Friday, November 21, 2014

ཀི་ལི་ཧྥོ་ཉར་འབྱོར་བའི་ཉིན་མོ།

ཨ་མ་མཉམ་དུ་སྨན་ཁང་ནང་ནས་བླངས་པའི་པར། 
ཟླ་བ་གཅིག་ལྷག་རིང་པོར་ལེན་ཌི་དང་། ཉིའུ་ཡོག བྷོ་སི་ཊོན། ཀི་ནི་རེའུ་ཀེ་ཊེ། ཀན་སེའུ་སེ་སོགས་ཨ་རིའི་མངའ་སྡེ་འགའ་རུ་ཆོས་བཤད་ཀྱི་ཆེད་དུ་འགྲོ་དགོས་བྱུང་། མངའ་སྡེ་དེ་རྣམས་ནི་གྲང་ངར་གཅིག་ལས་གཅིག་ཆེ་བས་འགྲུལ་བཞུད་སྐབས་སུ་དཀའ་ངལ་ཅུང་བྱུང་བ་མ་ཟད་གློ་འཆམས་ཞིག་ཕོག་ནས་ཡུན་རིང་སོང་ཡང་ད་དུང་སངས་གྲགས་རེད་མི་འདུག ངོས་ཀྱི་བསྡད་སའི་ས་ཆ་འདི་ནི་གནམ་གཤིས་དྲོ་གྲང་རན་ལ་ས་ཆའི་ཁོར་ཡུག་ཧ་ཅང་མཛེས་སྡུག་དང་ལྡན། ཨ་རིའི་འབྱོར་ལྡན་སྐད་གྲགས་ཅན་རྣམས་འདུག་ས་ཞིག་ཡིན་ཀྱང་ང་ནི་སྟེས་དབང་གིས་ས་གནས་འདིར་སླེབས་ནས་ཕལ་ཆེར་མི་ལོ་ལྔ་མ་ཟིན་ཙན་ཞིག་རེད་འདུག། ཉི་ཧོང་ནས་ཡིན་པའི་དད་ལྡན་མ་ཨ་མ་སུས་སིན་ནམ་ཆོས་མིང་དུ་ཀུན་བཟང་དབང་མོ་ཡང་སྐྱར་ཐེངས་མ་གཉིས་པའི་རྒྱུ་མ་བཤའ་བཅོས་བྱས་ནས་སྨན་ཁང་དུ་ཡོད་སྟབས་ང་ནི་གནམ་ཐང་ནས་བློ་བུར་དུ་སྨན་ཁང་དུ་ཨ་མར་ཐུག་འཕྲད་ལ་སོང་བས་མོ་རང་ཧ་ཅང་དགའ་བོ་བྱུང་སོང་། སྨན་པས་ཟེར་ན་ནད་ལྷག་ལུས་མེད་པར་གཙང་མ་བཟོས་ཟིན་པས་གང་མགྱོགས་ནང་དུ་འགྲོ་ཆོག་ཅེས་བཤད་ཀྱིན་འདུག ཨ་མ་སུས་སིན་ནི་འདི་ལོར་རྒྱུ་མ་བཤའ་བཅོས་ཐེངས་མ་གཉིས་བྱས་པ་རེད། སྤྱིར་གཏང་ལུང་པ་འདིའི་སྨན་དང་ལག་རྩལ་མཐུན་རྐྱེན་སོགས་ཧ་ཅང་ལེགས་པས་བཤའ་བཅོས་འདི་ཙམ་ལ་ནད་གྲལ་དུ་མི་འཇོག་ཀྱང་ང་ནི་ཨ་མ་སུས་སིན་ད་ལོར་ལོ་བརྒྱད་བཅུ་གྱ་གསུམ་ལ་སོང་བའི་ནད་པ་ཞིག་ལ་བསམ་ནས་སེམས་འཁྲལ་ཅུང་བྱུང་ཡང་ད་རེས་མོ་རང་ངོ་གདོང་དང་ནུས་ཤུགས་སོགས་གང་ལ་ལྟས་ཀྱང་ནད་ལོགས་མ་རྒྱབ་ན་ནད་འོག་འདི་ནས་ཐར་ཐུབ་འདུག་བསམ་པའི་ཚོར་སྣང་བྱུང་།  

No comments:

Post a Comment