Saturday, February 9, 2013

དགུ་ཐུག་འཐུང་བའི་ཉིན་མོ།

ཟས་སྣ་དགུ་འདུས་ཀྱི་ཞིམ་པོའི་དགུ་ཐུག
ཉིན་མོ་འདི་ནི་བོད་ཟླ་བཅུ་གཉིས་ཀྱི་ཚེས་ཉེར་དགུ་དྲག་པོ་མངོན་ཕྲིན་ལས་ཀྱི་གཟེར་ཁ་སྤུ་གྲི་ལྟར་རྣོ་བའི་དུས་ཆེན་ཡིན་པས་རྒྱ་བལ་འབྲུག་གསུམ་གཙོས་ས་ཕྱོགས་གང་དུ་གནས་པའི་བོད་དགོན་ཡོངས་ནས་དགུ་གཏོར་ཆེན་མོ་ཞེས་ཆོས་ལུགས་སོ་སོའི་ཡི་དམ་དང་སྲུང་མ་ལ་འཕྲིན་བཅོལ་བྱེད་པའི་དུས་ཆེན་ཁྱད་པར་ཅན་ཞིག་ཡིན། ངོས་ཀྱང་མི་འདོད་བཞིན་དུ་བྱ་སྒྲོ་རླུང་གིས་ཁྱེར་བའམ་ཚེ་འདས་བར་དོ་ལ་འཁྱམས་པ་བཞིན་དུ་རི་བོ་ཧི་མ་ལ་་རྐང་འགྲོས་ཀྱིས་གཤགས་ནས་ད་བར་གནས་ལ་ངེད་མེད་ལུང་པ་འདྲ་མིན་དང་། གྲོགས་ལ་ངེས་མེད་མགོ་སེར་ནག་སོགས་རང་ཡུལ་ཕ་ལུང་ཕྱུགས་མོ་དང་། རང་དགོན་ཆོས་ར་ཁྲ་མོ་རྣམས་ལས་ཁ་བྲལ་ནས་མི་ལོ་བཅོ་ལྔ་ཏག་ཏག་དེ་རིང་འཁེལ་འདུག་པས་སེམས་སྐྱོ་གདུང་གིས་ཁེངསད་ལྟ་ནི་གཡར་པོའི་རྒྱལ་ཁབ་ཨ་རིའི་ནང་དུ་ཡོད། ཡར་ལངས་ཏེ་སྐྱོ་བའི་མིག་ཆུ་ཕྱི་བཞིན་མཆོད་པ་བཤམས་ནས་ཁ་འདོན་རྣམས་ཚར་བར་བྱས་ཞིང་ཐུགས་སྒྲུབ་གསང་ཐིག་ཕུར་པའི་ཚོགས་རྒྱས་པ་ཞིག་བཏོན། དགོང་མོར་བོད་རིགས་དབུས་གཙང་སོགས་ཀྱི་ལུགས་སྲོལ་ལྟར་དུ་ཟས་སྣ་གུ་འཛོམས་པའི་ཐུག་པ་ཞིག་བཀོལ་ནས་ངོས་ཀྱི་དགེ་ཕྲུག་ཆོས་དབྱིངས་སྒྲོལ་མ་ལྷན་དུ་ཞིམ་རབ་དང་ཡག་རབ་སོགས་ཀྱི་ངོ་བསྟོད་བྱེད་རེས་བྱས་ནས་མཉམ་འཐུང་བྱས། བོད་ཁམས་སོགས་དང་ཁྱད་པར་དུ་ངོས་ཀྱི་ལུང་པའི་ནང་ནས་དགུ་ཐུག་འདི་འཐུང་སྲོལ་མེདངོས་ཀྱི་ལུང་པར་མཚོན་ན་ཉིན་མོ་འདིར་དགུ་མགོ་ཟ་ཟེར་ནས་དགུན་ཁ་གཤས་པའི་ཟོག་ལུག་སེམས་ཅན་རྣམས་ཀྱི་མགོ་སུག་རྣམས་ཉིན་མོ་འདིར་བཙོ་བསྲེགས་བྱེད་ནས་ཟ་སྲོལ་ཡོད། ལྷག་པར་དུ་ཉིན་མོ་འདིར་ཁྱིམ་གཙང་མ་བྱེད་ཅིང་ཡུལ་པའི་ཁང་རྒན་རྣམས་སུ་ལོ་མང་རིང་ཆགས་པའི་དུད་དྲེག་ནག་པོ་རྣམས་གཞུང་ལམ་དང་། འཁྱག་ཐོག་ཏུ་མདའ་གཞུའི་དབྱིབས་བྲི་ནས་རྩེ་མོ་སྒྲ་གཅན་ཕྱོགས་སུ་བསྟེན་པའམ་བྱང་ཤར་སོགས་སུ་བསྟེན་པའི་ལུགས་སྲོལ་ཡོད། 
དུས་ཚོད་འདི་ཡི་སྐབས་སུ་བོད་ལ་གྲངས་ངར་ཧ་ཅང་ཆེ་བས་ངོས་ཀྱང་ན་མཉམ་བྱིས་པ་སྣབས་ལུགས་རྣམས་དང་ལྷན་འཁྱག་པའི་ཐོག་ནས་རྩེད་མོ་རྩེ་བ་སོགས་དྲན་ཡུལ་ལ་ལྷང་ངེར་འདུགས་པ་སྣབས་ལུད་རྣམས་ཀྱི་ཁྲོད་ནས་འཁྱག་སྒར་གཞུར་བ་དང་། ཐལ་རྩེད་རྩེ་བ་སོགས་ད་ལྟ་དྲན་པའི་སྐབས་སུ་མི་ཚེའི་ནང་གི་སྐྱིད་ཤོས་དེ་སྐབས་དེ་དུས་ཡིན་པར་དྲན་སོས་ཀྱི་འདུག 
དེ་རིང་གི་ཉིན་ཐོ་མདོར་བསྡུས་ཞིག་གཏངས་ནས་ཉལ་སར་སོང་གཉིད་དུ་ཡུར། 
ཁ་སང་གི་ཀ་རྩོམ་འཕྲོ།  
པ་ལོ་རྒྱབ་ཏུ་བཅིངས་པའི་སྒྲུབ་བརྒྱུད་ཀྱི་མངའ་བདག།
ཕ་རྒན་མར་པ་ལོ་ཙཱའི་གདམས་ངག་གི་ཁྱད་ཆོས།།
བ་གླང་རྫི་ཡན་གྲོལ་བའི་བདེ་སྟོང་གི་མྱུར་ལམ།།
མ་ཡེངས་ཕྱག་རྒྱ་ཆེན་པོའི་ལྟ་བ་དེ་སྐྱོངས་ཤིག།

No comments:

Post a Comment