སྡིག་རོགས་ཞེས་པའི་དཔེ་ལྟར་དུ་བོད་ཉི་མ་ལྷ་ས་ནས་རྒྱ་གར་བཞུགས་སྒར་རྡ་རམ་ས་ལའི་བར་དུ་ཤི་ན་མཉམ་ཤི་དང་གསོན་ན་མཉམ་གསོན་གྱིས་ལ་ཆེན་ཐོད་ལ་བླངས། ཐང་ཆེན་བྲང་གིས་གཤགས་ནས་ཡོང་བའི་ལམ་གྲོགས་རྒྱལ་གཅེས་དཔའ་བོ་ཁོང་དྲན་ཐེངས་རེར་ཡང་སྐྱར་ང་ཡི་སྙིང་ལ་སོས་མེད་ཀྱི་རྨ་ཁ་གསར་པ་ཞིག་བྱས་སོང་། གང་ལྟར་གོང་གི་རྒྱུ་རྐྱེན་དེ་གཉིས་པོའི་རྐྱེན་བྱས་ནས་དེང་སང་གཞིས་ལུས་བོད་མི་རྣམས་ལ་སེམས་ཁྲལ་ལྷག་མ་ཞིག་དང་ངོས་ལའང་འདས་པའི་མི་ལོ་ལྔ་བཅུ་ང་བཞིའི་རིང་༧གོང་ས་སྐྱབས་མགོན་ཆེན་པོ་མཆོག་གཙོས་པའི་གཞི་བྱེས་བོད་རིགས་འདས་གསོན་རྣམས་ཀྱིས་བསད་རྡུང་གི་ཁྲག་མཚོ། མནར་གཅོད་ཀྱི་མུག་ཤི། ཟས་བཅད་ཀྱི་བཀྲེས་སྐོམ། འབོད་ཚིག་གི་མིག་ཆུ། མེར་བསྲེགས་ཀྱི་བསུར་དྲི་སོགས་ཡ་ང་བའི་དཀའ་སྡུག་ལ་བསམ་ནས་ཁྲ་ཆུང་སེམས་ལ་མི་ཐེག་པའི་ཁུར་པོ་ལྷག་མ་ཞིག་ཀྱང་སྤྲད་བྱུང་།

Sunday, November 3, 2013

པདྨ་འོད་གསལ་གླིང་ལ་སོང་བའི་ཉིན་མོ།

ཞྭ་བེར་གྱོན་ནས་བསྒྲལ་ལས་བྱེད་བཞིན་པ།


ཉིན་མོ་འདི་ནི་སྔ་མོ་ནས་དུས་ཆད་བྱས་པ་ནང་བཞིན་པདྨ་འོད་གསལ་གླིང་ལ་འགྲོ་དགོས་པས་ངོས་ཀྱི་ཨ་མ་སུས་སིན་ངེད་གཉིས་ཞོགས་པ་ཆུ་ཚོད་ལྔ་པའི་སྐབས་སུ་ལང་ནས་སོང་། ཉེ་ཆར་བླ་མ་མཐར་ཕྱིན་རིན་པོ་ཆེ་གློ་བུར་དུ་འདས་ནས་བཟུང་སྟེ་པདྨ་འོད་གསལ་གླིང་སྔགས་བཙུན་རྣམས་ནི་སྐྱབས་མེད་དྭ་ཕྲུག་ཁྱུ་གཅིག་དཔེར་ན་ཁྱིམ་ཚང་ནང་གི་ཕ་རྒན་མེད་པའི་ནང་མི་ཞིག་ཏུ་གྱུར་འདུག ཉེ་བའི་ཆར་སྔགས་པ་བསོད་ནམས་ཀྱི་རེ་བ་ལྟར་བདུད་འཇོམས་གཏེར་གསར་ཕུར་པ་སྤུ་གྲི་རེག་ཕུང་གི་སྒོ་ནས་སྲི་མནན་ཞིག་དགོས་རྒྱུ་དེ་ཡིན། དགོན་ནང་དུ་ཆུ་ཚོད་དགུ་ཙམ་འབྱོར། བོད་ནས་ཕེབས་པའི་སྤྲུལ་སྐུ་ཞིག་དང་སྔགས་པ་བསོད་ནམས་སོགས་སྐྱ་སེར་བཞི་བཅུ་ཙམ་ནས་ངོས་ལ་ཕེབས་སྒུག་བྱས་འདུག ཕུར་པ་སྤུ་གྲི་རེག་ཕུང་སྟོད་ལས་བྱང་ཆུབ་སྒྲུབ་པ་དང་། སྨད་ལས་དགྲ་བགེགས་བསྒྲལ་བ་གཉིས་ཀྱི་སྒོ་ནས་ཉིན་གྲངས་ཧྲིལ་པོ་གསུམ་རིང་ཞོགས་པ་ཆུ་ཚོད་བརྒྱད་ནས་བཟུང་དགོང་མོ་ཆུ་ཚོད་བདུན་བར་སྒྲུབས་ཞག་ཚང་བར་བྱས།  ངོས་ནི་བཀའ་རྙིང་གཉིས་ཀྱི་འཚོགས་པ་གང་འདྲ་ཞིག་ཡོད་ཀྱང་ཆོ་ག་ཕྱག་ལེན་འདོན་རྟ་དབྱངས་སོགས་ལ་ངོ་གནོང་མི་དགོས་པ་མགོ་མཐོ་ལིང་ངེར་གྲལ་མགོར་འདུག་གཟོད་པ་འདི་ནི་ཐུད་སྣུམ་པ་མར་གྱི་དྲིན་གྱི་དཔེ་ལྟར་བཀའ་དྲིན་ཟླ་མེད་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེའི་སྐུ་དྲིན་གྱིས་ཡིན་པ་ཤེས་ཚོར་བྱུང་། གཡས་ཕྱོགས་ཀྱི་ཁྲི་ཐོག་ཏུ་ཡོད་པའི་བོད་ནས་ཕེབས་པའི་སྤྲུལ་སྐུ་དེས་བསྒྲལ་ལས་སྐབས་སུ་གཡབ་དར་བཟུང་ལུགས་དང་འགུགས་རྒྱ་བཅའ་ལུགས་ཚུན་མཆོད་གཡོགས་ཕྱི་གླིང་བའི་མགོ་སེར་རྣམས་ནས་ཁྲིའུ་ཟུར་ནས་ཡར་བསླབ་དགོས་པ་མཐོང་བའི་སྐབས་སུ་སེམས་ལ་གནོང་འགྱོད་ཀྱི་མྱ་ངན་དང་། གདོང་ལ་ངོ་ཚས་དམར་པོར་གྱུར་སོང་། ཉིན་ཐ་མ་མནན་པའི་སྐབས་སུ་བླ་མ་བསོད་ནམས་ཀྱི་འདོད་པ་ལྟར་དུ་སྤྲུལ་སྐུ་ངེད་གཉིས་ནས་ཞྭ་ནག་བེར་ཐུལ་སོགས་འཆམས་གོས་གྱོན་ནས་མནན་དོང་ཁར་སོང་། སྲི་མནན་སྐབས་སུ་ཕྱི་ཡི་ཨོ་ཟོབ་ཙམ་མ་ཡིན་པར་ཚེ་ཁྲུས་ལུང་གི་དགོངས་པའི་དམིགས་པ་གང་ཤེས་ཀྱིས་ལེགས་པར་གྲུབ་པར་བྱས། ཆོས་ཚོགས་དང་མི་མང་ནས་གཏངས་རག་དང་སྐུ་འགྱེད་ཀྱིས་མདུན་ཅོག་ཁ་གཏགས་དང་ཤོག་ཁུག་གིས་ཁེངས་སོང། དེ་རིང་གཙོར་བྱས་ཉིན་གསུམ་གྱི་ཆོས་ཕྱོགས་ཀྱི་བགྱི་བྱ་རྣམས་ལེགས་པར་གྲུབ་ནས་ཨ་མ་སུས་སིན་ངེད་གཉིས་ཀྱང་མགྲོན་པོ་རང་ཁྱིམ་དུ་ལོགས་པའི་དཔེ་ལྟར་དུ་ནང་དུ་འབྱོར།       
ང་བདག་གཉིས་འཛིན་དགྲ་བོ་རུམ་དུ་བཅུགས།།
 ལས་ངན་བུ་ཆུང་དམ་སྲི་འདྲེ་རུ་བཟུང་།
ཕ་རྒན་སྔགས་ནག་ཧོམ་ཁུང་ཁ་ནས་ལྡིང་།
དུས་མཐའི་སྔགས་པ་རྣམས་ལ་སྙིང་རེ་རྗེ།།
སྲོག་སྡོམ་གཟེར་བཞིའི་གོ་ཡུལ་ཙམ་ཡང་མེད།།
ཚེ་ཁྲུས་ལུང་གི་གནད་རྣམས་མ་རྟོགས་པ།།
བེར་ཐུར་ལྭ་བ་གྱོན་ནས་རྫིག་ཉམས་སྟོན།།
ང་འདྲའི་སྔགས་རྫུན་རྣམས་ལ་ཡིད་རེ་སྐྱོ།།
ཞེས་རང་ཉིད་ཀྱིས་རང་ལ་ཁྲེལ་འདེབས་རྩོམ་ཐུང་འདི་དང་དེ་རིང་གི་ཉིན་ཐོ་བཅས་མཉམ་དུ་གཏངས།།