Thursday, April 21, 2016

སྤྲུལ་སྐུ་དོན་འགྲུབ་མཇལ་བའི་ཉིན་མོ།

སྔ་ནས་དུས་ཆད་བྱས་པ་ལྟར་དེ་རིང་ཉིན་གུང་རྒྱབ་ཏུ་ཨ་མ་ཡེ་ཤེས་མ་བུ་གཉིས་དང་ལྷན་ས་གནས་འདིར་གཉུག་མར་བཞུགས་མཁན་སྤྲུལ་སྐུ་དོན་འགྲུབ་མཇལ་བཅར་ལ་སོང་། སྤྲུལ་སྐུ་དོན་འགྲུབ་ནི་ཕ་ཡུལ་འགོ་ལོག་རྡོ་དགོན་ནས་ཡིན་ཅིང་ཨ་རིར་ཕེབས་ནས་ལོ་གྲངས་ཕལ་ཆེར་ལྔ་བཅུ་མ་ཟིན་ཙམ་ཡིན་སྐད་འདུག ཁོང་གི་རྩ་བའི་བླ་མ་སྐྱབས་རྗེ་རྡོ་གྲུབ་ཆེན་ཡིན་པ་མ་ཟད་དགོན་པའང་གཅིག་པ་རེད་འདུག ཨ་མ་ཡེ་ཤེས་ངེད་གཉིས་ཨ་རིའི་ཁང་པ་དཀྱུས་མ་ཐོག་རྩེགས་མང་པོ་ཅན་ཞིག་ཏུ་ཁ་གཏད་ནས་སོང་། རིན་པོ་ཆེ་ཐོག་རྩེགས་མཐོན་པོ་ཞིག་གི་སྒང་དུ་བཞུགས་འདུག བགྲེས་ཉམས་ཤ་སྐམ་ལ་འཛུམས་མདངས་ཅན་གྱི་བླ་རྒན་དེའི་དལ་བུས་སྒོ་འགྲམ་ནས་སྒུག་འདུག ནང་དུ་འཛུལ་ནས་ཁ་བཏགས་ཕུལ་ཅིང་རང་ཉིད་ངོ་སྤྲོད་སོགས་བྱས། མི་འདུག་ས་དང་མཆོད་ཁང་གཅིག་ཅོག་ཅན་གྱི་ཁང་པ་གཙང་ཟོ་དོད་པོ་ཞིག་དང་ཟུར་ནས་ཐང་སྐུ་མང་ཞིག་ཀྱང་མཇལ་རྒྱུ་འདུག མགོ་སེར་བུད་མེད་ལྟས་ཚོད་ལ་ལོ་གྲངས་ལྔ་བཅུའི་ཡས་མས་ཅན་ཞིག་ནས་ཨ་མ་ཡེ་ཤེས་ངེད་གཉིས་ལ་བོད་ལུགས་གུས་ཞབས་དང་ལྷན་ཇ་ཁུར་སོང་བས་དེ་ནི་སྤྲུལ་སྐུ་ཁོང་གི་གསང་ཡུམ་དེ་ཡིན་སྐད་འདུག དེ་ནས་ཕན་ཚུན་བཀའ་མོལ་བྱས་པས་འགོ་ལོག་གི་སྐད་གདངས་ལ་དམའ་ལ་དབུས་སྐད་ཀྱི་བསྲེ་སླད་ཅན་དེང་དུས་སྐྱབས་བཅོལ་བ་བཙན་བྱོལ་བོད་པའི་འདྲེས་སྐད་དཀྱུས་མ་དེ་རེད་འདུག སྤྲུལ་སྐུ་ནས་དེང་སང་ཕྱི་རྒྱལ་ནང་པ་འདི་རྣམས་ལ་དཀའ་ལས་ཁ་ཤོས་དེ་ནང་ཆོས་ལ་ཡིད་རྟིང་ནས་དད་པ་མེད་པ་དེ་རེད་འདུག གལ་སྲིད་དད་པ་ཡོད་ན་སྤྱན་རས་གཟིགས་དང་འོད་དཔག་མེད་སོགས་གང་ཉམས་སུ་བླངས་ཀྱང་ངེས་པར་འབྲས་བུ་འབྱུང་གི་རེད་ཅེས་བཀའ་མོལ་མང་དག་ཞིག་གསུངས་སོང་། བཀའ་མོལ་གསུངས་པའི་སྐབས་སུ་སྐད་གདངས་དམའ་བོས་སྤྱན་བར་སྣང་དུ་གཟིགས་ནས་གསུངས་པ་ལས་བཀའ་མོལ་གནང་སའི་གདོང་ལ་གཟིགས་གི་མི་འདུག བཀའ་མོལ་གསུངས་སྟངས་དང་བཞུགས་སྟངས་སོགས་གང་ལ་དཔྱད་ནའང་ཉམས་ལེན་ཡོད་པའི་གཟོ་ལྟ་འདུག ཁོང་ནས་དབྱིན་ཇིའི་ཐོག་ཏུ་བྲིས་པའི་དེབ་ཧ་ཅང་མང་བ་མ་ཟད་མང་པོ་ཞིག་ནས་ཧ་ཅང་དགའ་བོ་བྱེད་ཀྱི་ཡོད། ད་ལོར་དགུང་གྲངས་བདུན་བཅུ་དོན་དགུ་ཡིན་ཅེས་གསུངས་སོང་། གལ་སྲིད་ཀི་ལི་ཧྥོ་ཉའི་སོགས་སུ་ཕེབས་དགོས་ཡོད་ཚེ་ང་ཡི་ཆོས་ཚོགས་སུ་ཕེབས་རོགས་ཅེས་གདན་ཞུས་ཀྱང་བྱས། ངས་གོ་ཚུལ་ལྟར་དུ་བྱས་ན་ཁོང་ནི་མཁས་དབང་ཞིག་ཡིན་པ་མ་ཟད་ཉམས་ལེན་ཀྱང་ཧ་ཅང་ཡག་པོ་ཡོད་པའི་སྐད་ཆ་འདུག 

རིག་ལམ་ངག་ལ་གྱེར་བའི་རྟོག་གེ་བ།། 
མཐོང་ཚད་ཚུལ་མིན་སྒྲུབ་པའི་ལོག་ལྟ་ཅན།། 
མིང་སྙན་ཟོལ་རྫུ་ཆོས་དྲེད་བདག་འདྲ་རྣམས།། 
བློ་འདི་ཁྱེད་ལྟར་འགྱུར་ན་ཅི་མ་རུང་། 

བཤད་བཤད་ཚིག་སྐམ་བདག་པོའི་མཁན་པོ་དང་། 
རྩད་རྩད་གདན་སའི་གྲྭ་རྒོད་དགེ་བཤེས་སོགས། 
ཁྱི་ལུད་དར་བཏུམ་ང་འདྲའི་ཆོས་གཟུགས་རྣམས།། 
གང་ཁྱེད་ཐེངས་གཅིག་མཇལ་བས་གློ་བ་དགའ།། 

ཐོས་རྟགས་ཞི་ཞིང་དུལ་ལ་མི་མཛའ་མེད།།
སྒོམ་རྟགས་ཉོན་མོངས་མེད་ཅིང་ཆོག་ཤེས་མཁན།།
སེམས་སྲུང་དགེ་ལ་གཅིག་ཏུ་འདུན་པ་ཅན།། 
སྐྱེས་བུ་གཏན་གྱིདོནཆེནའགྲུབཔ་རྒྱལ།། 






Tuesday, April 19, 2016

བྷོ་སི་ཊོན་བཙོན་ཁང་ནང་ལ་ཆོས་བཤད་བྱས་པའི་ཉིན་མོ།

ཉིན་མོ་འདི་ནི་ངོས་ཀྱི་ལོ་གཅིག་གི་ཆོས་ཕྱོགས་ཀྱི་ལས་འཆར་ནང་ནས་མི་གྲངས་མང་ཉུང་ལ་མ་ལྟོས་པར་གལ་ཆེ་ཤོས་ཞིག་ཡིན། ལོ་ལྔ་ཡི་ཡར་སྔོན་དགེ་ཕྲུག་ཨ་རི་བ་ཀརྨ་ཤེས་རབ་ནས་བརྒྱུད་ནས་བྷོ་སི་ཊོན་ས་གནས་འདིའི་བཙོན་ཁང་ནང་དུ་ཆོས་བཤད་བྱེད་རྒྱུའི་གོ་སྐབས་བྱུང་། དེ་རིང་ལོ་བཞི་པ་དེ་ཡིན་དེ་ནི་ངོས་ལ་ལྟོས་ན་ཕན་ཐོག་ཆེ་ཤོས་ཀྱི་ཆོས་བཤད་ས་དེ་ཡིན། ཐེངས་མ་དང་པོར་ཉིས་སྟོང་དགུ་ལོར་བཙོན་ཁང་ནང་གི་སྡེ་ཚན་མི་འདྲ་བའི་ནང་ནས་ནང་པའི་སྡེ་ཚན་ཞིག་ཏུ་ཆོས་བཤད་བྱས་སྐབས་མི་གྲངས་བཅུ་གཉིས་ཡོད་པས་ཚང་མས་སྐྱབ་སྡོམ་ཞུས་ཤིང་ནང་ཆོས་ཉམས་ལེན་བྱེད་རྒྱུའི་འགོ་འཛུག་བྱས། དེ་ནས་ད་བར་བཙོན་པ་མང་པོ་ཞིག་གི་བརྒྱུད་ལ་ནང་ཆོས་ཀྱི་དགེ་བའི་བག་ཆག་འཇོག་ཐུབ་པ་མ་ཟད་ཁ་ཤས་ཆོས་པ་ཡང་དག་པ་བྱུང་འདུག ཁ་ཤས་བཅོན་བཀག་དུས་ཚོད་ཚང་ནས་བཙོན་གྲོལ་ཐོབ་པ་ཡང་མི་ཉུང་བ་བྱུང་འདུག ཉིན་རྒྱབ་ངོས་ཀྱི་གྲོགས་པོ་མི་རིགས་ནག་པོའི་ཡེ་ཤུའི་ཆོས་པ་ཞིག་ཡོད་པས་ཁོང་གི་ཆོས་ཁང་ནང་དུ་ཆོས་བཤད་བྱེད་ལ་སོང་། མི་རིགས་ནག་པོ་ཤ་སྟག་མི་གྲངས་ལྔ་བཅུ་ཙམ་ཞིག་སླེབས་འདུག ངོས་ཀྱི་དགེ་ཕྲུག་ཀརྨ་ཤེས་རབ་ནས་དེར་ཡོད་ཀྱི་མི་རྣམས་ལ་ང་ཡི་སྐོར་ངོ་སྤྲོད་མདོར་བསྡུས་གྲུབ་ནས་ངས་དབྱིན་ཇི་ཆག་རོ་དེ་རྒྱབ་ནས་བྱམས་སྙིང་རྗེའི་ཆོས་བཤད་མདོར་བསྡུས་བྱས། ཁོ་རང་ཚོའི་འདོད་པ་ལྟར་འོད་དཔག་ཀྱི་བསྙེན་དབྱངས་ཞིག་ཀྱང་བྱས་པས་མི་མང་ཧ་ཅང་དགའ་བོ་བྱས་སོང་། དགོང་མོ་ཨ་མ་ཡེ་ཤེས་དང་དཀོན་མཆོག་གཉིས་ནང་དུ་འབྱོར། ངོས་ཀྱི་ཟ་མ་དགའ་ཤོས་ཟྭ་ཐུག་དང་རྩམ་པ་སོགས་བོད་ཟས་བྲོ་བ་ཅན་རེ་བཟའ་རྒྱུ་རྙེད་དུས་བན་རྒན་ང་ནི་ངོ་ཚ་མེད་པར་གླང་རྒན་ཚ་ཆུ་དང་འཕྲད་པ་ལྟར་ནུབ་ཟས་འགྲངས་ཚད་ཟོས། གང་ལྟར་ད་རེས་ཡང་སྐྱར་བློ་དཀར་གཞུང་དྲང་བ་དད་ལྡན་ཕ་དཀོན་མཆོག་གཉིས་ཀྱི་ནང་མི་ལོ་རེར་ཐེངས་མ་རེར་ཐུག་འཕྲད་ལ་ཡོང་ནས་ཞག་ཤས་རིང་མཉམ་དུ་འཛོམས་རྒྱུ་འདི་ཡང་ཧ་ཅང་ནས་དགའ་བོ་བྱུང་། ང་ནི་ག་དུས་ཡིན་ཀྱང་མི་ཚང་འདི་ངོས་ཀྱི་ལས་ཀྱིས་བསྡུས་པའི་ནང་མི་ཞིག་ཡིན་པའི་ཚོར་བ་རྒྱུན་ཆགས་སུ་ཡོང་གི་ཡོད། ཕ་མ་འདི་གཉིས་ནི་ས་གནས་བྷོ་སི་ཊོན་བོད་རིགས་ཆེས་སྔ་ཤོས་དང་མ་ཟད་སྐྱབས་བཅོལ་བོད་རིགས་རྗེས་མ་རྣམས་ལ་རོགས་རམ་དང་སློབ་སྟོན་སོགས་ཧ་ཅང་དཀའ་དྲིན་ཆེན་པོ་ཡིན་སྐད་འདུག ཆེས་ཡ་མཚན་པ་ཞིག་ལ་དཀོན་མཆོག་དང་ཡེ་ཤེས་གཉིས་ཀྱི་བུ་མོ་ཆུང་བ་བསྟན་ལྷ་ལ་ཉེ་ཆར་ཟླ་ཤས་གོང་ནས་བུ་ཞིག་སྐྱེས་ཡོད་པའི་མིང་ལ་ངོས་ཀྱི་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེའི་མཚན་དང་གཅིག་པ་རེད་འདུག དེ་ནི་ངོས་ལ་ལྟོས་ན་ཆེས་ཡ་མཚན་ཅན་ཞིག་ཏུ་མཐོང་། གང་ཡིན་ཞེ་ན་སངས་རྒྱས་ཟེར་བའི་མིང་ཡོད་ཀྱང་སངས་རྒྱས་བསྟན་འཛིན་ཞེར་བའི་མིང་འདི་བོད་རིགས་བྱིང་གི་ཁྲོད་དུ་དར་ཁྱབ་ཆེར་མེད་པས་ཡིན། 

Friday, April 15, 2016

རྒོ་གུལ་ནང་དུ་ཆོས་བཤད་བྱས་པའི་ཉིན་མོ།

ཟླ་བ་འགའ་ཡི་གོང་ནས་ངོས་ཀྱི་དགེ་ཕྲུག་གསར་པ་dayena བརྒྱུད་ནས་ཆུ་ཚོད་གཅིག་ཙམ་གྱི་སར་ཡོད་པའི་རྒོ་གུལ་དྲྭ་རྒྱའི་ལས་ཁུངས་སུ་ཆོས་བཤད་བྱེད་རྒྱུ་དེ་ཡིན། ཁ་སང་ཞོགས་པ་ཆུ་ཚོད་བདུན་པའི་སྐབས་སུ་འཇམ་དབྱངས་ཆོས་འཁོར་གླིང་གི་ཚོགས་གཙོ་གཙོས་སྐད་བསྒྱུར་བྱམས་པ་མཐར་ཕྱིན་བཅས་སྡོམས་ངོས་ཀྱི་སློབ་མ་བཅུ་ལྷན་དུ་རླངས་འཁོར་བཞིའི་དང་བཅས་གཅིག་རྗེས་གཉིས་མཐུད་ཀྱིས་ཆུ་ཚོད་གཅིག་ཙམ་གྱི་སར་ཡོད་པའི་རྒུ་གོལ་དྲྭ་རྒྱའི་ཚོགས་པའི་ཕྱོགས་སུ་ཁ་གཏད་ནས་ཕྱིན། ཆུ་ཚོད་བཅུ་པའི་སྐབས་སུ་ངས་སྐད་ཆ་དངོས་གཞི་དེ་འགོ་འཛུག་དགོས་འདུག དེ་རིང་བཤད་བྱའི་སྐད་ཆ་ནི། བྱམས་སྙིང་རྗེའི་ངང་སྤྱི་ཚོགས་སུ་ལས་ཀའི་ནུས་པ། ཞེས་པའི་བརྗོད་བྱ་རེད་འདུག 
དེར་འདུས་དངོས་ཡོད་མི་མང་བདུན་བཅུ་མ་ཟིན་ཙམ་ཞིག་འདུག་ཀྱང་དྲྭ་ཐོག་ནས་ཐད་གཏོང་སྐབས་སུ་མི་ཁྲི་གསུམ་ནས་བཞིའི་བར་བལྟ་མཁན་ཡོད་སྐད་འདུག གང་ལྟར་དང་པོ་ངས་དབྱིན་ཇིའི་ཆག་རོ་དེ་བེད་སྤྱོད་བྱས་ནས་ཚང་མར་ཁམས་འདྲི་དང་མ་ཟད་ང་རང་གྲྭ་རྐྱང་དཀྱུས་མ་ཞིག་ཡིན་ཀྱང་རྒུ་གོལ་འདི་ཉིད་ཀྱང་ཁ་བྲལ་ཐབས་མེད་མཁན་ཞིག་ཡིན་པའི་ཆ་ནས་དེ་རིང་འདིར་སྐད་ཆ་བཤད་མཁན་མགྲོན་འབོད་གནང་བར་ཐུགས་རྗེ་ཆེ་ཞུས་བ་དང་སྦྲགས་ནས་བརྗོད་བྱ་དངོས་གཞི་སྐད་བསྒྱུར་དང་བརྒྱུད། ས་བཅད་རྣམ་པ་གསུམ་གྱི་སྒོ་ནས་དེ་རིང་གི་སྐད་ཆ་དེ་གླེང་སློང་བྱས། བྱམས་སྙིང་རྗེ་མེད་པའི་སྐྱོན་ཆ། ཡོད་པའི་དགེ་མཚན། དེ་ཇི་རང་རྒྱུད་ལ་བསྐྱེད་ཐབས་ཞེས་བརྗོད་བྱ་འདི་གསུམ་ཐོག་ནས་དེང་དུས་དངོས་ཡོད་གནས་ཚུལ་གཞིར་བཞག་ལ། ནང་ཆོས་ཀྱི་སླན་པ་རྒྱབ་ཀྱིན་འགྲེལ་བཤད་བྱས་དུས་དེར་ཡོད་ཀྱི་མི་མང་པོ་ཧ་ཅང་ནས་དགའ་བོ་བྱེད་ཀྱི་འདུག 

དུས་ཡུན་ནི་ཆུ་ཚོད་གཅིག་རེད་དྲི་བ་དྲིས་ལན་སོགས་ནི་གང་ཡང་མི་འདུག སྐད་ཆ་མཇུག་གྲུབ་པ་དང་ལྷན་གྲ་སྒྲིག་བྱེད་མཁན་ཕོ་གསར་གཟུགས་རིང་ལྟས་བཟོ་དོད་པོ་དེས་ཐུགས་རྗེ་ཆེ་ཞེས་གསུངས་བཤད་ཀྱི་མཇུག་གྲུབ། ཚོགས་པ་འདི་ཡི་ལས་བྱེད་གསུམ་གྱིས་ངེད་སླ་སློབ་རྣམས་ཟུར་དུ་ཡོད་པའི་རྒྱ་གར་ཟ་ཁང་ཞིག་ནང་དུ་ཁྲིད་ནས་གང་བཟའ་ཆོག་པའི་ཟས་རིགས་རྣམས་སོ་སོའི་གང་འདོད་ལ་ལོངས་སྤྱད། དོ་ནུབ་ཆུ་ཚོད་དགུ་པའི་སྐབས་སུ་སན་ཧོ་སེའི་San jose airport གནམ་ཐང་བརྒྱུད་ནས་boton བྷོ་སི་ཊོན་ལ་འགྲོ་དགོས་ཡོད། ང་མ་སོང་བའི་གོང་ནས་སྤྲོ་སེང་ལ་ཁྲིད་ཀྱི་ཡིན་ཟེར། ཉིན་རྒྱབ་རྒུ་གོལ་ཚོགས་པའི་ལས་བྱེད་མི་གསུམ་དང་འཇམ་དབྱངས་ཆོས་འཁོར་གླིང་ཚོགས་མི་བཅུ་དང་བཅས་ང་ཚོ་ཐག་ཉེར་ཡོད་པའི་ཧ་ཅང་མཛེས་སྡུག་ལྡན་པའི་ས་ཆ་ཞིག་ཏུ་འཁྱམས་ཉུལ་ལ་སོང་། ཀི་ལི་ཧྥོ་ཉའི་ས་ཆ་གང་དུ་སོང་ཡང་དག་པའི་ཞིང་ཁམས་འདྲ་ཤ་སྟག་རེད་འདུག ས་ཆ་འདིའི་དབྱིབས་ནི་སྤྱིར་གཏང་རི་མགོ་དབེན་ཁྲོད་འདྲ་ཞིག་ཡིན་པ་ལ། སྤངས་ལྗོངས་དང་ལྗོན་ཤིང་སྐབས་སྐབས་སུ་མཚོ་དང་མཚེའུ་ཆུ་ནང་དུ་བྱ་རིགས་དཀར་སེར་དམར་ལྗངས་ཁྱུ་ཁྱུ་བྱས་ནས་བསྡད་པ། གང་ལྟར་ས་ཆ་ཧ་ཅང་སྐྱིད་པོ་ཞིག་ཏུ་སླེབས་པས་མི་མང་ཧ་ཅང་དགའ་བོ་བྱས་སོང་། ཁོ་རང་ཚོའི་འདོད་པ་ལྟར་རྟེན་འབྲེལ་གྱི་ཆེད་དུ་རི་མགོ་དེར་ཕྱག་ཆེན་རྣལ་འབྱོར་བཞི་རིམ་འགྲེལ་བཤད་མདོར་བསྡུས་ཞིག་ཀྱང་བྱས། དེ་ནས་དགོང་མོར་གནམ་ཐང་བརྒྱུད་བྷོ་སི་ཊོན་ལ་སོང་། གནམ་གྲུ་ཆུ་ཚོད་ལྔ་ཡི་རིང་འཕུར་དགོས་འདུག ཕྱི་ཉིན་ཞོགས་པ་ཆུ་ཚོད་དྲུག་པའི་སྐབས་སུ་བྷོ་སི་ཊོན་གནམ་ཐང་ལ་བདེ་འབྱོར་བྱུང་། གནམ་ཐང་དུ་དཀོན་མཆོག་དང་བུ་མོ་བསྟན་ལྷ་གཉིས་ནས་སྒུག་འདུག་པས་དཀོན་མཆོག་ལགས་ཀྱི་ནང་ཤར་སྐྱོད་བྱས་ནས་ཡོང་། སང་ཉིན་ནས་བཟུང་ཉིན་གཉིས་རིང་བྷོ་སི་ཊོན་བཙོན་ཁང་ནང་དུ་ཆོས་བཤད་བྱེད་དགོས་ཡོད། 

Thursday, April 14, 2016

མཁན་ཆེན་ཚུལ་ཁྲིམས་བློ་གྲོས་མཇལ་ལ་སོང་བའི་ཉིན་མོ།


ཁ་སང་ནི་སྔ་ནས་གྲ་སྒྲིག་བྱས་པ་ལྟར་གངས་ལྗོངས་གསེར་རྟ་བླ་རུང་ཆོས་སྒར་སྤྱི་ཁྱབ་མཁན་ཆེན་ཚུལ་ཁྲིམས་བློ་གྲོས་རིན་པོ་ཆེ་མཆོག་མཇལ་བཅར་ཆེད་པདྨ་འོད་གསལ་གླིང་ལ་རླངས་འཁོར་ཁ་ལོ་བ་ཨ་མ་སུས་སིན་དང་མཉམ་དུ་སོང་། 
མཁན་ཆེན་ཚུལ་ཁྲིམས་བློ་གྲོས་ནི་བོད་ནས་དངོས་སུ་མཇལ་མ་མྱོང་བས་ད་རེས་མཇལ་བ་ཐེངས་མ་དང་པོ་དེ་ཡིན། ཡིན་ནའང་སྐྱབས་རྗེ་མཁན་ཆེན་འཇིགས་མེད་ཕུན་ཚོགས་རིན་པོ་ཆེ་མཇལ་ཐེངས་འགའ་དང་མ་ཟད་དབང་ཁྲིད་ལུང་གསུམ་ཐེངས་འགར་ཐོབ་མྱོང་། ད་རེས་ཆེས་བསྐལ་པ་བཟང་པོ་ཞིག་ལ་གུས་པའི་ཆོས་ཚོགས་ཀྱི་ཐག་ཉེར་ཡོད་པའི་སྐྱབས་རྗེ་ཞིང་གཤེགས་བླ་མ་མཐར་ཕྱིན་རིན་པོ་ཆེའི་ཆོས་ཚོགས་ནས་གདན་འདྲེན་ཞུས་འདུག་སྟབས་ངོས་ཀྱང་ཆོས་གྲལ་དུ་འདུག་རྒྱུའི་བསྐལ་པ་བཟང་པོ་གྱུར། གུས་པར་མཚོན་ན་དེང་སང་བོད་པའི་སྤྱི་ཚོགས་ཀྱི་འགྲོ་སྟངས་ལྟར་མིང་དང་སྐད་གྲགས་སོགས་ཀྱི་རྗེས་སུ་འབྲངས་རྒྱུར་དགའ་བོ་དེ་ཙམ་མེད་ཀྱང་མཁན་ཆེན་ཁོང་གི་མཚན་སྙན་དང་ལུགས་གཉིས་ཀྱི་མཛད་བཟང་རྣམས་ལ་སྔ་ནས་ཡི་རང་ཆེན་པོ་དང་གུས་པས་བཀུར་མཁན་ཞིག་ཡིན། མ་ཟད་ལོ་བདུན་ཡར་སྔོན་ཁོང་ནས་བརྩམས་པའི་སྐྱེ་བ་སྔ་ཕྱིའི་རྣམ་བཞག་སྲིད་པ་གསལ་བའི་མེ་ལོང་ཞེས་པའི་དེབ་ཞིག་བཀླག་མྱོང་ཡོད་པས་དེ་ནས་བཟུང་མཁན་པོ་མཆོག་ཐེངས་གཅིག་མཇལ་ན་བསམ་པའི་སྐོམ་པ་ཆུ་འདོད་ལྟར་བྱུང་། 
ད་རེས་གུས་པས་བསམ་པའི་རེ་འབྲས་རྣམས་དོན་ཐོག་ཏུ་སྨིན་ནས་ནས་པདྨ་འོད་གསལ་གླིང་བན་སྔགས་སྐྱ་སེར་བདུན་བཅུ་མ་ཟིན་ཙམ་དང་ལྷན་དུ་རྫ་དཔལ་སྤྲུལ་གྱིས་མཛད་པའི་ཐོག་མཐའ་བར་གསུམ་དུ་དགེ་བའི་གཏམ་ཞེས་པ་དེའི་ཐོག་ནས་གསུངས་ཆོས་མཉམ་ཞུ་བྱེད་རྒྱུའི་ཆེས་བསྐལ་པ་བཟང་པོ་བྱུང་། གསུངས་ཆོས་ཟུར་ནས་ཆོས་གྲོགས་བླ་མ་ལེགས་བཤད་བཟང་པོ་ནས་གུས་པ་ངོ་སྤྲོད་དང་ཟུར་བཅར་ཀྱི་སྐབས་སུ་འབྱུང་འགྱུར་གལ་སྲིད་ས་གནས་འདི་ཕྱོགས་ལ་ཆིབས་བསྒྱུར་གནང་ན་སྔ་ནས་ཆོས་ཚོགས་སུ་གདན་ཞུ་ཡང་བྱས་པས་ཞལ་བཞེས་བཟང་པོ་ལེགས་པར་ཐོབ། དེ་རིང་ནི་བཟང་པོའི་ཞོར་དུ་ཇ་ཆང་གི་དཔེ་ལྟར་ཡུན་རིང་མ་མཇལ་བའི་ཀློང་སྤྲུལ་རིན་པོ་ཆེ་དང་བླ་མ་ལེགས་བཤད་བཟང་པོ་གཉིས་གཙོར་བྱས་ཆོས་གྲོགས་འགའ་ཡང་མཇལ་རྒྱུ་བྱུང་། 

པདྨ་འོད་གསལ་གླིང་སྐྱ་སེར་འདུས་པ་མང་པོས་མཁན་པོ་མཆོག་ལ་ཕེབས་བསུ་དང་སྣེ་ལེན་གུས་པས་བཀུར་སྟངས་འདིར་དཔྱད་ན་ལུང་རྟོགས་ཀྱི་བསྟན་པར་བྱས་རྗེས་གང་ཡང་མེད་པར་བོད་ཀྱི་སྤྲུལ་ཆོས་རིང་ལུགས་འདི་ལ་རྨོངས་དད་དང་གཡམ་རྒྱུགས་བྱེད་རྒྱུའི་མཚམས་འཇོག་ནས་ད་ནས་བཟུང་སྟེ་རིག་པའི་ལམ་ནས་རྗེས་སུ་འབྲངས་དགོས་ཞེས་པའི་ཐོག་མའི་ཅོང་བརྡ་ཞིག་ཀྱང་རེད་འདུག་བསམ། དེ་ནི་ཞི་བ་ལྷས། མཁས་པ་རྣམས་ནི་བཀུར་བ་དང་།། བསོད་སྙོམས་དག་ཀྱང་རྙེད་པར་ཤོག ཅེས་པའི་ཐུགས་སྨོན་གནང་བ་འདི་ཉིད་ཀྱང་ཡིད་ལ་ཡང་དུ་དྲན་གསོས་བྱས་སོང་། 

Tuesday, April 5, 2016

ལམ་རིམ་ཆེན་མོར་དཔེ་མཇལ་བྱས་པའི་ཉིན་མོ།


དེ་རིང་ནི་ཉིན་ཧྲིལ་པོར་རྗེ་བདག་ཉིད་ཆེན་པོའི་ལམ་རིམ་ཆེན་མོར་དཔེ་མཇལ་ཞུས་ནས་ནང་ལ་བསྡད་པས་ཧ་ཅང་སྐྱིད་པོ་བྱུང་། 
ལམ་རིམ་ཆེན་མོ་འདི་ང་བོད་དུ་ཡོད་པའི་སྐབས་སུ་ཀ་མདའ་དགོན་པའི་ཁྲི་སྤྲུལ་རྡོ་རྗེ་འཆང་མདུན་ནས་ང་རང་གཅིག་པུར་ཟླ་གཅིག་རིང་ཞིབ་ཁྲིད་ལན་གཅིག་ཐོབ་པ་མ་ཟད་ཉིས་སྟོང་ལྔ་ལོར་རྒྱ་གར་ལྷོ་ཕྱོགས་སེ་ར་བྱེས་ནས་རྒྱལ་བ་ཡིད་བཞིན་ནོར་བུའི་སྐུ་མདུན་ནས་ལན་གཅིག་ཐོབ་པའི་ཆེས་བསྐལ་པ་བཟང་པོ་ཅན་ཏུ་གྱུར། 
དེང་སང་ལམ་རིམ་ཆེན་མོར་བརྗེད་ངས་རྐུན་པོས་ཁྱེར་དོགས་ཀྱིས་སྤམ་མཇལ་ཙམ་མ་ཡིན་པར་ལྷོད་དལ་ངང་དཔེ་མཇལ་ཞུ་རྒྱུ་བྱུང་བས་གུས་པའི་དགེ་སེམས་རླན་བྲལ་གྱི་ལྗང་བུ་སྐམ་པོ་འདིར་གནས་སྐབས་རིང་ངེས་འབྱུང་དང་བྱང་སེམས་སོགས་ཀྱི་རླན་དང་འཕྲད་ནས་དགེ་བ་འཕེལ་གྲོགས་ཀྱི་ཆ་རྐྱེན་དུ་གྱུར་པས་སེམས་ལ་སྐྱིད་པོ་བྱུང་། མ་ཟད་རྟེན་འབྲེལ་བཅུ་གཉིས་ལུགས་འབྱུང་ལྡོག་སོགས་ནས་ཚིག་གི་གཡམ་བཤད་ཙམ་མ་ཡིན་པར་རྒྱལ་བའི་བཀའ་བསྟན་མང་པོར་ཁུངས་གཏུགས་ནས་འགྲེལ་བཤད་གནང་སྟངས་འདིས་ཀྱང་སྔར་མེད་སེམས་ལ་བཟང་བསྐྱེད་བྱུང་། 
སྤྱིར་གཏང་ནང་དོན་རིག་པའི་གང་ཉམས་སུ་ལེན་རྒྱུའི་དཔེ་དེབ་རྣམས་དཔེ་མཇལ་བྱེད་པའི་སྐབས་སུ་དཔེ་དེབ་གང་གསུངས་མཁན་གྱི་བླ་མ་དེ་ཉིད་ད་ལྟའི་དཔེ་དེབ་དེ་ཡིན་བསམ་པའི་འདུ་ཤེས་དང་མ་བྲལ་བའི་ཐོག་ནས་དཔེ་དེབ་བཀླག་པ་ཡིན་ན་སེམས་ལ་ཕན་ཐོག་ངེས་རེད་འདུག 
དེ་མ་ཡིན་པར་བཀླག་རྒྱུའི་དཔེ་དེབ་གང་ཡིན་པ་དེ་ཉིད་ལ་རང་ཉིད་ཞུ་དག་བྱེད་མཁན་འདྲ་བོ་ཞིག་བྱས་ན་གསུངས་མཁན་བླ་མ་དེ་ཉིད་མཁས་བླུན་སྐད་གྲགས་ཆེ་ཆུང་ལ་མ་ལྟོས་པར་སེམས་ལ་ཕན་ཐོག་དཀའ་སྙམ། 
ང་ནི་ལོ་ན་ཆུང་ངུའི་དུས་སུ་ནས་རྗེ་རིན་པོ་ཆེའི་གསུངས་རྣམས་ལ་ཧ་ཅང་དགའ་བོ་ཡོད། ངོས་ཀྱི་ཁ་འདོན་དཔེ་ཁྲོད་ནང་དུ་ཡོད་པའི་དཔེར་ན། ལམ་རིམ་གྱི་ཉམས་མགུར། རྟོགས་བརྗོད་མདུན་ལེགས་མ། རྣམ་དག་གངས་རི་མ་སོགས་ཁ་འདོན་བྱེད་ཀྱི་ཡོད་པས་བརྗོད་བྱ་དང་རྗོད་བྱེད་གང་གི་ཐད་ནས་བསམ་ཡང་རྗེ་རིན་པོ་ཆེའི་གསུངས་ལ་དད་མོས་ཆེ། 
ལམ་རིམ་འདིའི་ས་བཅད་འཇོག་སྟངས་དང་གཞུང་ཚིག་གི་ནུས་པའི་བྲོ་བ་སོགས་ལ་ཧ་ཅང་ནས་སེམས་ལ་ཡིད་འགུལ་ཐེབས་པོ་ཞིག་བྱུང་། སློབ་དཔོན་ཁྲོ་མེད་དཔེ་ཆ་ཟེར་སྲོལ་ཡོད་པ་འདི་དཔེ་ཀློག་བྱས་ནས་རང་མྱོང་གི་བྲོ་བ་ཞིག་ནང་ནས་རྙེད་རྒྱུ་ཡོད་པ་འདིར་ངེས་ཤེས་ཡང་དག་པ་ཞིག་ཀྱང་འདྲོངས། 

ང་ནི་དུས་ཚོད་ཡོད་ན་ཁ་འདོན་རྣམས་ཀྱི་མཇུག་ཏུ་གང་ཤེས་སེམས་ཀྱི་ངོ་བོ་སྐྱོང་ནས་འདུག་རྒྱུ་བྱུང་ན་ཡག་ཤོས་དང་། གལ་སྲིད་དེ་ལྟར་མ་བྱུང་ཡང་ཇ་ཕོར་མདུན་དུ་བཞག་ནས་ཉི་མར་ལྡེ་བཞིན་ནང་ཆོས་ཀྱི་དཔེ་མཇལ་བྱེད་རྒྱུ་ལས་དགའ་ས་ཞིག་མེད།