Tuesday, May 26, 2015

གཟའ་ཟླ་བའི་བདེ་ཆེན་ཞིང་སྒྲུབ།།

Add caption
ཁ་སང་གི་ཉིན་མོ་འདི་ནི་གཟའ་ཟླ་བའི་འཆར་ཅན་ལྟར་དུ་ཡོད་པའི་བདེ་ཆེན་ཞིང་སྒྲུབ་དེ་ཡིན། ད་རེས་ཀྱི་བདེ་ཆེན་ཞིང་སྒྲུབ་ནི་ངོས་ཀྱི་ཆོས་ཚོགས་གསར་པ་འཇམ་དབྱངས་ཆོས་འཁོར་གླིང་ལ་ཐེངས་མ་དང་པོ་ཡིན་པས་མི་གྲངས་ཉི་ཤུ་རྩ་གྲངས་ཞིག་སླེབས་འདུག་པས་ངས་ཁོར་ཡུག་སྲུང་སྐྱོབ་དང་འབྲེལ་བའི་འབྱུང་བཞིའི་བྱིན་རླབས་བྱེད་སྟངས་དང་། ཕྱི་ཡི་འབྱུང་བཞི། ས། ཆུ། མེ། རླུང་། ནང་གི་འབྱུང་བཞི། ཤ ཁྲག དྲོད། དབུགས་བཅས་ཕྱི་ནང་གི་འབྱུང་བཞི་རྟེན་ཅིང་འབྲེལ་བར་འབྱུང་ཚུལ་དང་ནང་གི་འབྱུང་བཞི་ཁོད་མ་སྙོམས་ན་མི་རྣམས་ཀྱི་ཉོན་མོངས་དུག་ལྔ་འཁྲུགས་ཤིང་དེའི་དབང་གིས་ཕྱི་ཡི་ཁོར་ཡུག་ལ་གཏོར་སྐྱོན་ཡོང་བ་དང་དེས་རྐྱེན་པས་འཛམ་གླིང་ལ་འབྱུང་བའི་གོད་ཆགས་རྒྱུན་ཆད་མེད་པར་ཡོང་གི་ཡོད། ཀོང་སྤྲུལ་བློ་གྲོས་མཐའ་ཡས་ཀྱིས་བོད་ཡུལ་བདེ་བའི་སྨོན་ལམ་ལས། 
སྙིགས་དུས་འགྲོ་རྣམས་བསམ་སྦྱོར་ལོག་པ་དང་།། 
ཕྱི་ནང་འབྱུང་བ་འཁྲུག་པའི་རྒྱུ་རྐྱེན་གྱིས།། 
སྔར་མ་གྲགས་པའི་མི་ཕྱུག་དལ་ཡམས་ནད།། 
གཟའ་ཀླུ་རྒྱལ་གདོན་ནག་སོགས་འབྱུང་པོའི་གཟེར།། 

ཞེས་གསུངས་པ་ལྟར་ངས་ཀྱང་དེ་རིང་དེའི་སྐོར་འགྲེལ་བཤད་གང་ཤེས་བྱས་པས་མི་མང་ཧ་ཅང་དགའ་བོ་བྱུང་སོང་། 

Thursday, May 21, 2015

ཆོས་ཚོགས་གསར་པར་སྤོས་པའི་ཉིན་མོ།།


ད་ནུབ་གཟའ་ཟླ་བའི་བདེ་ཆེན་ཞིང་སྒྲུབ་སྐབས་སུ་ད་ལྟ་བེད་སྤྱོད་བྱེད་བཞིན་པའི་ཁང་པ་ལོ་གཅིག་གི་གླ་ཆ་དང་། གསར་དུ་ཉོས་པའི་ཁང་པའི་སྦྱིན་བདག་ཆེན་མོ་རྡེའུ་ར་ལ་བླ་སློབ་ཡོངས་ནས་བཀའ་དྲིན་རྗེས་དྲན་དང་དགེ་བསྔོ་སོགས་གང་དྲག་བྱས།  ད་ལྟའི་ཆོས་ཚོགས་གསར་རྙིང་གཉིས་ཀའི་སྦྱིན་བདག་མི་གཅིག་རང་ཡིན་པ་མ་ཟད་རྒྱ་གར་ལྷོ་ཕྱོགས་ཀྱི་བདེ་ཆེན་ཞིང་སྒྲུབ་འཚོགས་ཁང་སྦྱིན་བདག་སོགས་ཀྱང་ཡིན། 
དེ་རིང་ཞོགས་པ་ཆུ་ཚོད་བཅུ་པའི་སྐབས་སུ་མི་མང་ལྷན་ངོས་ཀྱི་ཆོས་ཚོགས་རྙིང་པའི་ནང་གི་ཅ་དངོས་ཡོངས་རྫོགས་ཆོས་ཚོགས་གསར་པར་གནས་སྤོ་བྱས། ང་ནི་ཆུང་ནས་ད་བར་བློ་ཕུག་ཆོས་ལ་གཏད་ནས་པདྨ་དབང་གི་ལྷ་སངས་རྒྱས་འོད་དཔག་མེད་ལ་འདི་ཕྱི་གཉིས་ཀྱི་སྐྱབས་གནས་སུ་བཅོལ་ནས་བརྒྱུད་འདེབས་ནས་གསུངས་པ་ལྟར། 
གསོལ་བ་འདེབས་སོ་བྱིན་རླབས་དངོས་གྲུབ་སྩོལ།། 
གདོད་མའི་སངས་རྒྱས་འགྲུབ་པར་བྱིན་གྱིས་རློབས།། 

ཞེས་པའི་དོན་ལ་སྦར་འཇུ་བྱས་ནས་ངེས་ལེགས་གཏན་བདེའི་ཐར་པའི་གོ་འཕངས་ལ་རེ་ཆེན་བྱས་པ་ལས། ཚེ་འདིར་བཙན་ཕྱུག་དར་གསུམ་སོགས་མངོན་མཐོའི་ལེགས་ཚོགས་ལ་རེ་བ་ཆེར་མ་བྱས་ཀྱང་སྟོན་ཐོག་ལེགས་ན་འཇག་སྐྱ་ཞོར་དུ་འབྱུང་བའི་དཔེ་ལྟར་ད་རེས་སྦྱིན་བདག་སྐུ་དྲིན་ཅན་ནས་ཨ་སྒོར་འབུམ་དྲུག་ལྷག་གིས་ཁང་པ་ཞིག་ཉོས་ནས་སྤྲད་བྱུང་། དེ་ནི་མི་ཚེ་ས་མཐར་འཁྱར་བའི་སྤྲང་བན་ང་ལ་ལྟོས་ན་རྨི་ལམ་ནང་བཞིན་ལེགས་ཕྱོགས་ཀྱི་འགྱུར་བ་ཆེ་ཤོས་ཞིག་ཡིན། ཁ་སང་ཉེ་ཆར་ཨ་སྒོར་ཁྲི་གསུམ་མ་ཟིན་ཙམ་གྱིས་ཁང་པ་བཟོ་བཅོས་དང་རྙིང་རྗེ་གསར་བཅོས་སོགས་བྱས་པས་མི་ཚང་མ་ཡིད་སྨོན་རང་དབང་མེད་པར་ཤོར་བའི་འཇམ་དབྱངས་ཆོས་འཁོར་གླིང་གཏན་ཇག་གི་ཆོས་ཚོགས་ཞིག་ཏུ་གྱུར། ད་ནས་བཟུང་སྟེ་གཟའ་ཟླ་བའི་བདེ་ཆེན་ཞིང་སྒྲུབ་དང་ཆོས་ཕྱོགས་ཀྱི་བྱེད་སྒོ་ཁག་ཚང་མ་ཆོས་ཚོགས་གསར་པའི་ནང་དུ་བྱེད་རྒྱུའི་གཏན་ཁེལ་ཟིན། ས་གནས་འདིར་ནང་པའི་ཆོས་ཚོགས་ཉུང་བ་མ་ཟད་བོད་ཀྱི་ཆོས་ཚོགས་ནི་ང་གཅིག་པུ་ཡིན་པས་ས་གནས་འདིའི་མི་མང་ནས་ང་ལ་དགའ་མོས་དང་རྒྱབ་སྐྱོར་ཧ་ཅང་ཆེ། ངས་ཀྱང་ས་གནས་འདིར་ནང་ཆོས་གཅིག་པུ་མ་ཡིན་པར་འབྱུང་བཞིའི་བྱིན་རླབས་དང་ཁོར་ཡུག་སྲུང་སྐྱོབ་སོགས་ལ་གང་དྲག་བྱས་པས་གྲུབ་འབྲས་མི་དམན་ཙམ་ཐོན་བྱུང་། 

Friday, May 15, 2015

བོད་པ་ཚང་ལ་ཟླ་ཐོ་བེད་སྤྱོད་གཏོང་བའི་ལུགས་སྲོལ་ཡོད་དམ།

བོད་པའི་སྤྱི་ཚོགས་ནང་གི་ཞེན་ཆ་གཅིག་ནི་ཟླ་ཐོ་བེད་སྤྱོད་མི་གཏོང་བ་དེ་ཡིན། 
སྔ་ས་ནས་གྲ་སྒྲིག་གང་ཡང་མེད་པར་རང་སྣང་གང་ཤར་དུས་ཚོད་ངེས་ཅན་ལ་ལས་ཀ་འགོ་འཛུགས་པ་དང་མགྲོན་ལ་འགྲོ་བ་སོགས་ཡིན། དེ་ནི་ལོ་རབས་བརྒྱ་ཕྲག་འགའ་ཡི་གོང་འཛམ་གླིང་རྣ་ཐོས་མིག་མཐོང་མེད་པར་ལུང་པ་ཁུག་སྐྱོག་ཞིག་ནང་གཞན་སུ་ལའང་ལྟོས་མ་དགོས་པར་རང་དང་འདྲ་བའི་དུད་འགྲོ་ཁ་ཤས་ཞིག་མཉམ་དུ་མི་ཚེ་བསྐྱལ་བ་དེས་དྲི་ངན་དེ་འགོས་པ་ཡིན། 
ང་ནི་ཆོས་ཚོགས་ཀྱི་བདག་པོ་ཞིག་ཡིན་པའི་དབང་གིས་ཁྲིམས་ལུགས་ལྟར་ཡུལ་མི་འདི་རྣམས་ལ་སྒོ་གང་ཐད་ནས་བསྟུན་དགོས་སྟབས་སྔ་ན་མེད་པའི་ཡར་རྒྱས་བཟང་བསྐྱེད་ཐོབ་པ་དེ་ནི་ཟླ་ཐོ་བེད་སྤྱོད་གཏོང་མཁས་པ་ཞིག་བྱུང་བ་དེ་ཡིན། དེ་ནི་ལེ་ལོ་ཅན་ང་ལ་ལྟོས་ན་ཧ་ཅང་སྟབས་བདེ་བ་མ་ཟད་ངོས་ཀྱི་འབྲེལ་ཡོད་རང་གཞན་གཉིས་ཀར་ཕན་པོ་ཞིག་བྱུང་། དཔེར་ན་ལུང་པ་འདིའི་ནང་གི་མི་ཚང་དཀྱུས་མའི་མོ་ཧྲེང་ཁེར་རྐྱང་ཞིག་ཡིན་ཀྱང་ཕལ་ཆེར་ལོ་གཅིག་གི་གལ་ཆེའི་ལས་ཀ་ཚང་མ་ཟླ་བ་དང་ཉིན་མ་ཆུ་ཚོད་སོགས་རྟགས་རྒྱབ་ནས་ཟླ་ཐོའི་ནང་དུ་བཀོད་ཅིང་གྱང་ངོས་སུ་བཀལ་བ་མཐོང་རྒྱུ་ཡོད། མི་དཀྱུས་མ་ཞིག་ལ་ཐུག་འཕྲད་དགོས་ནའང་ཉུང་མཐར་བདུན་གཅིག་གོང་ནས་དུས་ཆད་མ་བྱས་ན་ལས་སླ་བོར་ཐུག་མི་ཐུབ། ཁྱིམ་ཚང་རེའི་ནང་དུ་ལོ་ཐོ་གྱང་ངོས་སུ་མཐོང་རྒྱུ་ཡོད་པ་ནི་ལུང་པ་འདིའི་ཁྱད་ཆོས་ཞིག་ཡིན། རང་རེ་བོད་པ་ཚང་གི་ནང་དུ་སོང་ན་གྱང་ངོས་སུ་ལོ་ཐོ་རེ་མཐོང་རྒྱུ་ཡོད་ཀྱང་དེ་ནི་ལོ་ཐོའི་ནང་གི་ཐང་སྐུ་དང་བླ་པར་སོགས་ལ་དད་ནས་གཙང་སར་བཀལ་བ་ཙམ་ལས་སོ་སོའི་ལོ་རེའི་ནང་མཛད་འཆར་ཁག་བེད་སྤྱོད་གཏོང་མཁན་ཧ་ཅང་ཉུང་ཉུང་ཡིན། 

བོད་པ་རྣམས་ཀྱིས་ད་ནས་བཟུང་སྟེ་སོ་སོའི་ལས་འཆར་ཁག་ཟླ་ཐོའི་ནང་བཀོད་ནས་དུས་ཚོད་ལ་བསྲི་ཚགས་དང་། ལས་རོགས་ལ་སུན་པོ་མ་བཟོ་རོགས་ཞེས་འབོད་སྐུལ་གྱིས་དེ་རིང་གི་ཉིན་ཐོ་དེ་མཇུག་བསྡུས་པ་ཡིན། 

སྔ་ནས་གྲ་སྒྲིག་མེད་པའི་བོད་པ་ཚང་།
དུས་ཚོད་བསྲི་ཚགས་མི་ཤེས་བོད་པ་ཚང་། 
རང་སྣང་གང་ཤར་བྱེད་མཁན་བོད་པ་ཚང་།
ཟླ་ཐོ་བེད་སྤྱོད་མེད་པའི་བོད་པ་ཚང་། 

Monday, May 11, 2015

ཨ་མའི་དུས་ཆེན་ཉིན་མོ།

ཨ་མ་ཀུན་བཟང་དབང་མོ་མཉམ་དུ་སྨན་ཁང་ནང་དུ།
འདི་ཟླའི་སྤྱི་ཚེས་བདུན་ནས་བཟུང་དེ་རིང་སྤྱི་ཚེས་བཅུའི་བར་པོར་ལེན་ཌི་དང་སེའི་ཨ་ཏྲོའུ་སོགས་མངའ་སྡེ་འགའ་རུ་འགྲུལ་བཞུད་ལ་སོང་། སྤྱི་ཚེས་བརྒྱད་ཉིན་མོ་དཔལ་རྒྱལ་དབང་ཀརྨ་པ་བཅུ་བདུན་པ་ཆེན་པོ་མཆོག་གི་མདུན་ནས་གྲུབ་རྒྱལ་ལུགས་ཀྱི་སྨིན་བྱེད་ཀྱི་ཚེ་དབང་ཟབ་མོ་ཐོབ་པའི་ཤིན་ཏུ་བསྐལ་བཟང་གི་ཉིན་མོ་ཞིག་ཏུ་གྱུར། དགོང་མོ་དད་ལྡན་ཤེས་རབ་སྐལ་ལྡན་ནང་མི་དང་ལྷན་མགྲོན་ཁང་ནང་དུ་བསྡད། སྤྱི་ཚེས་དགུའི་ཞོགས་པ་ཆུ་ཚོད་དགུ་པའི་སྐབས་སུ་སྔ་ནས་དུས་ཆད་བྱས་པ་ལྟར་མགྲོན་གཉེར་དིལ་ཡག་སྒྲུབ་དཔོན་རིན་པོ་ཆེ་བརྒྱུད་རྒྱལ་དབང་ཀརྨ་པའི་གཟིམས་ཆུང་མཇལ་བཅར་ཞུས། ལོ་བཞིའི་ཡར་སྔོན་ངོས་ནས་ཞུ་བསྐུལ་ལྟར་ཀརྨ་པ་སྐུ་ཉིད་ནས་བརྩམ་གནང་བའི་ངོས་ཀྱི་རྩ་བའི་བླ་མ་སྐྱབས་རྗེ་གྲུབ་དབང་སངས་རྒྱས་བསྟན་འཛིན་རིན་པོ་ཆེའི་གསོལ་འདེབས་ལྡེབ་མ་གཅིག་ཅན་དེའི་ལྗགས་ལུང་ཞུས། རྗེས་མར་ཨ་རི་ལ་ཕེབས་སྐབས་ང་ཡི་ཆོས་ཚོགས་ལ་གདན་འདྲེན་སྔ་ཞུས་ཀྱང་བྱས་པས་ཞལ་བཞེས་བཟང་པོ་ཐོབ། 


ཉིན་གུང་ཤེས་རབ་ནང་མི་དང་ལྷན་པོར་ལེན་ལ་ཡོང་ངལ་གསོ་བྱས་ནས་ནང་དུ་བསྡད། དེ་རིང་ནི་སྤྱི་ཚེས་བཅུ་ཉིན་ཆོས་གྲོགས་ཚེ་བརྟན་དབང་ཕྱུག་དང་ཤེས་རབ་སྐལ་ལྡན་གཉིས་ལྷན་དུ་པོར་ལེན་ཌིའི་མཛེས་ལྗོངས་དང་མེ་ཏོག་ལྡུམ་ར་སོགས་ལ་སྤྲོ་སང་ལ་ཁྱུག་ཙམ་མཉམ་དུ་སོང་བས་དཔེ་མེད་སྐྱིད་པོ་བྱུང་། དགོང་མོ་ཆུ་ཚོད་བརྒྱད་པའི་སྐབས་པོར་ལེན་ཌི་གནམ་ཐང་བརྒྱུད་ནས་ཀི་ལི་ཧྥོ་ཉའི་གནམ་ཐང་ཆུ་ཚོད་བཅུ་པའི་སྐབས་སུ་འབྱོར། གནམ་ཐང་དུ་དད་ལྡན་མ་ཨ་མ་ཀུན་བཟང་དབང་མོ་ནས་ལག་ཁ་གཏག་གིས་སྒུག་འདུག། ཨ་མ་ཀུན་བཟང་དབང་མོ་ནི་ད་ལོར་དགུང་གྲངས་བརྒྱད་བཅུ་གྱ་བཞི་ཡིན། ཕར་ལྟས་ཚོད་ལ་ལོ་གྲངས་བརྒྱད་བཅུའི་ནང་ལ་སླེབས་པ་འདྲ་བོ་གཏན་ནས་མེད། ཕ་ཡུལ་ཉི་ཧོང་ནས་ཡིན་ཀྱང་ཆུང་ནས་ཨ་རིར་འབྱོར་ནས་སློབ་སྦྱོང་དང་འཚར་སློང་བྱུང་ས་ཕལ་ཆེར་ཨ་རིར་ཡིན། མོ་རང་དངོས་མིང་དུ་susan schek ཟེར། ངོས་ཀྱི་ཆོས་ཚོགས་མཆོད་དཔོན་དང་མ་ཟད་ང་ས་ཆ་གང་དུ་འགྲོ་དགོས་ཀྱང་རླངས་འཁོར་ཁ་ལོ་བ་ཡང་ཡིན། སྙིང་ཐིག་སྔོན་འགྲོའི་ཐོག་ནས་འབུམ་ལྔ་ཆ་ཚང་བསག་གྲུབ་པ་མ་ཟད་ང་ལ་འཕྲད་ནས་བཟུང་སངས་རྒྱས་འོད་དཔག་མེད་ཡི་དམ་དུ་བསྙེན་ནས་འོད་དཔག་སྔགས་རིང་ཐོག་ནས་བསྙེན་ཚད་འབུམ་གསུམ་གྲུབ་ཚར། ང་ལ་ར་གན་གསེར་རློམ་གྱིས་དད་འདུན་ཧ་ཅང་ཆེ། ངས་ནི་མོ་རང་གི་ང་ལ་བརྩེ་བས་སྐྱོངས་སྟངས་སོགས་གང་ལ་བལྟས་ཀྱང་ལས་ཀྱིས་བསྐོས་པའི་ཨ་མ་ཡི་ཚོར་སྣང་རྒྱུན་ཆད་མེད། དེ་རིང་ནི་འཛམ་གླིང་ཨ་མའི་དུས་ཆེན་དེ་ཡིན་སྟབས་ཁ་སང་ནས་གྲ་སྒྲིག་བྱས་ནས་མོ་རང་ལ་ཆེད་དུ་ཉོས་པའི་ཀརྨ་པའི་ལས་རྟགས་ཡོད་པའི་དངུལ་ལེན་ནང་འཇམ་དེ་དང་མཉམ་དུ་མེ་ཏོག་ཆག་པ་ཞིག་བཅས་སྤྲད་པས་མོ་རང་ཧ་ཅང་དགའ་བོ་བྱུང་། དེ་ནས་ངེད་མ་བུ་གཉིས་ངོས་ཀྱི་བྱེས་བསྒྲོད་ཉིན་གསུམ་རིང་ཁ་བརྡ་བྱེད་ཞོར་རླངས་འཁོར་མོན་ཊོའུ་རེའུ་སོགས་ལ་ཁ་སྐོར་ནས་ཆོས་ཚོགས་ལ་ཡོང་བས་དགོང་མོ་ཆུ་ཚོད་དང་པོའི་སྐབས་སུ་གཞི་ནས་འབྱོར།

ལུས་ཀྱི་སྐྱེད་མ་དམར་པོའི་རླུང་འཚུབས་ཀྱིས་ཁྱེར་ཡང་།། 
ལས་ཀྱི་བསྐོས་པའི་དྲིན་ཅན་ཨ་མ་ཞིག་རྙེད་སོང་། 
ཤི་གསོན་གཉིས་ཀྱིས་བསྐྱངས་བའི་ས་མཐའ་ཡི་བུ་ཆུང་།།
དེ་རིང་ཨ་མའི་དུས་ཆེན་བསུ་བ་རུ་སླེབས་ཡོད།། 


དམར་པོའི་འཐབ་རྩོད་ཁྲོད་ཀྱི་ཨ་མ་ཡི་འོ་རྒྱལ།།
ཟླ་གསུམ་ཙམ་ལས་མ་ལོན་བུ་ཆུང་ང་སྐྱུར་ནས།། 
སྡུག་གི་མུན་པའི་ཀློང་ནས་གསོན་བྲལ་དེ་བྱས་དུས།། 
ངུས་པའི་་གདོང་གི་མིག་ཆུ་ད་དུང་ཡང་སྐམ་མེད།། 

མ་མེད་ས་མཐའི་བུ་ཆུང་ཁེར་རྐྱང་དུ་གྱུར་དུས།། 
ངོ་གདོང་གཉེར་མས་ཁེངས་བའི་བོད་མོ་འགའ་མཐོང་དུས།། 
དྲིན་ཅན་ཨ་མའི་ཞལ་རས་ལྷང་ལྷང་དུ་དྲན་ནས།། 
སྐྱོ་བའི་མིག་ཆུ་ཤོར་བ་ཉུང་ཉུང་ཞིག་མིན་ནོ།། 

ས་སྟེང་ཨ་མའི་དུས་ཆེན་རེ་རེ་ཡི་སྐབས་སུ།། 
ས་མཐའི་བུ་ཆུང་སེམས་ལ་རྨ་ཁ་རེ་བཟོས་སོང་།
བརྩེ་བའི་སྙིང་གི་ནོར་བུ་དྲིན་ཅན་གྱི་ཨ་མ།། 
ད་ལྟ་འཛམ་གླིང་ས་ཆ་གང་འདྲ་རུ་བཞུགས་ཡོད།། 

 དེ་རིང་གི་ཉིན་ཐོ་མ་ཆད་ཙམ་གཏང་ནས་ཉལ་སར་སོང་ནས་གཉིད་དུ་ཡུར།