Monday, December 29, 2014

འདི་ལོའི་བདེ་ཆེན་ཞིང་སྒྲུབས་ཉིན་ཐ་མ།

དཔོན་སློབ་མི་འབྲལ་ལྷན་ཅིག་འགྲོགས།། 
དེ་རིང་ནི་འཆར་ཅན་ལྟར་དུ་ཡོད་པའི་གཟའ་ཟླ་བའི་བདེ་ཆེན་ཞིང་སྒྲུབ་དེ་ཡིན། ཆུ་ཚོད་དྲུག་པའི་སྐབས་སུ་ཆོས་ཚོགས་སུ་སོང་བས་ངོས་ཀྱི་ཆོས་ཚོགས་དེ་མི་རྣམས་ཀྱིས་ཡོངས་སུ་ཁེངས་སོང་། 
དེ་རིང་ནི་༢༠༡༤ ལོའི་གཟའ་ཟླ་བའི་འཆར་ཅན་ལྟར་དུ་ཡོད་པའི་བདེ་ཆེན་ཞིང་སྒྲུབ་ཉིན་ཐ་མ་དེ་ཡིན། དགེ་ཕྲུག་ཡོངས་ལ་ལོ་གསར་འཚམས་འདྲི་དང་སྦྲག་དེ་རིང་གི་ཆོས་ཐུན་དབུ་འཛུགས་བྱས། དེ་རིང་གི་ཆོས་བཤད་སྙིང་པོ་རུ་མི་ཡི་ལུས་རྟེན་འདི་རྙེད་པའི་དོན་གོ་རུ་ལྟོ་གོས་སོགས་ཚེ་འདིའི་ཆེད་དུ་ཙམ་མ་ཡིན་པར་མི་ཡི་བཟང་སྤྱོད་དང་འབྲེལ་བའི་སེམས་ཡར་རྒྱས་གཏོང་སྟངས་སྐོར་བཤད། སེམས་ཡར་རྒྱས་གཏོང་སྟངས་ཐབས་ལམ་ཡག་ཤོས་ནི་ནང་པའི་ཆོས་ལ་སློབ་སྦྱོང་བྱེད་ནས་དཔེར་ན་མི་དགེ་བཅུ་སྤོང་གི་ཚུལ་ཁྲིམས་སོགས་ལག་ལེན་ཏུ་ཁེལ་བར་བྱེད་དགོས། དེ་འདྲ་བྱས་ནས་ཉམས་ལེན་བྱས་ན་ནམ་ཞིག་རང་རྒྱུད་ལ་ཆོས་ཞེས་པའི་དོན་དེ་ཉིད་མངོན་དུ་འགྱུར་ཐུབ། ཆོས་ཞེས་པའི་ཚིག་འདིར་ཧ་ཅང་གོ་རྒྱུ་ཆེན་པོ་ཡོད། དེ་ནི་བཅོས་བསྒྱུར་གཏང་བ་ཞིག་ལ་གོ་དགོས། བཅོས་བསྒྱུར་གཏང་ཟེར་དུས་ཕྱི་ལུས་ཀྱི་རྣམ་འགྱུར་འདྲ་ཆགས་པོས་ཡོངས་ཐབས་མེད། བཅོས་བསྒྱུར་གཏང་ཞེས་པའི་དོན་དེ་ཉིད་ཀྱང་སེམས་བཅོས་བསྒྱུར་གཏང་བ་ལ་གོ་དགོས། མདོ་ལས། 
སྡིག་པ་ཅི་ཡང་མི་བྱ་ཞིང་།། 
དགེ་བ་ཕུན་སུམ་ཚོགས་པར་སྤྱད།། 
རང་གི་སེམས་ནི་ཡོངས་སུ་འདུལ།། 
འདི་ནི་སངས་རྒྱས་བསྟན་པ་ཡིན།། 
ཅེས་གསུངས་ཡོད། ལུས་འདྲ་ཆག་པོ་བྱས་ནས་བཅོས་བསྒྱུར་གཏང་ན་སངས་རྒྱས་བསྟན་པ་ཡིན་གསུངས་མི་འདུག ངག་གིས་སྙན་པོ་སྨྲ་ཤེས་པ་ཙམ་གྱིས་ཀྱང་སངས་རྒྱས་བསྟན་པ་ཡིན་མ་གསུངས།
དེ་བཞིན་དུ་མགོན་པོ་ཀླུ་སྒྲུབ་ཀྱི་ཞལ་ནས། 

བསྙེངས་དང་བྲལ་བ་མང་དུ་གསོལ་ཅི་འཚལ།།
ཕན་པའི་གདམས་ངག་དོན་པོ་འདི་ལགས་ཏེ།།
ཁྱོད་ཀྱིས་ཐུགས་དུལ་མཛོད་ཅིག་བཅོམ་ལྡན་གྱིས།།
སེམས་ནི་ཆོས་ཀྱི་རྩ་བ་ལགས་པར་གསུངས།།
ཞེས་གསུངས་པ་ལྟར་ཆོས་ཞེས་པའི་དོན་འདི་རང་གི་རྒྱུད་ཉོན་མོངས་དུག་གསུམ་བཅོས་བསྒྱུར་གཏང་ནས་སེམས་ཀྱི་ཐོག་ནས་བདེ་བ་ཁྱད་པར་ཅན་རྙེད་པ་ལས་ཐབས་ཤེས་གཞན་གང་ཡང་མེད། སེམས་ཀྱི་ཞི་བདེ་ནི་ཁྲོམ་ནས་ཉོ་རྒྱུ་མེད། སེམས་ཀྱི་ཞི་བདེ་ནི་གྲོགས་པོ་གྲོགས་མོས་ཀྱང་སྤྲད་ཐབས་མེད། སེམས་ཀྱི་ཞི་བདེ་ངོ་མ་ནི་སེམས་མ་དུལ་བ་དེ་ཉིད་བཏུལ་ནས་རང་གི་སེམས་ནང་ནས་རྙེད་པའི་ཐབས་ཤེས་བྱེད་དགོས།། 
ཅེས་སོགས་ཆོས་བཤད་མདོར་བསྡུས་གྲུབ་ནས་བདེ་ཆེན་ཞིང་སྒྲུབས་མདོར་བསྡུས་ཞིག་གིས་དེ་རིང་གི་ཆོས་ཐུན་དེ་གྲུབ་པར་བྱས། མི་མང་ཧ་ཅང་དགའ་བོ་བྱུང་སོང་། ངས་ཀྱང་སང་ཉིན་ཡོང་ལ་ཉེ་བའི་ཕྱི་ལུགས་ཀྱི་ལོ་གསར་ཆེད་དུ་མི་མང་ལ་བཀྲ་ཤིས་བདེ་ལེགས་མཚོན་བྱེད་ཁ་གཏགས་རེ་བཀོན་ནས་པར་ལེན་པ་སོགས་བྱས་ནས་དེ་རིང་གི་ཆོས་ཀྱི་བྱེད་སྒོ་རྣམས་རེ་ཞིག་མཇུག་ཡོངས་སུ་གྲུབ་པར་བྱས། 

Thursday, December 25, 2014

བདེ་ཆེན་དབྱངས་སྐྱིད་འབྱོར་བའི་ཉིན་མོ།

ཚ་མོ་བདེ་ཆེན་དང་ལྷན་དུ།
ངོས་ཀྱི་ཚ་མོ་བདེ་ཆེན་དབྱངས་སྐྱིད་དགུན་ཁའི་སློབ་གྲྭའི་གུང་སང་དང་བསྟུན་ང་ལ་ཐུག་འཕྲད་ལ་འབྱོར། བདེ་ཆེན་དབྱངས་སྐྱིད་ནི་ཕྱི་ལོགས་སུ་ངོས་ཀྱི་ཚ་མོ་ཆུང་ཤོས་དེ་ཡིན། ཨ་རིར་འབྱོར་ནས་ཕལ་ཆེར་ལོ་གཅིག་ལྷག་ཙམ་ཕྱིན་ཡོད། དེང་སང་ Pennsylvania མཐོ་རིམ་སློབ་གྲྭ་ Bucknell University ནང་དུ་སེམས་ཁམས་རིག་པ་དང་སྐྱེ་དངོས་རིག་པའི་སྐོར་སློབ་སྦྱོང་བྱེད་བཞིན་ཡོད། 
ང་ནི་ཉིན་ཤས་གོང་ནས་ཕྱི་ནང་གི་ལས་ཀའི་བྲེལ་ཟིང་གི་རྐྱེན་ལྷོད་དལ་དུ་བསྡོད་ཁོམ་གཏན་ནས་མ་བྱུང་། གང་ཡིན་ཟེར་ན་དེང་སང་ས་གནས་འདིར་སྟོན་པ་ཡེ་ཤུའི་འཁྲུངས་སྐར་དང་དུས་ཆེན། ངོས་ཀྱི་ཡོང་ལ་ཉེ་བའི་ལོ་གསར་གྱི་མཚམས་དང་ཆོས་ཁྲིད་སོགས་སྟབས་གཅིག་ཏུ་ཁེལ་བས་ཡིན། 
ཁར་ནུབ་ཡེ་ཤུའི་འཁྲུངས་སྐར་གྱི་ཉིན་མོར་ངོས་ཀྱི་སྦྱིན་བདག་རྡེའུ་ར་ནས་གྲ་སྒྲིག་བྱས་པ་ལྟར་ཨ་རི་ཤ་མེད་ཟ་ཁང་ཞིག་ནང་དུ་མི་གྲངས་བཅོ་ལྔ་ཙམ་གྱི་ལྷན་དུ་དགོང་ཟས་ལ་མཉམ་རོལ་བྱས། དགོང་མོ་ཆུ་ཚོད་དྲུག་པའི་སྐབས་སུ་འཆར་ཅན་ལྟར་དུ་ཡོད་པའི་རྒྱ་གར་གྱི་ཡོ་ག་ལུས་སྦྱོང་དེར་མཉམ་ཞུགས་བྱས། 
དེང་སང་མི་ཚང་མ་ཡེ་ཤུའི་འཁྲུངས་སྐར་གྱི་དུས་ཆེན་ལ་ཁེལ་ནས་ནང་མི་མཉམ་འཛོམས་དང་ལག་རྟག་སྤྲོད་རེ་སོགས་བྱེད་སྲོལ་ཡོད་པ་ལྟར་ང་ལ་ཡང་དགེ་ཕྲུག་རྣམས་ནས་ཤིས་ཤོག་དང་། ལག་རྟག་སྤྲད་མཁན་མི་ཉུང་བ་བྱུང་། 
ཆེས་ཡ་མཚན་པ་ཞིག་ལ་ཡེ་ཤུའི་སྐྱེ་སྐར་ཉིན་མོ་འདིར་དེང་སང་དྲྭ་ལམ་ཁག་དང་ངོ་དེབ་སོགས་ནས་རང་ཉིད་བཀྲུས་ན་མ་དག་པའི་མི་རིགས་བོད་པ་དང་མ་ཟད་ཆོས་ལུགས་ནང་པ་ཡིན་པའི་ཕྱི་བསྡོད་བོད་རིགས་བཅོལ་ཆུང་ཀླད་མེད་འགའ་ཡིས་མགོ་སེར་རྣམས་ཀྱི་ལུགས་སྲོལ་ལྟར་ཁང་སྦུག་ཏུ་ཤིང་སྡོང་གཤམས་པ་དང་། སྒོ་འགྲམ་གཡས་གཡོན་རྣམས་སུ་གློག་སྒྲོན་སྤར་བ། ལག་རྟགས་སྤྲད་རེས་བྱེད་པ་སོགས་ཡེ་ཤུའི་ཆོས་ལུགས་རྗེས་འབྲངས་ཞིག་གིས་ཇི་ལྟར་བྱས་པ་ནང་བཞིན་བྱེད་པ་འདིར་ཞིབ་འདིང་ཞིག་རྒྱབ་ན་བསམ་ཚུལ་འདི་འདྲ་བྱུང་། 
སྤྱིར་གཏང་འཛམ་བུའི་གླིང་གི་ཆོས་ལུགས་རྣམས་འཆམས་མཐུན་དང་རིས་མེད་བྱེད་རྒྱུ་དེ་ནི་༧གོང་ས་སྐྱབས་མགོན་ཡིད་བཞིན་ནོར་བུའི་འགན་ཁུར་རམ་རྩ་བའི་དམ་བཅའ་གསུམ་གྱི་ཡ་གྱལ་ནང་གསེས་ཞིག་ཡིན་པ་མ་ཟད་དོན་དངོས་སུ་ཆོས་ལུགས་གང་ན་སུ་ཡོད་པ་རྣམས་སྐྱེ་བ་ཕྱི་མ་འདོད་མིན་ལ་མ་ལྟོས་པར་འཛམ་གླིང་ཁྱིམ་ཚང་འདིའི་སྒང་དུ་གནས་པའི་མི་འབོར་དུང་ཕྱུར་བདུན་བཅུའི་གཙོར་བྱས་སྲོག་ཆག་སྐྱེ་འགྲོ་གྲོག་སྦུར་ཚུན་ཆད་ཀྱི་བདེ་སྡུག་གི་འགན་འཁྲིར་བསམ་ནས་འཆམས་མཐུན་གྱི་ཆོས་ལུགས་དང་འཚེ་མེད་ཀྱི་ཆོས་ལུགས་ཞིིག་ཏུ་ཡོང་རྒྱུ་ཧ་ཅང་གལ་ཆེ། ཡིན་ནའང་རང་ཉིད་གང་དུ་སྐྱེ་སའི་ཁོར་ཡུག་དང་རིག་གཞུང་སོགས་ནི་མི་བུ་རང་ཉིད་ཀྱི་ཤ་ཁྲག་རུས་གསུམ་དུ་ཐིམ་པ་མ་ཟད་ཆོས་ལུགས་ནི་མི་ཡི་ཚེ་སྲོག་ལས་རིན་ཐང་ཆེ་བར་གྱུར་ཡོད། རང་ཉིད་ཀྱི་ཤ་ཁྲག་རུས་གསུམ་ནང་དུ་ཐིམ་ཟིན་པའི་རིག་གཞུང་དང་ཆོས་ལུགས་ནི་གནས་སྐབས་འཕྲལ་སེལ་གྱི་ཆེད་དུའམ་ཚེ་འདིའི་ལྟོ་གོས་ཀྱི་ཆེད་དུ་བསྒྱུར་བ་ཡིན་ན་གཏན་ནས་མི་འགྲིག ༧གོང་ས་སྐྱབས་མགོན་ཆེན་པོ་མཆོག་ནས་ཀྱང་ཕྱི་རྒྱལ་མགོ་སེར་ནང་པ་གསར་པ་རྣམས་ལ་ཆོས་ལུགས་མ་བསྒྱུར་ཞེས་ཡང་ནས་ཡང་དུ་གསུང་གི་ཡོད་པ་འདི་ཡིན། 
བོད་རིགས་རྣམས་ཀྱང་དེ་བཞིན་དུ་རང་གི་ཆོས་ལུགས་ཀྱི་དུས་ཆེན་ཁག་དང་རང་གི་སྟོན་པའི་འཁྲུངས་སྐར་སྲུང་གཙི་བྱེད་རྒྱུ་ལས་གཞན་པའི་ཆོས་ལུགས་དང་སྟོན་པའི་སྲུང་གཙི་བྱེད་རྒྱུ་འདི་ནི་རང་ཉིད་ལ་བུ་ཡོད་བཞིན་དུ་གཞན་གྱི་བུ་མོ་པང་དུ་ལེན་དགོས་དོན་གཏན་ནས་མེད། དེང་སང་འུར་འུར་ཟིང་ཟིང་གིས་ཡེ་ཤུའི་འཁྲུངས་སྐར་སྲུང་གཙི་་བྱེད་བཞིན་པའི་བོད་རིགས་ནང་པ་འདི་རྣམས་ལ་ངས་འདི་འདྲི། ཀ་ཡེ་སངས་རྒྱས་བཅོམ་ལྡན་འདས་ག་དུས་འཁྲུངས་པ་རེད། དྲིས་ན་ཕལ་ཆེར་གྱིས་ལོ་ཟླ་ཞག་དུས་སོགས་ལན་སྟེར་རྒྱུ་མི་རྙེད་དེ་ནི་ང་ཚོ་ནང་པ་བ་རྣམས་ཀྱིས་སངས་རྒྱས་བཅོམ་ལྡན་འདས་ཀྱི་འཁྲུངས་སྐར་ཉིད་ཡེ་ཤུའི་འཁྲུངས་སྐར་ནང་བཞིན་འཛམ་གླིང་གི་ལྡིང་ཆའི་སྒང་དུ་སྐྱལ་མ་ཐུབ་པས་ལན་པ་ཡིན། ད་ནས་བཟུང་སྟེ་ང་ཚོས་ཀྱང་སངས་རྒྱས་ཀྱི་འཁྲུངས་ཚིག་གཅིག་བསྒྱུར་བཟོ་ནས་མ་འོངས་པར་འཁྲུངས་སྐར་ལ་ཤིས་ཤོག་འདྲ་མིན་རེ་དྲྭ་ལམ་ཁག་ཏུ་མཐོང་རྒྱུ་ཡོད་ན་ཅི་མ་རུང་། 

བཅོལ་ཆུང་བོད་རིགས་འགའ་ཡིས།། 

ཁྱིམ་ལ་ཤིང་སྡོང་གཤམས་ཤིང་། 
སྒོ་རུ་གློག་སྒྲོན་སྤར་ནས།། 
ཡེ་ཤུའི་འཁྲུངས་སྐར་བསུས་སོང་།

སངས་རྒྱས་འཁྲུངས་སྐར་ལོ་ཚིག། 

དྲིས་ན་ཤེས་མཁན་མི་འདུག། 
ཤེས་ཀྱང་བསུ་མཁན་མི་འདུག། 
བསུས་ཀྱང་རྒྱས་སྤྲོས་མི་འདུག།

Sunday, December 21, 2014

རྒྱ་མཚོ་བྱིན་རླབས་བྱས་པའི་ཉིན་མོ།།

རྒྱ་མཚོ་བྱིན་རླབས་བྱེད་བཞིན་པ།
དེ་རིང་ནི་སྔ་ནས་གྲ་སྒྲིག་བྱས་ཟིན་པ་ནང་བཞིན་རྒྱ་མཚོའི་འགྲམ་དུ་ཀླུ་གཏོར་དང་བྱིན་རླབས་བྱེད་རྒྱུ་དེ་ཡིན།  བོད་ཀྱི་གསང་སྔགས་ཀྱི་ཆོས་འདི་ནི་གང་དུ་སྦྱར་ཀྱང་འབྱར་ཆོག་ཆོག་དང་། གང་དུ་འཐེན་ཀྱང་ནུར་ཆོག་ཆོག་དཔེར་ན་འགྱིག་བྱེ་རིལ་ནང་བཞིན་ཡོད། རྫོགས་ཆེན་དང་རྩ་རླུང་ཐིག་ལེ་སོགས་ལ་རང་དབང་ཐོབ་ན་ཚེ་འདིར་འཇའ་ལུས་ཆོས་སྐུ་རུ་གཤེགས་པའི་ལམ་པོ་ཆེ་ཞིག་དང་། གལ་སྲིད་སྐྱེ་བ་ཕྱི་མ་མ་འདོད་ཀྱང་ཚེ་འདིའི་གཟུགས་པོའི་འཕྲོད་བསྟེན་དང་ཚེ་རིང་ནད་མེད་འདོད་ན་ལུས་སེམས་ཤིན་སྦྱང་གི་ཐབས་ལམ་བླ་ན་མེད་པ་སྒོམ་དང་ལུས་སྦྱོང་ཡོ་ག་སོགས་དང་། ཐ་ན་ནང་པ་ཡིན་མིན་ལ་མ་ལྟོས་པར་གོ་ལའི་གླིང་ཆེན་འདིར་སྟེང་དུ་འདུག་མཁན་ཞིག་ཡིན་ནས་བཟུང་སྟེ་ཁོར་ཡུག་སྲུང་སྐྱོབས་ནི་འཛམ་གླིང་མི་འབོར་ཐེར་འབུམ་བདུན་བཅུའི་སོ་སོའི་ཚེ་སྲོག་གི་འགན་འཁྲི་ཞིག་ཡིན་པའི་ཆ་ནས་གསང་སྔགས་ཀྱི་ཆོས་འདིའི་ནང་ནས་རྣལ་འབྱོར་རང་ཉིད་རྟོགས་པ་མཐོན་པོ་ཅན་ཞིག་ནས་ནང་གི་མ་དག་པའི་འབྱུང་བ་བཞི་དབང་དུ་བསྒྱུར་བའི་སྟབས་ཀྱིས་ཕྱི་ཡི་འབྱུང་བ་དབང་བསྒྱུར་ཐུབ་པའི་ནུས་པ་ཡོད། དེ་ལྟར་མ་བྱུང་ནའང་མོས་པ་ལམ་བྱེད་ཀྱི་སྐབས་སུ་རྫས་དང་སྨན་སྔགས་ཏིང་འཛིན་ཟབ་མོའི་ནུས་པ་དང་ལས་སྦྱར་ཆོག་སོགས་ལ་བསྟེན་ནས་འབྱུང་བཞིའི་བྱིན་རླབས་དང་། གཏེར་བུམ་བཅའ་སྒྲུབས་བྱེད་པ། ཀླུ་གཏོར་དང་རླུང་གནོན་ཆར་འབེབས་སད་སྲུང་སོགས་ལས་ཚོགས་ཧ་ཅང་མང་པོ་ཡོད། 
ལས་ཚོགས་དེ་རྣམས་ནི་རང་བཞིན་གྱིས་ཁོར་ཡུག་སྲུང་སྐྱོབས་དང་འབྲེལ་བ་ཧ་ཅང་ཤུགས་ཆེན་པོ་ཡོད། ངས་ཀྱང་བོད་པའི་བླ་གཟུགས་རང་ག་བའི་མིང་གཅིག་པུས་ཁྲིའུ་ཁར་བསྡད་ནས་ནང་ཆོས་འཆད་འཁྲིད་གཅིག་པུ་ཙམ་མ་ཡིན་པར་གོང་དུ་བཤད་པ་ལྟར་གསང་སྔགས་ཀྱི་ལས་ཚོགས་འདི་རྣམས་ལ་བསྟེན་ནས་ཆར་འབོད་དང་། ཀླུ་གཏོར། གཏེར་བུམ་བཅའ་སྒྲུབས། འབྱུང་བཞིའི་བྱིན་རླབས་སོགས་གསང་སྔགས་ཟབ་མོའི་ལས་ཚོགས་འདི་རྣམས་ལ་བསྟེན་ནས་ས་གནས་འདིར་ཕན་ཐོག་དང་གྲུབ་འབྲས་མི་དམན་ཙམ་བྱུང་། སྔ་ལོར་ས་གནས་འདིར་བྱེ་མ་ལེབ་གནས་སྡོད་བྱེད་སའི་ཤིང་སྡོང་བྱིན་རླབས་བྱས་དེ་ནས་བཟུང་སྟེ་བྱེ་མ་ལེབ་མང་པོ་འཁོར་ནས་ས་གནས་འདིའི་ཁོར་ཡུག་སྲུང་སྐྱོབས་ཚོགས་པ་ནས་ང་ལ་གཟེངས་རྟགས་ཞིག་ཀྱང་ཐོབ་མྱོང་། ཁ་སང་ཀྱང་ངོས་ཀྱི་ཐག་ཉེར་ཡོད་པའི་རྒྱ་མཚོ་འགྲམ་དུ་ཀླུ་གཏོར་འདོན་ལ་སོང་བས་་མི་མང་ཕལ་ཆེར་བརྒྱ་ལྷག་འཛོམས་འདུག ངས་དང་པོ་ཀླུ་ཡི་རྒྱལ་པོ་ལ་མགྲོན་འབོད་ཀྱི་ཚུལ་དུ་དུང་དཀར་དེ་ཕྱོགས་བཞི་ལ་ཁ་སྐོར་བཞིན་དབུགས་སྐོར་བྱས་ནས་ཐེངས་ཁ་ཤས་བུས། དེ་ནས་སྡེ་བརྒྱད་གསེར་སྐྱེམས་དང་། ཆགས་མེད་རཱ་གས་མཛད་པའི་ཀླུ་གཏོར་མདོར་བསྡུས་ཞིག་ཀྱང་བཏོན། མཐར་སྔ་ལོར་ངོས་ནས་བྲིས་པའི་འབྱུང་བཞིའི་བྱིན་རླབས་དབྱིན་བསྒྱུར་བྱས་པ་དེ་ཉིད་ཚར་གཅིག་འདོན་བཅུགས། བསམ་ལྷུན་ནང་གི། 
ས་ཆུ་མེ་རླུང་འབྱུང་བའི་བར་ཆད་ཀྱིསཿ 
སྒྱུ་ལུས་གཡོར་པོ་འཇིག་ལ་ཐུག་པའི་ཚེཿ། 
ཡིད་གཉིས་ཐེ་ཚོམ་མེད་པར་གསོལ་བ་འདེབསཿ 
ཨོ་རྒྱན་འབྱུང་བ་བཞི་ཡི་ལྷ་མོར་བཅསཿ 
འབྱུང་བ་རང་སར་ཞི་བར་ཐེ་ཚོམ་མེདཿ 
ཨོ་རྒྱན་པདྨ་འབྱུང་གནས་ལ་གསོལ་བ་འདེབསཿ 
བསམ་པ་ལྷུན་གྱིས་འགྲུབ་པར་བྱིན་གྱིས་རློབསཿ 
སོགས་ཨོ་རྒྱན་འབྱུང་བཞིའི་སྨོན་ལམ་དེ་ཉིད་ཀྱང་ཚར་ཁ་ཤས་བཏོན། མི་མང་ནས་ལག་ཏུ་མེ་ཏོག་སིལ་མ་སྣ་ཚོགས་རྒྱ་མཚོའི་ནང་དུ་མཆོད་བཅུགས་ནས་དེ་རིང་གི་མཛད་སྒོ་དེ་རེ་ཞིག་ཡོངས་སུ་གྲུབ་པར་བྱས། མི་མང་ཧ་ཅང་དགའ་བོ་བྱས་སོང་བ་མ་ཟད་ཁ་ཤས་ནས་ལག་པ་དམ་བཅངས་བྱེད་བཞིན་གདོང་ལ་གཅེར་ནས་ད་དུང་མུ་མཐུད་ནས་དེ་འདྲ་བྱེད་རོགས་ཞེས་རེ་བསྐུལ་བྱེད་མཁན་ཡང་མི་ཉུང་བ་ཞིག་འདུག། 

Wednesday, December 10, 2014

ཆོས་བཤད་བྱས་པའི་ཉིན་མོ།

གཙོ་བོ་གསུམ་པོ་རི་རྒྱལ་ལྷུན་པོ་བཞིན།།
ཁ་སང་ནི་གཟའ་ཟླ་བའི་འཆར་ཅན་གྱི་བདེ་ཆེན་ཞིང་སྒྲུབ་དེ་ཡིན། ངོས་ཀྱི་སྐད་བསྒྱུར་བྱམས་པ་ལགས་ཀྱི་གཟའ་ཟླ་ཉེ་ཆར་བདུན་ཕྲག་གོང་མར་གཟའ་ཟླ་བའི་ཉིན་མོ་ཚེ་ལས་འདས། ཚེ་ལས་འདས་རྗེས་དགེ་ཕྲུག་ཁ་ཡོའུ་ངེད་གཉིས་ཆེད་དུ་སོང་ནས་རོ་མགོར་སྤྱན་རས་གཟིགས་འཁོར་བ་དོང་སྤྲུགས་དང་འོད་ཆོག་སོགས་ཀྱིས་གཤིན་པོར་བསྔོ་སྨོན་གང་དྲག་བྱས། ཕུང་པོ་རླངས་འཁོར་ནང་དུ་འཇོག་པ་སོགས་འཛེམས་ཟོན་གང་ཡང་མེད་པར་རོ་ལས་ཀྱི་བགྱི་བྱ་རྣམས་ཆ་ཚང་གྲུབ་པར་བྱས། དེ་རིང་ཉིན་མོ་འདི་ནི་གཟའ་ཟླ་བའི་འཆར་ཅན་ལྟར་དུ་ཡོད་པའི་བདེ་ཆེན་ཞིང་སྒྲུབ་དེ་ཡིན་སྟབས་དགོང་མོ་ཆུ་ཚོད་དྲུག་པའི་སྐབས་སུ་མི་རྣམས་ཀྱིས་འཚོགས་ཁང་དེ་རྦད་དེ་གང་སོང་། དེ་རིང་ངོས་ཀྱི་ཆོས་བཤད་རུ་དུས་རབས་འདིར་ལྷ་སངས་རྒྱས་འོད་དཔག་མེད་དང་། ཆོས་བདེ་ཆེན་ཞིང་སྒྲུབ། ཞིང་ཁམས་བདེ་བ་ཅན་གསུམ་གང་འདྲ་གལ་ཆེན་པོ་ཡིན་མིན་སྐོར་དང་མ་ཟད་ཉེ་ཆར་སྐད་བསྒྱུར་བྱམས་པ་ལགས་ཀྱི་གཟའ་ཟླ་ཚེ་ལས་འདས་རྐྱེན་སོང་བས་མི་རྟག་པའི་སྐོར་བཤད་པ་ཡིན། ལར་ནི་ལུང་པ་འདིའི་མི་རྣམས་ལ་མི་རྟག་པ་དང་སྡུག་བསྔལ་སོགས་བཤད་ན་གཏན་ནས་མི་དགའ་བ་མ་ཟད་སེམས་ལ་ཞེད་དངངས་བྱེད་ཀྱི་ཡོད། བླ་མ་གྲྭ་བ་མང་པོ་ཞིག་ནས་ཀྱང་ཆོས་ཉན་མཁན་གནས་སྐབས་མ་དགའ་བའི་རྒྱུ་མཚན་ལ་བསྟེན་ནས་ཆོས་ཚད་ལྡན་བཤད་མཁན་ཧ་ལམ་དཀོན་པོ་ཡིན། ཆོས་བཤད་པའི་སྐབས་སུ་དེང་དུས་ལེགས་སྦྱར་བཤད་པ་ནང་བཞིན་གནས་སྐབས་ཆོས་ཐུན་དེ་ཡི་རིང་ལ་མི་རྣམས་ལ་གཏམ་འདྲ་ཆག་པོ་འདྲ་ཞིག་གིས་འདོད་བློ་བཀང་གི་ཡོད། ཆོས་རྣམ་པར་དག་པ་བློ་ལྡོག་རྣམ་བཞི་དང་། ལས་འབྲས། སྐྱབས་འགྲོའི་སྐོར་ལ་ཉན་བཤད་བྱེད་མཁན་ཧ་ཅང་དཀོན། ངས་ནི་གནས་སྐབས་སུ་ཆོས་ཐུན་རིང་དགའ་མིན་ལ་མ་ལྟོས་པར་མི་གཅིག་གི་རྒྱུད་ལ་ཐར་པའི་ས་བོན་གྲུང་པོ་ཞིག་འཇོག་ཐུབ་ན་བསམ་ནས་ལས་འབྲས་དང་སྐྱབས་འགྲོ་བློ་ལྡོག་རྣམ་བཞིའི་སྐོར་གལ་ཆེན་བྱེད་ནས་བཤད་ཀྱི་ཡོད། དེ་རིང་ཡང་ཁ་སང་ཉེ་བའི་ཆར་སྐད་བསྒྱུར་བྱམས་པ་ལགས་ཀྱི་གཟའ་ཟླ་ཚེ་ལས་འདས་པའི་དངོས་ཆོས་དཔེ་མཚོན་དུ་བཞག་ནས་མི་རྟག་པའི་ཁྱད་ཆོས་ཕན་ཡོན་སོགས་བཤད། མི་རྟག་པ་ནི་དང་པོ་ཆོས་ལ་འཇུག་པའི་སྒོ། བར་དུ་ཆོས་སྒྲུབ་པའི་ལྕག། ཐ་མ་ཆོས་ཀྱི་སྙིང་པོ་ཡིན་ཅེས་པོ་ཏོ་བས་གསུངས་པ་ནང་བཞིན་འགྲེལ་བཤད་བྱས་པ་ཡིན། ལར་ནི་ཆོས་ཟེར་དུས་ཉོན་མོངས་འདུལ་བྱེད་ཀྱི་གཉེན་པོ་བླ་མེད་ཞིག་ཡིན་སྟབས་གནས་སྐབས་མངོན་མཐོ་དང་། མཐར་ཐུག་ངེས་ལེགས་གཉིས་ཀའི་ཁེ་ཕན་ལ་བསམ་བློ་གཏོང་དགོས། སྐྱེ་བ་ཕྱི་མ་མ་འདོད་ཀྱང་ཚེ་འདིའི་རིང་ལ་དཀའ་ངལ་དང་སྡུག་བསྔལ་མང་པོ་ཞིག་དངོས་སུ་མཐོང་ཆོས་སུ་མྱོང་བཞིན་པ་འདི་རེད། འདི་འདྲའི་དཀའ་ངལ་དང་སྡུག་བསྔལ་ཡོང་བའི་སྐབས་སུ་ད་ལྟ་ནས་བཟུང་སྟེ་སྐྱེ་བུ་ཆེན་པོའི་ཆོས་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཡོད་ན་མཆོག། གལ་སྲིད་དེ་ལྟར་མེད་ཀྱང་སྐྱེས་བུ་ཐ་མའི་ཆོས་དཔེར་ན་འཆི་བ་མི་རྟག་པ་སོགས་ལ་ད་ལྟ་ནས་བློ་སྦྱངས་པ་ཡིན་ན་ད་གཟོད་གློ་བུར་དུ་འཆི་བ་ཐོག་ཏུ་སླེབས་པའི་སྐབས་སུ་སེམས་ལ་དངངས་སྐྲག་མེད་པར་ཏན་ཏན་ཕན་གྱི་ཡོད། ཅེས་སོགས་བཤད་ནས་དེ་རིང་གི་བདེ་ཆེན་ཞིང་སྒྲུབ་མདོར་བསྡུས་ཞིག་གཏང་ནས་མཇུག་སྒྲིལ། སྐད་བསྒྱུར་བྱམས་པ་ལགས་ཀྱི་གཟའ་ཟླ་གྲོང་བའི་སེམས་གསོའི་ཆེད་དུ་ཆོས་ཚོགས་ནས་བོད་ལུགས་ལྟར་དུ་ཤོག་ཁུག་དང་ཁ་གཏགས་མེ་ཏོག། གཞན་བཟའ་བཅའི་རིགས་སོགས་སྤྲད་སོང་བས་ཁོ་རང་ཧ་ཅང་དགའ་བོ་བྱས་སོང་། 

Wednesday, December 3, 2014

རྨི་ལམ་རྨིས་པའི་ཉིན་མོ།།

བསོད་ནམས་ཆེན་པོའི་དབང་གིས་བོད་ཆོས་ལྡན་གྱི་ཞིང་དུ་སྐྱེས་པ་མ་ཟད་ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་ལ་ཕུག་གཏད་འཆའ་བའི་ཆོས་ལྡན་གྱི་མི་ཚང་ཞིག་ཏུ་སྐྱེ་ཚར་བྱུང་བའི་དོན་གོ་རུ་ཆུང་ནས་ཆོས་སྒོ་རུ་ཞུགས། བཀའ་དྲིན་སུམ་ལྡན་རྩ་བའི་བླ་མ་ངེས་པ་དོན་གྱི་རྣལ་འབྱོར་པ་ཆེན་པོ་གྲུབ་དབང་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེའི་གཙོས་བཀའ་རྙིང་གི་མཁན་ཆེན་མང་པོའི་མདུན་ནས་ཟབ་དགུའི་གདམས་ངག་རྣམས་ཞུས་བློ་ཙམ་དུ་མ་སོང་བར་གང་ཐུབ་ཉམས་ལེན་བྱེད་ཁུལ་བྱས། མ་ཟད་སྙིགས་དུས་ཚེ་ཐུང་ནད་མང་། དུས་ངན་གཡོ་འཁྲུག་ངན་དགུ་མཐའ་དག་མི་འདོད་བཞིན་དུ་བརྡོ་བའི་དུས་སྐབས་འདིར། ཐུགས་བསྐྱེད་དང་སྨོན་ལམ་སངས་རྒྱས་གཞན་ལས་ཀྱང་ཆེས་ཆེར་ལྷག་པ། སངས་རྒྱས་འོད་དཔག་འདི་ཉིད་རིགས་ཀྱི་བདག་པོར་བསྙེན་ནས་བགྲང་བྱ་བཅུ་ཕྲག་གཉིས་ལྷག་རིང་། ལྷ་འགྲུབ་པའི་རྟགས་མཚན་ལ་རབ་ཀྱིས་ཞལ་མཇལ། འབྲིང་གིས་ཉམས་དང་རྟོགས་པ། ཐ་མས་རྨི་ལམ་གྱི་ཚུལ་དུ་ཡོང་ཞེས་བརྒྱུད་སྡེ་རྣམས་ནས་གསུངས་ཀྱང་བདག་ལྟ་བུ་སོ་སྐྱེའི་འཆིང་བ་ཀུན་ལྡན་ཞིག་ལ་འགྲུབ་རྟགས་རབ་འབྲིང་གཉིས་ལ་རེ་བ་ཆེར་མེད་ཀྱང་ཐ་མ་འདི་ཉིད་ནི་ག་དུས་ཡིན་ཀྱང་ཡོད། ཉེ་བའི་ཆར་ཨ་རིའི་པོར་ལེན་དང་། ཉིའུ་ཡོག བྷོ་སི་ཊོན། ཀན་སེའི་སི། སོགས་མངའ་སྡེ་འགའ་ཤས་ཞིག་ནང་བདེ་ཆེན་ཞིང་སྒྲུབ་དང་ནང་ཆོས་ངོ་སྤྲོད་སོགས་ཆེད་དུ་ཟླ་བ་གཅིག་ལྷག་རིང་སོང་ནས་གཉུག་མར་གནས་བསྡོད་བྱེད་ས་འཇམ་དབྱངས་ཆོས་འཁོར་གླིང་ལ་བདེ་འབྱོར་བྱུང་ནས་ཕྱིར་ཉིན་སྐབས་སུ་འཆར་ཅན་ལྟར་དུ་ཡོད་པའི་བདེ་ཆེན་ཞིང་སྒྲུབ་ཉིད་འཚོགས་གྲུབ་ནས་དགོང་མོ་ཉལ་སར་གཉིད་དུ་ཡུར། ཞོགས་པ་ཆུ་ཚོད་ལྔ་ཙམ་ལ་རྨི་ལམ་འདི་འདྲ་ཞིག་རྨིས། བོད་ཁམས་གསེར་རྟ་ཆོས་སྒར་འདྲ་བ་ཞིག་ལ་འབྱོར་འདུག ཅི་ཆ་མེད་པར་ངོས་ནས་རྟ་དཀར་པོ་ཞིག་ཞོན་འདུག སྤྱིར་བོད་ཀྱི་དགོན་པའི་ནང་དུ་རྟ་ཞོན་ནས་འགྲོ་བའི་ལུགས་སྲོལ་གཏན་ནས་མེད། གལ་སྲིད་ཞོན་མཁན་ཡོད་ན་དེ་ནི་མི་ཐ་ཤལ་ཞིག་ཏུ་རྩི་བ་མ་ཟད་དགོན་པའི་ལས་ཀྱི་སྣེ་མོ་རྣམས་ཀྱིས་ཉེས་ཆད་ཀྱང་བཅོད་སྲིད། ང་ནི་རྟ་དཀར་པོ་ཞིག་ཞོན་ནས་གསེར་རྟ་ཆོས་སྒར་ལུང་པའི་མདའ་ནས་ཕུ་ཡི་བར་དུ་སོང་བས་ཚོད་དཔག་བྱས་ན་གྲྭ་བཙུན་འབུམ་ཕྲག་ཙམ་གྱིས་ང་ལ་བལྟ་བཞིན་འདུག འགྲོ་བཞིན་པའི་སྐབས་སུ་གྲྭ་པ་ཞིག་གིས་ངོས་ཀྱི་རྟ་ལམ་བཀག་ནས་འདི་འདྲ་ཟེར།  (ཡ་དེང་སང་ས་གནས་འདིར་སྦག་སྦག་དང་། རླངས་འཁོར། འཕྲུལ་རྟ་སོགས་ཞོན་ནས་འགྲོ་མཁན་ལས་རྟ་ཞོན་ནས་འགྲོ་མཁན་ཁྱོད་རང་མ་གཏོགས་མཐོང་མ་བྱུང་། གང་ནས་ཡོང་བ་ཡིན། གང་དུ་འགྲོ་མཁན་ཡིན།)  ཅེས་དྲིས་བྱུང་། ངས་ལན་མ་རྒྱབ་གོང་ནས་ཞོན་རྟ་དཀར་པོ་དེས་མི་སྐད་ཀྱི་ཚུལ་དུ།  (ངེད་གཉིས་བདེ་ཆེན་ཞིང་ལ་འགྲོ་མཁན་ཡིན།)  ཅེས་ལན་བཏབས་པ་དང་མཉམ་དུ་གོམ་རྒྱུགས་ཐུང་ཙམ་བྱས་ནས་མཐར་ནམ་མཁའ་ལ་ཇེ་མཐོར་བཀྱག་ནས་འཕུར་སོང་། བར་སྣང་ཁམས་ནས་མར་བལྟ་དུས་གནམ་གྲུའི་སྒེའུ་ཁུང་ནང་ནས་བལྟས་པ་ནང་བཞིན་གསེར་རྟ་ཆོས་སྒར་གྱི་བཟོ་དབྱིབས་བཀོད་པ་ཚང་མ་མཐོང་ཐུབ། མ་ཟད་གྲྭ་བཙུན་འབུམ་ཕྲག་ཙམ་དམར་སེར་ཉིལ་ལེ་མཐོང་བའི་སྐབས་སུ་ངོས་ཀྱི་སེམས་ནང་འདི་འདྲ་བསམ། ཆགས་མེད་བདེ་སྨོན་གྱི་འགྲེལ་བའི་ནང་དུ་བདེ་བ་ཅན་དུ་ཆོས་ལོངས་སྤྲུལ་གསུམ་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དགྲ་བཅོམ་པ་སོགས་མང་པོ་ཞིག་ཡོད་ཀྱང་གཙོ་བོ་སྤྲུལ་སྐུའི་ཆ་ལུགས་ཅན་དགེ་སློང་བྱེ་བ་འབུམ་ཕྲག་མང་པོ་ཡོད་ཅེས་གསུངས། སྨོན་ལམ་ལས།
ལྷང་ངེ་ལྷན་ནེ་ལྷམ་མེར་བཞུགས་པའི་འཁོར།།
བྱང་ཆུབ་སེམས་དཔའི་དགེ་སློང་བྱེ་བ་འབུམ།། 
ཀུན་ཀྱང་གསེར་མདོག་མཚན་དང་དཔེ་བྱད་བརྒྱན།། 
ཆོས་གོས་རྣམ་གསུམ་གསོལ་ཞིང་སེར་ལྟེམ་མེ།། 
ཚིག་དོན་རྣམས་སེམས་ལ་ལྷང་ལྷང་དྲན་བྱུང་། 
རྟ་ཐོག་ནས་མིག་གིས་ཆོས་སྒར་ལ་གཅེར་བཞིན་མི་རྟ་གཉིས་པོ་ནམ་མཁའ་ནས་ཇེ་མཐོ་ཇེ་མཐོར་སོང་ནས་མཐར་ཅི་ཆ་མེད་པར་གཉིད་སད་འདུག ཞོགས་པ་གཉིད་སད་པའི་སྐབས་སུ་སེམས་ལ་ཧ་ཅང་དགའ་སྤྲོ་ཆེན་པོས་ཁེངས་འདུག ཡར་ལངས་ནས་མཆོད་ཁང་གཙང་མ་བྱས་ཤིང་མཆོད་པ་གསར་པ་གཤམས་ནས་འཆར་ཅན་གྱི་རྒྱུན་ཁྱེར་ཞོགས་འདོན་བྱས། 

ད་ནུབ་ཉིང་འཕྲུལ་བདེན་ན།། 
བན་རྒན་འཆི་མ་ཐག་ཏུ།། 
བདེ་ཆེན་ཞིང་ལས་མ་གཏོགས།། 
འགྲོ་ས་མེད་པར་ཤེས་སོང་།


ལྷ་གཅིག་སྣང་བ་མཐའ་ཡས།།
ཆོས་གཅིག་བདེ་ཆེན་ཞིང་སྒྲུབ།། 
ཞིང་གཅིག་སུ་ཁ་ཝཱ་ཏི།། 
གཏན་དུ་བསྙེན་པས་འཚེངས་སོང་། 



Throughout my life, I have practiced the Amitabha Sadhana and at times experienced unusual dreams and sometimes, interpreted them as signs of my practice.

About two weeks ago, after concluding my teachings on Amitabha practices in Portland, Oregon and New York City, I returned home to California and resumed teachings here.  The following morning, I had an extraordinary dream.

Around 5 am, I dreamt of being in Sertha Lharong in Tibet, the residence of one of my most revered master, His Holiness Khenpo Jigme Phuntsok.  Sertha monastery, a seat of great Buddhist learning, has over 20,000 resident monks and nuns.  However, in my dream, there were countless in number and seemed as though the whole plain was filled with monks and lamas and the entire region blanketed with red robes.  In the dream, I rode a white horse and we were entering the monastery as all the monks and lamas watched us.  As we proceeded towards the monastery, a monk came towards us and asked, “These days everyone travels by motorcycle or car and no one rides a horse anymore.  Where have you come from and where are you going?”  I felt as though the horse carried me there on his back and could not answer right away, but before I attempted to speak, the horse replied in a human voice. First it seemed to reply in English, “Amitabha Pureland” and then spoke in Tibetan, “we are both going to Dewachen Shingkham (Amitabha Pureland).”  The horse had wings and it gradually spread its wings and started to fly.  As we glided in the sky, the view was like one from a descending airplane.  It was exceptionally beautiful and became more vivid of the entire region filled with monks and lamas.  Instantly, I remembered two lines from the aspiration prayers of the Amitabha practice.  “Where there are countless realized beings/Bodhisattvas. Where there is co-existence of Dharmakaya, Sambhokakaya and Nirmankaya.”  As the horse gained altitude and flew higher and higher, I woke up from the dream. 

Waking up, I felt an extraordinary sense of bliss and peace that I never experienced before.  I got up, made my offerings and sensed profound joy and happiness.  That morning, I felt a conviction that if I pursue this path and do not commit any unwholesome actions, right from that moment on, I could achieve to be born in Dewachen.

Dreams are usually illusions and yet some do come true.   That morning, it felt like it will come true. 



Monday, November 24, 2014

གཟའ་ཟླ་བའི་བདེ་ཆེན་ཞིང་སྒྲུབ་ཉིན་མོ།

ཞིང་སྒྲུབ་འདོན་བཞིན་པ། 
ཉིན་མོ་འདི་ནི་གཟའ་ཟླ་བའི་འཆར་ཅན་ལྟར་བདེ་ཆེན་ཞིང་སྒྲུབ་འཚོགས་རྒྱུ་དེ་ཡིན། ཉེ་ཆར་ཟླ་བ་གཅིག་ལྷག་རིང་ཨ་རིའི་མངའ་སྡེ་འགར་ཆོས་ཕྱོགས་ཀྱི་མཛད་རིམ་འགའ་ཡི་ཆེད་དུ་སོང་ནས་བདེ་ཆེན་ཞིང་སྒྲུབ་འཚོགས་རྒྱུ་མ་བྱུང་། དགོང་མོ་ཆུ་ཚོད་དྲུག་དང་ཕྱེད་སྐབས་སུ་མི་རྣམས་རིམ་གྱིས་འབྱོར་ནས་ཆོས་ཚོགས་དེ་མི་ཡིས་ཡོངས་སུ་ཁེངས་སོང་། དེ་རིང་ངོས་ཀྱི་སྐད་བསྒྱུར་བྱམས་པ་ལགས་མེད་སྟབས་དབྱིན་ཇིའི་ཆགས་རོ་དེ་རྒྱབ་ནས་འདས་པའི་ཟླ་བ་གཅིག་ལྷག་རིང་བྱེས་སོང་གི་ལོ་རྒྱུས་དང་འབྲེལ་ཆོས་སྒོམ་སྒྲུབ་གང་བྱས་ཀྱང་ཀུན་སློང་བཅོས་རྒྱུ་ཧ་ཅང་གལ་ཆེན་ཡིན་ཚུལ་མདོར་བསྡུས་བཤད་གྲུབ་ནས་བདེ་ཆེན་ཞིང་སྒྲུབ་མཉམ་འདོན་བྱས། མདུན་བསྐྱེད་འོད་ཞུའི་སྐབས་སུ་སངས་རྒྱས་འོད་དཔག་མེད་ཀྱི་སྐུ་གསུང་ཐུགས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་ནས་རང་གི་ལུས་ངག་ཡིད་གསུམ་ལ་ཐིམ། རང་གི་ལུས་ངག་ཡིད་གསུམ་གྱིས་མི་དགེ་བ་བཅུ་སོགས་སྡིག་པ་གང་བསགས་པ་རྣམས་མུན་ཁུང་ལ་ཉི་མ་ཤར་བ་ནང་བཞིན་སངས་ཀྱིས་དག་ནས་སངས་རྒྱས་འོད་དཔག་མེད་ཀྱི་སྐུ་གསུང་ཐུགས་ཀྱི་བྱིན་རླབས་ཐོབ། མཐར་རང་ཉིད་ཀྱང་སངས་རྒྱས་འོད་དཔག་མེད་ཀྱི་སྐུ་གསུང་ཐུགས་ཀྱི་རང་བཞིན་དུ་གྱུར་སོང་བསམ་པའི་ངང་ནས།
སངས་རྒྱས་གཞན་ན་མེད་དོ་རང་སར་ཞོགས།། 
གཞན་ནས་འཚོལ་རྒྱུ་མེད་དོ་རང་བབས་ཞོགས།།

ཅེས་པའི་ཚིག་དུམ་འདི་གཉིས་ཀྱི་དོན་ལྟར་དུས་གསུམ་རྟོག་བྲལ་ཀ་དག་མ་བཅོས་པའི་ད་ལྟའི་གཉུག་མའི་ཤེས་པ་འདི་ཉིད་ཀྱི་ངོ་བོར་བལྟ་བཅུགས་ནས་སྒོམ་སྐར་མ་བཅུ་ཙམ་བྱས། མཐར་བདེ་སྨོན་བསྡུས་པ། ངོ་མཚར་སངས་རྒྱས་སོགས་ཀྱིས་སྨོན་ལམ་དང་༧གོང་ས་སྐྱབས་མགོན་ཆེན་པོ་དང་རྒྱལ་དབང་ཀརྨ་པའི་ཡབ་སྲས་རྣམས་ཀྱི་ཞབས་བརྟན་སོགས་ཀྱིས་དེ་རིང་གཟའ་ཟླ་བའི་བདེ་ཆེན་ཞིང་སྒྲུབ་ཉིད་མཐར་དབྱུངས་བས་མི་རྣམས་ཧ་ཅང་དགའ་བོ་བྱུང་སོང་། 

Friday, November 21, 2014

ཀི་ལི་ཧྥོ་ཉར་འབྱོར་བའི་ཉིན་མོ།

ཨ་མ་མཉམ་དུ་སྨན་ཁང་ནང་ནས་བླངས་པའི་པར། 
ཟླ་བ་གཅིག་ལྷག་རིང་པོར་ལེན་ཌི་དང་། ཉིའུ་ཡོག བྷོ་སི་ཊོན། ཀི་ནི་རེའུ་ཀེ་ཊེ། ཀན་སེའུ་སེ་སོགས་ཨ་རིའི་མངའ་སྡེ་འགའ་རུ་ཆོས་བཤད་ཀྱི་ཆེད་དུ་འགྲོ་དགོས་བྱུང་། མངའ་སྡེ་དེ་རྣམས་ནི་གྲང་ངར་གཅིག་ལས་གཅིག་ཆེ་བས་འགྲུལ་བཞུད་སྐབས་སུ་དཀའ་ངལ་ཅུང་བྱུང་བ་མ་ཟད་གློ་འཆམས་ཞིག་ཕོག་ནས་ཡུན་རིང་སོང་ཡང་ད་དུང་སངས་གྲགས་རེད་མི་འདུག ངོས་ཀྱི་བསྡད་སའི་ས་ཆ་འདི་ནི་གནམ་གཤིས་དྲོ་གྲང་རན་ལ་ས་ཆའི་ཁོར་ཡུག་ཧ་ཅང་མཛེས་སྡུག་དང་ལྡན། ཨ་རིའི་འབྱོར་ལྡན་སྐད་གྲགས་ཅན་རྣམས་འདུག་ས་ཞིག་ཡིན་ཀྱང་ང་ནི་སྟེས་དབང་གིས་ས་གནས་འདིར་སླེབས་ནས་ཕལ་ཆེར་མི་ལོ་ལྔ་མ་ཟིན་ཙན་ཞིག་རེད་འདུག། ཉི་ཧོང་ནས་ཡིན་པའི་དད་ལྡན་མ་ཨ་མ་སུས་སིན་ནམ་ཆོས་མིང་དུ་ཀུན་བཟང་དབང་མོ་ཡང་སྐྱར་ཐེངས་མ་གཉིས་པའི་རྒྱུ་མ་བཤའ་བཅོས་བྱས་ནས་སྨན་ཁང་དུ་ཡོད་སྟབས་ང་ནི་གནམ་ཐང་ནས་བློ་བུར་དུ་སྨན་ཁང་དུ་ཨ་མར་ཐུག་འཕྲད་ལ་སོང་བས་མོ་རང་ཧ་ཅང་དགའ་བོ་བྱུང་སོང་། སྨན་པས་ཟེར་ན་ནད་ལྷག་ལུས་མེད་པར་གཙང་མ་བཟོས་ཟིན་པས་གང་མགྱོགས་ནང་དུ་འགྲོ་ཆོག་ཅེས་བཤད་ཀྱིན་འདུག ཨ་མ་སུས་སིན་ནི་འདི་ལོར་རྒྱུ་མ་བཤའ་བཅོས་ཐེངས་མ་གཉིས་བྱས་པ་རེད། སྤྱིར་གཏང་ལུང་པ་འདིའི་སྨན་དང་ལག་རྩལ་མཐུན་རྐྱེན་སོགས་ཧ་ཅང་ལེགས་པས་བཤའ་བཅོས་འདི་ཙམ་ལ་ནད་གྲལ་དུ་མི་འཇོག་ཀྱང་ང་ནི་ཨ་མ་སུས་སིན་ད་ལོར་ལོ་བརྒྱད་བཅུ་གྱ་གསུམ་ལ་སོང་བའི་ནད་པ་ཞིག་ལ་བསམ་ནས་སེམས་འཁྲལ་ཅུང་བྱུང་ཡང་ད་རེས་མོ་རང་ངོ་གདོང་དང་ནུས་ཤུགས་སོགས་གང་ལ་ལྟས་ཀྱང་ནད་ལོགས་མ་རྒྱབ་ན་ནད་འོག་འདི་ནས་ཐར་ཐུབ་འདུག་བསམ་པའི་ཚོར་སྣང་བྱུང་།  

Wednesday, November 12, 2014

བདེ་ཆེན་ཞིང་སྒྲུབ་ཉིའུ་རྗེས་སེ།

ཞིང་སྒྲུབ་འཚོགས་བཞིན་པའི་ཟུར་པར་ཞིག
ཁ་སང་ཉིན་རྒྱབ་ཀོ་ལམ་བྷི་ནས་ཡིན་པའི་དགེ་ཕྲུག་ཆོས་མིང་དུ་ཀརྨ་རྡོ་རྗེ་དང་། ཁོང་གི་གཟའ་ཟླ་བསོད་ནམས་བཟང་མོ་གཉིས་སླེབས་བྱུང་བས་ངེད་གསུམ་ཤར་སྐྱོད་ཉིའུ་རྗེར་སེ་ཆོས་ཚོགས་སུ་སོང་། ཚོགས་སུ་འབྱོར་བ་དང་གཅིག་རྗེས་གཉིས་མཐུད་ཀྱིས་མི་མང་གིས་ཚོགས་ཁང་ཆུང་ཆུང་དེ་ཡོངས་སུ་ཁེངས་སོང་། ཆོས་ཚོགས་ཀྱི་འགན་འཛིན་ཀརྨ་རྡོ་རྗེ་ནས་ལོ་གཅིག་རིང་ཆོས་ཚོགས་ཀྱི་བྱེད་སྒོ་ཁག་ཚང་མ་སྙན་ཞུ་གྲུབ་མ་ཐག་བདེ་ཆེན་ཞིང་སྒྲུབ་ཚར་གཅིག་མཉམ་འདོན་བྱས། ཆུ་ཚོད་དྲུག་པའི་སྐབས་སུ་བདེན་བཞིའི་ཆོས་བཤད་མདོར་བསྡུས་བྱས་པས་མི་རྣམས་ཧ་ཅང་ནས་དགའ་བོ་བྱས་སོང་།

ལྷོ་ཨ་མི་རི་ཀའི་མི་རིགས་འདི་རྣམས་ནི་འགྲོ་ལུགས་འདུག་སྟངས་སྤྱོད་ལམ་ཐ་ན་ཁ་ཟས་སོགས་ཀྱང་བོད་རིགས་དང་ཧ་ཅང་འདྲ་བོ་ཡོད་པ་མ་ཟད་བོད་བརྒྱུད་ནང་ཆོས་ལ་ཧ་ཅང་རྩི་མཐོང་ཆེན་པོ་ཅན་རེད་འདུག ཉིའུ་རྗེར་སེ་ལ་ཡོད་པའི་ཆོས་ཚོགས་འདི་ནི་ལོ་ལྔ་ཡི་ཡར་སྔོན་ནས་ད་ལྟའི་ཆོས་ཚོགས་ཀྱི་འགན་འཛིན་ཕ་ཡུལ་ཀོ་ལམ་བྷི་ནས་ཡིན་པའི་ཀརྨ་རྡོ་རྗེའི་མིང་ཅན་འདིས་ང་ལ་སྤྲད་བྱུང་། ཅ་དངོས་ཞིག་ཡིན་ན་རྒྱབ་ཏུ་ཁུར་ཐུབ་ཆོས་ཚོགས་ཁུར་ཐབས་ནི་མེད་ཁོ་རང་ལ་འཛིན་སྐྱོང་གི་ལས་འགན་ཆ་ཚང་བསྐོས་ནས་གནམ་ཆོས་འོད་དཔག་གི་ཆོ་ག་འདིའི་དེབ་བརྒྱ་ཐམས་པའི་ཞལ་འདེབས་ཕུལ་ནས་དབང་ལུང་ཁྲིད་སོགས་ཆ་ཚང་བཏོན་ཅིང་ཉམས་ལེན་བྱེད་བཅུག་པས་ད་བར་བདུན་ཕྲག་རེའི་ནང་ཉིན་གསུམ་རེར་ཞིང་སྒྲུབ་ཉམས་ལེན་བྱེད་ཀྱི་འདུག འགའ་ཤས་ནས་འོད་ཆོག་འདི་ཉིད་བོད་ཀྱི་སྒྲ་གདངས་ཐོག་ནས་བློ་ཐོག་ཏུ་སྐྱོར་ཐུབ་མཁན་འདུག ཆོས་བཤད་དང་ཞིང་སྒྲུབ་སོགས་ཚང་མ་གྲུབ་ཚར་བའི་སྐབས་སུ་ཕན་ཚུན་མ་ཐུག་ཡུན་རིང་སོང་བས་ཐང་ན་མཉམ་དུ་བསྡད་ནས་སྐད་ཆ་བྱས་པས་མི་རྣམས་ཧ་ཅང་དགའ་བོ་བྱས་སོང་། འགའ་ཤས་ནས་ང་ས་གནས་འདིར་གཏན་འདུག་བྱེད་དགོས་ཟེར་ནས་བསམ་ཚུལ་འདོན་མཁན་འདུག གང་ལྟར་བླ་སློབ་མ་ཐུག་ཡུན་རིང་སོང་བས་དེ་རིང་མཉམ་དུ་ཐེངས་གཅིག་འཛོམས་པ་ཧ་ཅང་དགའ་བོ་བྱུང་། 

Monday, November 10, 2014

ཨ་རིའི་ཉིའུ་ཡོག་ལ་བདེ་ཆེན་ཞིང་སྒྲུབ་འཚོགས་པའི་ཉིན་མོ།

ཞིང་སྒྲུབ་འཚོགས་བཞིན་པའི་ཟུར་པར་ཞིག
ཉིན་མོ་འདི་ནི་སྔ་ནས་དུས་ཆད་བྱས་པ་ནང་བཞིན་ཕ་ཡུལ་ནང་ཆེན་སྐྱིད་ཆུ་ནས་ཡིན་པའི་ཡུན་རིང་གྲོགས་པོ་ཨོ་རྒྱན་དར་རྒྱས་དང་། བཀྲ་བསྟན། ཨ་བཟང་། འཆི་མེད་སོགས་ནས་གོ་བསྒྲིགས་འོག་བདེ་ཆེན་ཞིང་སྒྲུབས་ཐེངས་མ་གཉིས་པ་དེ་ད་ནུབ་ཨོ་རྒྱན་དར་རྒྱས་ནང་དུ་འཚོགས། ངས་ཀྱང་བདེ་ཆེན་ཞིང་སྒྲུབས་དང་འབྲེལ་ནང་ཆོས་གལ་ཆེན་ཡིན་ཚུལ་དང་ཆོས་བཤད་མདོར་བསྡུས་གྲུབ་ནས་གནམ་ཆོས་འོད་ཆོག་ཉིད་མཉམ་འདོན་བྱས། མཇུག་ཏུ་ཆགས་མེད་བདེ་སྨོན་ཚར་གཅིག་བཏོན་ནས་སྔོན་སྨོན་སོགས་ཀྱི་མཐར་ལེགས་པར་དབྱུངས། མ་ཐུག་ཡུན་རིང་སོང་བའི་ཆོས་གྲོགས་ཨོ་རྒྱན་དར་རྒྱས་དང་མཉམ་དུ་ཁམས་ཟས་དཀྱུས་མ་དགོང་ཟས་ཤ་རྡོག་གཙོས་དང་མོག་མོག་ལ་རོལ་བཞིན་གང་དྲན་ཁ་བརྡའི་གླེང་མོལ་བྱས་ནས་མཚན་མོ་ཆུ་ཚོད་གཉིས་པའི་བར་དུ་བསྡད། 

Saturday, November 8, 2014

བྷོ་སི་ཏྲོན་ལ་སོང་བའི་ཉིན་མོ།

  
དཀོན་མཆོག་དང་ཡེ་ཤེས་ནང་མི་དང་མཉམ་དུ།
སྔ་ནས་དུས་ཆད་བྱས་པ་ནང་བཞིན་ཁ་སང་བྷོ་སི་ཏྲོན་ལ་འབྱོར། འགྲོ་དགོས་དོ་ནི་ལོ་བཞིའི་ཡར་སྔོན་ང་བྷོ་སི་ཏྲོན་ལ་སོང་བས་སྐབས་དེ་དུས་ངོས་ཀྱི་ཆོས་གྲོགས་དབྱིན་ཇིའི་མི་ཚང་ཞིག་ནང་དུ་བསྡད་ཡོད། སྐབས་དེ་དུས་བྷོ་སི་ཏྲོན་བོད་རིགས་རྣམས་དང་ཐུག་འཕྲད་ལ་ཧ་ཅང་དགའ་ཡང་འདུག་ས་དབྱིན་ཇིའི་མི་ཚང་ཞིག་ཡིན་སྟབས་ཕན་ཚུན་འབྲེལ་བ་བྱེད་མ་ཐུབ་ནས་ཡུན་རིང་སོང་། སྐབས་ཞིག་ལ་དབྱིན་ཇིའི་སྐད་བསྒྱུར་ཞིག་དགོས་མཁོའི་དབང་གིས་ཉིན་གཅིག་ཨ་མ་ཡེ་ཤེས་དང་འབྲེལ་བ་བྱུང་དེ་ནས་བཟུང་སྟེ་ཨ་མ་ཡེ་ཤེས་དང་དཀོན་མཆོག་དཔལ་བཟང་གཉིས་ཀྱི་ནང་མི་རྣམས་དང་འབྲེལ་བ་ཧ་ཅང་ཡག་པོ་བྱུང་། ལོ་གཉིས་ཙམ་གྱི་རྗེས་སུ་ཟླ་བ་གཅིག་རིང་ཕུར་པའི་བསྙེན་མཚམས་ཞིག་ལ་ཨ་མ་ཡེ་ཤེས་ཀྱི་ནང་འདུག་རྒྱུ་བྱུང་ངོས་ཀྱི་ཕུར་པའི་བསྙེན་མཚམས་གྲུབ་མ་ཐག་ཨ་མ་ཡེ་ཤེས་ཀྱི་སྤུན་མཆེད་ཆུང་བ་ཚེ་ལས་འདས་པའི་སྐབས་དང་ཁེལ་ནས་ཡང་སྐྱར་ཨ་མ་ཡེ་ཤེས་ཀྱི་ངོ་ཆེན་ལྟར་གཤིན་པོའི་དུས་དྲན་གྱི་ཆེད་དུ་ཞགས་པོ་བཞི་བཅུ་ཞེ་དགུའི་རིང་དེར་བསྡད། ལུང་པ་དགྲ་ལག་ཏུ་ཤོར་ཅིང་། ཁྱིམ་ཚང་ཁ་འཐོར་དུ་སོང་བའི་འཁྱམས་པོ་ང་ལ་ལྟོས་ན་ཁྱིམ་ཚང་འདི་ནི་ཚེ་འདིའི་ལས་ཀྱི་བསྐོས་པའམ་ཡང་ན་དཀོན་མཆོག་གིས་གནང་བའི་གཡར་པོའི་ལུང་པ་འདིའི་ནང་དུ་དྲོ་སྐྱིད་ལྡན་པའི་ཁྱིམ་ཚང་གཉིས་པ་ལྟ་བུ་ཞིག་ཏུ་གྱུར། ཨ་མ་ཡེ་ཤེས་ནི་བསམ་པ་བཟང་ཞིང་ཁོག་ཡངས་ལ་སློབ་སྦྱོང་ཡོད་པ་ཆུང་ནས་སྐྱེས་ཆེན་གྱི་བླ་མ་མང་པོ་ཞིག་བསྟེན་མྱོང་མཁན་ཆོས་ལྡན་མ་བུད་མེད་ཡ་རབ་ཅན་ཞིག་དང་། དཀོན་མཆོག་ལགས་ནི་ནམ་རྒྱུན་མི་དགེའི་གཡོ་སྒྱུའི་དྲིས་མས་མ་གོས་པ་སེམས་པ་ཧ་ཅང་སྐྱིད་པོ་ངོ་ལྐོག་གཡོ་སྒྱུ་མེད་མཁན་མི་ཧ་ཅང་བཟང་པོ་ཞིག་འདུག དཀོན་མཆོག་ལགས་ནི་ཨ་རིར་བོད་པ་སྐྱབས་བཅོལ་བ་སྔ་ཤོས་གྲས་རེད་འདུག ང་ནི་མི་ཚང་འདིར་ཧ་ཅང་བརྩེ་བ་ཆེན་པོ་ཞིག་ཆགས་སོང་། དེ་སྔ་ཕན་ཆོད་ས་གནས་གང་སར་ཁྱི་འཁྱམས་ལྟར་ཉུལ་ཀྱང་སྐྱབས་བཅོལ་ལུང་པ་གཉིས་པར་གནས་པའི་བོད་རིགས་མི་ཚང་ཞིག་ལ་སྲོལ་རྒྱུན་བོད་པའི་དྲི་ངད་མ་ཡལ་བ་འདི་ཚང་འདྲ་བོ་ཞིག་གཏན་ནས་མ་མཐོང་། ང་ཡང་ཉེ་ཆར་ཉིའུ་ཡོག་སོགས་ལ་མཛད་རིམ་མ་འདྲ་བ་མང་པོ་ཡོད་ཀྱང་གནས་སྐབས་འདིར་ཡོང་རྒྱུ་འདི་གལ་ཆེན་དུ་རྩིས་ནས་ཉིན་གསུམ་གཅིག་པུར་ཡོང་བས་དུས་ཚོད་ཐུང་ཡང་ང་ཚོ་ཕན་ཚུན་ཧ་ཅང་སྐྱིད་པོ་བྱུང་། ད་ནུབ་ཨ་མ་ཡེ་ཤེས་ལགས་ཀྱི་འདོད་པ་ལྟར་མོ་རང་གི་ནང་མི་རྣམས་ལ་ལན་ཆགས་གཏོར་མ་ཞིག་འདོན་དགོས་ཀྱང་ལན་ཆགས་གཏོར་མའི་ཡི་ཆ་ཁུང་ལྡན་ཞིག་མ་རྙེད་ནས་དེ་ཡི་ཚབ་ཏུ་གདོན་ཚོགས་དགུ་མ་དང་སྦྲག་ནས་ལུས་སྦྱིན་ཞིག་བཏོན། ད་ནངས་ཞོགས་པ་ཀླུ་ཐེབས་དང་ཁེལ་ཡོད་སྟབས་བསང་དང་སྡེ་བརྒྱད་གསེར་སྐྱེམས་རླུང་རྟ་སྒྲོན་འཛུགས་བྱས་ནས་ཉིན་གུང་རྒྱབ་ཏུ་ཨ་མ་ཡེ་ཤེས་ནས་སྒོ་འགྲམ་ནས་ལག་ཏུ་ཁ་གཏགས་བཟུང་ནས་ཕྱག་རྒྱ་དང་ལག་གཡུག་སོགས་ཀྱིས་ཕེབས་སྐྱེལ་འབྲལ་མི་ཕོད་པ་ལྟ་བུ་བྱས། ངས་ཀྱང་རླངས་འཁོར་ནང་ནས་ནང་མི་འདིར་སྨོན་ལམ་འདི་འདྲ་ཞིག་བཏབས།
གནས་སྐབས་སུ་ཡང་འགལ་རྐྱེན་མཐའ་དག་ཞི།། 
མཐུན་རྐྱེན་ཚེ་དང་དཔལ་འབྱོར་རྒྱས་པ་དང་། 
ཆོས་བཞིན་སྤྱོད་པའི་གྲོགས་དང་ལྷན་ཅིག་ཏུ།། 
བསམ་པའི་དོན་ཀུན་འགྲུབ་པའི་བཀྲ་ཤིས་ཤོག། 

དཀོན་མཆོག་རིན་ཆེན་གསུམ་གྱི་བྱིན་རླབས་དང་། 

ཡི་དམ་རྡོ་རྗེ་གཞོན་ནུའི་ནུས་སྟོབས་ཀྱིས།། 
འགྲོ་བ་འདི་རྣམས་བདག་གིས་སྲུང་ཟིན་གྱི།། 
ཕྱིན་ཆད་སུས་ཀྱང་གནོད་པ་མ་བྱེད་ཅིག། 

ཅེས་སྨོན་ལམ་ལྐོག་འདོན་བྱེད་བཞིན་སྤྱི་སྤྱོད་མི་མང་རླངས་འཁོར་འབབས་ཚུགས་སུ་ཕ་དཀོན་མཆོག་དང་བུ་མོ་བསྟན་ལྷ་མག་པ་བཀྲ་ཤིས་གསུམ་ནས་བསྐྱལ་བྱུང་བས་ཉིའུ་ཡོག་ལ་མཚན་མོ་ཆུ་ཚོད་བརྒྱད་པའི་སྐབས་སུ་འབྱོར། དགེ་ཕྲུག་ཀརྨ་ཆོས་སྒྲོན་གཟའ་མི་གཉིས་ནས་རླངས་འཁོར་འབབས་ཚུག་ནས་སྒུག་འདུག་པས་ནང་དུ་ཤར་བསྐྱོད་བྱས་ནས་ཡོང་། དགོང་ཟས་མདོར་བསྡུས་ཞིག་ཚར་མ་ཐག་དེ་རིང་གི་ཉིན་ཐོ་དེ་གཏངས་ཞིང་ཉལ་སར་སོང་ནས་གཉིད་དུ་ཡུར།  

Monday, November 3, 2014

འཆམས་པ་ཕོག་ནས་ནང་དུ་ལུས་པའི་ཉིན་མོ།



ས་འོག་མེ་འཁོར་འབབས་ཚུགས་ཀྱི་རྟགས་རྣམས། 
དེ་རིང་ནི་འཆམས་ངན་ཞིག་ཕོག་འདུག་སྟབས་༧གོང་ས་སྐྱབས་མགོན་ཡིད་བཞིན་ནོར་བུའི་གསུང་ཆོས་དེ་ཞུ་ལ་འགྲོ་ཐུབ་མ་སོང་། དེང་སང་ཉིན་ཤས་གོང་ནས་བློ་བུར་དུ་ཉིའུ་ཡོག་གནམ་གཤིས་དེ་འགྱུར་བ་ཕྱིན་ནས་འཐོར་རླུང་སྦུད་པ་དང་གྲང་ལྷག་ཁོལ་བ་སོགས་མདོར་ན་གནམ་གཤིས་ཧ་ཅང་གྲང་མོ་རེད་འདུག ང་ནི་ནམ་རྒྱུན་བསྡད་ས་ཨ་རིའི་ས་ཆ་སྐྱིད་ཤོས་ཀུན་གྱིས་ཡིད་སྨོན་ཤོར་ས་ཀི་ལི་ཧྥོ་ཉའི་ནང་ཚན་ཁར་མེལ་ཞེས་འབྱོར་ལྡན་སྐད་གྲགས་ཅན་ས་ཆ་དེར་བསྡད་ནས་ཕལ་ཆེར་མི་ལོ་ལྔ་མ་ཟིན་ཙམ་ཞིག་ཡིན། ངོས་ཀྱི་བསྡད་ས་དེར་མི་རྣམས་རང་བཞིན་གྱིས་དལ་ཞིང་ལྷོད་ལ་ཉིའུ་ཡོག་ལྟར་གང་དུ་སོང་ཡང་ས་ཞབས་མེ་འཁོར་དང་སྤྱི་སྤྱོད་མི་མང་རླངས་འཁོར་སོགས་མཐོང་རྒྱུ་ཧ་ཅང་དཀོན་དེའི་རྐྱེན་པས་ས་གནས་འདི་ལྟ་བུ་ལས་ཀའི་བྲེལ་ཟིང་དང་ལག་ཏུ་ཇ་དང་བག་ལེབ་བཟུང་ནས་རྒྱུག་འདུལ་བྱེད་མཁན་དེ་བས་ཀྱང་མཐོང་རྒྱུ་དཀོན། ཁ་སང་ངོས་ཀྱི་ཚ་བོ་ངེད་གཉིས་ས་འོག་མེ་འཁོར་བརྒྱུད་བོད་དང་རྒྱ་གར་བའི་མི་རིགས་རྣམས་འདུ་བསྡོད་བྱེད་ས་རྒྱག་སེང་ཧེའི་ལ་སོང་བས་འཁྱག་རླུང་དང་ཟ་མ་སོགས་གང་གིས་མ་འགྲིག་པ་ཡིན་ན་ད་ནངས་ཞོགས་པ་བྱེའུ་ཕྲུག་ལ་རྡོ་ཕོག་པ་ནང་བཞིན་བན་རྒན་ང་ནི་ཚ་འཆམས་ཞིག་གིས་ཉལ་སར་ལུས་སོང་། སེམས་ཕམ་དགོས་པ་ཞིག་ལ་དེ་རིང་ངོས་ཀྱི་བསྡད་ས་ཐག་ཉེར་༧གོང་ས་སྐྱབས་མགོན་ཆེན་པོ་མཆོག་ནས་དྲང་ངེས་ལེགས་བཤད་སྙིང་པོའི་གསུངས་ཆོས་གནང་གི་ཡོད་སྟབས་དེ་ཆད་ཤོར་སོང་། 
མ་གཞི་ང་ནི་ཉིའུ་ཡོག་གི་ས་ཆ་འདིར་འདུག་རྒྱུར་གཏན་ནས་དགའ་བོ་མེད་པ་མ་ཟད་ས་གནས་འདིར་བོད་རིགས་གཙོར་བྱས་པའི་ཨ་སྒོར་ཆེད་དུ་གནས་བསྡོད་བྱེད་མཁན་ཡོངས་ལ་སེམས་རྟིང་ནས་སྙིང་རྗེ་འདྲ་ཞིག་རང་དབང་མེད་པར་སྐྱེ་ཡོང་གི་འདུག 
མི་ཡི་ལུས་རྟེན་བཟང་པོ་འདི་ཐོབ་པའི་དོན་གོ་རུ་ཚེ་གཡོག་དང་སོ་སོའི་ཁ་རྒྱབ་ཙམ་ལས་མ་འཇོན་ན་དལ་འབྱོར་གྱི་ལུས་རྟེན་བཟང་པོ་འདི་དངོས་གནས་ཆུད་ཟོས་རེད་བསམ་གྱི་འདུག ཚེ་འདིའི་ལྟོ་གོས་དང་བསྡོད་ཁང་ཙམ་རེ་ནི་ཉམ་ཆུང་དུད་འགྲོ་རྣམས་ཀྱིས་ཀྱང་མི་ལས་ལྷག་ས་ཞིག་བཟོ་སྐྲུན་བྱེད་ཤེས་ཀྱི་འདུག

ཉིའུ་ཡོག་མ་རེད་མི་གཡོག་རེད།། 
མི་གཡོག་ཨ་སྒོར་ཆེད་དུ་རེད།། 
ས་གནས་འདི་རུ་འདུག་མཁན་རྣམས།།
 མི་ལུས་རིན་ཆེན་ཕྲོག་རླག་རེད།། 

དུས་བཞི་མི་གཅིག་གྲང་ལྷག་ཆེ།།
མི་རིགས་མི་གཅིག་འཛམ་གླིང་མི།། 
སྐད་རིགས་མི་གཅིག་ར་མ་ལུག། 
ཆ་ལུགས་མི་གཅིག་ཡ་མ་ཟུང་།། 

དགུན་དུས་གྲང་བས་ཁེངས་གྲབ་བྱེད།། 
དབྱར་ཀ་ཚ་བས་ཞུ་གྲབ་བྱེད།། 
མི་ཡི་གཟུགས་ལ་ཚེ་གཡོག་མཁན།། 
ས་གནས་འདི་རུ་ང་མི་འདུག། 

ང་ནི་ཀི་ལི་ཧྥོ་ཉར་འགྲོ། 
ཁར་མེལ་རྒྱ་མཚོའི་འགྲམ་དུ་འགྲོ། 
རྦིག་སུར་རི་བོའི་རྩེ་རུ་འགྲོ།
ཆོས་ཚོགས་འཇམ་དབྱངས་གླིང་དུ་འགྲོ། 


གཡར་པོའི་ལུས་རྟེན་འདི་ཐོབ་ནས་བཟུང་སྟེ་ཚེ་འདིར་དམ་ཆོས་གཤའ་མ་ཞིག་མ་འགྲུབ་ཀྱང་ཚེ་འདི་ཁོ་ནའི་ཆེད་དུ་རང་ཁེ་གཞན་ཕམ་གྱི་སྡིག་ལས་ཀྱིས་རང་ཉིད་སྨྱོན་པ་མི་བཟོ་བསམ་པའི་དམ་བཅའ་བྱེད་བཞིན་དེ་རིང་གི་ཉིན་ཐོ་དེ་ཨུ་ཚུགས་ཀྱིས་གཏངས། 


Saturday, November 1, 2014

ཨ་རིའི་འདྲེ་ཡི་དུས་ཆེན་ཉིན་མོ།

དུས་ཆེན་ཀྱི་ཤོག་བྱང་།
ཡེ་ཤུའི་འདྲེ་ཡི་དུས་ཆེན་ཉིན་མོ།
ཉིན་མོ་འདི་ནི་ཡེ་ཤུའི་ཆོས་ལུགས་ཡོངས་ཀྱི་འདྲེ་ཡི་དུས་ཆེན་སྲུང་གཙིའི་ཉིན་མོ་ཞིག་ཡིན། ལུས་སྲོལ་འདི་ནི་ཡོ་རོབ་སོགས་ནས་འཛམ་གླིང་གང་སར་ཁྱབ་བརྡལ་དུ་སོང་ནས་དེང་སང་རྒྱལ་ཁབ་མང་པོ་ཞིག་ནང་དུས་ཆེན་འདི་གལ་ཆེན་དུ་ངོས་འཛིན་བྱེད་ནས་སྲུང་གཙི་བྱེད་ཀྱི་ཡོད། ལྷག་པར་དུ་ཨ་རི་ནས་མཚན་མཐུན་ཆགས་སྤྱོད་ཅན་རྣམས་ཀྱིས་དུས་ཆེན་འདི་ཧ་ཅང་གལ་ཆེན་དུ་ངོས་འཛིན་བྱེད་ཀྱི་ཡོད། ཉིན་མོ་འདིར་དམིགས་བསལ་ཕྲུག་གུ་རྣམས་ལ་འདྲེ་གཟུགས་དང་འདྲེ་འབག་སོགས་གཡོགས་ནས་མི་ཚང་རེ་རེ་བཞིན་སྒོ་འགྲིམ་བྱེད་ནས་མངར་ཟས་འདྲ་མིན་སློང་བའི་ལུགས་སྲོལ་ཞིག་ཀྱང་ཡོད། ང་ནི་དགེ་ཕྲུག་ཀརྨ་ཆོས་སྒྲོན་ནང་དུ་ཉིན་གང་པོར་བསྡད་པས་ཕྲུག་གུ་སྒོ་བརྡུང་མཁན་ཧ་ཅང་མང་པོ་བྱུང་བས་སྔ་ནས་གྲ་སྒྲིག་བྱས་ནས་ཡོད་པའི་མངར་ཟས་རྣམས་ཀྱིས་ཕྲུག་གུ་རྣམས་ཚིམས་པར་བྱས། 

སྣང་བ་ཀུན་བརྟག་འདྲེ་ཉིད་ཕུགས་སུ་ཉར།།
གཞན་དབང་ཡོངས་གྲུབ་འདྲེ་གཟུགས་སྒོ་རུ་གཤམས།།
རང་ཉིད་འདྲེ་ཡི་ཕ་རྒན་ཡིན་བཞིན་དུ།།
སུ་ཡིས་སུ་ལ་འདྲེ་ཞེས་མཛུབ་མོ་གཙུགས།།

མ་རབ་གཡོ་སྒྱུས་དུག་ཆུ་ཁོང་དུ་སྦས།། 
མི་ཡི་གཟུགས་ལ་གསོན་འདྲེའི་གཡབ་མོ་ཅན།། 
ས་སྟེང་རྐང་གཉིས་འདྲེ་ལས་ཐུ་བ་ཞིག།
ཁྱེད་ཀྱིས་ལན་བརྒྱར་བཙལ་ཡང་རྙེད་རེ་ཀན།། 

Friday, October 31, 2014

ཀརྨ་ཆོས་སྒྲོན་ཆང་ས་རྒྱབ་པའི་ཉིན་མོ།

གཟའ་མི་གཉིས་ནས་ཆང་སའི་དམ་བཅའ་འཇོག་བཞིན་པ། 
ཁ་སང་ནས་བཟུང་སྟེ་ཉིན་གཉིས་རིང་ཨ་རིའི་མངས་སྡེ་ཀོ་ནེའི་ཏྲི་ཀེ་ཏྲེ་connecticut ལ་སོང་། ངོས་ཀྱི་དགེ་ཕྲུག་ཕ་ཡུལ་ཀོ་ལིམ་བྷེ་ནས་ཡིན་པའི་ཨེ་སེ་མེ་ར་རྡ་ཆོས་མིང་དུ་ཀརྨ་ཆོས་སྒྲོན་ཆང་སའི་ཉིན་མོ་ཡིན་སྟབས་ཆང་སའི་མཛད་སྒོ་དེར་སོང་། མོ་རང་གི་ཆོ་ག་ནི་ཕ་ཡུལ་ཡོ་རོབ་སི་པིན་ནས་ཡིན་པའི་མི་ཡ་རབས་བཟང་སྤྱོད་དང་ལྡན་པ་ཅན་ཞིག་འདུག ཀརྨ་ཆོས་སྒྲོན་ནི་ནང་ཆོས་ལ་དད་པ་ཡོད་པའི་ནང་པ་དཀྱུས་མ་དང་མ་ཟད་ངོས་ལ་ར་གན་གསེར་རློམ་གྱི་དད་ལྡན་མ་བུད་མེད་བཟང་སྤྱོད་ཅན་ཞིག་རེད་མོ་རང་ལ་བུ་མོ་གཉིས་དང་བུ་གཅིག་བཅས་ཡོད་ཀྱང་ད་ལྟ་མོ་རང་མཉམ་དུ་ནི་གཅིག་ཀྱང་མེད། མོ་རང་གི་འདོད་པ་ལྟར་དེ་རིང་གི་ཆང་སའི་ཉིན་མོ་འདིར་ང་མེད་ན་ཐབས་མེད་ཡིན་ཅེས་ཨུ་ཚུགས་ཀྱི་རེ་བ་ལྟར་ང་ཡང་ལོ་རེ་བཞིན་ཉིའུ་ཡོག་ལ་ངོས་ཀྱི་ཚ་བོ་དང་དགེ་ཕྲུག་རྣམས་ལ་ཆེད་དུ་ཐུག་འདོད་ཀྱི་ཞོར་དུ་ཁ་སང་མོ་རང་གི་འདོད་པ་ལྟར་ཆང་སར་སོང་། ཆང་ས་ཉིའུ་ཡོག་ནས་ཆུ་ཚོད་གཉིས་ཙམ་གྱི་སར་ཡོད་པའི་ཀོ་ནེའི་ཏྲི་ཀེ་ཏྲེ་ལ་ཁོ་རང་གཉིས་ཀྱི་ཁང་པ་གཉིས་པ་ཞིག་ཡོད་པ་དེར་མཉམ་དུ་སོང་། སྤྱི་ཟླ་བཅུ་པའི་ཚེས་པ་ཉེར་དགུ་འདི་ནི་བོད་ལུགས་ཀྱི་ནག་རྩིས་ལྟར་ཁོ་རང་གཉིས་ཀྱི་ཆང་སའི་དུས་ཚིག་ལ་གཏན་འབེབས་བྱུང་བ་ཞིག་ཡིན་འདུག་དུས་ཆེན་འདི་ཧ་ཅང་གལ་ཆེན་དུ་རྩིས་ནས་ཞོགས་པ་ངས་ཀྱང་བཀྲ་ཤིས་བརྒྱད་པ་དང་། གཞན་བཀྲ་ཤིས་བརྩེགས་མདོ། ཉེས་པ་ཀུན་སེལ་སོགས་བོད་བརྒྱུད་གསང་སྔགས་ཀྱི་ལུགས་སྲོལ་ལྟར་སྡེ་བརྒྱད་གསེར་སྐྱེམས་སོགས་ཞབས་རིམ་གང་དྲག་བྱས། ཉེ་སར་ཡོད་པའི་ཡེ་ཤུའི་བག་སྟོན་མཁན་པོ་ཞིག་ཁོ་རང་ཚོའི་ལུགས་སྲོལ་ལྟར་གདན་ཞུས་ཀྱིས་ཁོ་རང་གཟའ་མི་གཉིས་ནས་དེ་རིང་ནས་བཟུང་སྟེ་མ་ཤིའི་བར་དུ་བརྩེ་སེམས་མི་འགྱུར་བ་རྡོ་རྗེ་ཕ་ལམ་ལྟ་བུའི་ངང་ནས་ཆང་ས་ཤི་མཐའ་འཁྱོལ་བ་བྱེད་པའི་དམ་བཅའ་བཞག་སོང་། དེ་ནས་རྗེས་ཟློས་དང་མཉམ་དུ་ཕོ་ཡིས་མཛུབ་དཀྲིས་མོ་ལ་བཀོན་ཅིང་མོ་ཡིས་མཛུབ་དཀྲིས་ཕོ་ལ་བཀོན་པ་སོགས་ཀྱིས་མཐར་གཉིས་ཀས་འོ་བྱེད་པ་སོགས་དེ་སྔོན་མཐོང་གཏན་ནས་མ་མྱོང་བའི་ལྟད་མོ་ཞིག་དེ་རིང་མཐོང་སོང་། 
ཆང་སའི་དུས་སྟོན་འདིར་ཀརྨ་ཆོས་སྒྲོན་བུ་དང་བུ་མོ་སོགས་འབྲེལ་ཡོད་ཀྱི་ནང་མི་རྣམས་ལས་གཞན་ལོགས་ནས་ང་ལས་མ་གཏོགས་གཅིག་ཀྱང་མགྲོན་འབོད་བྱས་མི་འདུག ཆང་སའི་རྟེན་འབྲེལ་ཚར་མ་ཐག་ང་ཚོ་ཚང་མ་ཉེ་སར་ཡོད་པའི་ཟས་རིགས་སྣ་མང་ལས་གྲུབ་པའི་ཟ་ཁང་ཞིག་ནང་དུ་སོང་ནས་ཟ་མ་འགྲང་ཚད་ཟོས། ཉིན་རྒྱབ་ཆུ་ཚོད་བཞི་པའི་སྐབས་སུ་རྒྱལ་ས་ཉིའུ་ཡོག་ལ་འབྱོར་ང་ནི་མ་ཐུག་ཡུན་རིང་ཚ་བོ་དང་མཉམ་དུ་བསྡད་པས་ཧ་ཅང་སྐྱིད་པོ་བྱུང་། དེ་རིང་གི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར། 

Saturday, October 25, 2014

བད་ེཆེན་ཞིང་སྒྲུབ་ཉིན་ཐ་མའི་ཉིན་མོ།

པོར་ལེན་ལ་ཞིང་སྒྲུབ་འཚོགས་བཞིན་པའི་ཟུར་པར་ཞིག
དེ་རིང་ནི་པོར་ལེན་ལ་འདི་ལོའི་བདེ་ཆེན་ཞིང་སྒྲུབ་ཉིན་ཐ་མ་དེ་ཡིན། སྤྱིར་གཏང་པོར་ལེན་ནུབ་བྱང་བོད་རིགས་ཚོགས་པར་བདེ་ཆེན་ཞིང་སྒྲུབ་འཚོགས་ནས་ལོ་བདུན་པ་དེ་ཡིན། ད་ནངས་ཞོགས་པ་ཆུ་ཚོད་བདུན་པའི་སྐབས་སུ་བོད་ཁང་དུ་སོང་བས་བདེ་ཆེན་ཞིང་སྒྲུབ་ཆོས་ཞུ་བ་ཚང་མ་འཛོམས་ཚར་འདུག དེ་རིང་ནི་ཞིང་སྒྲུབ་ཉིན་ཐ་མ་དེ་ཡིན་སྟབས་གསོ་སྦྱོང་མེད་ཞོགས་ཟས་ཚར་བ་མཉམ་དུ་ཆོ་ག་གཞུང་རྐྱང་མཐར་ཆགས་སུ་ཚར་གཅིག་གཏོན་ནས་བསྙེན་མཚམས་སྐབས་སུ་ཉེ་ཆར་དབུས་བོད་མིའི་སྒྲིག་འཛུགས་ནས་༧གོང་ས་སྐྱབས་མགོན་ཆེན་པོའི་སྐུ་ཕྱའི་ཞབས་བརྟན་ཆེད་ཚེ་གཟུངས་དང་ཚིག་བདུན་གསོལ་འདེབས་སོགས་བོད་རིགས་ཡོངས་ནས་འདོན་དགོས་པའི་བརྡ་ཁྱབ་ལྟར་དེ་རིང་མི་མང་འདུ་འཛོམས་ཀྱི་གོ་སྐབས་བཟང་པོ་དང་བསྟུན་ཚེ་གཟུངས་དང་སོགས་ཞབས་བརྟན་འགའ་མཉམ་འདོན་བྱས། ཉིན་རྒྱབ་མི་མང་དྲུག་བཅུ་མ་ཟིན་ཙམ་དང་ལྷན་བདེ་ཆེན་ཞིང་སྒྲུབས་ཚོགས་འཁོར་མར་མེ་སྨོན་ལམ་བཅས་ཀྱིས་འདི་ལོའི་བདེ་ཆེན་ཞིང་སྒྲུབ་ཉིད་བཀྲ་ཤིས་བདེ་ལེགས་ངང་ལེགས་པར་གྲུབ། མི་མང་ནས་ངོས་ལ་ཁ་བཏགས་དང་ཆོས་ཡོན་སོགས་མཇལ་ཁར་འཚང་ཁ་ཤིག་ཤིག་བྱུང་། ས་ཆ་གང་དུ་སོང་ཡང་བོད་པ་རྣམས་ནས་ངོས་ཀྱི་ཆོས་དང་གང་ཟག་གཉིས་ལ་ལོ་རེ་བཞིན་དད་མོས་ཇེ་ཆེ་དང་མི་འབོར་ཇེ་མང་རེད་འདུག
ནམ་རྒྱུན་ངས་ཆོས་བཤད་པའི་སྐབས་སུ་མི་མང་ཉུང་དང་སློབ་མ་ལ་ཕན་ཐོག་མིན་ལ་མ་ལྟོས་པར་གང་བཤད་རྒྱུའི་ཆོས་ཉིད་ལ་རང་ནས་བསམ་བློ་གཏོང་བཞིན་བཤད་པའི་སྐབས་སུ་ཏན་ཏན་ང་རང་ཉིད་ལ་ཕན་ཐོག་ཧ་ཅང་ཆེན་པོ་འདུག དེ་ནི་མི་སྒོ་ནས་རང་སངས་རྒྱས་ཞེས་པ་དེ་རེད། 
སང་ཉིན་ཞོགས་པ་སྔ་བོ་ཆུ་ཚོད་ལྔ་པའི་སྐབས་སུ་པོར་ལེན་གནམ་ཐང་བརྒྱུད་ནས་ཉིའུ་ཡོག་ལ་འགྲོ་དགོས། 

Tuesday, October 21, 2014

མཁན་པོ་ཀར་ཚེ་ལ་ལོ་གཉིས་དང་ཕྱེད་ཀྱི་ཁྲིམས་ཐག་བཅད་པ།

མཁན་པོ་ཀར་ཚེའི་པར་བོད་ཕྲིན་ནས་བླངས། 
ངོས་ནས་ཉེ་ཆར་ནང་ཆེན་ལ་ཁ་པར་གཏངས་བས་བློ་ཡུལ་ལས་འདས་པའི་གཏམ་བཟང་ཞིག་ལ་མཁན་པོ་ཀར་ཚེ་ལ་ཁྲིམས་ཐག་ལོ་གཉིས་དང་ཕྱེད་བཅད་ནས་ད་རེས་སྐུ་གཟུགས་གནས་སྟངས་མི་སྐྱོན་ཙམ་གྱིས་ཆབ་མདོའི་བཙོན་ཁང་ནང་དུ་ཡོད་སྐད་འདུག དེ་ནི་ངོས་ལ་ལྟོས་ན་ཧ་ཅང་གཏམ་བཟང་ཞིག་ཡིན། གང་ཡིན་ཟེར་ན་མཁན་པོ་ཀར་ཚེ་ཁོང་བཙོན་ཁང་དུ་བཅུགས་ནས་བཟུང་ངོས་ལ་སེམས་ཁྲལ་ཧ་ཅང་ཆེན་པོ་བྱུང་། ངོས་ཀྱི་དགོན་པར་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་ཞི་བར་གཤེགས་ནས་སྡེ་དགོན་གཉིས་ལ་རེ་བའི་མིག་འབུར་གཏོད་ས་གཅིག་ཡོད་པ་དེ་ནི་མཁན་པོ་ཁོང་ཡིན། ཁོང་ནི་བོད་བརྒྱུད་ནང་བསྟན་ཆོས་ལུགས་ལ་ལོ་མང་རིང་ཐོས་བསམ་བྱས་པའི་མཁན་པོ་ཞིག་ཡིན་པ་མ་ཟད་དེང་དུས་མི་མང་གཉོམ་ཆུང་ཁྲོད་ན་བདེ་སྡུག་གི་གནས་སྟངས་ཐོག་ལ་བསམ་གཞིག་བྱེད་མཁན་ན་གཞོན་བསམ་བློའི་ཁ་ལོ་བ་ཞིག་ཀྱང་ཡིན། 
ཁ་སང་ནོར་ཝེའི་རླུང་འཕྲིན་ཁང་དང་ཨ་རིའི་བོད་སྐད་རླུང་འཕྲིན་ཁང་ཨེ་ཤ་ཡའི་རང་དབང་རླུང་འཕྲིན་ཁང་སོགས་རླུང་འཕྲིན་ཁང་རྣམས་དང་དེ་བཞིན་རྒྱལ་གཅེས་བོད་དོན་རོགས་སྐྱོར་ཚོགས་པ་དང་སློབ་ཕྲུག་རང་བཙན་ཚོགས་པ་སོགས་ནས་གཅིག་རྗེས་གཉིས་མཐུད་ཀྱིས་ཁ་པར་གཏངས་ནས་མཁན་པོ་ཀར་ཚེའི་གནས་སྟངས་སྐོར་བཅར་འདྲི་བྱེད་རྒྱུ་དེ་རེད་འདུག ང་ནི་དེང་སང་པོར་ལེན་ནུབ་བྱང་བོད་རིགས་ཚོགས་པ་རྣམས་ཀྱི་གོ་སྒྲིག་འོག་ལོ་ལྟར་ཆགས་སུ་ཡོད་པའི་བདེ་ཆེན་ཞིང་སྒྲུབས་འཚོགས་བཞིན་པའི་སྐབས་ཀྱི་བྲེལ་ཟིང་ལ་ཁེལ་ནས་དུས་ཐོག་ལ་ཁ་པར་ལ་ཡ་ལེན་བྱེད་རྒྱུར་དུས་ཚོད་ཆེར་མེད་ཀྱང་བར་གསེང་སྐབས་སུ་རང་དགོན་གྱི་བླ་སྤྲུལ་རྣམས་ཀྱི་བཀའ་ཁྲོལ་ལྟར་མཁན་པོའི་སྐོར་གནས་ཚུལ་གང་ཤེས་ཁྱབ་བསྒྲགས་བྱས། 



འཁོར་བའི་འདམ་ནས་མི་འཇིགས་ཕྱག་ཡངས་ཀྱིས་དྲངས་ཤིང་། 
ལུགས་གཉིས་ལམ་གྱིས་བླང་དོར་བློ་མིག་རང་སྦྱིན་པའི།། 
བཀའ་དྲིན་འཁོར་མཐའ་བྲལ་བའི་དྲིན་ཅན་གྱི་བླ་མ།། 
སྐྱབས་རྗེ་བུདྡྷའི་མཚན་ཅན་སྙིང་དབུས་ནས་དྲན་སོང་།

གང་གི་གདན་ས་ཇ་དགོན་ཉི་མ་ཡི་གླིང་ནས།།
མཚུངས་མེད་བླ་རྒན་དམ་པའི་གྲིབ་བསིལ་གྱི་བདུད་རྩི།། 
བཀའ་གཏེར་སྨིན་གྲོལ་གདམས་པའི་གཏེར་སྒོ་རང་འབྱེད་དུས།། 
དམར་སེར་འདུས་པ་རྒྱ་མཚོའི་མཆེད་ལྕམ་རྣམས་དྲན་སོང་།

མེ་ཏོག་ནང་ནས་ཨུ་དུམ་ཝ་ར་ལྟར་འཕགས་པ།། 
འདུས་པའི་ནང་ནས་ཐོས་བསམ་སྒོམ་པ་ཡི་མངའ་བདག།
ཁོ་བོའི་རྡོ་རྗེའི་མཆེད་པོ་བློ་ཐུབ་ཀྱི་ཆོས་གྲོགས།། 
མཁན་པོ་ཀརྨ་ཚེ་དབང་སེམས་རྟིང་ནས་དྲན་ཀི།

ཁྱེད་ཀྱི་ལ་རྒྱའི་སེམས་ཤུགས་རི་བོ་ལས་བརྟན་ཅིང་། 
ཕུག་བསམ་དམིགས་འདུན་མ་ཀིའི་གཙང་ཆུ་ལས་རིང་བ།། 
གདོང་དམར་བོད་ལ་བཅངས་བའི་འགྱུར་མེད་ཀྱི་དམ་བཅའ།། 
གཡོ་མེད་བྲག་ལས་སྲ་བའི་མཆེད་གྲོགས་ཁྱེད་དྲན་བྱུང་། 

བླ་གཟུགས་དཔོན་མ་བླ་ཡི་ཆེ་ཚུགས་དེ་མ་ངོམ།།
ཐོས་དོན་མིང་གིས་རྒྱགས་པའི་སྔོ་ལོ་དེ་མ་འཕྱར།། 
ཉམ་ཆུང་ཐལ་རྡུལ་ཁྲོད་ཀྱི་ན་གཞོན་གྱི་སློབ་གསོ།། 
ང་ཡི་འཐབ་གྲོགས་སེམས་ཀྱི་ཉི་མ་དེ་དྲན་ནོ།།

དེ་རིང་གི་ཉིན་ཐོ་མདོར་བསྡུས་དེ་གཏངས་ནས་ཉལ་སར་སོང་ནས་གཉིད་དུ་ཡུར། 

Monday, October 20, 2014

བདེ་ཆེན་ཞིང་སྒྲུབ་ཉིན་ལྔ་པ།

དེ་རིང་ནི་བདེ་ཆེན་ཞིང་སྒྲུབ་ཉིན་ལྔ་པ་དེ་ཡིན། ད་ནངས་ཞོགས་པ་ཆུ་ཚོད་དྲུག་པའི་སྐབས་སུ་བོད་ཁང་དུ་སོང་བས་བོད་རིགས་རྣམས་ནས་ངོས་ལ་ཡོང་སྒུག་བྱས་འདུག ཆུ་ཚོད་བདུན་པའི་སྐབས་སུ་ཐེག་ཆེན་གསོ་སྦྱོང་གི་སྡོམ་པ་མཉམ་དུ་བླངས་ནས་ཞོགས་ཟས་ལ་རོལ། ཆུ་ཚོད་དགུ་པའི་སྐབས་སུ་བདེ་ཆེན་ཞིང་སྒྲུབ་པདྨ་མའི་དྲྭ་བ་མཉམ་དུ་བཏོན་ནས་བདེ་བ་ཅན་དུ་སྐྱེ་བའི་རྒྱུ་བཞིའི་འགྲེལ་བཤད་
བོད་པ་རྣམས་ནས་སྒོམ་བྱེད་བཞིན་པ། 
དང་བར་སྐབས་ཀྱི་ཆོས་བཤད་ཀྱི་མཚམས་སྦྱོར་རྣམས་གང་ཤེས་ངོ་སྤྲོད་སོགས་བྱས། ཉིན་རྒྱབ་ཏུ་སྔ་ནས་གྲ་སྒྲིག་བྱས་ཟིན་པའི་ཕྱག་རྒྱ་ཆེན་པོའི་ཆོས་བཤད་བྱེད་རྒྱུ་དེ་ཡིན་ཀྱང་ཁ་སང་བསམ་བློ་ཞིག་གཏངས་དུས་ཆོས་ཞུ་བ་མང་ཆེ་བ་རྒན་གོག་ཡིན་པ་མ་ཟད་ཕལ་ཆེར་ནི་ཡིག་རྨོངས་ཙམ་ཡང་སེལ་མ་ཐུབ་མཁན་མང་སྤྱིར་ཕྱག་རྒྱ་ཆེན་པོའི་ཆོས་འདི་ཐེག་ཆེན་གསང་སྔགས་ཐུན་མོང་མ་ཡིན་པའི་ལྟ་བ་བཙན་ཐབས་ཀྱི་སྒོ་ནས་ངོ་སྤྲོད་སྟངས་ཞིག་ཡིན་སྟབས་ཟབ་ཆོས་དེ་ཉིད་ཉམས་སུ་ལེན་མཁན་ལའང་དབང་རབ་ཐེག་ཆེན་གྱི་སློབ་མ་སྣོད་དང་ལྡན་པ་ཞིག་ངེས་པར་ཅན་གལ་ཆེ་བས་ད་རེས་ཏེ་ལོ་པས་མཛད་པའི་ཕྱག་ཆེན་གངྒ་མ་དང་། ཀརྨ་པ་རང་བྱུང་རྡོ་རྗེས་མཛད་པའི་ཕྱག་ཆེན་སྨོན་ལམ་གཉིས་གནས་སྐབས་ཕྱི་འཐེན་བྱས་པ་ཡིན། དེ་རིང་ནི་བན་རྒར་འཇམ་དཔལ་བཟང་པོས་མཛད་པའི་ཕྱག་ཆེན་བླ་བརྒྱུད་གསོལ་འདེབས་རྡོ་རྗེ་འཆང་ཐུང་མ་འདི་ཉིད་ཀྱི་ཐོག་ནས་འགྲེལ་བཤད་གང་དྲག་དང་རང་ལ་ཉམས་ལེན་ཡོད་མེད་ལ་མ་ལྟོས་པར་ནམ་མཁའ་འདོམ་འཇལ་གྱི་ཚུལ་དུ་སྟོང་ཉིད་སྐོར་མདོར་བསྡུས་ཞིག་བཤད་ཁུལ་བྱས་པ་ཡིན། 

དགོང་མོ་ཆུ་ཚོད་བཞི་པའི་སྐབས་སུ་བདེ་ཆེན་ཞིང་སྒྲུབ་ཆོ་ག་རྗེས་ཆོག་དང་བསྔོ་སྨོན་སོགས་ཀྱིས་མཐར་དབྱུངས་ནས་ངོས་ཀྱི་ཆོས་གྲོགས་པདྨ་ཆོས་འཕེལ་ནང་དུ་སོང་། སང་ཉིན་ནས་བཟུང་ཉིན་གསུམ་རིང་བོད་རིགས་རྣམས་ཁེ་ན་ཌ་ལ་༧གོང་ས་སྐྱབས་མགོན་ཆེན་པོའི་གསུང་ཆོས་ལ་འགྲོ་བ་དང་སྟབས་སྟུན་ང་ནི་ཉིན་གསུམ་རིང་ངལ་གསོ་ཡོད་པས་སེམས་པ་ཧ་ཅང་སྐྱིད་པོ་འདུག

Thursday, October 16, 2014

པོར་ལེན་ལ་སོང་བའི་ཉིན་མོ།

སྔ་ལོར་འཚོགས་ཟིན་པའི་བདེ་ཆེན་ཞིང་སྒྲུབ་ཀྱི་ཟུར་པར་ཞིག།
དེ་རིང་ནི་ཆོས་ཚོགས་ཀྱི་ཚོགས་གཙོའི་གཙོས་དགེ་ཕྲུག་གསུམ་གྱིས་སན་ཧོའི་ཟེའི་གནམ་ཐང་ལ་སྐྱེལ་མ་བྱས་ནས་སེའི་ཨ་ཏྲོའི་གནམ་ཐང་བརྒྱུད་ནས་པོར་ལེན་ལ་དགོང་མོ་ཆུ་ཚོད་དགུ་པའི་སྐབས་སུ་འབྱོར། པོར་ལེན་གནམ་ཐང་ནས་སྙིང་ནས་བརྩེ་བའི་ཆོས་གྲོགས་པདྨ་ཆོས་འཕེལ། ཤེས་རབ་སྐལ་ལྡན་དང་། བདེ་ཆེན་དཔལ་མཚོ་གསུམ་ནས་སྒུག་འདུག ཤར་སྐྱོད་ཤེས་རབ་ནང་དུ་ཡོང་ནས་ད་ནུབ་དེར་བསྡད། ཤེས་རབ་ནས་ངོས་ཀྱི་ཟ་མ་དགའ་ཤོས་མོག་མོག་དང་འཐེན་ཐུག་སོགས་ཀྱིས་ང་ནི་བོད་ཟས་དངས་མ་ཁ་ལ་མ་རག་ནས་ཡུན་རིང་སོང་བས་ཁྱི་ལྟོག་ཟས་དང་འཕྲད་པ་ནང་བཞིན་གྱུར། 
པོར་ལེན་བོད་རིགས་འདི་རྣམས་ནི་ང་ཚོ་ཕན་ཚུན་ཧ་ཅང་འཆམས་མཐུན་ཡག་པོ་ཡོད་པ་མ་ཟད་ཆོས་ཕྱོགས་ནས་ཀྱང་དམ་ཚིག་ཧ་ཅང་ཆེན་པོ་ཡིན། པོར་ལེན་བོད་རིགས་རྣམས་དང་ལྷན་བདེ་ཆེན་ཞིང་སྒྲུབ་འཚོགས་ནས་ལོ་འདི་ཐེངས་མ་བདུན་པ་དེ་ཡིན། འདི་ལོར་རྩ་བའི་བདེ་ཆེན་ཞིང་སྒྲུབ་ཁོག་ནས་ཀརྨ་པ་རང་བྱུང་རྡོ་རྗེས་མཛད་པའི་ཕྱག་ཆེན་སྨོན་ལམ་དང་། ཏཱེ་ལོ་པས་མཛད་པའི་ཕྱག་ཆེན་གངྒ་མ། ཉེ་ཆར་ཁོ་བོས་བྲིས་པའི་ཕྱག་ཆེན་རྣལ་འབྱོར་བཞི་རིམ་གྱི་འགྲེལ་བཤད་བཅས་སྦྲག་ནས་བཤད་འཆར་ཡོད། 
ས་གནས་འདིའི་བོད་རིགས་རྒན་གོག་རྣམས་ཀྱིས་ངོས་ལ་ར་གན་གསེར་རློན་གྱི་འདུ་ཤེས་ཚད་མཐོར་འཛིན་ནས་བདེ་ཆེན་ཞིང་སྒྲུབ་ལ་ཧ་ཅང་དགའ་བོ་བྱེད་ཀྱི་ཡོད། 
ང་གང་ཟག་ཆོས་སྨྲ་བའི་མིང་ཅན་འདི་ལ་གཞན་ལ་མི་འདྲ་ཀུན་དང་མི་མཚུངས་པའི་དམིགས་བསལ་ཁྱད་ཆོས་ཞིག་ཡོད་བསམ་པ་ཞིག་མེད་ཀྱང་ཆེས་དགའ་འོས་པ་ཞིག་ལ་ཁོར་ཡུག་བཟང་པོ་བོད་གངས་ཅན་ལྗོངས་སུ་ལྟེ་ཁྲག་འཐོར་ཅིང་། རྩ་བའི་བླ་མ་དང་ཨ་ཞང་སོགས་སེམས་པ་དུང་བས་དཀར་ཞིང་། མི་གཞི་སྨྱུག་ལས་དྲངས་བའི་ཚད་ལྡན་དགེ་རྒན་རྣམས་ཀྱི་གཉོར་སྐྱོང་དང་བོད་གངས་ཅན་པའི་ཕ་ཁྱིམ་ཚ་བོའི་ནང་དུ་འཚར་ལོངས་བྱུང་བས་དེ་ནི་གཏམ་དཔེར་ཐུད་སྣུམ་པ་མར་གྱི་སྐུ་དྲིན་གྱི་དཔེ་ལྟར་ཡིན་པས་ཆེས་རིན་ཐང་ཅན་གྱི་དཀའ་དྲིན་དེ་ནི་ས་གནས་གང་དུ་སོང་གྲོགས་སུ་དང་འགྲོགས་ཀྱང་དུས་ནམ་ཡང་མི་བརྗེད་པའི་དམ་བཅའ་ཡོད། 
ལར་ནི་ངས་བོད་རིགས་རྣམས་ལ་ནང་ཆོས་ཀྱི་སྒོ་བཤའ་འབྱེད་པ་འདི་ནི་རྒྱུ་མཚན་གཉིས་ཡོད། དང་པོ་ནི། ངས་བཤད་རྒྱུའི་ཆོས་འདི་ཉིད་བོད་ཀྱི་ཐུན་མོང་མ་ཡིན་པའི་རིག་གཞུང་ཟབ་མོ་ཞིག་ཡིན་པའི་ཆ་ནས་ད་ལྟའི་མི་རབས་འདི་རྣམས་ཀྱིས་གོ་ལའི་གཅེས་ནོར་དུ་གྱུར་པའི་རིག་གཞུང་ཟབ་མོ་འདི་མི་ཉམས་རྒྱུན་འཛིན་གྱི་ཆེད་དུ་ཡིན། གཉིས་པ་ནི། ངོས་ཆུང་ནས་ད་བར་ནང་ཆོས་ཟབ་མོ་འདིའི་རྩ་བ་དང་ཡན་ལག་སོགས་ལ་སྦྱང་པ་རིག་གཅིག་རྐང་འཛིན་དུ་སོང་བའི་ཆེད་ལས་པ་ནང་ཆོས་སློབ་སྦྱོང་བ་ཞིག་ཡིན་པའི་ཆ་ནས་གང་ཕན་བཤད་པ་བླ་མའི་ལས་འགན་དུ་སོང་བས་དེ་ནི་ངོས་ཀྱི་གཡོལ་དུ་མེད་ལས་འགན་ངོ་མ་དེ་ཡིན་པའི་ཆ་ནས་ཡིན། 

སང་ཉིན་ནས་བཟུང་བདུན་ཕྲག་གཅིག་ལྷག་རིང་ཞོགས་པ་ཆུ་ཚོད་བདུན་པ་ནས་དགོང་མོ་ཆུ་ཚོད་ལྔ་ཡི་བར་ཆོས་བཤད་ཀྱི་མཁན་པོ་དང་། ཆོ་གའི་དབུ་མཛད་སོགས་འགན་གཅིག་ལྕོག་གིས་བྲེལ་ཟིང་ཆེ་བའི་ལོ་གཅིག་གི་མཛད་རིམ་ཆེ་ཤོས་དེ་ཡིན་པས་དགུང་བཅད་ཀྱི་ལྟོག་སྐོམ་དང་། ཚ་གྲང་གི་དཀའ་ཐུབ། སློབ་མའི་ལོག་སྒྲུབ་སོགས་མདོར་ན་ཆོས་ཕྱིར་དཀའ་སྤྱད་ཀྱི་བཟོད་པའི་གོ་ཆ་གྱོན་ནས་འདི་ལོའི་བདེ་ཆེན་ཞིང་སྒྲུབ་ཐེངས་མ་བདུན་པ་ཉིད་ཀྱང་གེགས་མེད་མཐར་ཕྱིན་ཡོང་བའི་སྨོན་ལམ་དང་དམ་བཅའ་བརྟན་པོ་ཡོད།

Saturday, October 11, 2014

ཕྱག་རྒྱ་ཆེན་པོའི་ཆོས་བཤད་བྱས་པའི་ཉིན་མོ།

ཆོས་ཞུ་བ་ཁག་ཅིག་དང་མཉམ་དུ། 
ཉིན་མོ་འདི་ནི་ཟླ་བ་འགའ་ཡི་གོང་ངོས་ཀྱི་ཆོས་ཚོགས་ནས་གྲ་བསྒྲིགས་བྱས་པ་ནང་བཞིན་དེ་རིང་ཉིན་གང་ཧྲིལ་པོར་ཕྱག་རྒྱ་ཆེན་པོའི་ཆོས་བཤད་བྱེད་རྒྱུ་དེ་ཡིན། ཞོགས་པ་ཆུ་ཚོད་བཅུ་པའི་སྐབས་སུ་འཚོགས་ཁང་ལ་སོང་བས་མི་གྲངས་སུམ་བཅུ་ཁ་ལྷག་གིས་ངོས་ལ་ཕེབས་སྒུག་བྱས་འདུག 
དང་པོ་ངོས་ཀྱི་དབྱིན་ཇི་ཆགས་རོ་དེ་རྒྱབ་ནས་མི་མང་ལ་ཁམས་འདྲི་དང་སྦྲག་དངོས་བཞིའི་ཆོས་ལ་སྐད་བསྒྱུར་བྱམས་པ་མཐར་ཕྱིན་ལགས་བརྒྱུད་ནས་ཕྱག་ཆེན་དངོས་གཞིའི་ཆོས་མ་བཤད་གོང་ནས་ཐུན་མོང་གི་སྔོན་འགྲོའི་ཆོས་ལ་བློ་ལྡོག་རྣམ་བཞི་མདོར་བསྡུས་བཤད་ནས་ཐུན་མོང་མ་ཡིན་པའི་ཆོས་ལ་རླུང་རོ་དགུ་ཕྲུག་བྱེད་སྟངས་མདོར་བསྡུས་ཞིག་བཤད། 
དངོས་གཞིའི་ཆོས་ཐུན་ལ་ཉེ་ཆར་ངོས་རང་ནས་བྲིས་པའི་ཕྱག་ཆེན་རྣལ་འབྱོར་བཞི་རིམ་གྱི་འགྲེལ་བཤད་ཐོག་ནས་རྩེ་གཅིག སྤྲོས་བྲལ། རོ་གཅིག སྒོམ་མེད། རྣམས་རིམ་བཞིན་ཇི་ལྟར་ཉམས་སུ་ལེན་སྟངས་དང་བཅས་རང་གང་ཤེས་ཉམས་མྱོང་དང་། རྩ་བའི་བླ་མའི་ཞལ་རྒྱུན་སོགས་མདོར་ན་རང་བཟོ་དང་ཕོ་ཚོད་ཀྱི་དབང་དུ་མ་སོང་བར་གང་ཤེས་བཤད་ཁུལ་བྱས། སྐབས་སྐབས་སུ་བཤད་དོན་རྣམས་གདན་ཐོག་དེ་གར་སྒོམ་འཇུག་པ་སོགས་ཀྱང་བྱས། ཆུ་ཚོད་ལྔ་པའི་སྐབས་སུ་དྲི་བ་དྲིས་ལན་སོགས་ཀྱིས་དེ་རིང་གི་ཆོས་ཐུན་ཉིད་ཡོངས་སུ་གྲུབ་པར་བྱས་པས་མི་མང་ཧ་ཅང་དགའ་བོ་བྱས་སོང་། ལར་ནི་ངོས་ཀྱི་སློབ་མ་འདི་རྣམས་ལོ་རེ་བཞིན་ང་ལ་དད་གུས་དང་ཆོས་ལ་མོས་པ་ཇེ་ཆེ་རེད་འདུག དེ་ནི་ངོས་ལ་ལྟོས་ན་ཧ་ཅང་དགའ་འོས་པའི་གནས་སྟངས་ཞིག་རེད་བསམ། 
གཤམ་དུ་ལོ་གསུམ་ཡར་སྔོན་ཁོ་བོས་བྲིས་པའི་ཀ་རྩོམ་ཞིག་གཏངས་ཡོད། 
 ༄།། ཀ་རྩོམ་རིག་པའི་བུ་ཆུང་ཉམས་འགྱུར་རྩེད་མཚར་བཞུགས་སོ།
ཀ་དག་གཡོ་བ་མེད་པ་རྩེ་གཅིག་གི་ངང་ནས།།
ཁ་ཚིག་བརྗོད་པ་ལས་འདས་སྤྲོས་བྲལ་གྱི་ལྟ་བ།།
ག་ལེར་སྣང་སེམས་དབྱེར་མེད་རོ་གཅིག་ཏུ་རྟོགས་ནས།།
ང་ཚོའི་མེས་པོའི་སྒོམ་མེད་རྒྱལ་ས་རུ་སྙེག་འགྲོ།།
ཅ་དག་དབེན་པ་མ་བསྟེན་རང་བྱུང་གི་གཤིས་ལུགས།།
ཆ་ལུགས་གང་གིས་མ་བསྒྱུར་གསལ་རིག་གི་ངོ་བོ།།
ཇ་ཡུན་ཙམ་ལ་མ་ཡེངས་མ་ཧཱ་ནི་མུ་དྲ།།
ཉ་ཆུ་བཞིན་དུ་འབྲལ་མེད་སྐྱོང་བ་འདི་ཨེ་མ།།
ཏཱ་ཐ་གཱ་ཏའི་ཆོས་ཀྱི་སྙིང་པོ་ཡི་ཡང་རྩེ།།
ཐ་མལ་འགྲོ་འདུག་སྤྱོད་ལམ་རྣམ་བཞི་ཡི་སྐབས་སུ།།
ད་ལྟའི་གསལ་རིག་ཤེས་པ་མ་ཡེངས་ཙམ་སྐྱོང་ན།།
ན་འཆི་སྔས་མགོར་སླེབས་ཀྱང་དངངས་སྐྲག་ཞིག་མི་དགོས།།
པ་ལོ་རྒྱབ་ཏུ་བཅིངས་པའི་སྒྲུབ་བརྒྱུད་ཀྱི་མངའ་བདག།
ཕ་རྒན་མར་པ་ལོ་ཙཱའི་གདམས་ངག་གི་ཁྱད་ཆོས།།
བ་གླང་རྫི་ཡན་གྲོལ་བའི་བདེ་སྟོང་གི་མྱུར་ལམ།།
མ་ཡེངས་ཕྱག་རྒྱ་ཆེན་པོའི་ལྟ་བ་དེ་སྐྱོངས་ཤིག།
ཙཱ་རིའི་ནགས་སོགས་དབེན་ཁྲོད་ཉམས་དགའ་ཡི་གནས་སུ།།
ཚ་གྲང་དཀའ་སྤྱད་མེས་པོ་གོང་མ་ཡི་རྣམ་ཐར།།
ཛཱ་ཧུའི་བུ་མོ་བཞིན་དུ་གུས་རྟག་གིས་འབད་ན།།
ཝ་ལེར་གསལ་བའི་སངས་རྒྱས་ཐག་རིང་ན་མི་འདུག།
ཞྭ་མོའི་དབྱིབས་མདོག་ཙམ་ལ་བསྟན་རྩ་རང་འཛིན་ཅིང་།།
ཟ་ཉལ་སྤྱོད་སོགས་འཇིག་རྟེན་ཐ་མལ་ལས་སྡུག་པ།།
འ་ཅག་བོད་བསྟན་བདག་པོ་ང་འདྲ་ཡི་སེར་གཟུགས།།
ཡ་མ་རཱ་ཛའི་མདུན་ནས་བྲོས་ས་འདྲ་ཡོད་དམ།།
རྭ་ལྟར་གྱོང་བའི་བདག་འཛིན་འགོང་པོ་ཡི་ཐོག་ཏུ།།
ལ་མོ་སྟོང་ཉིད་ཟབ་མོས་ཐོག་རྫིས་ཞིག་བྱོས་དང་།།
ཤཀྱཱའི་བསྟན་ལ་གྲུབ་རྟགས་དེ་ལས་རང་མེད་པས།།
ས་ཆ་གང་དུ་སོང་ཡང་མན་ངག་དེ་མ་རྗེད།།
ཧ་ལོའི་དུག་གི་ས་བོན་ངན་རྟོག་གི་ཁྲོད་ནས།།
ཨ་མྲི་ཏ་ཡི་འབྲས་བུ་བསླབ་བྱ་ཞིག་མེད་ཀྱང་།
ཧ་ཅང་དགེ་བའི་ཀུན་སློང་རབ་དཀར་གྱི་ཉི་མ།།
ཨ་མཚར་ཉམས་འགྱུར་ཙམ་ལ་འགོག་མཁན་ཞིག་ཨི་ཡོད།།

ཅེས་བཀའ་རྩོམ་རིག་པའི་བུ་ཆུང་ཉམས་འགྱུར་རྩེད་མཚར་ཅེས་པ་འདི་ཉིད་ཀྱང་། ཨ་རིའི་བྱང་ཕྱོགས་ཀི་ལི་ཧྥོ་ཉའི་ས་གནས་སུ་དབེན་ཁྲོད་གྲུབ་གཉིས་དགའ་ཚལ་གླིང་དུ་ཕུར་པའི་བསྙེན་མཚམས་ཞིག་གི་སྔ་ཐུན་སྐབས་སུ་ཆོས་སྨྲའི་མིང་ཙམ་འཛིན་པ་དོན་དུ་ཆོས་དོན་ནོར་གྱིས་དབུལ་བའི་སྙོམས་ལས་པ་ཀར་བསྟན་ནས་རབ་གནས་ཆུ་འབྲུག་ལོའི་ནག་ཟླའི་ཚེས་པ་བརྒྱད་དང་། 2012 ཕྱི་ཟླ་12 ཚེས་པ་20 ཉིན་བྲིས་པ་དགེ་ལེགས་འཕེལ།།)

Sunday, October 5, 2014

སངས་རྒྱས་སྨན་བླའི་ཆོས་ཚོགས་ལ་སོང་བའི་ཉིན་མོ།

སངས་རྒྱས་སྨན་བླའི་ཆོས་ཚོགས་ནང་ནས། 
ཉིན་མོ་འདི་ནི་སྔ་ནས་གྲ་བསྒྲིགས་བྱས་པ་ནང་བཞིན་ད་ནང་ཞོགས་པ་ཆུ་ཚོད་དགུ་པའི་ཐོག་ས་གནས་འདི་ནས་ཐག་ཉེར་ཡོད་པའི་བླ་མ་བཟོད་པ་རིན་པོ་ཆེའི་སངས་རྒྱས་སྨན་བླའི་ཆོས་ཚོགས་ལ་ངོས་ཀྱི་དགེ་ཕྲུག་གསར་བུ་བཅུ་གསུམ་ཙམ་ཁྲིད་ནས་ཆོས་མཇལ་ལ་སོང་།  བླ་མ་བཟོད་པ་ནི་དགེ་ལུགས་པའི་བླ་མ་ཕྱི་རྒྱལ་སོགས་ལ་འགྲོ་དོན་ཧ་ཅང་ཆེན་པོ་ཅན་ཞིག་ཡིན་པ་མ་ཟད་སྐད་ཆ་གོ་ཚུལ་བྱས་ན་ཉམས་ལེན་ཧ་ཅང་ཡག་པོ་ཅན་ཞིག་ཡིན་སྐད་འདུག ངས་ནི་ལོ་གསུམ་ཙམ་གོང་ནས་རྡ་རམ་ས་ནས་སྐྱབས་མགོན་རིན་པོ་ཆེའི་གསུངས་ཆོས་ཞིག་གི་སྐབས་སུ་གྲལ་གདན་གཅིག་པ་ཙམ་ལས་དམིགས་བསལ་གྱི་འབྲེལ་བ་གང་ཡང་མེད། ཞོགས་པ་ཆོས་ཚོགས་སུ་སླེབས་མ་ཐག་ཏུ་མཆོད་ཁང་ནང་སོང་ནས་ཚང་མས་༧གོང་སྐྱབས་མགོན་ཡིད་བཞིན་ནོར་བུའི་མཐོང་གྲོལ་རིན་པོ་ཆེར་མཇལ་དར་ཕུལ་ནས་ངས་བོད་སྐད་ཐོག་སྨན་བླའི་གཟུངས་སྔགས་དང་སྨོན་ལམ་སོགས་བྱས་ནས་རིའི་སྒང་དུ་ཡོད་པའི་རྒྱལ་བ་བྱམས་པའི་སྐུ་བརྙན་མཇལ་དུ་སོང་། སྐུ་བརྙན་ཐོག་རྩེགས་གཉིས་ཙམ་ཅན་གྱི་སྐུ་དེ་མཇལ་བ་དང་མཉམ་དུ་ངོས་ཀྱི་དགེ་ཕྲུག་གསར་བུ་རྣམས་ཧ་ལས་ཧོན་འཐོར་མདོག་བྱེད་ཀྱི་འདུག སྐུའི་དྲུང་ནས་སོ་སོའི་སྨོན་ལམ་སོགས་གང་ཤེས་མཐར་སྒོམ་སྐར་མ་ཁ་ཤས་བྱེད་བཅུག་ནས་ངས་དབྱིན་ཇིའི་ཆགས་རོ་དེ་སྐྱོན་ནས་ཆོས་བཤད་འདི་འདྲ་ཞིག་བྱེད་ཁུལ་བྱས། 
ནམ་རྒྱུན་གནས་སྐོར་ལྷ་མཇལ་གང་ཡིན་ཀྱང་ཐོག་མའི་ཀུན་སློང་བཟང་པོའི་འོག་ནས་རྟེན་དང་གནས་སོགས་ལ་མོས་གུས་ཀྱི་དད་པས་མཇལ་དགོས། དེང་དུས་འགྲེམ་སྟོན་ཁང་དང་སྤྱན་གཟིགས་ཁང་ནང་དུ་ལྟ་སྐོར་ལ་སོང་བ་འདྲ་བོ་ཞིག་བྱས་ན་གནས་མཇལ་བའི་གོ་མི་ཆོད། བོད་གངས་ཅན་ལྗོངས་ལྟ་བུར་མཚོན་ན་གནས་ཀྱིས་གང་ཟག་བྱིན་གྱིས་རླབས་ཐུབ་པ་ཡོད། ས་གནས་འདིར་ད་ལྟ་བོད་ཆོས་དར་འགོ་ཚུགས་ནས་རིང་པོར་སོང་མེད་དུས་གང་ཟག་ཁྱད་པར་ཅན་གྱིས་གནས་ཕར་བྱིན་གྱིས་རླབས་པའི་དུས་ཡིན། ད་ལྟ་ང་ཚོའི་མདུན་ན་ཡོད་པའི་སྐུ་བརྙན་འདི་རྒྱལ་བ་བྱམས་པ་ཟེར་འདི་མ་འོང་འབྱུང་འགྱུར་ཚེ་ལོ་བཅུ་པའི་དུས་རབས་ཀྱི་སངས་རྒྱས་རེད། སྤྱིར་སངས་རྒྱས་གཅིག་སྟོང་དང་གཉིས་ཡོད་པའི་ནང་ནས་ད་ལྟའི་སངས་རྒྱས་བཅོམ་ལྡན་འདས་འདི་སངས་རྒྱས་བཞི་པ་དེ་རེད། རྒྱལ་བ་བྱམས་པ་འདི་སངས་རྒྱས་ལྔ་པ་རེད་ད་དུང་སངས་རྒྱས་དགུ་བརྒྱ་དང་དགུ་བཅུ་གོ་བརྒྱད་ཙམ་འབྱོན་རྒྱུ་བསྡད་ཡོད། སྐབས་དེ་དུས་ང་ཚོ་གང་དུ་ཡོད་སུས་ཤེས། 
ཞེས་བཤད་པས་སློབ་མ་རྣམས་ཧ་ཅང་དགའ་བོ་བྱས་སོང་། ཉིན་གུང་ཞལ་ལག་ཚར་མ་ཐག་རི་མགོར་སོང་། ལམ་བར་རྣམས་སུ་བློ་སྦྱོང་ཚིག་བརྒྱད་མ་ཤོ་ལོ་ཀ་རེ་རེ་བཞིན་གཤམ་དུ་སྐྱབས་མགོན་རིན་པོ་ཆེའི་འགྲེལ་བཤད་ཡོད་པ་སྦྱར་བྱང་དུ་མཇལ་རྒྱུ་འདུག་པས་ངོས་ཀྱི་དགེ་ཕྲུག་རྣམས་ལ་རེས་མོས་ཀློག་བཅུག་པས་དེ་རིང་གི་གནས་མཇལ་དེས་མི་རྣམས་ཧ་ཅང་དགའ་བོ་བྱུང་སོང་། དགུང་མོ་ཆུ་ཚོད་བཞི་པའི་སྐབས་སུ་དེ་རིང་གི་དགོན་པ་དེ་སྐྱིད་རབ་དང་ཁ་ལག་དེ་ཞིམ་རབ་སོགས་རླངས་འཁོར་ནང་ནས་ཕན་ཚུན་ཁ་བརྡ་དང་ཀུ་ཅོའི་འུར་སྒྲས་རྣ་བ་བཀས་གྲབ་བྱེད་བཞིན་ནང་དུ་འབྱོར། 
དེ་རིང་གི་ཉིན་ཐོ་དེ་གཏངས་ནས་ཉལ་སར་སོང་ནས་གཉིད་དུ་ཡུར།