Thursday, April 4, 2013

ཀུན་བཟང་ཨ་མ་ཚེ་ལས་འདས་པའི་ཉིན་མོ།

ཉི་ར་ནང་དུ་སོས་དལ་བྱེད་བཞིན་པ།།
ཞོགས་འཐུང་བཞིན་པའི་སྐབས་སུ་ཟུར་ནས་ཁ་པར་གྱི་ཐིར་སྒྲ་ཞིག་ཡོད་པ་དེ་ནི་བུ་མོ་ཀུན་བཟང་རེད་འདུག དེ་རིང་ཛ་དྲག་གི་དཀའ་ངལ་བྱུང་སོང་ཟེར་བ་དང་མཉམ་དུ་སྐད་ཤུགས་ཆེན་པོའི་སྒོ་ནས་ངུས་སོང་། ང་ནི་གློ་བུར་དུ་སྙིང་ཁམས་མ་བདེ་བ་འདྲ་བོ་བྱུང་། གང་ཡིན་ཟེར་ན་ས་གནས་འདིར་ང་ཚོ་བོད་པ་གསུམ་ལས་མ་གཏོགས་མེད། གཅིག་ཀུན་བཟང་ཡིནམོ་རང་སྐྱེ་ས་རྒྱ་གར་རྡོ་རྗེ་གླིང་ནས་ཡིན་ཅིང་ཨ་རིར་སླེབས་ནས་ཕལ་ཆེར་ལོ་བཅུ་གྲངས་ཞིག་ཡིན་ཚོད་རེད། གཅིག་ཤོས་བལ་ཡུལ་ལ་སྐྱེས་པའི་ཨ་ཅ་ཆོས་འཛིན་ལགས་ཡིན། མོ་རང་ཡང་ཨ་རིར་སླེབས་ནས་རྒྱུན་རིང་པོ་རེད་འདུག ང་ཚོ་གསུམ་ལས་མ་གཏོགས་མེད་ཀྱང་བོད་ཀྱི་ལོ་གསར་དང་། ༧གོང་ས་མཆོག་གི་འཁྲུངས་སྐར་སུམ་བཅུ་དུས་དྲན་སོགས་ལ་བོད་པའི་ངོ་ཚབ་གང་དྲག་བྱེད་ཀྱི་ཡོད། ཁོང་གཉིས་ལ་བོད་དོན་ལ་སེམས་ཤུགས་ཧ་ཅང་ཆེན་པོ་ཡོད་རེད། དེ་རིང་ནི་བཀྲ་མ་ཤིས་པ་ཞིག་ལ་བུ་མོ་ཀུན་བཟང་གི་ཨ་མ་ཉིན་གཉིས་ནད་ཡུན་གྱིས་ད་ནང་ཞོགས་པ་གྲོངས་འདུག ངས་ཀུན་བཟང་ལ་ཁ་པར་ནང་ནས་སེམས་གསོ་གང་དྲག་བྱས་པ་ཡིན། ཉིན་གུང་རྒྱབ་ཏུ་ཀུན་བཟང་ང་སར་སླེབས་བྱུང་ང་ལ་ཞེ་དགུའི་སྐབས་སུ་སྨོན་ལམ་འདོན་དགོས་པའི་ཞུ་བསྐུལ་རེད་འདུག ངས་ཀྱང་ཨ་སྒོར་བརྒྱ་དང་ཉི་ཤུའི་སེམས་གསོའི་དོད་ཕུལ་ནས་སེམས་གསོ་གང་ཤེས་བྱས། མོ་རང་གང་མགྱོགས་རྒྱ་གར་ལ་འགྲོ་རྩིས་བྱེད་ཀྱི་འདུག 

འཆི་བདག་བདུད་པོ་ཉི་མའི་གྲིབ་སོ་འདྲ།།
ཚེ་ལ་ངེས་མེད་སྟོན་ཁའི་བ་མོ་འདྲ།། 
སྒྱུ་ལུས་འདི་ནི་མི་བརྟན་ཐོ་ཡོར་འདྲ།།
ཇི་ལྟར་བྱས་ཀྱང་སྙིང་པོ་མེད་པ་འདྲ།།
གང་ཞིག་འཆི་བ་མཐོང་ངམ་ཐོས་ཀྱང་རུང་།།
མི་རྟག་སྒྱུ་མ་སྟོན་པའི་སློབ་དཔོན་གསུངས།། 
རྟག་འཛིན་ཅན་གྱི་ཆོས་དྲེད་ཟོབ་སྐྱལ་ལ།། 
མི་རྟག་རྒྱུད་ལ་སྐྱེ་བར་བྱིན་གྱིས་རློབས།།
 
   

No comments:

Post a Comment