Saturday, April 25, 2015

བཀྲ་མ་ཤིས་པའི་གཏམ་ངན་ཉིན་མོ།

ས་ཡོམ་ཁྲོད་ཀྱི་བལ་པོའི་ནང་མི།
ད་ནངས་ཞོགས་པ་ཡར་ལངས་པའི་སྐབས་སུ་བཀྲ་མ་ཤིས་པའི་གཏམ་ངན་ཞིག་ལ་བལ་ཡུལ་ལ་ས་ཡོམ་ཤུགས་ཆེན་པོ་རྒྱབ་ནས་མི་བརྒྱ་ཕྲག་མང་པོའི་ཕུང་པོ་དྲྭ་རྒྱའི་རྒྱུད་ལམ་ནང་དུ་མཐོང་རྒྱུ་ཡོད་པ་དེ་རེད། གནས་ཚུལ་དེ་མཐོང་ཐོས་བྱུང་མ་ཐག་བལ་ཡུལ་ཕྱོགས་ལ་ཡོད་པའི་ངོས་ཀྱི་ཆོས་གྲོགས་དང་སློབ་མ་སོགས་ལ་ཁ་པར་གཏང་ཡང་ཁ་པར་འགྲོ་གི་མི་འདུག། ཆར་འཕྲིན་ཐོག་ནས་མི་ཁ་ཤས་ལ་འབྲེལ་བ་བྱས་པས་ངོས་ཀྱི་ངོ་ཤེས་འགའ་ལ་སྐྱོན་གང་ཡང་བྱུང་མི་འདུག་ད་དུང་ཁ་ཤས་ལ་འབྲེལ་བ་བྱེད་ཐུབ་མ་སོང་། 
ང་ནི་བལ་ཡུལ་ལ་ཧ་ཅང་དགའ། གང་ཡིན་ཟེར་ན་༡༩༩༧ ལོར་སྤྲིན་དཀར་པོ་དེ་ཐོད་ལ་བླངས། ས་ནག་པོ་དེ་འདོམས་ཀྱིས་འཇལ་ནས་སྟོད་གངས་རིའི་བརྒྱུད་མི་འདོད་བཞིན་དུ་གཞན་ཡུལ་ས་མཐར་འཁྱར་བའི་སྐབས་སུ་འཆི་གསོས་ཀྱི་ངལ་གསོའི་ས་ཚིག་ཞིག་ཡིན། མ་ཟད་གདོང་དམར་བོད་པ་ཚང་དབུ་འཕངས་དགུངས་བས་མཐོ་ཞིང་ཨེ་ཤ་ཡའི་སུམ་གཉིས་ལ་དབང་བསྒྱུར་བྱེད་པའི་དུས་རབས་བརྒྱད་པའི་སྐབས་སུ་བལ་བོད་གཉིས་ནི་གཉེན་ཚན་གྱི་འབྲེལ་བ་ཡོད་པ་ཅན་ཞིག་ཡིན། ང་རང་ཉིད་ལ་ལྟོས་ན་ཉིས་སྟོང་གཅིག་ནས་བཞིའི་བར་བལ་ཡུལ་བོད་དགོན་འགའ་རུ་ནང་ཆོས་དཔེ་ཁྲིད་ཀྱི་དགེ་རྒན་བྱས་ནས་བསྡད་པའི་རིང་བལ་ཟས་བརྒྱ་གོ་གཅིག་ཆོད་འབྲས་ལྡ་ལི་ལའང་དགའ་མོས་ཆེ་ཙམ་བྱུང་། ཕར་ལྟས་ཚོད་ལ་བྱང་ཐང་རྔ་མོང་ཁ་ནས་སྐྱུག་པའི་བཙོ་ཆུ་དང་འདྲ་ན་ཡང་ཁ་རུ་ཟ་བའི་སྐབས་སུ་བལ་ཟས་ཡོངས་ཀྱི་ནང་ནས་བྲོ་བ་ཞིམ་ཤོས་དེ་ཡིན། བལ་པོའི་ལག་ཁྱེར་རྫུན་བཟོ་བྱས་ཤིང་རླུང་རྟ་དར་བའི་སྐབས་སུ་ཨེ་ཤ་ཡའི་རྒྱ་རིགས་ཀྱི་ཡུལ་གྲུ་འགའ་ཉུལ་ནས་ཚུར་འཁོར་བའི་སྐབས་སུ་བན་རྒན་གྱི་སྒོར་ཁུག་འཐུག་པོའང་ཆག་མྱོང་། རླུང་རྟ་ཆག་པའི་སྐབས་སུ་གནམ་ཐང་ནས་ལག་ཁྱེར་རྫུན་མའི་རྐུབ་རྡོལ་ནས་བལ་སྒོར་ཁྲི་ཚོ་མང་པོའི་རྫུན་འཇལ་བྱེད་པའང་ཐེངས་གཅིག་ཙམ་ག་ལ་ཚད། 
གང་ལྟར་ཀྱང་དེ་རིང་བལ་པོར་ལོ་རྒྱུས་ཐོག་བྱུང་མ་མྱོང་བའི་རང་བྱུང་གི་གོད་ཆག་ཆེན་པོ་བྱུང་བ་ལ་བོད་ཀྱི་གཏམ་དཔེར། ཁྱིམ་ཚེས་ལ་རྐུ་མ་རྒྱུག་ན་ཀི་མཉམ་རྒྱག་གི་དཔེ་ལྟར་ང་རང་ཉིད་བོད་རིགས་ཞིག་ཡིན་པའི་ཆ་ནས་སེམས་ཕམ་ཧ་ཅང་ཆེན་པོ་བྱུང་། དེ་རིང་ནས་བཟུང་སྟེ་ཞེ་དགུ་མ་ཡོལ་བར་ངོས་ཀྱི་ཆོས་ཚོགས་འཇམ་དབྱངས་ཆོས་འཁོར་གླིང་ནས་གཟའ་ཟླ་བའི་འཆར་ཅན་བདེ་ཆེན་སྒྲུབས་སྐབས་སུ་དམིགས་བསལ་བསྔོ་སྨོན་དང་བྱང་ཆོག་སོགས་བྱེད་རྒྱུ་ཡིན། 

རང་བྱུང་འབྱུང་བའི་གོད་ཆག་ཟློག་མེད་འདིས།། 
ཉམ་ཆུང་མི་རྣམས་སྡུག་གི་གནས་ལ་སྦྱར།། 

ཀྱེ་མ་ཀྱེ་ཧུད་བལ་པོའི་སྡུག་བསྔལ་འདི།། 
སངས་རྒྱས་འོད་དཔག་མེད་ཀྱིས་གཟིགས་ལགས་སམ།། 

རིང་ནས་བསྙེན་པའི་ལྷ་མཆོག་ཁྱེད་རྣམས་ཀྱིས།། 
ལྷང་ལྷང་གདུང་བའི་གསོལ་འདེབས་གསན་ལགས་ན།།

འཇིགས་རུང་ས་ཡོམ་ཁྲོད་ཀྱི་ཚེ་འདས་རྣམས།།
འཁྲུལ་སྣང་བར་དོའི་སྡུག་བསྔལ་ལས་གྲོལ་ནས།། 

པདྨའི་འོད་ལས་གྲོལ་བའི་ཞིང་ཁམས་སུ།། 

སྐྱེས་ནས་ཕྱིར་མི་ལྡོག་པའི་ས་ཐོབ་ཤོག།

Friday, April 3, 2015

དབྱིན་ཇིའི་མི་རྒན་ཞིག་དང་མཉམ་དུ་གླེང་མོལ་བྱས་པ།།


ཁ་སང་ནི་སྔ་ནས་དུས་ཆད་བྱས་པ་ལྟར་ངོ་ཤེས་མི་ཚང་ཞིག་གིས་ཉིན་གུང་ཟ་མར་མགྲོན་འབོད་བྱས། མི་ཚང་དེའི་དགའ་ཉེ་སྤུན་མཆེད་སོགས་མི་གྲངས་བདུན་བརྒྱད་ཙམ་ཞིག་འཛོམས་འདུག ཕན་ཚུན་འཕྲད་མ་ཐག་རང་གིས་མིང་ནས་འབོད་ཅིང་ངོ་སྤྲོད་བྱེད་ཞོར་ལག་འཇུ་དང་འཐམ་འཁྱུད་སོགས་བྱེད་པ་ནི་ཡུལ་ལུང་འདིའི་ལུགས་སྲོལ་རང་ཡིན་པས་ངས་ཀྱང་དེ་བཞིན་བྱས། དེ་རིང་གི་གནམ་གཤིས་ཧ་ཅང་བཟང་བས་འབྱོར་ལྡན་མི་ཚང་འདིའི་ཁང་པའི་ཐོག་ཁར་ཉི་རའི་ནང་དུ་ཟས་རིགས་འདྲ་མིན་གྱིས་གཡོས་སྦྱོར་བྱས་པའི་ཟས་སྣ་རྣམས་ཟ་ཆོག་ཆོག་བྱས་ནས་གཤམས་འདུག
ཟས་ལ་རོལ་བཞིན་པའི་སྐབས་སུ་ང་ནི་སྐུ་མགྲོན་དམིགས་བསལ་བ་ཡིན་ཙང་ཚང་མས་ངོས་ཀྱི་སྐོར་སྐད་ཆ་འདྲི་བཤད་ལ་འཚང་ཁ་ཤིག་ཤིག་བྱེད་ཀྱི་འདུག། 

ཟུར་དུ་ཡོད་པའི་མི་རྒན་ཞིག་ནས་གོ་མ་བརྡ་ཡིས་ལྐོབ་ལབ་ཀྱིས་ང་ལ་འདི་ལྟར་ཟེར། ང་ནང་པའི་ཆོས་ལ་དོ་སྣང་བྱས་ནས་ལོ་མང་པོར་འགྲོ་སོང་། དང་པོ་ང་ཐེག་ཆེན་གྱི་ཆོས་བྱེད་མཁན་ཞིག་དང་འབྲེལ་བ་བྱུང་དེ་ནས་བཟུང་སྟེ་བོད་པའི་བླ་མ་འགའ་ཡི་མདུན་ནས་སྐྱབས་འགྲོའི་སྡོམ་པ་ཞུས་པ་ཡིན། ཁྱད་མཚར་ཞིག་ལ་ལོ་ལྔ་ཡི་གོང་ནས་བཀའ་གདམས་གསར་མ་པ་ཡིན་ཟེར་བའི་ཚོགས་པ་ཞིག་དང་འབྲེལ་བ་བྱུང་། ཉིན་གཅིག་དབྱིན་ཇིའི་གྲྭ་པ་གཉིས་དང་བོད་པའི་བླ་མ་གཅིག་བཅས་དགེ་འདུན་པ་འགའ་ཡིས་བྱེ་མའི་རྡུལ་མཚོན་གཤམས་སྟོན་གྱི་མཛད་སྒོ་ཞིག་གི་ཞོར་དུ་མི་མང་ལ་སངས་རྒྱས་སྨན་བླའི་དབང་ཞིག་གནང་བྱུང་བས་ངས་ཀྱང་དབང་དེ་ཞུས་པ་ཡིན། ཁོང་ཚོའི་བྱེད་སྟངས་དེ་བོད་པའི་བླ་མ་གཞན་ལས་ཁྱད་པར་ཆེན་པོ་འདུག དབང་གྲལ་ལ་བསྡད་ཚར་བའི་སྐབས་སུ་མི་རེ་རེ་བཞིན་དུ་པར་བླངས་བ་མ་ཟད་ཁ་བྱང་ཡང་སྤྲད་དགོས་འདུག གང་ལྟར་དབང་དེ་ཞུས་ཚར་ནས་བཟུང་སྟེ་ང་ལ་བཀྲ་མ་ཤིས་པ་མང་པོ་བྱུང་ཞེས་ཟེར་ཞོར་དབུགས་རིང་ནར་ནར་བྱེད་བཞིན་མིག་ནས་མཆི་མ་གཏོང་གིན་འདུག ངས་ཁྱོད་རང་ལ་དཀའ་ངལ་ག་རེ་བྱུང་སོང་ཞིབ་ཕྲ་བཤད་རོགས་ཞེས་དྲིས་དུས། 
ང་ལ་དོན་མེད་རླངས་འཁོར་རྡབ་སྐྱོན་ཐེངས་མ་ཁ་ཤས་དང་མ་ཟད་ངོས་ཀྱི་གྲོགས་མོ་དང་ཁ་བྲལ་དགོས་བྱུང་། སྡུག་ཤོས་ཞིག་ལ་མཚན་མོར་རྨི་ལམ་ཧ་ཅང་ཞེད་དངངས་ཅན་མང་པོ་རྨིས་ནས་གཉིད་ཁུག་ཐུབ་མི་འདུག དེ་ང་ཡི་དཀའ་ངལ་ཆེ་ཤོས་དེ་ཡིན། ཟླ་གསུམ་ཙམ་གོང་ནས་རྒྱ་གར་ལ་ཡོད་པའི་ངོས་ཀྱི་སྐྱབས་སྡོམ་ཞུ་སའི་བླ་མ་ཆེ་གེ་མོར་དེའི་སྐོར་བཀའ་འདྲི་ཞུས་པ་ཡིན། ཁོང་ནས་ཟེར་ན་ཁྱོད་རང་བཤེས་གཉེན་ལོགས་པར་འཕྲད་པ་རེད་ཟེར། ངོས་ཀྱི་བླ་མ་དེ་ད་ལྟ་རྒྱ་གར་ལ་ཡོད་རེད་ས་གནས་འདིར་ཕེབས་ཐུབ་ཀྱི་མ་རེད། ཁྱེད་རང་ནས་ངོས་ཀྱི་དཀའ་ངལ་དེར་རོགས་པ་བྱེད་རོགས་ཟེར་ནས་མི་རྒན་ཡང་སྐྱར་ངུས་སོང་། ང་ད་ལྟའི་དཀའ་ངལ་འདི་ལས་གྲོལ་ཐུབ་ན་ཕྱིན་ཆད་ནང་པ་བྱེད་ཀྱི་མིན་ཟེར། ཁོ་རང་གི་དངོས་ཡོད་ད་ལྟའི་དཀའ་ངལ་དེ་དང་དེ་ལ་བསྟེན་ནས་ང་ཕྱིན་ཆད་ནང་པ་བྱེད་ཀྱི་མིན་ཅེས་པའི་ཚིག་འདི་གོ་བ་དང་མཉམ་དུ་མི་རྒན་དེར་སྙིང་རྗེ་ཆེན་པོ་ཞིག་རང་དབང་མེད་པར་སྐྱེས་བྱུང་། ངས་ཁོང་གིས་བཀའ་གདམས་གསར་མ་ཟེར་བའི་སྐབས་སུ་ནས་ཆོས་ལུགས་དེ་གང་ཡིན་པ་ལམ་སང་ཤེས་སོང་། གང་ལྟར་ཀྱང་ད་ལྟའི་གནས་སྐབས་སུ་མི་རྒན་ས་གནས་འདིར་གཞན་ལ་སྤོས་ཚར་འདུག་པས་ངས་ཁོང་ལ་མ་འོང་པར་དེའི་སྐོར་གཟབ་གཟབ་གྱིས་དེ་ནི་དགེ་ལུགས་པའི་ཆོས་ལུགས་ཁ་ལ་ཁྱེར་ནས་མི་ཚེ་གདོན་འདྲེར་སྐྱབས་བཅོལ་མཁན་ཤུགས་ལྡན་ཚོགས་པ་རེད་ཟེར་བཤད་པ་ཡིན། ཁོང་ནས་ཀྱང་སྔ་མོ་ནས་ཧ་གོ་ཚར་འདུག ཟ་མ་ཚར་བའི་སྐབས་སུ་ངེད་གཉིས་ང་ཡི་ཆོས་ཚོགས་སུ་སོང་ནས་རིང་ནས་བསྙེན་པའི་ཕུར་པ་རྡོ་རྗེ་གཞོན་ནུའི་སྒོ་ནས་བྱིན་རླབས་བཀའ་སྒོ་གང་དྲགས་བྱས་པ་མ་ཟད་༧གོང་ས་སྐྱབས་མགོན་ཆེན་པོའི་སྐུ་པར་ཞིག་ཀྱང་སྤྲད་པ་ཡིན། མི་རྒན་དགའ་ཐག་ཆོད་ནས་ཁོ་རང་འདུག་སའི་ཁ་བྱང་དང་ཁ་པར་ཨང་གྲངས་བཅས་སྤྲད་བྱུང་། ངས་ཀྱང་ད་ནས་བཟུང་སྟེ་ཆོས་ལུགས་དེའི་སྐོར་ལ་འབྲེལ་མ་བྱེད་ཅེས་བསླབ་བྱ་གང་དྲགས་བྱས་པ་ཡིན། 
ཤུགས་ལྡན་དགེ་ལུགས་པའི་དམ་ལྡན་གྱི་སྲུང་མ་ངོ་མ་ཞིག་ཡིན་ན་བླ་མས་སངས་རྒྱས་སྨན་བླའི་བཀའ་དབང་གྱི་གྲལ་དུ་ཡོད་པའི་ཆེས་ཉམ་ཆུང་གི་མི་རྒན་འདི་ཉིད་ལ་སྙིང་རྗེའི་ངང་ནས་སྲུང་སྐྱོབས་དང་གྲོགས་བྱེད་དགོས། 
རྗེ་བདག་ཉིད་ཆེན་པོའི་ཞལ་ནས་ཀྱང་། 

གང་ཚེ་ཐེག་པ་མཆོག་ལ་ཆོས་སྤྱོད་བཅུས།། 
ཚུལ་བཞིན་སྒྲུབ་ལ་བརྩོན་པ་དེ་ཡི་ཚེ།། 
མཐུ་ལྡན་རྣམས་ཀྱིས་རྟག་ཏུ་གྲོགས་བྱེད་ཅིང་། 
བཀྲ་ཞིས་རྒྱ་མཚོའི་ཕྱོགས་ཀུན་ཁྱབ་གྱུར་ཅིག། ཅེས་གསུངས་ཡོད། དམ་ལྡན་གྱི་སྲུང་མ་ཚད་ལྡན་ཞིག་ཡིན་ན་བླ་མའི་དབང་གྲལ་དུ་སྙེགས་པའི་རྡོ་རྗེའི་སློབ་མ་རྣམས་ལ་ཉིན་མཚན་དུས་དྲུག་ཀུན་ཏུ་སྡོང་གྲོགས་བྱེད་ཀྱི་ཡོད།  
སེམས་སྐྱོ་དགོས་པ་ཞིག་ལ་དབང་གྲལ་ནང་ནས་མི་སྐྱོ་ཤོས་ཉམ་ཆུང་ཤོས་མི་རྒན་དེ་ལ་ཤུགས་ལྡན་གྱིས་ཐུབ་ཚོད་དང་བརྙས་བཅོས་བྱེད་སྟངས་འདི་ལ་ལྟོས་དང་ཤུགས་ལྡན་ནི་གང་ཡིན་པ་བཤད་མ་དགོས་པར་ཤེས་ཐུབ། ལར་ནི་ཤུགས་ལྡན་ཞེས་པའི་མིང་རྫིག་པོའི་སྔོ་ལོ་འདི་མ་འཕྱར་བའི་གོང་ནས་༧གོང་ས་ལྔ་པ་ཆེན་པོའི་གཟུ་དཔང་ལས། རྒྱུ་སྨོན་ལམ་ལོགས་པ། ངོ་བོ་དམ་སྲི་འབྱུང་པོ། བྱེད་ལས་བསྟན་འགྲོར་འཚེ་བ་ཅན་ཡིན་ཅེས་བསླུ་མེད་རྡོ་རྗེའི་མགུར་ནས་ཐ་ཚིག་གཉེན་པོར་བསྒྲགས་པ་འདིར་ཡིད་ཆེས་འཕར་མ་ཞིག་རྙེད་བྱུང་། དེ་རིང་གི་ཉིན་ཐོ་དེ་ཙམ་ཡིན་གཟིམས་མལ་བདེ།