Tuesday, July 23, 2013

བླ་མ་མཐར་ཕྱིན་ལགས་ཞིང་དུ་ཕེབས་པའི་སྐད་ངན་གོ་བའི་ཉིན་མོ།

ཞིང་གཤེགས་བླ་མ་མཐར་ཕྱིན་རིན་པོ་ཆེ་དང་མཉམ་དུ།
དེང་སང་ཨ་རིའི་རྒྱལ་ས་ཉིའུ་ཡོག་ཏུ་འབྱོར་ནས་ཉིན་ཤས་ཡིན། ཉིའུ་ཡོག་གི་རྒྱལ་ས་འདི་ནི་འཛམ་གླིང་མི་རིགས་འདྲ་མིན་འདུས་བསྡོད་བྱེད་ས་ཆེས་སྐད་གྲགས་ཅན་གྱི་ས་ཚིག་ཞིག་ཡིན། གནམ་གཤིས་ཚ་གྲང་གི་འགྱུར་ལྡོག་གནས་བབས་མི་མཚུངས་ཤིང་དགུན་དུས་གྲངས་ངར་ལ་བོད་ཁམས་ལུང་པ་དང་འདྲ་ཞིང་། དབྱར་དེང་སང་དུས་སུ་ཚ་བ་དང་གཞའ་ཚན་ཧ་ཅང་ཆེ་ཞིང་རྒྱ་གར་ལྡི་ལི་དང་འདྲ། མི་རྣམས་རང་བཞིན་གྱིས་བྲེལ་ཟིང་ཆེ་ཞིང་ཟས་གོས་དང་ཁང་གླ་སོགས་ཀྱི་རིན་གོང་ཧ་ཅང་ཆེ་བས་མི་རྣམས་ལྟོ་གོས་ཁོ་ནའི་ཆེད་དུ་ཉིན་མཚན་བསྟུད་མར་ལས་ལ་བྲེལ་ཆེ་ནས་མི་མང་པོ་ལ་སེམས་ཁམས་མི་བདེ་བ་དང་། གཉིད་མི་ཁུག་པ་སོགས་ཀྱིས་ལུས་སེམས་གཉིས་ཀར་དཀའ་ངལ་མེད་མཁན་ཕལ་ཆེར་མེད། ངོས་ནི་ཁ་སང་ཉིན་འགའ་ཡི་སྔོན་ནས་ཕྱི་ཕྱོགས་སུ་འགྲུལ་བཞུད་ཞིག་གི་ཆེད་དུ་དང་ངོས་ཀྱི་སྤུན་མཆེད་འགའ་དང་ཐུག་འཕྲད་ཀྱི་ཆེད་དུ་མི་ཡོང་ཁ་མེད་གྱུར་སོང་མ་གཏོགས་གྲོང་ཁྱེར་འདིའི་ནང་དུ་བསྡད་འདོད་གཏན་ནས་མེད། 
ད་ནང་ཞོགས་པ་ཁ་པར་གྱི་ཐིར་སྒྲ་ཞིག་ཡོད་པ་དེ་ནི་ངོས་ཀྱི་ཆོས་ཚོགས་ཀྱི་འགན་འཛིན་ཧར་ཌེའི་རེད་འདུག མོ་རང་ནས་གསུངས་ན་བླ་མ་མཐར་ཕྱིན་རིན་པོ་ཆེ་ཁ་སང་དགོངས་པ་རྫོགས་ཡོད་པའི་སྐད་ངན་དེ་རེད་འདུག  ངས་ནི་གཏམ་ངན་དེ་གོ་བ་དང་མཉམ་དུ་སེམས་མ་བདེ་བ་ཞིག་བྱུང་། གང་ཡིན་ཟེར་ན་བླ་མ་མཐར་ཕྱིན་ཁོང་ནི་ངེས་པ་དོན་གྱི་བསྔགས་པ་ཚད་ལྡན་ཞིག་ཡིན་པ་མ་ཟད་སྐྱབས་རྗེ་གདུང་སྲས་ཕྲིན་ནས་ནོར་བུ་རིན་པོ་ཆེའི་ཐུགས་སྲས་ཀྱི་སློབ་མ་ཡག་ཤོས་དེ་ཡིན། ནམ་རྒྱུན་ངོས་ལ་ར་གན་གསེར་རློམ་གྱིས་ཐུགས་རྩིག་ཧ་ཅང་ཆེན་པོ་གནང་ནས་སྔ་ལོར་ངོས་ཀྱི་དགེ་ཕྲུག་དགའ་ཡིས་བསྐུལ་མ་ལྟར་དུ་རིན་པོ་ཆེ་ནས་ངོས་ཀྱི་ཞབས་བརྟན་ཞིག་ཀྱང་འབྲི་མྱོང་ཡོད། ང་ནི་སྤྱིར་གཏང་བྱས་ན་རིས་སུ་མ་མཆིས་པའི་ཆོས་ལུགས་ཡོངས་ལ་དད་པ་དང་། སྐྱ་སེར་དང་སྔགས་བན་ལ་མ་ལྟོས་པར་གང་གི་ཐུགས་རྒྱུད་ལ་རྟོགས་པའི་བསྟན་པ་རིན་པོ་ཆེ་ཡོད་ན་གང་ཟད་དེ་ལ་དགའ་མོས་དང་དེའི་མདུན་ནས་ལེགས་བཤད་ཀྱི་ཤོ་ལོ་ཀ་རེའི་ཆེད་དུ་འབད་རྩོན་བྱེད་མཁན་ཞིག་ཡིན། 
སྔ་ལོར་བླ་མ་མཐར་ཕྱིན་རིན་པོ་ཆེའི་མདུན་ནས་བདུད་འཇོམས་གཏེར་གསར་ལས། ཕུར་པ་སྤུ་གྲི་རེག་ཕུང་གི་དབང་དང་ཁྲིད་སོགས་ཞུས་ནས་བླ་མ་དང་སློབ་མའི་འབྲེལ་བ་ཞིག་ཀྱང་ཡོད། ད་རེས་ཁོང་དགོངས་པ་གཞན་དོན་དུ་གཤེགས་པ་དེས་སེམས་པ་སྐྱོ་བ་ཚད་མེད་པ་ཞིག་བྱུང་ཀྱང་བྱ་ཐབས་བྲལ། ཁོང་ནི་ཕལ་ཆེར་༧གོང་སྐྱབས་མགོན་ཆེན་པོ་མཆོག་དང་དགུངས་མཉམ་ཡིན་ཅིང་ནམ་རྒྱུན་ཁྲག་མངར་མོའི་སྙུང་གཞི་དང་མ་ཟད་དུས་ངེས་དུ་ཁྲག་རླུང་སྟོད་འཚང་གི་སྙུང་གཞིས་ཟིན་ནས་ལོ་འགའ་ཡིན། འཁྲུངས་ཡུལ་བོད་མདོ་སྨད་འགུ་ལོག་ནས་ཡིན་ཅིང་ང་དགུ་ལོའི་ཡས་མས་སྐབས་སུ་བོད་རིགས་བྲོས་བྱོལ་བ་སྤྱི་མཚུངས་ལྟར་རྒྱ་གར་ལ་ཕེབས་ནས་ཨོ་རིའི་སའི་གཞིས་ཆགས་སུ་བཞུགས་གནང་འདུག ཨ་རིར་ནམ་ཕེབས་སོགས་ཀྱི་ལོ་རྒྱུས་ཞིབ་ཕྲ་མི་ཤེས་ཀྱང་ས་གནས་ཀི་ཧྥོ་ཉ་ང་བསྡད་ས་ནས་ཆུ་ཚོད་གཅིག་ཙམ་རིང་སོང་ན་ཁོང་གི་དགོན་པ་པདྨ་འོད་གསལ་གླིང་ཞེས་ས་ཁྱོན་ཆེ་ལ་ཁོར་ཡུག་གཙང་ཞིང་། ཟུར་དུ་ལོ་གསུམ་ཕྱོགས་གསུམ་གྱི་སྒྲུབ་སྡེ་ཡོད་པ་བདུད་འཇོམས་གཏེར་གསར་གྱི་ཆོས་བརྒྱུད་འཛིན་མཁན་བསྔགས་གྲྭ་ཕོ་མོ་སུམ་བཅུ་ཡས་མས་ཞིག་གཉུག་མར་གཏན་བསྡོད་བྱེད་མཁན་ཡོད། ང་ནི་ཁོང་ཚོའི་འཚོགས་པ་དང་དམིགས་བསལ་གྱི་མཛད་སྒོ་ཞིག་ཡོད་ནས་བཟུང་སྟེ་སྐུ་མགྲོན་གཙོ་བོ་བྱེད་ནས་མགྲོན་འབོད་བྱེད་ཀྱི་ཡོད།

No comments:

Post a Comment