གཟའ་ཟླ་བའི་བདེ་ཆེན་ཞིང་སྒྲུབས་ཉིན་མོ།

འོད་དཔག་བདེ་བཀོད་ཐང་སྐུ།

ཞོགས་པ་ལངས་ནས་གཟུགས་པོའི་འཕྲོད་བསྟེན་གྱི་ཆེད་དུ་གོམས་འགྲོས་ཀྱིས་ཆུ་ཚོད་ཕྱེད་ཙམ་རིང་སོང་ནས་ནང་དུ་འབྱོར། ཞོགས་ཟས་ཚར་མ་ཐག་ཏུ་ཁ་འདོན་རྣམས་གྲུབ་པར་བྱས། དེ་རིང་ནི་བདུན་རེའི་གཟའ་ཟླ་བའི་བདེ་ཆེན་ཞིང་སྒྲུབས་ཀྱི་ཉིན་མོ་དེ་ཡིན་པས་དགོང་མོ་ཆུ་ཚོད་དྲུག་པའི་སྐབས་སུ་འཚོགས་ཁང་ནང་དུ་སོང་བས་མི་མང་ཕལ་ཆེར་ཉི་ཤུའི་ཁ་ལྷག་ཞིག་སླེབས་འདུག དེ་རིང་ནི་སྐད་བསྒྱུར་མེད་སྟབས་ངོས་ཀྱི་དབྱིན་ཇིའི་ཆག་རོ་དེ་རྒྱབས་ནས་ཆོས་བཤད་མདོར་བསྡུས་བྱས། ལར་ནི་ངོས་ཀྱི་དགེ་ཕྲུག་རྣམས་ནི་ངོས་ཀྱི་དབྱིན་ཇི་ཆག་རོ་དེ་ལ་ཧ་ཅང་དགའ་བོ་བྱེད་ཀྱི་འདུག དེ་རིང་གི་ཆོས་གྲལ་དུ་མི་གསར་པ་ཁ་ཤས་ཞིག་འདུག་པས་དེ་རྣམས་ཀྱི་ཆེད་དུ་འོད་དཔག་མེད་ཀྱི་བསྙེན་པའི་ལུང་ཞིག་ཀྱང་བཏོན་པ་ཡིན། འཚོགས་པ་ཚར་བ་དང་མཉམ་དུ་ནང་དུ་འབྱོར་ནས་དེ་རིང་གི་ཉིན་ཐོ་མ་ཆད་ཙམ་ཞིག་གཏང་ཞིང་ཉལ་སར་སོང་ནས་གཉིད་དུ་ཡུར།