Saturday, March 14, 2015

ཁ་འདོན་བྱས་ནས་ནང་དུ་བསྡད་པའི་ཉིན་མོ།

ད་ནུབ་ཉལ་ཁར་ཁ་པར་དེ་སྒོ་རྒྱག་རྒྱུ་རྗེད་འདུག་སྟབས་ད་ནང་མཚན་མོ་ཆུ་ཚོད་གསུམ་པའི་སྐབས་སུ་ཟུར་ནས་ཁ་པར་གྱི་ཐིར་སྒྲ་དྲག་པོས་འཇམ་པོའི་གཉིད་སྐྱིད་པོ་དེ་རྦད་དེ་དཀྲོགས་སོང་། མིག་ལྕི་ཁ་ཕྱེ་ལོངས་མེད་པར་ལམ་སང་ཁ་པར་ལ་ལག་ཉུག་བྱས་ནས་སྐད་གསལ་ལ་མ་གསལ་བ་ཞིག་དང་ལྷན་ཧ་ལོའི་སྐད་ཀྱིས་གཏམ་སྒོ་ཕྱེས་དུས་བལ་ཡུལ་ནས་ངོས་ཀྱི་ཕ་ཡུལ་གཅིག་པ་སྐུ་ཞབས་བསོད་ནམས་རྡོ་རྗེ་ལགས་རེད་འདུག ཁོང་ནི་ཉེ་བའི་ཆར་འཇམ་མགོན་ཀོང་སྤྲུལ་རིན་པོ་ཆེའི་དགོན་པའི་སྒྲུབ་ཁང་ནང་ནས་ལོ་གསུམ་ཟླ་གསུམ་གྱི་མཚམས་གྲོལ་ཚར་མ་ཐག་ཡིན། ནམ་རྒྱུན་རྒྱ་གར་བལ་ཡུལ་ནས་ཁ་པར་སླེབས་ན་མང་ཤོས་ནི་དངུལ་ལ་རེ་མཁན་ཤ་སྟག་ཡིན། དེ་རིང་ནི་ངོ་མ་བཀྲ་ཤིས་པའི་ཉིན་མོ་ཞིག་ལ་ངོས་ལ་འཚམས་འདྲི་ཙམ་ལས་གཞན་སྐད་ཆ་གང་ཡང་མི་འདུག 
 ཞོགས་པ་ཆུ་ཚོད་ལྔ་པའི་སྐབས་སུ་ལངས་ནས་གཙང་ཁང་ཕྱི་དོར་བྱས་ནས་མཆོད་པ་རྣམས་གཤམས། ཞོགས་ཟས་ཚར་མ་ཐག་ཏུ་ཁ་འདོན་རྣམས་ལ་བྲེལ་བས་ནམ་རྒྱུན་ངོས་ཀྱི་ཁ་འདོན་སྐབས་སུ་གཡས་གཡོན་ཐག་ཉེ་སར་ཡོད་པའི་ལས་མེད་རྒན་གོག་ངོས་ཀྱི་དགེ་ཕྲུག་ཁ་ཤས་མི་ཡི་ལས་ཟློས་སྤྲེའུ་དཔེ་ལྟར་ཁོ་རང་ཚོ་ནས་སྒོམ་བྱེད་ཀྱི་ཡོད། དེ་རིང་རྒན་གོག་གསུམ་སླེབས་བྱུང་བས་ང་ཚོ་སྒོམ་མཉམ་དུ་རྒྱབས་ནས་བསྡད་པ་ཡིན། ཉིན་གུང་རྒྱབ་ཏུ་ངོས་ཀྱི་རྩིས་འཁོར་ལག་ཁྱེར་ཆུང་བ་ipad ནང་ནས་རིན་མེད་ཀྱི་ཕབས་ལེན་བྱས་པའི་རྒྱལ་དབང་ཀརྨ་པ་དགུ་པ་དབང་ཕྱུག་རྡོ་རྗེས་མཛད་པའི་ཕྱག་ཆེན་ངེས་དོན་རྒྱ་མཚོར་དཔེ་བལྟས་བྱས། ལྡེབ་མ་༦༣༦ གི་ནང་དུ་ལྷག་མཐོང་གི་སྐབས་སུ་བཞག་ཐབས་ལ།
 ཐོག་མར་སེམས་རང་ལུགས་སུ་ལྷོད་ཀྱི་གློད་ནས་འཇོག་དགོས། འཇོག་ལུགས་ནི། གསལ་དྭངས་ངར་དང་ལྡན་པ་ཉི་མ་སྤྲིན་དང་བྲལ་བ་ལྟ་བུར་བཞག བྱུང་ཚོར་སེམས་སུ་ཤེས་པ་ཆུ་དང་རླབས་ལྟ་བུར་བཞག གསལ་ཆ་ཡོད་ལ་འཛིན་པ་མེད་པ་བུ་ཆུང་གིས་ལྷ་ཁང་མཐོང་བ་ལྟ་བུར་བཞག 
ཞེས་འཇོག་སྒོམ་གྱི་བཞག་ཐབས་དཔེ་དོན་དང་སྦྱར་ནས་ཚིག་ཉུང་དོན་ཚང་བ་དོན་ལ་གོ་རྒྱུ་ཡོད་པ་གསལ་པོར་གསུངས་འདུག་པས་སེམས་ལ་ཕན་པོ་འདྲ་ཞིག་བྱུང་། དེ་ནས་པོར་ལེན་ཌ་ལ་ཡོད་པའི་ངོས་ཀྱི་ཆོས་གྲོགས་པདྨ་ཆོས་འཕེལ་དང་མཉམ་དུ་ཆོས་གཏམ་འགའ་བྱས་ནས་དགོངས་ཟས་ལ་རོལ། 
དེ་རིང་གི་ཉིན་ཐོ་མདོར་བསྡུས་དེ་གཏངས་ནས་ཉལ་སར་སོང་ནས་གཉིད་དུ་ཡུར།

No comments:

Post a Comment