Monday, July 9, 2012

མུན་ནག་གླིང་རོ་ཐང་ཞེས་པའི་རི་མགོར་སོང་བའི་ཉིན་མོ།

མུན་ནག་གླིང་རོ་ཐང་ལ་ཁ་རུ་བླངས་པའི་པར།
ཞོགས་པ་སྔ་བོ་ལངས་ནས་ཚ་མོ་གཉིས་དང་ཇོ་རྒན་མ་རྡོ་སྒྲོན་གཞན་སྐུ་ཞབས་བློ་བཟང་དང་། ཡུར་སྐོར་སྣེ་ཤན་པ་བཀྲ་ཤིས་བཅས་ང་ཚོ་མི་དྲུག་ནས་ཐུན་མོང་དུ་གླ་བྱེད་སྒེར་འཁོར་ཞིག་ལ་ཧིན་སྒོར་ཉིས་སྟོང་ལྔ་བརྒྱ་སྤྲད་ནས་རི་མགོར་སོང་། ཉིན་མོ་འདི་ནི་གནམ་གཤིས་ཧ་ཅང་བཟང་བས་ནམ་མཁར་སྤྲིན་དཀར་ལང་ལིང་དམ་དུམ་བལ་དཀར་རླུང་གིས་བསྐྱོད་པ་ནང་བཞིན་ག་ས་གང་དུ་མཐོང་རྒྱུ་འདུག མུན་ནག་གླིང་ཞེས་པ་འདི་ནི་གླིང་གེ་སར་རྒྱལ་པོས་བདུད་ཨ་སྐྱོང་རྒྱལ་པོའམ་བདུད་ཀླུ་བཙན་དམ་ལ་གཏགས་པའི་ས་ཡིན་སྐད་འདུག སྔར་བདུད་ལུང་ཡིན་པའི་སྐབས་སུ་ས་འདིར་ཧ་ཅང་འཇིགས་སུ་རུང་བ་གཅན་གཟན་དང་འདྲེ་སྲིན་གནས་སའི་ས་མུན་པའི་གླིང་འདྲ་བོ་ཞིག་ཡིན་པས་མིང་དེར་བཏགས་པ་ཡིན་སྐད། དེང་སང་རྒྱ་གར་བལ་ཡུལ་སོགས་ཀྱི་ས་ཆའི་མིང་མང་པོ་ཞིག་བོད་སྐད་དུ་འབོད་ཀྱི་ཡོད་དཔེར་ན་རྡོ་རྗེ་གླིང་དང་། མུན་ནག་གླིང་ལྟ་བུ་མང་པོ་ཡོད་ཀྱང་མི་རྣམས་ཀྱིས་འབོད་སྟངས་མ་དག་རྒྱུན་འབྱམས་སུ་སོང་ནས་འབོད་སྲོལ་མི་འདྲ་བ་ཡོང་གི་འདུག
དེ་ནས་ངེད་རྣམས་མུན་ནག་གླིང་གི་ལུང་པའི་ནང་ནས་རིམ་བཞིན་སོང་བས་གྱེན་ལ་ཧ་ཅང་གཟར་མོ་བརྒྱུད་ནས་སོང་བས་དམར་རིལ་ཞེས་པའི་ས་ཆ་རུ་འབྱོར། དེར་ཡུལ་སྐོར་སྤྲོ་འཁྱམས་པ་རྣམས་ནས་གངས་རི་དང་ཆུ་བྲག་སོགས་ལ་ལྟད་མོ་བལྟ་བཞིན་འདུག རིམ་བཞིན་སོང་བས་རོ་ཐང་ཞེས་སྐད་གྲགས་ཅན་གྱི་རི་མགོ་དེར་འཛེགས་ཐུབ་སོང་། རི་རྣམས་ཀྱི་ཆག་ཚུལ་དང་ས་དབྱིབས་སོགས་ནི་ཁམས་སྡེ་དགེ་ཁྲོ་ལ་ཞེས་སྐད་གྲགས་ཅན་གྱི་རྫ་རི་དེ་དང་གཅིག་པ་འདྲ་བོ་ཞིག་འདུག རི་མགོར་གངས་ཀྱིས་བཟུང་ཞིང་། རི་སྐེད་རྫ་སྤང་འདྲེས་མ་དང་། རི་མཐའ་རྣམས་ཤིང་རིགས་སྣ་ཚོགས་ཀྱིས་ཡོངས་སུ་བསྐོར་བའི་ནགས་རི་ཡིན་པ་མ་ཟད་འབྲས་བུ་ཅན་གྱི་ལྗོན་ཤིང་མང་པོ་དཔེར་ན་ཁམ་ཤིང་དང་། སྟར་ཤིང། གཞན་ཀུ་ཤུའི་ཤིང་སྡོང་སོགས་ཧ་ཅང་མང་པོ་སྐྱེས་འདུག 
ང་ཚོ་ནི་རོ་ཐང་ཞེས་པའི་རི་མགོ་དེར་སྔོན་སྐྱབས་མགོན་རིན་པོ་ཆེའི་བཞུགས་ཁྲི་ཡིན་སྐད་རྡོ་ཕ་ཝོང་ཆེན་པོ་ཞིག་ཡོད་པ་དེའི་འགྲམ་དུ་བསྡད་ནས་བསང་དང་གསེར་སྐྱེམས་སྨོན་ལམ་སོགས་བྱས་ཤིང་ཉིན་གུང་ཟ་མ་རུ་ནང་ནས་ཆེད་དུ་བཟོས་པའི་བག་ལེབ་དང་། ཚོད་མ། ཇ་སོགས་འགྲང་ཚད་ཟོས་ནས་པར་བླངས་ཤིང་གངས་ནང་ནས་ཕན་ཚུན་གངས་རིལ་འཕེན་རེས་བྱས་ནས་གངས་རྩེད་ཀྱང་བྱས། དེ་ནས་ཡ་མཚན་པ་ཞིག་ལ། ལ་ཚུར་ནང་དེར་རྡོ་ཕ་ཝོང་ཆེན་པོ་ཞིག་གི་ཐོག་ལ་གླིང་གེ་སར་གྱི་ཞབས་རྗེས་གསལ་བོ་ཞིག་དང་། ལ་སྐེད་མཚམས་སུ་གེ་སར་ཆིབས་རྟ་འདོགས་ས་རེད་ཟེར་བྲག་ཟོར་ཟོར་ཕུར་པ་འདྲ་ཞིག་ཀྱང་འདུག 
གང་ལྟར་ཀྱང་རྒྱ་གར་ཚ་བའི་ཁྲོད་དུ་མི་འདོད་ཀྱང་སྐྱབས་བཅོལ་དུ་ཡོང་ནས་དེ་རིང་མི་ལོ་བཅོ་ལྔ་ཏག་ཏག་རེད་འདུག་པས་རྒྱ་གར་བའི་ལུང་པ་ཞིག་ནང་ས་ཆ་འདི་ལས་སྐྱིད་པ་ཞིག་དེ་སྔ་འགྲོ་མ་མྱོང་། དེ་རིང་ཉིན་མོ་འདིར་ངོ་མ་རང་ཡུལ་སྐྱིད་པའི་ལུང་པར་སླེབས་སོང་བའི་ཚོར་སྣང་འདྲ་ཞིག་རྒྱུན་ཆགས་སུ་འདུག
དེ་ནས་རི་ལུང་ལ་ལྟད་མོ་བལྟ་བཞིན་མར་མུན་ནག་གླིང་མགྲོན་ཁང་ནང་དུ་ཆུ་ཚོད་དྲུག་པ་ཙམ་ལ་འབྱོར་སོང་
 མགྲོན་ཁང་ནང་ནས་དགོང་ཟས་སུ་འཐེན་ཐུག་ཞིམ་པོ་ཞིག་འཐུང་ཞོར་ཚང་མས་དེ་རིང་སྐྱིད་རབ་དང་ཡག་རབ་སོགས་ཁ་བརྡ་བྱེད་བཞིན་འདུག ང་ནི་ཧ་ཅང་དཀའ་ལས་ཁ་ནས་ཤི་གྲབ་འདྲ་བྱེད་ཀྱི་འདུག་ཀྱང་དེ་རིང་གི་སྐྱིད་པའི་ཉིན་ཐོ་འབྲི་རྒྱུ་དེ་གལ་ཆེན་དུ་བཟུང་ནས་ཨུ་ཚུགས་ཀྱིས་ཉིན་ཐོ་མདོར་བསྡུས་ཞིག་ཆུ་ཚོད་བཅུ་པའི་སྐབས་སུ་གཏང་ཐུབ་ཙམ་བྱུང་བས་ཉལ་སར་སོང་ནས་གཉིད་དུ་ཡུར།

No comments:

Post a Comment