རང་དགོན་གྱི་བླ་མ་དཔལ་འབར་སྤྲུལ་སྐུ་དགོངས་པ་ཆོས་དབྱིངས་སུ་ཐིམ་པ།

ཁམས་ནང་ཆེན་ཇ་པ་དགོན་ནམ་དགོན་ཞབས་དགོན་པ་འདི་ནི་མཉམ་མེད་འགྲོ་མགོན་ཀརྨ་ཀ་ཚང་གི་ཆོས་བརྒྱུད་འཛིན་མཁན་ལས་རྒྱལ་བ་ཞྭ་ནག་པའི་གདན་ས་ཆེན་མོ་དཔལ་གྱི་སྟོད་ལུང་མཚུར་ཕུའི་དགོན་ལག་ཞིག་རེད། 1454 ལོར་སྐུ་འཁྲུངས་པའི་དཔལ་རྒྱལ་དབང་ཀརྨ་པ་སྐུ་ཕྲེང་བདུན་པ་ཆོས་གྲགས་རྒྱ་མཚོའི་དངོས་སློབ་འཇང་གྲྭ་སངས་རྒྱས་དཔལ་བཟང་དང་། བྱ་བཏང་ཐར་པ་རྒྱལ་མཚན་གཉིས་ཀྱིས་ཕྱག་བཏབས་པའི་དགོན་པ་ཞིག་ཡིན། དུས་དེ་ནས་བཟུང་སྟེ་ད་བར་དགོན་པ་འདི་ལའང་དར་རྒུད་དང་ཆག་འཇིགས་ཧ་ཅང་མང་པོ་བྱུང་ཡོད། བོད་གངས་ཅན་ལྗོངས་སུ་བསྟན་དགྲ་རྒྱ་དམར་གྱིས་ལྷ་ལུང་ནང་དུ་འདྲེ་ལག་མ་བརྐྱང་བའི་གོང་དུ་དགོན་པ་འདིར་འགྲོ་མགོན་བཀའ་བརྒྱུད་པའི་ལྟ་བ་ཕྱག་རྒྱ་ཆེན་པོ་དང་། སྒོམ་པ་ན་རོའི་ཆོས་དྲུག སྤྱོད་པ་རོ་སྙོམ་སྐོར་གསུམ་སོགས་ལ་ཉམས་ལེན་གནང་ཞིང་བཀའ་བརྒྱུད་པའི་གཏད་ས་བཞི་ལ་བློ་ཕུག་བཅའ་ཞིང་ཚེ་དང་སྒྲུབ་པ་མཉམ་པའི་རྟོགས་ལྡན་བཅུ་གསུམ་དང་། འཇང་གྲྭ་བླ་དགུ་ཞེས་གཞན་སེམས་མངོན་ཤེས་དང་རླུང་ནུས་གྲུབ་རྟགས་ལ་རང་དབང་འབྱོར་བའི་བླ་མ་མང་ཙམ་མཆིས། རིག་གསར་ཁྲག་མཚོས་རྦ་རླབས་ཀྱིས་བཅོམ་པའི་རྗེས་སུ་དགོན་པའི་བརྟེན་དང་རྟེན་པར་བཅས་རྨིག་མེད་རྩ་རླག་ཏུ་སོང་། གུས་པའི་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་དང་། ཁ་སང་ཞིང་དུ་ཕེབས་པའི་དཔལ་འབར་སྤྲུལ་སྐུ་རྣམ་གཉིས་བཙོན་གྲོལ་ཐོབ་རྗེས་སྡེ་དགོན་ཡོངས་ནས་མ་གྲོས་བསམ་པ་གཅིག་མཐུན་གྱིས་དགོན་པ་གསར་གཞེངས་གནང་། ཞིང་ཕེབས་དཔལ་འབར་སྤྲུལ་སྐུ་ཁོང་ནི་མདོ་ཁམས་སྐུ་རྒྱལ་ཆེན་པོའི་རི་བོའི་ཞོལ་སྲིབ་མདའ་ཞེས་པའི་གྲོང་དུ་སྐུ་འཁྲུངས། དགུང་ལོ་དྲུག་ཐོག་ཀརྨ་པ་བཅུ་དྲུག་རིག་པའི་རྡོ་རྗེ་དང་། སི་ཏུ་པདྨ་དབང་མཆོག་རྣམ་གཉིས་ནས་ཇ་པ་དགོན་གྱི་དཔལ་འབར་སྐུ་གོང་མའི་ཡང་སྲིད་དུ་ངོས་འཛིན་གནང་། དཔལ་འབར་སྐུ་གོང་མ་ནི་སྐབས་དེ་དུས་མདོ་སྨད་ཕྱོགས་ནས་རྟོགས་པ་མཐོ་བའི་ཚད་དུ་འཇོག། ཉེ་ཆར་ཞིང་དུ་ཕེབས་པའི་དཔལ་འབར་འདི་ཉིད་ཀྱང་རྒྱ་སྤྲུལ་རིན་པོ་ཆེ་དང་། རང་དགོན་གྱི་བླ་རྒན་ཆོས་དབྱིངས་རབ་འབྱམས་སོགས་བླ་མ་མང་པོ་བསྟེན་པ་མ་ཟད། བཙོན་ཁང་ནང་ནས་ཀྱང་མཁན་པོ་མུན་སེལ་སོགས་བླ་མ་མང་པོ་ཞིག་བསྟེན་ནས་ཉམས་རྟོགས་ཀྱི་རྩལ་ཆེན་རྫོགས། ལྷག་པར་དུ་ལས་བཞིའི་ཕྲིན་ལས་ལ་མངའ་དབང་བརྙེས། ཡུལ་ལུང་སྡེ་དགོན་རྣམས་སུ་བཅོས་མེད་ནད་ཀྱིས་ཟིན་པའི་ནད་པ་མང་པོ་དང་། ཐར་མེད་གདོན་གྱིས་རླམ་པའི་ཉམ་ཐག་གི་སེམས་ཅན་རྣམས་ལ་མི་འཇིགས་པའི་སྲོག་གི་སྐྱབས་སྦྱིན་གནང་བ་ནི་རེ་ཟུང་ཙམ་ག་ལ་ཡིན། ལྷག་པར་དུ་ཡུལ་ལྷ་གཞི་བདག་དང་། ཆོས་སྐྱོང་སྲུང་མ་སོགས་ལ་མི་དང་མི་འཕྲད་པ་བཞིན་ཆོས་སྤྱན་དང་ལྡན་པའི་མངོན་ཤེས་ལ་ཐོགས་པ་མེད། ཚུལ་མཐོང་ཚད་མའི་ངོར་ནམ་རྒྱུན་ཆང་རག་འཐུང་རྒྱུ་དང་། ལྷག་པར་དུ་བུད་མེད་སོགས་ལ་ཧ་ཅང་བརྙེས། དགུངས་གྲངས་བརྒྱད་བཅུ་གྱ་བཞིའི་ཐོག་ཉེ་ཆར་འདི་ཟླའི་སྤྱི་ཚེས་བཅུ་བདུན་བོད་ཚེས་བཅུའི་ཉིན་མོ་རེ་ཞིག་གཟུགས་སྐུའི་བཀོད་པ་ནང་དབྱིངས་སུ་བསྡུས་པའི་ཚུལ་བསྟན་འདུག།

སྤྱིར་གཏང་ཐུགས་དམ་ཞེས་པའི་ཚིག་འབྲུ་གཉིས་པོ་འདི་ལ་གོ་རྒྱུ་ཆེན་པོ་ཡོད་ཅིང་། ཐུགས་དམ་ནི་ངེས་པར་ཡོང་ཆོག་པ་ཞིག་ཡིན་ཀྱང་དེང་སང་སྤྱི་ཚོགས་འདིར་ཐུགས་དམ་གྱི་ཁ་ཕྱོགས་ནི་ཕན་ཚུན་འགྲན་རྩོད་དང་། བླ་མའི་སྐུ་ཕུང་ཆབ་སྲིད་པའི་ལག་ཆར་གྱུར་ཟིན་པའི་དུས་རབས་གསར་པ་འདིར་ངོས་ལ་ལྟོས་ན་ཐུགས་དམ་ཟེར་ནས་འུར་བཞིན་པ་འདི་ལ་ཡིད་ཆེས་འཕེར་དཀའ་བ་མ་ཟད་ཐུགས་དམ་ལ་བཞུགས་མ་བཞུགས་འདས་ཚུལ་ཙམ་ནི་དེ་བས་ཀྱང་གཙོ་བོ་ཞིག་ལ་གཏན་ནས་མིན། ཡིན་ནའང་ཞིང་གཤེགས་བླ་མ་ཁོང་ནི་ཉིན་གསུམ་རིང་ཐུགས་དམ་ལ་གཡོ་མེད་དྲང་པོར་བཞུགས་འདུག་ཞེས་གླེང་གིན་གདའ།

ཟླ་བ་གཅིག་རིང་ཕུར་པའི་བསྙེན་མཚམས་ཞིག་ལ་བསྡད་པ།

རང་ལོ་ཉེར་གཅིག་སྐབས་སུ་གུས་པའི་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་དང་དྲིན་ཅན་ཕ་འདས་པོ་གཉིས་ཀྱི་སྐུ་དྲིན་ལ་བསྟེན་ནས་རང་དགོན་མཆོག་གླིང་གཏེར་གསར་སྒྲུབ་སྡེ་ཐོག་མའི་གྲལ་དུ་ལོ་གསུམ་ཕྱོགས་གསུམ་མཚམས་ལ་འདུག་རྒྱུའི་གོ་སྐབས་བྱུང་། དེ་ནས་བཟུང་སྟེ་ཐོས་བསམ་སྒོམ་གསུམ་གང་བྱས་རྣམས་ཡན་གར་དུ་མ་སོང་བར་ཐོས་དོན་བསམ་སྒོམ་གཉིས་ཀྱི་ཡན་ལག་ཏུ་གོ་ནས་གང་བསྒྲུབ་རྒྱུའི་ཆོས་ཉིད་མདོར་ཧྲིལ་གྱིས་དྲིལ་ན་རང་རྒྱུད་ཉོན་མོངས་འདུལ་བྱེད་ཀྱི་རྒྱུ་རུ་འགྲོ་དགོས་པའི་ངེས་ཤེས་ཀྱིས་བློ་ཆོས་སུ་འགྲོ་བའི་སྒོ་འཕར་ཡངས་པོར་ཕྱེས། དེང་སང་རྟོག་གེ་བ་ཐོས་དོན་རྒྱུད་ཐོག་ཏུ་མ་སོང་བ་འགའ་ཞིག་ནས་ལོ་གསུམ་ཕྱོགས་གསུམ་མཚམས་ལ་འདུག་རྒྱུ་ནི་དུས་ཚོད་གྲོན་པའི་རྒྱུ་རེད། དེ་བས་ཤེས་རབ་འཕེལ་བ་ལ་ལོ་གསུམ་ཕྱོགས་གསུམ་བསྡུས་གྲྭ་སྦྱང་ན་ཡག་བླ་ཆེན་ག་གེ་མོས་གསུངས་ཞེས་སྒྲུབ་བྱེད་ལྟར་སྣང་འགའ་ལ་བསྟེན་ནས་བཤད་ཡམ་རྔམ་པོ་ཆེ་རེ་འཐེན་ཁུར་བྱེད་ཀྱང་། དེ་ནི་བླ་ཆེན་དེ་ཉིད་ཀྱི་གསུང་གི་དགོངས་པ་ངོ་མ་དེ་མ་ལོན་པར་སྣང་།

གང་ལྟར་ངོས་ལ་མཚོན་ན་ཆུང་ནས་ད་བར་ལས་སྨོན་རྟེན་འབྲེལ་བཟང་པོའི་དབང་གིས་རང་རེའི་མེ་ཏོག་ཕོག་པའི་ལྷ་སྐལ་ཉམས་ལེན་སྒྲུབ་པའི་བཀའ་བབས་དང་།

བྱིན་རླབས་དང་མོས་གུས་ཀྱི་བཀའ་བབས་སོགས་ཁྱད་ཆོས་དུ་མ་ཡོད་པའི་བརྒྱུད་པ་གསེར་གཙོ་མ་ལྟ་བུ་ལ་དམ་སེལ་དང་ལོག་རྟོག་གི་གཡའ་ཡིས་མ་གོས་པའི་སྒྲུབ་བརྒྱུད་པའི་གྲལ་མཐར་སྐྱེས། ཆུང་ནས་དགེ་བའི་བཤེས་གཉེན་ཚད་ལྡན་མང་པོའི་བྱིན་རླབས་ཀྱི་དྲོད་ཀྱིས་ཉེ་བར་བསྐྱངས་བའི་སྐུ་དྲིན་གྱིས་ནང་ཆོས་ལ་ཐོས་བསམ་སྒོམ་གསུམ་ཕྱོགས་རེ་གཡག་ཞར་གྱི་རྩྭ་ལྟར་མ་སོང་བ་འདི་ནི་ཆེས་སྐལ་པ་སྦོམ་པོ་ཞིག་ཏུ་འཁུམ། འགྲོ་དགོས་ས་དང་ལས་དགོས་རྒྱུ་ནི་རྫོགས་རྒྱུ་མེད་པ་ཆུ་ནག་གི་གཉེར་མ་ལྟར་མང་དག་ཞིག་ཡོད་ཀྱང་གནས་སྐབས་ཡོད་ཚད་བློས་གཏང་ནས་གནས་འདིའི་ཐག་ཉེར་རྦིག་སུར་ཞེས་པའི་བོད་ཀྱི་ས་ཆ་འདྲ་བོ་ཞིག་ཡོད་པས་རི་མགོ་དེར་ཆོས་གྲོགས་མཁས་དབང་ཆེན་པོ་ཨ་གནམ་ཐུབ་བསྟན་རིན་པོ་ཆེའི་ཐུགས་རྗེའི་བཀའ་དྲིན་གྱིས་བསྡད་སའི་གནས་མལ་གཡར་བས་ཉིན་མོ་རས་གུར་ནང་དུ་ཐུན་བཟུང་ཞིང་། མཚན་མོ་ཉལ་ས་ཤིང་གི་ཁང་པར་བྱས། ས་གནས་དེར་ང་མ་གཏོགས་མི་གཞན་དག་ནི་བཙལ་ཀྱང་མི་རྙེད། དབེན་གནས་ཀྱི་རྒྱུ་ཚོགས་ལེགས་པར་ཚང་ཞིང་ལྷག་པར་རྫོགས་ཆེན་ཐོད་རྒལ་ཉམས་ལེན་བྱེད་སའི་གནས་ཀྱི་ཁྱད་ཆོས་ནམ་མཁའི་མཐོངས་ཡངས་ཤིང་། ཤར་ནུབ་གཉིས་ཀྱི་ཉི་མའི་རྒྱུ་ཐག་ཧ་ཅང་རིང་། སླེབས་པ་ཙམ་གྱིས་དབེན་ཅིང་འཇམ་ལ་རང་བཞིན་གྱིས་སེམས་ལ་བདེ་བ་ཐོབ།

མི་མེད་དབེན་པའི་ནགས་ཁྲོད་དུ། །སྐྱོ་ཆད་དེ་བ་ལ་སང་དུས་མེད།

།བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད།

ཅེས་པའི་ཚོར་བ་འདི་རང་བཞིན་གྱིས་ཡོང་གི་གདའ།

ད་རེས་དུས་བརྒྱའི་ཟ་མ་ལན་གཅིག་གི་དཔེ་ལྟར་གོ་སྐབས་བཟང་པོ་འདི་དམ་འཛིན་བྱས་ནས་རང་ཉིད་གཅིག་པུར་ཟླ་གཅིག་རིང་ནས་བསྙེན་པའི་ལྷག་པའི་ལྷ་མཆོག་ཕུར་པ་རྡོ་རྗེ་གཞོན་ནུའི་བསྙེན་མཚམས་ཞིག་ཏུ་བསྡད་པས་ཧ་ཅང་སྐྱིད་པོ་བྱུང་།

བསླུ་མེད་གཏན་གྱི་གྲོགས་བཟང་དམ་ཆོས་འདི། །གཉིས་མེད་ཡེ་ཤེས་མངོན་དུ་མ་གྱུར་པར།

།འབྲལ་མེད་དུས་ཀུན་ཉམས་སུ་ལེན་པ་ལ། །གེགས་མེད་མཐའ་རུ་ཕྱིན་པར་བྱིན་གྱིས་རློབས།།