Monday, December 21, 2015

རྒྱ་མཚོ་བྱིན་རླབས་བྱས་པའི་ཉིན་མོ།


དེ་རིང་ནི་སྔ་ནས་གྲ་བསྒྲིགས་བྱས་པ་ནང་བཞིན་ཐག་ཉེར་ཡོད་པའི་རྒྱ་མཚོ་བྱིན་རླབས་བྱེད་རྒྱུ་དེ་ཡིན། དེ་རིང་ནི་བོད་ལུགས་ནག་རྩིས་ལྟར་དུ་དགུན་ཉི་ལྡོག་པའི་ཉིན་མོ་དེ་ཡིན་པས་ཉིན་རྒྱབ་ཆུ་ཚོད་བཞི་པའི་སྐབས་སུ་དགེ་ཕྲུག་པདྨ་སྒྲོལ་མ་དང་ལྷན་མཆོད་ཆས་དང་མཁོ་བའི་ཡོ་བྱད་རྣམས་ཁུར་ནས་མཚོ་འགྲམ་ལ་སོང་། དེ་རིང་གི་གནམ་གཤིས་ནི་སྔར་དང་མི་འདྲ་བ་ཆར་ཟིམ་ཟིམ་འབབས་བཞིན་འདུག མཚོ་འགྲམ་ལ་འབྱོར་མ་ཐག་ཆར་པ་ཇེ་ཆེར་བབས་སོང་འོན་ཀྱང་གནམ་གཤིས་སྡུག་ཚོད་མི་མང་པོ་འབྱོར་འདུག མ་ཟད་ས་གནས་འདིའི་གསར་འགོད་པ་དང་གློག་བརྙན་པར་ལེན་མཁན་རྣམས་ཀྱང་འབྱོར་འདུག་སྟབས་པར་ལེན་པ་དང་གློག་བརྙན་རྒྱག་པ་སོགས་བྲེལ་ཟིང་ཚུབས་སེ་རེད་འདུག ངས་ནི་བཀྲ་ཤིས་བརྒྱད་པས་སྣ་དྲངས་ནས་དང་པོ་སྡེ་བརྒྱད་གསེར་སྐྱེམས་དང་ཀླུ་གཏོར་བཅས་བཏོན། མཐར་ཁོ་བོས་བྲིས་པའི་རྒྱ་མཚོ་བྱིན་རླབས་ཤོག་ལྷེ་གཉིས་ཅན་དེ་མི་མང་དང་མཉམ་དུ་དབྱིན་སྐད་ཐོག་འདོན་བཅུགས་ནས་ཨོ་རྒྱན་བསམ་ལྷུན་ནང་། ས་ཆུ་མེ་རླུང་འབྱུང་བའི་བར་ཆད་སོགས་ཀྱི་ཨོ་རྒྱན་འབྱུང་བཞིའི་དབང་རྒྱལ་ལ་འདོད་གསོལ་སྨོན་ལམ་སོགས་ཀྱང་གང་དྲག་བྱས། དེ་ནས་མི་མང་རྣམས་ལ་མེ་ཏོག་སིལ་མ་ཆུ་ནང་དུ་གཡུག་བཅུགས་ནས་བཀྲ་ཤིས་པའི་ཚིག་བཅད་རྣམས་ཀྱིས་དེ་རིང་གི་རྒྱ་མཚོ་བྱིན་རླབས་དེ་རེ་ཞིག་གྲུབ་པར་བྱས། ཟུར་དུ་ས་གནས་འདིའི་གཟུགས་མཐོང་བརྙན་པར་ལེན་མཁན་རྣམས་དང་། གསར་འགོད་པ་སོགས་ཀྱི་སོ་སོའི་འདོད་པའི་དྲི་བ་རྣམས་རེ་ཞིག་ལན་གྱིས་བཀང་བར་བྱས་ནས་ཆོས་ཚོགས་སུ་འབྱོར་ནས་དེ་རིང་ནི་གཟའ་ཟླ་བའི་བདེ་ཆེན་ཞིང་སྒྲུབ་ཀྱང་ཡིན་པས་དཔོན་སློབ་འགའ་དང་ལྷན་ཞིང་སྒྲུབ་མ་ཆད་ཙམ་ཞིག་བྱས། པོར་ལེན་ནས་ངོས་ཀྱི་ཆོས་གྲོགས་གཉའ་ནང་བ་ཤེས་རབ་སྐལ་ལྡན་ལགས་ཀྱང་ཕེབས་སོང་། 

Thursday, December 10, 2015

མ་ལེ་ཤར་འགྲུལ་བཞུད་བྱས་པ།


དེ་རིང་ནི་མ་ལེ་ཤའི་འགྲུལ་བཞུད་ཉིན་ཐ་མ་དེ་ཡིན། བདུན་ཕྲག་གསུམ་རིང་ཡུན་རིང་མ་ཐུག་པའི་ས་གནས་ཁག་མི་འདྲ་མང་པོར་ཡོད་པའི་ངོས་ཀྱི་ཆོས་གྲོགས་ཕོ་མོ་རྣམས་དང་འཕྲད་པ་ཧ་ཅང་ས་དགའ་བོ་བྱུང་། ངས་ཀྱང་ཆོས་བཤད་དང་། འདོན་པ། གཞན་རབ་གནས་སོགས་ཁོ་རང་ཚོའི་འདོད་པ་ལྟར་དཀའ་ཚེགས་དང་ངལ་དུབ་གང་ལའང་མ་འཛེམས་པར་རང་ནུས་གང་ཤེས་བྱེད་ཁུལ་བྱས། མང་པོ་ཞིག་ནས་དུས་ཡུན་བདུན་ཕྲག་གསུམ་དེ་ཐུང་དྲགས་པའི་བསམ་འཆར་འདོན་མཁན་ཡང་འདུག ཁ་སང་རྒྱལ་ས་ཀོ་ལ་ལམ་བུར་ཡོད་པའི་རྙིང་མའི་ཀློང་ཆེན་སྙིང་ཐིག་ཆོས་ཚོགས་ལ་ཆེར་བཅར་བྱས། ངོས་ཀྱི་ཆོས་གྲོགས་སྤྲུལ་སྐུ་བཀྲ་ཤིས་བསོད་ནམས་བོད་ལ་ཕེབས་ནས་མ་བཞུགས་པ་ཁེལ་འདུག ཁོང་གི་སློབ་མ་རྣམས་ནི་ངོས་ཀྱི་ཆོས་གྲོགས་རྙིང་ཤོས་དེ་ཡིན་སྟབས་ཕན་ཚུན་ཐུག་འཕྲད་བྱུང་བ་ཧ་ཅང་ནས་དགའ་བོ་བྱུང་། གཟའ་ཟླ་བའི་ཉིན་མོར་ཀློང་ཆེན་སྙིང་ཐིག་ཆོས་ཚོགས་སུ་དབྱིན་ཇི་གོབ་ཏོ་དེ་སྐྱོན་ནས་ཆོས་བཤད་འདི་འདྲ་བྱས། 
"བཀའ་བསྒོ་ངོ་མ་དེ་མི་ཚེ་ཧྲིལ་པོར་གཞན་ལ་སྐྱབས་སུ་མ་བཅོལ་བར་རང་མགོ་རང་གིས་ཐོན་པར་བྱེད་རྒྱུ་དེ་གལ་ཆེན་པོ་ཡིན། སངས་རྒྱས་ཀྱིས་ཀྱང་། བདག་ཉིད་བདག་གི་མགོན་ཡིན། ཅེས་གསུངས་པ་འདིར་གོ་རྒྱུ་ཆེན་པོ་ཡོད། ཆོས་བྱེད་ཟེར་དུས་ཁ་འདོན་སྨོན་ལམ་གཅིག་པུའི་སེམས་ནང་གི་ཉོན་མོངས་སེལ་བར་ཕན་ཐོག་དཀའ་ལས་ཁག་པོ་རེད། དེ་ལས་རང་སེམས་བསྒྱུར་བཅོས་གཏང་ནས་སེམས་ཀྱི་ཐོག་ནས་སངས་རྒྱས་རྙེད་པའི་ཐབས་ཤེས་བྱས་ན་ཡག་པོ་རེད། དེ་འདྲ་ཡོང་དགོས་ན་ངེས་པར་ཅན་གྱི་སྒོམ་རྒྱག་དགོས། སྒོམ་རྒྱག་ཟེར་དུས་ཞལ་ཕྱག་གིས་མཚན་པའི་ལྷ་འཇིགས་སུ་རུང་བ་ཞིག་སྒོམ་མི་དགོས། རང་གི་སེམས་ཀྱི་ངོ་བོ་འདི་སྐྱོང་ནས་གང་ལྟར་གླང་ཆེན་སྨྱོན་པ་ལྟ་བུའི་སེམས་འདི་བདག་པོ་རྒྱག་དགོས།" 
ཞེས་བཤད་ནས་ཁོ་རང་ཚོའི་འདོད་པ་ལྟར་རབ་གནས་དང་བཀའ་བསྒོ་སོགས་ཀྱང་བྱས་པས་མི་མང་དགའ་བོ་བྱས་སོང་། ཕྱི་ཉིན་མཚན་མོ་ཆུ་ཚོད་བཞི་པའི་སྐབས་སུ་ཆོས་ཚོགས་ཀྱི་འགན་འཛིན་སྐྱེད་དམན་ཞིག་དང་། ཆོས་ཚོགས་ཀྱི་བླ་མ་ནམ་མཁའ་གཉིས་ནས་གནམ་ཐང་དུ་སྐྱེལ་མ་བྱས་སོང་། ངས་ཀྱང་ད་རེས་མ་ལེ་ཤའི་འགྲུལ་བཞུད་འདིའི་སྐབས་སུ་ཚུར་བསུ་ཕར་བསྐྱལ་སོགས་སྣེ་ལེན་ཟབ་རྒྱས་གནང་མཁན་ཆོས་གྲོགས་ཕོ་མོ་ཚང་མ་ལ་ཐུགས་རྗེ་ཆེ་ཞུ་འདོད་བྱུང་། མ་ལེ་ཤའི་གནམ་ཐང་ནས་ཀོའུ་རི་ཡའི་གནང་ཐང་བརྒྱུད་ནས་ཀི་ལི་ཧྥོ་ཉའི་གནམ་ཐང་བར་དུ་ཆུ་ཚོད་ཉེར་གསུམ་ཏག་ཏག་འགོར་སོང་། ཀི་ལི་ཧྥོ་ཉའི་གནམ་ཐང་ནས་ཨ་མ་སུས་སིན་དང་སློབ་མ་སི་ཀབ་གཉིས་ནས་ལག་ཁ་གཏག་གིས་སྒུག་འདུག ཨ་མ་སུས་སིན་ཧ་ཅང་དགའ་བོ་བྱུང་འདུག ངེད་གསུམ་ཁ་བརྡ་བྱེད་བཞིན་ཆོས་ཚོགས་སུ་དགུང་མོ་ཆུ་ཚོད་གཉིས་པའི་སྐབས་སུ་གཞི་ནས་བདེ་བྱོར་སོང་། 

Sunday, November 15, 2015

མ་ལེ་ཤཱ་རུ་སོང་བའི་ཉིན་མོ།

གནམ་ཐང་ནས་བླངས་པའི་པར། 
ད་ནངས་ཞོགས་པ་སྔ་བོར་ལངས་ནས་ཆོས་ཚོགས་འགན་འཛིན་ཧ་སྒྲེའུ་དང་ལྷན་གནམ་ཐང་ལ་སོང་། རླང་འཁོར་ནང་ནས་དེ་རིང་ཁ་འདོན་ཕལ་ཆེར་གྲུབ་པར་བྱས། དེ་རིང་ནི་གནས་སྐབས་བདུན་གསུམ་རིང་ཡུན་རིང་མ་འཕྲད་པའི་མ་ལེ་ཤཱ་དང་སེངྒ་པུར་སོགས་ལ་ཡོད་པའི་ཆོས་གྲོགས་ཕོ་མོ་རྣམས་ལ་ཐུག་འཕྲད་ལ་འགྲོ་རྒྱུ་དེ་ཡིན། སྤྱིར་གཏང་ནི་གཞན་དབང་སྟབས་སྟུན་གཡར་པོའི་རྒྱལ་ཁབ་གང་དུ་བསྡད་ཀྱང་ཕྱི་སྐྱོད་ལག་ཁྱེར་དང་། རྒྱལ་ཁབ་རྩ་ཁྲིམས་སོགས་ཀྱིས་རང་གང་འདོད་དུ་འགྲོ་མི་ཆོག་པ་ནི་ཆོས་ཉིད་ཞིག་རེད། ལྷག་པར་ཨ་རིའི་རྒྱལ་ཁབ་འདི་ནི་ཁྲིམས་ཀྱི་དབང་བསྒྱུར་གྱི་རྒྱལ་ཁབ་ཞིག་ཡིན་སྟབས་སྐབས་རེེར་ང་ལྟ་བུ་རང་སྣང་གང་དྲན་ངན་པ་ལངས་ཤོར་དུ་སོང་བའི་འཁྱར་བོ་རྣམས་ལ་མི་རྒོད་འདུལ་སའི་ཁྲིམས་རའི་དཔེ་ལྟར་མི་ཚེའི་འཚོ་བ་གསར་པ་ཞིག་ཀྱང་སྣང་གི་འདུག
ང་ནི་གང་དུ་སོང་གང་དུ་བསྡད་ཀྱང་བརྗེད་ངས་ཆེ་བའི་མི་ཞིག་ཡིན་སྟབས་ཆེ་ས་ནས་སྒོར་ཁུག་དང་འཛོ་ལ། ཆུང་ས་ནས་མགོ་ཞྭ་རྐང་ལྷམ་ཚུན་ཆད་བོར་རླག་ཤོར་བ་ནི་ཉུང་ཉུང་ཞིག་གཏན་ནས་མིན། ལོ་གཉིས་ཡར་སྔོན་ད་ལྟའི་ནང་བཞིན་མ་ལེ་ཤཱ་རུ་འགྲུལ་བཞུད་སྐབས་སུ་ཉི་ཧོང་གནམ་ཐང་ནས་ཨ་སྒོར་སུམ་བརྒྱ་ལྷག་ཡོད་པའི་སྒོར་ཁུག་ཞིག་དང་། མཉམ་དུ་དངུལ་ཁང་འཛིན་བྱང་། ཨ་རིའི་མི་མང་ཐོབ་ཐང་དཔང་ཡིག་དང་མ་ཟད་ལག་འཛིན་ཁ་པར་བཅས་ཡོད་ཚད་བོར་རླག་བྱུང་། 

ད་རེས་དེ་འདྲ་མི་འབྱུང་བའི་སྨོན་ལམ་དང་བན་རྒན་ངས་ཀྱང་རིག་པ་གྲུང་ཙམ་བྱེད་ནས་འགྲོ་རྒྱུ་ཡིན། 

Sunday, November 1, 2015

བླ་མ་དབང་འདུས་ཆོས་ཚོགས་སུ་ཕེབས་པའི་ཉིན་མོ།

Add caption
ཉམས་ལེན་བྱིན་རླབས་དང་ལྡན་པའི་བླ་མ་དབང་འདུས་རིན་པོ་ཆེ་སྔ་ནས་གདན་འདྲེན་ཞུས་པ་ལྟར་སྤྱི་ཟླ་བཅུ་པའི་སྤྱི་ཚེས་ཉེར་དགུ་ཉིན་དགུང་མོ་ཆུ་ཚོད་གསུམ་པའི་སྐབས་སུ་ཁོང་གི་ཚ་མོ་བདེ་ཆེན་དང་། ང་ཡི་ཆོས་གྲོགས་གཉའ་ནང་བ་ཤེས་རབ་སྐལ་ལྡན་བཅས་དཔོན་སློབ་གསུམ་ཆོས་ཚོགས་སུ་ཕེབས། བླ་མ་འདི་དང་ངོས་ཀྱི་སྐྱེ་ཡུལ་སོགས་གང་སྤྱིར་ཐ་དད་ཡིན་ཀྱང་ཨ་རིའི་པོར་ལེན་ཌི་ལ་ཡོད་པའི་ངོས་ཀྱི་ཆོས་གྲོགས་བོད་པ་འགའ་ཡི་བརྒྱུད་ནས་བླ་མ་འདི་ཡི་ལོ་རྒྱུས་གོ་རྒྱུ་མང་དྲགས་པས་མཇལ་འདོད་ཆེ་བ་དང་མ་ཟད་ཉམས་ལེན་གྱི་ཐོག་ནས་ཆོས་གཏམ་འགའ་བྱེད་བསམ་ནས་སྐོམ་པ་ཆུ་འདོད་ལྟར་དུ་གྱུར་ཀྱང་། ཕྱི་ནང་གི་ཆ་རྐྱེན་སོགས་མ་འགྲིག་པའི་དབང་གིས་ད་བར་རིམ་ལུས་སུ་གྱུར་ནས་དེ་རིང་གཞི་ནས་གདན་འདྲེན་ཐུབ་ཙམ་བྱུང་། འོན་ཀྱང་སྟབས་མ་ལེགས་པ་ཞིག་ལ་ཆོས་ཀྱི་དྲི་བ་དྲིས་ལན་དེ་ཕར་ཞོག་ཕལ་སྐད་ལའང་བླ་མ་འདིའི་སྟོད་སྐད་གྱོང་པོ་དེ་གོ་བ་ལ་ཧ་ཅང་དཀའ་ལས་ཁག་པོ་འདུག 
གང་ལྟར་ཉིན་དང་པོར་གཏོར་མ་བཅས་ཤིང་ཉིན་གཉིས་པར་ཛམ་དཀར་ཡིད་བཞིན་ནོར་བུའི་སྒོ་ནས་གཡང་སྒྲུབ་གནང་། ཉིན་གསུམ་པར་བཅོད་ཡུལ་མཁའ་འགྲོའི་གད་རྒྱངས་ཀྱི་སྒོ་ནས་ས་འདུལ་དང་བྱིན་འབེབས་སོགས་གནང་། ཉིན་གསུམ་པར་ཡང་སྐྱར་ནད་པ་འགའ་ཡི་ཆེད་དུ་བཅོད་དང་མི་མང་ལ་བཀའ་བསྒོ་དང་བྱིན་རླབས་སོགས་བྱས། དེ་རིང་ཉིན་རྒྱབ་བླ་མ་རིན་པོ་ཆེ་ཆུ་ཚོད་གསུམ་ཙམ་གྱི་སར་ཡོད་པའི་བལ་ཡུལ་ཤར་པ་མི་ཚང་ཞིག་ནང་དུ་ཕེབས་སོང་། 
སྤྱིར་རྟེན་འབྲེལ་མ་འགྲིག་རང་འགྲིག་ཞེས་པའི་དཔེ་ལྟར་ཁ་སང་བཅོད་གཏང་བའི་ཉིན་མོ་ཨ་རིའི་འདྲེ་ཡི་དུས་ཆེན་ལ་ཁེལ་འདུག་སྟབས་སེམས་ལ་སྤྲོ་སྣང་གསར་པ་ཞིག་སྤྲད་བྱུང་། ང་ནི་ནམ་རྒྱུན་བོད་ཀྱི་བླ་རྒན་མིང་དང་སྐད་གྲགས་མེད་པར་གྲྭ་རྐྱང་དཀྱུས་མའི་ཚུལ་དུ་བློ་ཕུག་ཆོས་ལ་གཏད་ནས་རྟོགས་པའི་བསྟན་པའི་བདག་པོ་འདི་རྣམས་ལ་ཧ་ཅང་ནས་དགའ་དད་ཆེ། དེ་རིང་གི་བླ་རྒན་འདི་ལ་ལྟོས་ན་སྒྲུབ་བརྒྱུད་ཤིང་རྟ་བརྒྱད་ཀྱི་ནང་གསེས་ཞི་བྱེད་ཀྱི་བསྟན་པའི་བདག་པོ་ངོ་མ་ཞིག་རེད་འདུག རྡ་ས་གཙོར་བྱས་པའི་ཐ་ན་གཞིས་གྲོང་རྒན་མོའི་ངག་རྒྱུན་ཚུན་ཆད་ལ་བོད་ཀྱི་སྤྱི་ཚོགས་ནང་དུ་རིག་གཞུང་སྲུང་སྐྱོབ་ཞེས་མཐོ་དམན་ཀུན་གྱི་ཁ་ནང་དུ་འཇག་བསྡད་ཡོད། སྲུང་སྐྱོབ་བྱེད་ཟེར་དུས་མང་པོ་ཞིག་ནས་ལུང་པ་སོ་སོའི་ཕོ་ཆས་མོ་ཆས་གྱོན་ནས་གཞས་དང་ཞབས་བྲོ་འཁྲབ་ཤེས་པ་ཙམ་དང་། ཐ་ན་ཕྱི་སྡོད་ལུང་པར་གནས་མཁན་བོད་རིགས་སྤྱི་མཐུན་ཚོགས་པ་རྣམས་ཀྱིས་བོད་པའི་ཕྲུ་གུ་རྣམས་ལ་གཟའ་ཉི་མར་བོད་སྐད་བོད་ཡིག་ཐར་ཐོར་བསླབ་པ་ཙམ་ལ་དོན་ངོ་མའི་རིག་གཞུང་སྲུང་སྐྱོབ་ཡིད་སྙམ་བྱེད་ཀྱང་། དོན་ངོ་མའི་རིག་གཞུང་སྲུང་སྐྱོབ་ཞིག་དགོས་ན་དེ་རིང་འདིར་དགུང་གྲངས་བརྒྱད་བཅུར་ཕེབས་པའི་བླ་རྒན་འདི་ལྟ་བུའི་རྒྱུད་ལ་ཡོད་པའི་ཞི་བྱེད་བཅོད་ཀྱི་བསྟན་པ་འདི་དང་འདྲ་བ་བོད་ཀྱི་ཕ་ཆོས་ཐུན་མོང་མ་ཡིན་པ་བཤད་རྒྱུན་འདེགས་པའི་བཀའ་ཆེན་བཅུ་དང་། སྒྲུབ་བརྒྱུད་ཤིང་རྟ་བརྒྱད་ཀྱི་ལུང་རྟོགས་ཀྱི་འཆད་ཉན་རྣམས་ལ་ཁའི་ཉི་མ་ལྟར་གྱུར་པའི་སྐབས་སུ་དོན་གཉེར་ཅན་རྣམས་ནས་དབང་ཁྲིད་ལུང་གསུམ་མ་ཉམས་པར་ཞུ་ཞིང་བདག་པོ་རྒྱབ་ནས་འཛིན་སྐྱོང་བྱེད་ཐུབ་ན་རིག་གཞུང་ངོ་མའི་སྲུང་སྐྱོབ་དེ་རེད་བསམ། 


Thursday, October 8, 2015

ཨ་རིའི་མངའ་སྡེ་པོར་ལེན་ཌི་ནང་དུ་བདེ་ཆེན་ཞིང་སྒྲུབ་ཆེན་མོ།།


འདི་ཟླའི་སྤྱི་ཚེས་གཉིས་ནས་ཨ་རིའི་ནུབ་བྱང་པོར་ལེན་ཌིའི་བོད་རིགས་ཚོགས་པ་རྣམས་ཀྱི་གོ་སྒྲིག་ལྟར་བདེ་ཆེན་ཞིང་སྒྲུབ་ཆེན་མོའི་ཆེད་དུ་ཡོང་། ཞོགས་པ་བསྙེན་གནས་ཡན་ལག་བརྒྱད་ཀྱི་སྡོམ་པ་མཉམ་དུ་ཞུ་ཞིང་དགོང་བཅད་དང་དམར་ཟས་སྤངས་བ་སོགས་ལུགས་སྲོལ་ཚུལ་མཐུན་གྱིས་སྒྲུབས་ཀྱི་ཡོད། འདི་ལོའི་ཞིང་སྒྲུབ་ཆེན་མོ་ནི་ཐེངས་མ་བརྒྱད་པ་དེ་ཡིན། ཐེངས་མ་དང་པོ་ཉིས་སྟོང་བརྒྱད་ལོར་འགོ་འཛུགས་བྱས་ཤིང་ད་བར་ལོ་སྟར་ཆག་མེད་དུ་འཚོགས། དེ་སྔ་ཕན་ཆོད་སྔ་དྲོ་ཞིང་སྒྲུབ་འཚོགས་ཤིང་སྒོམ་བྱེད་པ་དང་། ཕྱི་དྲོ་ཆོས་ཁྲིད་གང་རུང་ཞིག་གི་ཐོག་ནས་དཔེ་ཁྲིད་བྱེད་ཀྱི་ཡོད། ད་ལོའི་ཆོས་ཁྲིད་དུ་ཕ་དམ་པ་སངས་རྒྱས་ཀྱིས་མཛད་པའི་ཞལ་གདམས་དིང་རི་བརྒྱ་རྩ་མ་དང་། སྐྱོབ་པ་འཇིག་རྟེན་གསུམ་མགོན་གྱིས་མཛད་པའི་ཕྱག་ཆེན་ལྔ་ལྡན་རྟོགས་པའི་མགུར་དང་། མཉམ་མེད་དྭགས་པོས་མཛད་པའི་ཕྱག་རྒྱ་ཆེན་པོའི་ལམ་ཆིག་ཆོད་ཀྱི་མན་ངག་བཅས་ཀྱི་དཔེ་ཁྲིད་ཞུས། པོར་ལེན་ཌི་བོད་རིགས་འདི་རྣམས་ནི་ཆོལ་ཁ་དང་ཆོས་ལུགས་ཀྱི་འཐེན་ཁྱེར་ཉུང་ཞིང་། བོད་རིགས་ནང་ཕན་ཚུན་མཐུན་ལམ་ཟབ། ཆོས་དང་བླ་མར་གུས་བཀུར་ཆེ་བ་མ་ཟད་ང་ལའང་ར་གན་གསེར་རློན་གྱི་འདུ་ཤེས་ཟབ། ངས་ཀྱང་བདེ་ཆེན་ཞིང་སྒྲུབ་ཆེན་མོའི་སྐབས་སུ་འཚོགས་པའི་དབུ་མཛད་དང་ཆོས་བཤད་ཀྱི་བླ་མ་སོགས་ཚང་མ་རང་ནས་བྱེད་དགོས་ཐུག་ནས་དཀའ་ངལ་ཆེ་ཡང་ཆོས་ཕྱིར་དཀའ་སྤྱད་ཀྱི་བཟོད་པར་བསམ་ནས་སྡུག་རུས་ཆེ་ཙམ་བྱས། ལར་ནི་ཆོས་བཤད་དང་འཚོགས་པའི་སྐབས་སུ་ཡུལ་ལ་ཕན་ཐོག་ཡོད་མེད་ལ་མ་ལྟོས་པར་སྤྱོད་འཇུག་ལས། རང་གི་ཡིད་ལ་སྒོམ་ཕྱིར་ངས་འདི་བརྩམས།། གསུངས་པ་ལྟར་རང་གི་ཡིད་ལ་སྒོམ་པའམ་ཐོག་མར་རང་རྒྱུད་ལ་བརྟག་དཔྱད་བྱེད་ནས་ཡོང་དུས་མི་སྒོ་ནས་རང་སངས་རྒྱས་ཞེས་པའི་དཔེ་ལྟར་གཏན་གཏན་རང་ལ་ཕན་ཐོག་ཧ་ཅང་ཆེན་པོ་འདུག། སྤྱིར་དམ་པའི་ཆོས་ལ་ཐོས་བསམ་སྒོམ་གསུམ་ཁ་ཕྱིར་ལྟས་སུ་མ་སོང་བར་རང་སེམས་འདུལ་བའི་གཉེན་པོ་བླ་ན་མེད་པར་ངོ་འཕྲོད་པ་འདི་ཉིད་ཀྱང་ཐུད་སྣུམ་པ་མར་གྱི་སྐུ་དྲིན་གྱི་དཔེ་ལྟར་དྲིན་ཅན་རྩ་བའི་བླ་མ་རྣམས་ཀྱི་ཐུགས་རྗེའི་བཀའ་དྲིན་ཁོ་ན་ཡིན། 


Wednesday, September 23, 2015

ཐར་རྒྱན་ཆོས་ཁྲིད་བྱས་པའི་ཉིན་མོ།



ལོ་འགའ་ཡི་སྔོན་ནས་ངོས་ཀྱི་དགེ་ཕྲུག་ཁ་ཤས་ཀྱིས་རེ་བ་ལྟར་རེས་གཟའ་ལྷག་པའི་ཉིན་མོ་འདི་ནི་མཉམ་མེད་དྭགས་པོའི་ཐར་རྒྱན་ཆོས་ཁྲིད་བྱས་ནས་དེ་རིང་བདུན་ཕྲག་དྲུག་པ་དེ་ཡིན། བོད་བརྒྱུད་ནང་ཆོས་ལ་ཉམས་ལེན་ཚུལ་བཞིན་བྱེད་མཁན་ཞིག་ཡོད་ན་མཉམ་མེད་དྭགས་པོའི་ཐར་རྒྱན་དང་། རྗེ་རིན་པོ་ཆེའི་ལམ་རིམ་སོགས་ལ་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཞིག་ཏུ་མཐོང་། འདི་ལྟ་བུའི་གཞུང་བཟང་པོ་རེ་ལ་སློབ་སྦྱོང་བྱེད་ཐུབ་ན་ད་གཟོད་བོད་བརྒྱུད་ནང་བསྟན་གྱི་ཆོས་དེ་ལ་ཐུན་མིན་གྱི་བྲོ་བ་ཞིག་མྱོང་ཐུབ། དེ་མ་ཡིན་པར་དེང་སང་བོད་ཀྱི་ལུང་པ་འགའ་རུ་རྒྱ་བླ་དང་དབྱིན་བླ་ཞེས་ཕྱི་རྒྱལ་དང་རྒྱ་ཡི་གྲོང་ཁྱེར་དུ་འདུག་མཁན་གྲྭ་བཙུན་ཞིག་ཡིན་ནས་བཟུང་ལྟས་ངན་བཅོ་བརྒྱད་ཀྱི་གྲངས་སུ་བགྲངས་ནས་མཐའ་གཅིག་ཏུ་སྡོམ་ཉམས་དང་ལྟ་ལོག་ཡིན་པའི་ཁྱབ་མཐའ་འཇོག་པའི་དུས་སྐབས་འདིར་ཡུལ་ལ་ཕན་ཐོག་མིན་ཙམ་མ་ཡིན་པར་ཆོས་དགེ་རང་ཉིད་ཀྱི་ངོས་ནས་ཀུན་སློང་བསམ་པ་རྣམ་དག་གིས་ཆོས་ཀྱི་མུ་གེས་མནར་བའི་དོན་གཉེར་ཅན་འདི་རྣམས་ལ་བྱམས་པ་དང་སྙིང་རྗེ་རྒྱབ་ཏུ་ཁུར། རྒྱུ་འབྲས་དང་དམ་ཚིག་དཔང་དུ་བཙུགས། ངོ་ཚ་དང་ཁྲེལ་གཞུང་ཐོད་དུ་བཅིངས་ནས་རས་ཆོད་དང་གཟུ་ལུམ་གྱི་དབང་དུ་མ་སོང་བར་རང་གང་ཤེས་ཀྱི་ཆོས་མ་མཐར་ཤོ་ལོ་ཀ་རེར་བཤད་པ་ན་བླ་སློབ་གཉིས་ཀའི་བསོད་ནམས་བསགས་པའི་རྒྱུ་རུ་འགྱུར་རོ། རྗེ་རིན་པོ་ཆེའི་ལམ་རིམ་སྨོན་ལམ་ལས། 
བསྟན་པ་རིན་ཆེན་མཆོག་གིས་མ་ཁྱབ་ཅིང་།། 
ཁྱབ་ཀྱང་ཉམས་པར་གྱུར་པའི་ས་ཕྱོགས་དེར།། 
སྙིང་རྗེ་ཆེན་པོས་ཡིད་རབ་བསྐྱོད་བྱས་ནས།། 
ཕན་བདེའི་གཏེར་དེས་གསལ་བར་བྱེད་པར་ཤོག། 
ཅེས་གསུངས་པ་ལྟར་སློབ་ཚོགས་ཁྲི་སྟོང་མང་པོའི་ཁ་ལོ་བསྒྱུར་མ་ཐུབ་ཀྱང་རང་འཁོས་ནུས་ཚོད་གང་ཟག་རེ་ཟུང་གི་རྒྱུད་ལ་དགེ་སེམས་ཉག་མ་རེ་སྐྱེ་ཐུབ་ན་བསམ་ནས་ཨུ་ཚུགས་རྒྱག་བཞིན་ཡོད། ལྷག་པར་དུ་དྭགས་པོའི་ཐར་རྒྱན་འདིའི་ཁྱད་ཆོས་ཐུན་མོང་མ་ཡིན་པ་ནི་རྒྱུ་དང་རྐྱེན་དང་རྟེན་སོགས་ནས་རིམ་བཞིན་རྩ་བའི་ས་བཅད་ཀྱི་འགྲོས་ལྟར་འགྲེལ་བཤད་བྱེད་ཡོང་དུས་སེམས་ལ་འཇུག་པོ་ཞིག་ཡོང་གི་འདུག 
གཞུང་གི་རྩ་བའི་ས་བཅད་ནི། 
རྒྱུ་ནི་བདེ་གཤེགས་སྙིང་པོ་ཡིན།། 
རྟེན་ནི་མི་ལུས་རིན་ཆེན་ཡིན།། 
རྐྱེན་ནི་དགེ་བའི་བཤེས་གཉེན་ཡིན།། 
ཐབས་ནི་དེ་ཡི་གདམས་ངག་མཆོག། 
འབྲས་བུ་རྫོགས་སངས་རྒྱས་ཀྱི་སྐུ།། 
ཕྲིན་ལས་རྟོག་མེད་འགྲོ་དོན་མཛད།། 
ཅེས་ཚིག་ཉུང་ལ་དོན་འདུས་པ། དོན་གྱིས་གནད་སྟོན་ཅིང་བྱིན་རླབས་ཆེ་བའི་བཀའ་ཕྱག་ཆུ་བོ་གཉིས་འདྲེས་ཀྱི་གཞུང་བཟང་ཡིད་བཞིན་གྱི་ནོར་བུ་རིན་པོ་ཆེ་འདི་ལྟ་བུ་ཞིག་འཆད་ཁྲིད་བྱེད་རྒྱུའི་གོ་སྐབས་རག་པ་ནི་མི་ལ་ཕན་ཐོག་བྱུང་མིན་ལ་མ་ལྟོས་པར་རང་ངོས་ནས་ཧ་ཅང་བསྐལ་པ་བཟང་པོ་བྱུང་། དེ་རིང་ནི་ས་བཅད་གཉིས་པ། རྟེན་ནི་མི་ལུས་རིན་ཆེན་ཡིན།། ཅེས་པའི་ས་བཅད་གཉིས་པའི་ནང་ནས་འགྲེལ་བཤད་དང་སྦྲག་མཐར་དྲི་བ་དྲིས་ལན་སོགས་ཀྱིས་དེ་རིང་གི་ཆོས་མཚམས་དེ་རེ་ཞིག་གྲུབ་པར་བྱས། ཟུར་བཅར་བ་རྣམས་ལ་བཀའ་བསྒོ་དང་ཁ་བརྡ་སོགས་བྱས་པས་དེ་རིང་གི་ཆོས་ཐུན་དེས་མི་མང་ཧ་ཅང་དགའ་བོ་བྱུང་འདུག།  

Tuesday, September 8, 2015

བཙན་བྱོལ་བའི་སྲིད་སྤྱི་གཉིས་ཀྱི་འོས་མི་ལ་དཔྱད་པ།

དེང་སང་དྲྭ་ཚིགས་དང་ངོ་དེབ་ཆ་འཕྲིན་སོགས་ནས་འུར་བཞིན་པ་དེ་ནི་ཚང་མས་མཁྱེན་གསལ་ལྟར་༢༠༡༦་ལོའི་བཙན་བྱོལ་བོད་མིའི་སྒྲིག་འཛུག་གི་སྲིད་སྤྱི་གཉིས་ཀྱི་འོས་བསྡུ་དེ་རེད། ང་ལ་མཚོན་ན་རྣམ་ཀུན་བོད་བསྟན་སྲིད་གཉིས་ཀར་སེམས་ཁུར་བྱེད་མཁན་ཞིག་ཡིན་པའི་སྟབས་ཀྱིས་ཕ་ཡུལ་གཅིག་པའི་གྲོགས་པོ་འགའ་ཡིས་ད་རེས་མདོ་སྟོད་སྤྱི་འཐུས་སམ་ཡང་ན་བྱང་ཨ་རིའི་སྤྱི་འཐུས་གང་རུང་ཞིག་ལ་ལངས་དགོས་པའི་རེ་བསྐུལ་བྱེད་མཁན་མི་ཉུང་བ་ཞིག་བྱུང་། ངས་ནི་ང་སྤྱི་འཐུས་ལ་མི་ལངས་བའི་རྒྱུ་མཚན་གསུམ་བཤད། དང་པོ་ནི་ང་འདྲ་བ་མི་འུས་ཐུག་ཞིག་གིས་གཞི་བྱེས་གཉིས་ཀྱི་མདོ་ཁམས་ཆུ་བཞི་སྒང་དྲུག་གི་སྤྱི་འཐུས་བྱེད་མི་ཐུབ། གཉིས་པ། གལ་སྲིད་རྡ་སའི་རི་གཤོང་དུ་ཡོད་པའི་གངས་ཅན་སྐྱིད་གཤོང་སྤྱི་འཐུས་ཀྱི་གྲོས་ཚོགས་རྭ་བའི་ནང་དུ་སོ་སོའི་ངོས་ནས་ལྷག་བསམ་དུང་བས་དཀར་ཞིང་། སེམས་ཤུགས་རི་བོ་ལས་ཆེ་བ་ཞིག་སྤྱི་འཐུས་ཀྱི་མིང་ཁུར་ནས་སོང་ཡང་མཐར་སེམས་ཤུགས་ཆག་ནས་བོད་ཀྱི་རྩ་དོན་ལ་ཕན་པའི་ལས་ཀ་གང་ཡང་མི་འགྲུབ། གསུམ་པ། ༧གོང་ས་མཆོག་ནས་རྟག་པར་བཀའ་སློབ་ལྟར་སོ་སོ་གང་དུ་སོང་ཡང་ཆོས་སྲིད་གཉིས་ཀའི་ཐད་ནས་འཐུས་ཤོར་མ་སོང་བར་བོད་མིའི་འཐུས་ཚབ་ངོ་མ་དེ་བོད་མི་ཚང་མས་བྱེད་དགོས་གསུངས་པ་དེ་སེམས་ལ་བཞག་ནས་དེ་སྔ་ཕན་ཆོད་ལུགས་གཉིས་གང་གི་ཐད་ནས་ཡིན་ཀྱང་རང་འཁོས་ནུས་ཚོད་དང་བསྟུན་གང་དྲག་བྱེད་བཞིན་པ་ལགས་པས་དེ་བས་གལ་ཆེ་བ་ཞིག་མ་མཐོང་། 
ལར་ནི་དེང་སང་དྲྭ་ལམ་ཁག་ནས་ཉིན་ལྟར་མཐོང་བཞིན་པ་ནི་བཙན་བྱོལ་བོད་མིའི་སྒྲིག་འཛུག་ཁག་གི་སྲིད་སྐྱོང་དང་སྤྱི་འཐུས་ཀྱི་སོགས་ཀྱི་སྐོར་རེད། བཙན་བྱོལ་བོད་མིའི་སྤྱི་ཚོགས་འདི་ལ་ཕྱི་ནས་ལྟས་ན་དམངས་གཙོའི་ཀ་བ་གསུམ་ཞེས་གྲ་འགྲིག་པོ་དང་། འདྲ་ཆགས་མདོག་ཁ་བོ་བཤད་རྒྱུ་ཡོད་ཀྱང་དོན་ངོ་མར་ཆོལ་ཁ་དང་། ཆོས་ལུགས། སྐྱིད་སྡུག ལུང་ཚན་སོགས་མི་མངོན་པའི་ས་འོག་དར་ཐག་གིས་ཆོལ་ཁ་དང་ཆོས་ལུགས་འཐེན་འཁྱེར་འདིས། འདས་པའི་མི་ལོ་དྲུག་བཅུའི་ནས་བོད་རིགས་རྣམས་ཀྱི་ནུས་ཤུགས་ད་དུང་གཅིག་ཏུ་སྒྲིལ་མ་ཐུབ་པའི་སྟབས་ཀྱིས་གཏམ་དཔེར། ནང་བཀྲ་མ་ཤིས་ན་ཕྱི་ནས་དོན་མི་འགྲུབ་ཅེས་པ་ལྟར་དུ་གྱུར་ཡོད། ལྷག་པར་དུ་སྤྱི་འཐུས་གྲོས་ཚོགས་འདིའི་ནང་དུ་ཆོལ་ཁ་དང་ཆོས་ལུགས་ཀྱི་ཞེ་འཁོན་ཅན། སྒེར་འགྲས་སྤྱི་ཐོག་གི་དཀྲུགས་ཤིང་མཁན། ཤེས་ཡོན་དང་མཐོང་རྒྱ་ཁབ་མིག་ལྟར་དོགས་པའི་ཕུང་རྒན་མགོ་སེ་མི་ཉུང་བ་ཞིག་དུས་རབས་རྗེ་བོ་རྗེས་ཀྱང་མི་རབས་རྗེ་མ་ཐུབ་ནས་མི་ཚེ་ཕྱེད་ཀར་སྤྱི་འཐུས་ནང་དུ་གནས་ཡོད། དེ་ནི་དམངས་གཙོའི་ཐོབ་ཐང་འཕྲོག་པའི་ཇག་པ་དང་། ཡར་རྒྱས་ཀྱི་ལམ་ཁའི་བཀག་རྡོ་ཞིག་ཀྱང་ཡིན།
 དེང་སང་གོ་བཞིན་པ་ཞིག་ལ་སྲིད་སྐྱོང་འོས་མི་སྤྱི་འཐུས་ཚོགས་གཙོ་སྤེན་པ་ཚེ་རིང་ལའང་མངའ་རིས་ཕུད་པའི་དབུས་གཙང་ཆོལ་ཁས་དཔུང་སྒྲིག་ནས་རྒྱབ་རྩ་བྱེད་སྟངས་འདིར་དཔྱད་ན་སྐྱབས་བཅོལ་བའི་ཆོལ་ཁའི་ནང་གི་ཁ་གཏད་དུ་བླུགས་པ་ལས་ཕ་བསད་ཀྱི་ཤན་པ་ལག་དམར་རྒྱ་ནག་དམར་པོའི་གཞུང་ལ་ཁ་གཏད་དུ་ལང་མཁན་སྲིད་སྤྱི་རེ་ཨི་ཡོད་ན་བསམ་པའི་དྲི་བ་ཞིག་རང་བཞིན་གྱིས་སླེབས་སོང་། ངས་སྤྱི་འཐུས་ཚོགས་གཙོ་ཆོལ་ཁའི་འཐེན་མཁན་ཞིག་དང་མི་མ་རབས་ཞིག་རེད་གཏན་ནས་ཟེར་བ་མིན། མང་ཚོགས་ནས་རང་གི་དམངས་གཙོའི་ཐོབ་ཐང་བེད་སྤྱོད་བྱེད་མ་ཐུབ་པར་མི་ངན་རེ་ཟུང་གིས་ཟིན་པའི་ཆོལ་ཁ་དང་ལུང་ཚན་སོགས་ཀྱི་རྗེས་སུ་རི་བོང་ཅལ་འདྲོག་གིས་འོས་ཤོག་བླུགས་སྟངས་འདི་བསམ་ནས་ཡིན། ལར་ནི་ཆོལ་ཁ་ལུང་ཚན་སྐྱིད་སྡུག་སོགས་ཀྱིས་འོས་མི་བཏོན་ནས་འོས་གཞིའི་དྲིལ་སྒྲག་བྱེད་སྟངས་འདི་ལ་ངས་ནི་དམངས་གཙོའི་འགྲོ་སྟངས་ཚད་ལྡན་ཞིག་ལ་སྔ་མོ་ནས་ངོས་འཛིན་བྱེད་མྱོང་མེད། རང་རེའི་བོད་པའི་སྤྱི་ཚོགས་འདི་ནི་བཙན་རྒྱལ་རིང་ལུགས། སྤྱི་ཚོགས་རིང་ལུགས། མ་རྩ་རིང་ལུགས་སོགས་གང་ལའང་མ་ཐེ་བར་བླུན་པོ་ཆུ་སྣ་གར་ཁྲིད་ཀྱི་དཔེ་ལྟར་བཙན་བྱོལ་བོད་རིགས་འདི་རྣམས་ནི་གཞན་དབང་མགོ་འདོགས་རིང་ལུགས་སམ་ཆོལ་ཁ་དང་ལུང་ཚན་གང་རུང་ཞིག་གི་ཞབས་སུ་མནན་ཡོད། ཆོལ་ཁ་དང་ལུང་ཚན་གྱི་འཐེན་ཁྱེར་བཅོས་མེད་ཀྱི་ནད་ངན་དེ་ནི་མི་དྲག་དང་དཔོན་པོའི་མི་ཚང་འགའ་ཡིས་སྒེར་གྱི་འཁོན་འགྲས་སྤྱི་ཐོག་ཏུ་སླེབས་པའི་རྙོག་དྲ་ཞིག་ཡིན་ཀྱང་ཕལ་མོ་ཆེའི་དེའི་གནད་དོན་ཧ་མ་གོ་ནས་དེང་སང་གཞོན་སྐྱེས་སྐྱ་སེར་མང་པོ་ཞིག་གིས་མཁས་མདོག་དང་འཇོན་མདོག་གིས་རི་བོང་བཅལ་འདྲོགས་ཀྱི་དཔེ་ལྟར་ཐ་ན་སྤྱི་འཐུས་གྲོས་ཚོགས་ནང་ཚུན་ཆད་ལ་རྙོག་དྲ་དེ་སླེབས་ཡོད། ལོ་རབས་དྲུག་བཅུ་དང་བདུན་བཅུའི་བཙན་བྱོལ་བོད་མིའི་ནང་མངའ་བདག་དང་མི་ཚང་དབང་ཆེན་འགའ་ཡི་སྒེར་གྱི་འཁོན་འགྲས་དེ་ཆོལ་ཁའི་ཐོག་ཏུ་སླེབས་ནས་སྐྱབས་བཅོལ་བོད་མིའི་ཁྲོད་དུ་དཀའ་ངལ་དེ་གཏམ་དཔེར། བ་མ་ཤིའི་བར་དུ་གཉང་བའི་རྒྱུན་ད་དུང་ཡང་ཆད་ཐུབ་མེད་པ་དེ་ནི་ཉེ་བའི་ཆར་སྲིད་སྐྱོང་གི་འོས་མིར་ལང་མཁན་ལ་དྭགས་བྱང་ཐང་དུ་ལུག་རྫི་མི་ལོ་བཅུ་དྲུག་དང་དམག་མིར་ལོ་བཅུ་བཞིའི་རིང་བྱས་པའི་བཀྲ་ཤིས་སྟོབས་རྒྱལ་མིང་ཅན་གྱིས་འདི་ལྟར་ཟེར།
ང་སྲིད་སྐྱོང་ལ་ལང་དགོས་དོན་ནི་དབུས་གཙང་མི་འབོར་ཆེན་པོ་དེ་ལ་སྲིད་སྐྱོང་ལ་ལང་མཁན་མི་འདུག་ཟེར། ད་རེས་ང་རྟེན་འབྲེལ་མ་འཆུགས་ཙམ་དབུས་གཙང་ནས་མི་གཅིག་ཡོད་ཟེར་བའི་བརྡ་ལན་ཙམ་ཡིན།
སྲིད་སྐྱོང་ལ་གཞེངས་མཁན་ཁོང་གི་ཚིག་འདི་ལ་དཔྱད་ན་བཙན་བྱོལ་བོད་མིའི་སྒྲིག་འཛུག་རི་བོང་ཁ་ཤྭའི་ཆོལ་ཁའི་འཐེན་ཁྱེར་ལྟས་ངན་གྱི་རྔ་མ་ཐུང་ཐུང་དེ་ད་དུང་ཡང་བཅད་འདོད་གཏན་ནས་མེད་པ་ཞིག་ཏུ་ཟུར་ལྟས་ལེབ་མཐོང་གིས་གོ་ཐུབ། དེ་ལས་ལྡོག་སྟེ་ད་རེས་མདོ་སྟོད་དབུས་ཆུ་སྒང་ནས་གསལ་སྒྲག་ཞིག་ལ་འདི་ལྟར་མཐོང་། 
ད་ལོར་མདོ་སྟོད་དབུས་ས་གང་ནས་ཀྱང་མདོ་སྟོད་པའི་མི་སུ་གང་ལ་ཡང་སྲིད་སྤྱི་གཉིས་ཀྱི་འོས་མིར་ཁྱབ་སྒྲག་བྱེད་ཀྱི་མིན། རྒྱུ་མཚན་གང་ཡིན་ཟེར་ན་མདོ་སྟོད་མི་མང་གི་དམངས་གཙོའི་ཐོབ་ཐང་རྡོག་རོལ་གཏོང་འདོད་མེད། 
ཅེས་པའི་གསར་འགོད་གསལ་སྒྲག་དེ་མཐོང་དུས་ད་རེས་ཨ་རོགས་ཁམས་པ་པདྨ་བདེ་ལེགས་ཀྱིས་རྒྱུ་མཚན་ལྡན་པའི་ཚིག་འདིས་ང་ཡི་གདོང་ལ་སྔ་ན་མེད་པའི་འཛུམ་མདངས་དང་། སེམས་ལ་སྤྲོ་སྣང་དྲོད་མོ་ཞིག་འཁོར་བཅུག་སོང་། བོད་ཀྱི་བདེན་དོན་ལ་རྒྱར་བཟུང་ཞིང་དགྲ་བོ་རྒྱ་དམར་ལ་འཐབ་རྩོད་ཀྱི་ཆེད་དུ་རང་བཙན་དང་དབུ་མ་སོགས་ཐབས་ལམ་དམིགས་ཡུལ་མ་འདྲ་བའི་ཐོག་ནས་སྲིད་སྐྱོང་དང་སྤྱི་འཐུས་སུ་ལངས་ན་མ་འགྲིག་པ་གང་ཡང་མེད། འོན་ཀྱང་གཏམ་དཔེར། རྟེན་འབྲེལ་འཆུགས་ཁར་དྲིལ་བུའི་ཆག་སྐད་ཞེས་པའི་གནའ་དཔེ་ལྟར་མཐོ་༧གོང་ས་སྐྱབས་མགོན་ཡིད་བཞིན་ནོར་བུ་ནས་། དམའ་རྡ་སའི་གསང་ལམ་ཁྲོད་ཀྱི་ལ་ཕུག་གཙོང་མཁན་ཚུན་སྐྱབས་བཅོལ་བ་ཡོངས་ལ་ཁུངས་གཏུགས་ན་བོད་རིགས་གཅིག་ལའང་འདུག་སའི་ས་ཆ་ལག་མཐིལ་ཙམ་དང་། འགྲོ་སའི་ལམ་རྟ་རྔ་ཙམ་ཞིག་བདག་དབང་མེད་པ་ཆབ་སྲིད་པའི་སྐྱབས་བཅོལ་བ་ཞིག་ནས་ཆོལ་ཁའི་རྩོད་རྙོག་འདི་ནི་བུ་མ་སྐྱེས་གོང་ནས་མིང་ལ་རྩོད་པ་རྒྱབ་པ་ལྟར་དེ་ནི་བོད་རིགས་སྐྱབས་བཅོལ་བོད་མིའི་ཞབས་འདྲེན་ལ་དེ་བས་ཆེ་བ་ཞིག་མ་མཐོང་།  

ཐ་མར་ངས་རེ་ཞུས་ཞིག་ལ། ད་རེས་བོད་རིགས་སྐྱབས་བཅོལ་བ་རྣམས་ནས་ཆོལ་ཁ་དང་ལུང་ཚན་གྱི་འཐེན་ཁྱེར་གཞན་གྱི་གཡོ་འོག་ཏུ་མ་ཚུད་པར་རང་ཉིད་དམངས་གཙོའི་ཐོབ་ཐང་གི་ཁེ་དབང་ལོངས་སུ་སྤྱད་ནས་གདམས་རྒྱུ་ཡོད་ན་མ་ནོར་བ་དགོས་ཞེས་པའི་དཔེ་ལྟར་དུ་སྲིད་སྤྱི་གཉིས་ཀྱི་འོས་དེ་རིག་པ་གྲུང་པོའི་ངང་ནས་མ་བླུགས་ན་གཏམ་དཔེར། ཤིག་ལ་ཁོང་ཁྲོ་ཟ་ནས་ར་རྩག་མེ་ལ་རྒྱབ་ཞེས་པའི་དཔེ་ལྟར་ཐ་མའི་གྱོང་རག་ས་ནི་གཞི་བྱེས་གཉིས་སུ་ཡོད་པའི་བོད་ཆོལ་ཁ་གསུམ་ལ་མ་གཏོགས་འགྲོ་ས་མེད། ལར་ནི་ནམ་རྒྱུན་སྐྱབས་བཅོལ་བའི་བོད་རིགས་རྣམས་ཀྱིས་འོས་བླུགས་སྟངས་དང་། ཕྱག་ལས་གནང་སྟངས། འཚོགས་འདུ་འཚོགས་སྟངས་སོགས་ཀྱི་སྐབས་ནས་ཆོལ་ཁ་དང་ཆོས་ལུགས་ཀྱི་འཐེན་ཁྱེར་མེད་པར་གཟབ་གཟབ་མ་བྱས་ན། ནམ་ཞིག་གཞི་བྱེས་བོད་མི་གཉིས་ཀྱི་བར་དུ་འགྱང་ཐག་ཇེ་རིང་ལ་མི་འགྲོ་བའི་ངེས་པ་གཏན་ནས་མེད། དེང་སང་འཛམ་གླིང་ལག་ཐོག་ཏུ་བཟུང་ནས་མཛུབ་སྐོར་བྱེད་པའི་དུས་རབས་སུ་གྱུར་ནས་གླིང་ཕྲན་གཅིག་ནས་བྱས་ཉེས་དང་གནས་ཚུལ་རྣམས་དེ་མ་ཐག་གླིང་ཕྲན་གཞན་ལ་སླེབས་པ་ལ་ནི་སྐར་ཆ་ཁ་ཤས་ལས་མི་དགོས། གཞིས་ལུས་བོད་མི་རྣམས་ཀྱིས་ཀྱང་རྒྱ་ནག་གཞུང་ནས་དྲྭ་རྒྱ་དང་བརྡ་འཕྲིན་བཀག་སྡོམ་ཆེ་མིན་ལ་མ་ལྟོས་པར་ཉིན་མཚན་ཀུན་ཏུ་ང་ཚོའི་ཕྱོགས་ལ་སེམས་དུང་དུང་། རྣ་བ་དཀྲོག་དཀྲོག མིག་གྱེར་གྱེར་བྱས་ནས་ལོ་མང་རིང་རེ་བ་བཙན་བྱོལ་བོད་པ་རྣམས་དང་༧གོང་ས་སྐྱབས་མགོན་ཆེན་པོ་མཆོག་ལ་བཅོལ་ནས་བསྡད་ཡོད། བཙན་བྱོལ་བོད་མིའི་སྒྲིག་འཛུག་གཙོར་བྱས་པའི་ཆོལ་གསུམ་སྐྱབས་བཅོལ་ལ་གནས་པའི་བོད་རིགས་ཡོངས་ནས་གཞིས་ལུས་བོད་རིགས་སྤུན་ཟླ་རྣམས་ཀྱི་དཀའ་སྡུག་ལས་བསམ་གཞིག་ནན་པོ་བྱེད་དགོས། གལ་སྲིད་གཞིས་ལུས་སྤུན་ཟླ་རྣམས་ལ་ཕན་མ་ཐོག་ཀྱང་སེམས་ཕམ་དུ་འཇུག་ན་དེ་ལས་ཐབས་སྡུག་པ་ཞིག་མེད། བསམ་བློ་ཞིབ་ཏུ་མ་གཏང་ན་སྲིད་སྐྱོང་གཅིག་གི་ལོ་ཚད་མི་ལོ་ཧྲིལ་པོ་ལྔ་ཐམས་པ་ཡིན། སྲིད་སྐྱོང་རྗེས་མའི་སྐབས་སུ་༧གོང་ས་མཆོག་དགུང་གྲངས་བརྒྱད་བཅུ་གྱ་ལྔར་སླེབས་ཚར་ཡོད། ལོ་རྒན་གྱ་ལྔར་སླེབས་པའི་མི་རྒན་ཞིག་གི་ཚེ་ཚད་དང་། དབང་ཤུགས་སོགས་ཅི་ཡོད་ནི་ཚང་མས་མཐོང་གསལ་ལྟར་ལགས་པས་ད་རེས་མ་ཡོ་མ་འཆུགས་པར་གཞིས་ལུས་བོད་རིགས་སྤུན་ཟླ་ཤི་གསོན་མང་པོའི་ཁ་ཆེམས་དང་རེ་སྒུག་ལ་བསམ་ནས་གསེར་བས་ལྷག་པའི་ད་ལྟའི་དུས་ཚོད་འདི་བོད་རིགས་ཡོངས་ནས་གཅེས་སྤྲས་བྱེད་ནས་འོས་ཤོག་བླུགས་དགོས། 

ཕྱོགས་ཞེན་ཆོལ་ཁས་མྱོས་པའི་དུག་མདའ་མིན།། 
ཆོས་ལུགས་འཁོན་དུ་འཛིན་པའི་འབར་རྫས་མིན།།
བསྟན་སྲིད་དམར་པོའི་རླུང་གིས་ཁྱེར་བའི་དུས།།
མ་བཟོད་བོད་རིགས་ཡོངས་ལ་སྙིང་གཏམ་ཡིན།། 

ལས་མེད་དཀྲུགས་ཤིང་མཁན་གྱི་དྲྭ་འབུ་མིན།། 

རྒྱལ་འཚོང་དངུལ་རྗེས་འབྲངས་བའི་སོ་ཉུལ་མིན།། 
ཆོལ་ཁའི་རེག་དུག་ཕོག་པའི་ནད་པ་འགར།། 
འཆི་སོས་སྨན་མཆོག་རིན་ཆེན་རིལ་བུ་ཡིན།། 

Wednesday, August 5, 2015

རྩ་བའི་བླ་མ་རྣམ་གཉིས་རྨི་ལམ་དུ་མཇལ་བའི་ཉིན་མོ།

ཁར་ནུབ་གཟའ་ཟླ་བའི་བདེ་ཆེན་ཞིང་སྒྲུབ་ཚར་བའི་ནུབ་མོར་རྨི་ལམ་ཁྱད་མཚར་ཞིག་གཏང་། ང་ནི་བོད་ཀྱི་ས་ཆ་ཞིག་ཏུ་འདུག་ངའི་རྒྱབ་ཏུ་བོད་བཟོ་བྱས་པའི་(སྒྲོ་བ་) སྒྲོ་བ་ཞེས་པ་ནི་ནང་ཆེན་བའི་ཡུལ་སྐད་ཡིན་དོན་དུ་ཀོ་བས་བཟོས་པའི་སྣོད་ཞིག་ལ་གོ་དགོས། མཆན།  ཞིག་ནང་དུ་བོད་ཟས་འདྲ་མིན་དཔེར་ན། རྩམ་པ་དང་། ཆུར་བ། ཞོ་དང་མར་སོགས་ཁུར་ནས་རི་མགོར་འཛེགས་པ་ཡིན། རི་མགོར་རྫ་སྤང་འདྲེས་མའི་ས་ཆ་སྐྱིད་པོ་ཞིག་གི་སྟེང་དུ་རས་གུར་ཁྲ་བོ་ཞིག་ནང་དུ་༧གོང་ས་སྐྱབས་མགོན་ཡིད་བཞིན་ནོར་བུ་ཞལ་འཛུམས་མདངས་དང་བཅས་བཞུགས་འདུག
ངས་རྒྱབ་ཏུ་ཁུར་བའི་བོད་ཟས་རྣམས་སྐྱབས་མགོན་རིན་པོ་ཆེར་ཕུལ་བས་ཧ་ཅང་ཐུགས་རྗེས་ཚོར་ཆེན་པོའི་སྒོ་ནས་ང་ལ་བསླབ་བྱ་མང་པོ་ཞིག་གནང་ནས་མཐར་གཉིད་སད་སོང་། གཉིད་ཐུན་གཉིས་པའི་སྐབས་སུ་སྔར་བཞིན་རྨི་ལམ་དེ་གཏང་བྱུང་། ས་ཆ་དང་། རི་མགོ རས་གུར་སོགས་ཚང་མ་གཅིག་པ་རེད་འདུག་པ་མ་ཟད་ངའི་རྒྱབ་ཏུ་ཁུར་ཡོད་པའི་སྒྲོ་བ་དང་ཟས་རིགས་ཚང་མ་གཅིག་པ་རེད་འདུག སྐབས་དེ་དུས་ང་ཡི་མཉམ་དུ་མི་འགའ་ཤས་འདུག་ང་ཚོའི་རྒྱལ་བ་རིན་པོ་ཆེ་མཇལ་ལ་འགྲོ་གི་ཡོད་པ་ཤེས་ཀྱི་འདུག རས་གུར་ནང་དུ་མཛུལ་བ་དང་མཉམ་དུ་སྔར་རྒྱལ་བ་རིན་པོ་ཆེའི་བཞུགས་མལ་ཐོག་ཏུ་ང་ཡི་རྩ་བའི་བླ་མ་སྐྱབས་རྗེ་སངས་རྒྱས་བསྟན་འཛིན་རིན་པོ་ཆེ་བཞུགས་འདུག ངས་སྔར་བཞིན་རྒྱབ་ཏུ་ཁུར་ཡོད་པའི་བོད་ཟས་རྣམས་རྩ་བའི་བླ་མར་ཕུལ་བས་ཧ་ཅང་ཐུགས་རྗེས་ཚོར་ཆེན་པོའི་སྒོ་ནས་བསླབ་བྱ་མང་པོ་ཞིག་གནང་སོང་། གཉིད་ཐུན་གཉིས་པ་གཉིད་ལས་སད་པའི་སྐབས་སུ་སེམས་ལ་ཧ་ཅང་དགའ་སྤྲོ་ཆེན་པོ་ཞིག་གིས་ཁེངས་འདུག ནམ་རྒྱུན་བླ་སྒྲུབ་བྱེད་པའི་སྐབས་སུ་རྩ་བའི་བླ་མ་ལ་བརྒྱུད་པའི་བླ་མ་རྣམས་ཀུན་འདུས་ནོར་བུའི་ལུགས་སུ་སྒོམ་ཁུལ་བྱེད་ཀྱི་ཡོད་པས་རྨི་ལམ་དེ་ཉིད་ཀྱང་བླ་སྒྲུབ་ལ་མོས་པ་བྱས་པའི་བཟང་འབྲས་ཡིན་པ་གཞི་ནས་ཤེས་ཚོར་བྱུང་། 

After the Amitabha Puja on Monday, I had a very beautiful dream. I saw His Holiness the Dalai Lama in a small tent on a very high mountain in Tibet. I brought traditional Tibetan food specialities including butter, cheese, curd and Tsampa for offering. As soon as I offered them to His Holiness, he gave me many words of advice. When I woke up my heart was filled with so much joy and happiness. After a short while, I fell back to sleep. I had an another dream at the same place in the same tent. Again, I heard that His Holiness the Dalai Lama is living there. I went with all these gifts of Tibetan specialities to offer but when I entered the tent it wasn't His Holiness the Dalai Lama, it was my own Guru Kyabje Sangye Tenzin Rinpoche in the tent. I thought to myself; oh this time it's Sangye Tenzin Rinpoche, not His Holiness the Dalai Lama. Then, I gave him the offerings that I had brought with me. He too gave me teachings and advice. As soon as he had finished giving me teachings, I woke up with so much happiness in my heart. Dreaming of two lamas (gurus) at the same time at the same place symbolizes the very same heart and thought of all the lamas. I usually chant Guru Sadhana of His Holiness and Kyabje Sangye Tenzin Rinpoche. When I do Guru Sadhana of Sangye Tenzin Rinpoche I also think of His Holiness, idealizing him as Sangye Tenzin Rinpoche and vice-versa. I finally concluded from my dreams that all my lamas have the same nature and the same basis of emanation. So, my heart was filled with so much joy and happiness. 



Tuesday, August 4, 2015

བདེ་ཆེན་ཞིང་སྒྲུབ་འཚོགས་པའི་ཉིན་མོ།


ཁར་ནུབ་གཟའ་ཟླ་བའི་འཆར་ཅན་བདེ་ཆེན་ཞིང་སྒྲུབ་འཚོགས། ་སང་གི་ཞིང་སྒྲུབ་སྐབས་སུ་ཆོས་ཁྲིད་ལ་སྐད་བསྒྱུར་བྱམས་པ་མཐར་ཕྱིན་བརྒྱུད་ནས་བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། བྱིན་རླབས་དང་དངོས་གྲུབ་གཉིས་ཐོབ་པའི་བར་ཆད་སེལ་བྱེད་ལ་མཁའ་འགྲོ་དང་ཆོས་སྐྱོང་ཞེས་གསུངས་པ་ལྟར་རྩ་བ་གསུམ་གྱི་ཁྱད་ཆོས་དང་ཕན་ཡོན་སོགས་འགྲེལ་བཤད་གང་ཤེས་བྱས། དངོས་གཞིའི་ཉམས་ལེན་གྱི་སྐབས་སུ་མདུན་བསྐྱེད་སངས་རྒྱས་འོད་དཔག་མེད་ཀྱི་སྐུ་ལས་བདུད་རྩི་འབེབས་སྦྱངས་དང་འོད་ཟེར་སྤྲོ་བསྡུ་སོགས་དམིགས་རྣམ་སྐྱོང་བཅུག། མདུན་བསྐྱེད་འོད་ཞུའི་སྐབས་སུ་རྫོགས་རིམ་ངང་། རང་སེམས་མ་བཅོས་པ་དྲན་རིག་ད་ལྟའི་ཤེས་པ་སོ་མ་དུས་གསུམ་གྱི་རྟོག་པས་མ་བསླད་པ་འདི་ཉིད་ཀྱི་ངོ་བོར་བལྟ་བཅུག་ནས་སྐར་མ་འགར་སྒོམ་བྱས། བསྔོ་བ་མ་བྱས་པའི་གོང་ནས་སྤྱིར་སེམས་ཅན་ཐམས་ཅད་དང་། ཁྱད་པར་དུ་བོད་ནས་ཉེ་བའི་ཆར་བཙོན་ཁང་ནང་དུ་སྐུ་གཤེགས་པའི་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐུ་གྲོངས་སྟངས་དང་། ད་ལྟའི་བོད་ནང་གི་དཀའ་ངལ་གང་ཡོད་རྣམས་འཕྲོས་བཤད་ཀྱི་ཚུལ་དུ་ངོ་སྤྲོད་བྱས་པས་དགེ་ཕྲུག་ཕལ་མོ་ཆེའི་མིག་ནས་མཆི་མ་འདོན་བཞིན་འདུག ངས་ཀྱང་དེ་རིང་གི་དགེ་རྩ་འདི་སྤྱིར་སེམས་ཅན་ཐམས་ཅད་དང་ལྷག་པར་དུ་འདས་པོ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཆེད་དུ་བསྔོ་དགོས་ཚུལ་སོགས་བཤད། 
ངས་ནམ་རྒྱུན་ཆོས་ཀྱི་བྱེད་སྒོའི་སྐབས་སུ་དངོས་ཡོད་བོད་ནང་གི་གནས་སྟངས་སྐོར་གང་བྱུང་ཡོད་རྣམས་སློབ་མ་ཚང་མར་མཚམས་སྦྱོར་བྱེད་ཀྱི་ཡོད། སློབ་མ་རྣམས་ཀྱང་དེ་ལ་ཧ་ཅང་དགའ་མོས་བྱེད་ཀྱི་འདུག། ཞིང་སྒྲུབ་ཚར་མ་ཐག་དེ་རིང་ཆོས་ཚོགས་ཀྱི་འགན་འཛིན་ཧར་གྲིའི་སྐྱེ་སྐར་ཡིན་སྟབས་སྔ་ནས་གྲ་སྒྲིག་བྱས་པ་ནང་བཞིན་མེ་ཏོག་ཆགས་པ་ཞིག་དང་ཁ་གཏགས་བཅས་ལེགས་སྐྱེས་སུ་ཕུལ་ནས་མང་ཚོགས་ཀྱིས་སྐྱེ་སྐར་གདངས་དབྱངས་མཉམ་ལེན་བྱས་ནས་དཔོན་སློབ་རྣམས་དགའ་སྐྱིད་ངང་དེ་རིང་གི་ཆོས་ཐུན་དེ་གནས་སྐབས་མཇུག་ཡོངས་སུ་གྲུབ་བོ། 
 

Saturday, July 25, 2015

སྙིང་རྗེ་དང་ཤེས་རབ་ཀྱི་ཆོས་བཤད་བྱས་པའི་ཉིན་མོ།


དེ་རིང་ནི་ངོས་ཀྱི་ཆོས་ཚོགས་ནས་སྔ་ནས་གྲ་སྒྲིག་བྱས་པ་ནང་བཞིན་དགོང་མོར་ཆུ་ཚོད་བདུན་པའི་སྐབས་སུ་མི་མང་ལ། སྙིང་རྗེ་དང་ཤེས་རབ་གཉིས་ཀྱི་བརྗོད་བྱའི་ཐོག་ནས་ཆོས་བཤད་བྱེད་རྒྱུ་དེ་ཡིན། ཆུ་ཚོད་བདུན་པའི་སྐབས་སུ་མི་མང་ལྔ་བཅུ་མ་ཟིན་ཙམ་གྱིས་ངོས་ཀྱི་ཆོས་ཚོགས་དེ་རྦད་དེ་ཁངས་སོང་། དེ་རིང་ནི་ངོས་ཀྱི་ཆོས་ཚོགས་གསར་པར་མི་མང་ལ་ཆོས་བཤད་བགྱིས་པ་ཐེངས་མ་དང་པོ་ཡིན། སྐད་བསྒྱུར་བྱམས་པ་མཐར་ཕྱིན་བརྒྱུད་ནས་སྙིང་རྗེ་དང་ཤེས་རབ་ཀྱི་བརྗོད་བྱའི་ཐོག་ནས་དང་པོ་ནང་ཆོས་དང་མ་འབྲེལ་བར་སྙིང་རྗེ་གལ་ཆེན་ཡིན་ཚུལ་དང་། སྙིང་རྗེ་དེ་ཉིད་ཀྱང་གྲོགས་ཤེས་རབ་དང་འགྲོགས་སྟེ་འགྲོ་དགོས་ཚུལ་སོགས་བཤད། ནང་ཆོས་དང་འབྲེལ་བའི་ཐོག་ནས་སྙིང་རྗེ་ཉིད་ཚད་མེད་བཞི་ལས་དང་པོ་གཏང་སྙོམས་གལ་ཆེན་པོ་ཡིན་ཚུལ་དང་གཏང་སྙོམས་དེ་ཉིད་ཀྱང་རང་རྒྱུད་ལ་ལེགས་པར་གོམས་ནས་སྙིང་རྗེའི་བློ་སྦྱོང་སྟངས་དེ་ཉིད་རྒྱུ་འབྲས་མན་ངག་བདུན་དང་བདག་གཞན་མཉམ་རྗེ་སོགས་ལ་བསྟེན་དགོས་ཚུལ་དང་གྲོགས་ཤེས་རབ་ཀྱིས་རང་གཅེས་འཛིན་དེ་རྒུད་པ་ཀུན་སྒོ་ཡིན་པ་དང་། གཞན་གཅེས་འཛིན་དེ་ལེགས་ཚོགས་ཀྱི་འབྱུང་ཁུངས་ཡིན་པ་བཅས་འགྲེལ་བཤད་གང་ཤེས་བྱས་པས་མི་མང་ཧ་ཅང་དགའ་བོ་བྱས་སོང་། མཐར་མི་མང་གི་དྲི་བ་དྲིས་ལན་སོགས་ལ་སོ་སོའི་འདོད་བློ་ཁེངས་པའི་ལན་བཏབས་ནས་དེ་རིང་གི་ཆོས་ཐུན་དེ་བསྔོ་སྨོན་གྱིས་མཇུག་ལེགས་པར་བསྡུས། 

Thursday, July 9, 2015

གྱ་སྟོན་འཁྲུངས་སྐར་ལ་སོང་བའི་མྱོང་ཚོར།།



འདི་ལོར་༧གོང་ས་སྐྱབས་མགོན་ཡིད་བཞིན་ནོར་བུ་མཆོག་མཚན་དཔེའི་གཟུགས་སྐུ་མངོན་པར་བཞད་ནས་དགུང་གྲངས་བརྒྱད་བཅུར་ཐམ་པར་ཕེབས་པའི་སྐུའི་འཁྲུངས་སྐར་ཉིད་ཀི་ལི་ཧྥོ་ཉའི་མངའ་སྡེ་ལོའུ་སན་རྗེའུ་སེའི་ལ་གཏང་གི་ཡོད་སྟབས་སྔ་ནས་གྲ་སྒྲིག་བྱས་པ་ནང་བཞིན་ངོས་ཀྱི་ཆོས་ཚོགས་ཀྱི་ཚོགས་གཙོ་ཧར་གྲེའུ་དང་། ཨ་མ་ཀུན་བཟང་དབང་མོ། ཚ་མོ་བདེ་ཆེན་དབྱངས་སྐྱིད་བཅས་ངེད་མི་བཞི་པོ་རླངས་འཁོར་གཅིག་གི་ནང་དུ་ཞུགས་ནས་སྤྱི་ཚེས་ལྔ་ཞོགས་པ་སྔ་བོར་ཐོན། ལོའི་སན་རྗེའུ་སེའི་ལ་དགུང་མོ་ཆུ་ཚོད་དྲུག་པའི་སྐབས་སུ་གཞི་ནས་འབྱོར། ལམ་དུ་རླངས་འཁོར་ཆུ་ཚོད་བདུན་མ་ཟིན་ཙམ་འགྲོ་དགོས་འདུག དེ་ནུབ་མགྲོན་ཁང་སྐྱིད་པོ་ཞིག་ནང་དུ་བསྡད། མགྲོན་ཁང་ལ་ནུབ་རེར་ཨ་སྒོར་བརྒྱ་དང་བཞི་བཅུ་ཙམ་རེད་འདུག ད་རེས་མགྲོན་ཁང་གི་གླ་ཆ་དང་གསུང་ཆོས་ཀྱི་འཛིན་བྱང་རྣམས་ངོས་ཀྱི་ཆོས་ཚོགས་སློབ་སྟོན་པ་ཁའུ་སན་རྡ་ར་དང་། ཚོགས་གཙོ་ཧར་གྲེའུ་གཉིས་ནས་སྦྱིན་བདག་གནང་སོང་བས་གོ་སྐབས་འདི་བརྒྱུད་ནས་ཐུགས་རྗེ་ཆེ་ཞུ་འདོད་བྱུང་། 
སྤྱི་ཚེས་དྲུག་ནི་༧གོང་ས་སྐྱབས་མགོན་ཡིད་བཞིན་ནོར་བུའི་འཁྲུངས་སྐར་ཡིན་པས་མགྲོན་ཁང་ཉེ་འཁྲིས་སུ་ཡོད་པའི་སྐད་གྲགས་ཅན་གྱི་འཚོགས་ཁང་མི་གྲངས་གཅིག་ཁྲི་བརྒྱད་སྟོང་ཤོང་ཚད་ཅན་གྱི་འཚོགས་ཁང་ཕྱོགས་སུ་ཁ་གཏད་ནས་སོང་། སེམས་སྐྱོ་དགོས་པ་ཞིག་ལ་འཚོགས་ཁང་ཕྱི་ལོགས་ནས་བཀའ་གདམས་གསར་མའི་མིང་ཁ་རུ་ཁྱེར་ནས་དོན་དུ་དམ་སྲི་དོལ་རྒྱལ་འདྲེ་ཚོགས་འགའ་ཡིས་༧གོང་ས་སྐྱབས་མགོན་ཡིད་བཞིན་ནོར་བུ་ལ་མཚན་སྨས་དང་ངུ་འབོད་བྱེད་པའི་རྣམ་འགྱུར་འདི་མཐོང་བ་དང་མཉམ་དུ་སེམས་ལ་མ་དགའ་བ་ཞིག་བྱུང་། ཞིབ་བལྟ་ཞིག་བྱས་དུས་མགོ་སེར་གྲྭ་ཆས་ཡ་མ་ཟུང་གྱོན་མཁན་འགའ་དང་མཉམ་དུ་བོད་པའི་གཞོན་སྐྱེས་གཉིས་འདུག་པས་ང་ཟུར་དུ་དོན་ནས་བོད་པའི་ཕོ་གསར་དེར་ངས་དྲི་བ་འདི་འདྲ་ཞིག་གཏང་བ་ཡིན། ཁྱེད་རང་གང་ནས་ཡིན་ཟེར་དུས་ཁམས་ནས་ཡིན་ཟེར། ང་ཡང་ཁམས་པ་ཡིན་ལས་ངན་ཁྱེད་རང་གི་ཁམས་པའི་ཕོ་རུས་མ་དྲུད་ཟེར་དུས། ཁོ་རང་ནས་ལག་ཏུ་བཟུང་བའི་རྔ་གོག་དེ་སྐད་ཇེ་ཆེ་རུ་བརྡུང་ནས་ལན་བཏབས་མ་སོང་། ང་ནི་༧གོང་ས་སྐྱབས་མགོན་ཆེན་པོའི་གསེར་ཞལ་མ་མཇལ་གོང་ནས་ལྟས་ངན་འདྲེ་ཚོགས་པ་དེས་སེམས་པ་མ་སྐྱིད་པ་བཟོས་ཚར་སོང་། དེ་ནི་ང་གཅིག་པུ་ག་ལ་ཡིན་ས་ཐག་རིང་ནས་ཆེད་དུ་ཡོང་མཁན་བོད་རིགས་དད་ལྡན་མང་པོ་ཞིག་སེམས་ལ་སོས་མེད་ཀྱི་རྨ་ཁ་གསར་པ་རེ་བཟོས་འདུག། སེམས་སྐྱིད་དགོས་པ་ཞིག་ལ་འཚོགས་ཁང་ནང་དུ་སླེབས་པ་དང་མཉམ་དུ་མི་རིགས་འདྲ་མིན་དང་ཆོས་ལུགས་འདྲ་མིན་ཞི་བདེའི་དེད་དཔོན་ཅན་གྱི་མི་སྣ་དང་། མཁས་དབང་། སྐད་གྲགས་ཅན་གྱི་གཞས་པ། རྩོམ་པ་པོ་སོགས་མི་མང་ཆིག་ཁྲི་བརྒྱད་སྟོང་གིས་དེ་རིང་གི་འཚོགས་ཁང་དེ་ཡོངས་སུ་ཁེངས་ནས་ཡིད་བཞིན་ནོར་བུའི་འཁྲུངས་སྐར་ལ་དགའ་དད་སྤྲོ་གསུམ་གྱིས་མཉམ་བསུ་བྱེད་བཞིན་འདུག 
སྤྱི་ཚེས་བདུན་ཉིན་མི་མང་དྲུག་སྟོང་ཤོང་ཚད་ཅན་གྱི་འཚོགས་ཁང་ཞིག་ནང་དུ་བརྗོད་གཞི། (གོ་ལའི་ཚ་དྲོད་ཀྱི་ཤུགས་རྐྱེན་དང་ཁོར་ཡུག་སྲུང་སྐྱོབས) ཞེས་པའི་བཀའ་སློབ་དང་འབྲེལ་ནས་མཁས་དབང་མང་པོའི་མཉམ་དུ་བགྲོ་གླེང་ལྷུག་པོར་གནང་ནས་མི་མང་ནས་ཧ་ཅང་དགའ་མོས་ཆེན་པོ་བྱེད་བཞིན་འདུག། ཉིན་མོ་འདིར་ཨེ་ཤ་ཡའི་རང་དབང་རླུང་འཕྲིན་ཁང་ལས་བྱེད་མདོ་འཛིན་པ་རྡོ་རྗེ་དགྲ་འདུལ་ནས་ཉིན་གུང་ཞལ་ལག་བར་གསེང་སྐབས་ཡིད་བཞིན་ནོར་བུའི་ཉིན་གསུམ་གྱི་མཛད་འཕྲིན་ཇི་བྱུང་སྐོར་ངོས་ལ་དྲི་བ་དྲིས་ལན་བྱས་སོང་། 
སྤྱི་ཚེས་བརྒྱད་ཉིན། (ན་གཞོན་རྣམས་ཀྱི་བཟང་སྤྱོད་ཀྱི་ཤེས་ཡོན) ཞེས་པའི་བརྗོད་གཞིའི་ཐོག་བཀའ་སློབ་དང་ཉིན་རྒྱབ་བོད་རིགས་དང། སོག་པོ། འབྲུག་པ་སོགས་མི་མང་ཉིས་སྟོང་ལྔ་བརྒྱ་མ་ཟིན་ཙམ་ལ་ཟུར་དུ་མཇལ་ཁ་དང་བཀའ་སློབ་གནང་ཞིང་ས་གནས་བོད་རིགས་སྤྱི་མཐུན་ཚོགས་པའི་ན་གཞོན་རྣམས་ནས་གླུ་བྲོ་རྐང་གཞས་སོགས་ཀྱིས་ཉིན་གསུམ་རིང་མཛད་ཕྲིན་གེགས་མེད་མཐར་ཕྱིན་དུ་སོང་ནས་ངོས་ཀྱི་དགེ་ཕྲུག་རྣམས་དང་ལྷན་རླངས་འཁོར་ཁ་ཕྱོགས་མོན་ཊེའུ་རེའུ་སོགས་སུ་བསྒྱུར་ནས་ཆུ་ཚོད་བརྒྱད་མ་ཟིན་ཙམ་ཡོང་ནས་མཚན་མོ་ཆུ་ཚོད་དང་པོའི་སྐབས་སུ་གཞི་ནས་ཆོས་ཚོགས་སུ་འབྱོར། 

Sunday, June 21, 2015

བྷོ་སི་ཊོན་ལ་ཉིན་གསུམ་རིང་སོང་བའི་སྐོར།


བཙོན་ཁང་གི་ཕྱི་ལོགས་ཟུར་དབྱིབས་ཞིག། 
ཉིན་ཤས་གོང་ནས་བཟུང་ཨ་རིའི་གྲོང་ཁྱེར་ཉིའུ་ཡོག་གི་ཆོས་ཕྱོགས་ཀྱི་བགྱི་བྱ་རྣམས་ལེགས་གྲུབ་འོག་མངའ་སྡེ་བྷོ་སི་ཊོན་ལ་ཡོང་། རེས་གཟའ་པ་སང་སྤྱི་ཚེས་བཅུ་དགུའི་ཉིན་ངོས་ཀྱི་དགེ་ཕྲུག་ཀརྨ་ཤེས་རབ་ནས་གོ་སྒྲིག་བྱས་པ་ལྟར་ཁོ་རང་ཡེ་ཤུའི་ལྷ་ཁང་ནང་དུ་བྱམས་པ་དང་སྙིང་རྗེའི་སྐོར་ཆོས་བཤད་བྱས་པས་མི་མང་ཧ་ཅང་དགའ་བོ་བྱས་སོང་། སྔ་ནས་དུས་ཆད་བྱས་པ་ལྟར་སྤྱི་ཚེས་ཉི་ཤུ་རེས་གཟའ་སྤེན་པའི་ཉིན་བྷོ་སི་ཊོན་བཙོན་ཁང་ཞིག་ནང་དུ་ཞོགས་པ་སྔ་བོ་ནས་སོང་། ས་གནས་འདིར་སྡོམས་པས་བཙོན་པ་མི་གྲངས་དྲུག་བརྒྱ་མ་ཟིན་ཙམ་ཡོད་སྐད་འདུག། ཡིན་ནའང་ནག་ཉེས་མི་འདྲ་བའི་སྟབས་ཀྱིས་སྡེ་ཚན་མི་འདྲ་བ་རེད་འདུག། ང་ཐུག་འཕྲད་བྱེད་ས་ནི་ནང་པའི་བཙོན་པ་རེད། བཙོན་པ་མི་གྲངས་དགུ་ཙམ་དང་མཉམ་དུ་ཞོགས་པ་བདེ་ཆེན་ཞིང་སྒྲུབ་དང་། ཉིན་རྒྱབ་ཆོས་བཤད་དང་སྒོམས་སོགས་བྱས་ཉིན་གང་དེར་བསྡད་པས་ཁོ་རང་ཚོ་ཧ་ཅང་དགའ་བོ་བྱུང་སོང་། བཙོན་ཁང་འདིས་ནང་ལོ་ལྔ་ཡི་ཡར་སྔོན་ནས་བཟུང་ད་བར་ཕལ་ཆེར་ལོ་ལྟར་ཐུག་འཕྲད་ཞོར་དུ་ཆོས་བཤད་སོགས་བྱེད་ཀྱི་ཡོད། བཙོན་ཁང་འདི་ཡི་ནང་དུ་ཡོད་པའི་བཙོན་པ་རྣམས་ནི་ཁྲིམས་འགལ་གྱི་ལས་ནི་ཕྲུག་གུ་ལོ་ཆུང་རྣམས་ལ་ཚུལ་མིན་གྱིས་བཙན་གཡེམས་བྱས་པའི་ནག་ཉེས་ཀྱིས་ཕལ་ཆེར་ལོ་ཉི་ཤུ་དང་སུམ་བཅུ་བར་རེད་འདུག ལོ་ཆེ་ཤོས་ཀྱི་མི་གཉིས་ཡོད་པ་དེ་ནི་ཚེ་བཙོན་རེད་འདུག སེམས་ཧ་ཅང་སྐྱོ་དགོས་པ་ཞིག་ལ་ཕལ་ཆེར་ནི་ཕོ་གསར་དང་དར་མ་ཤ་སྟག་རེད་འདུག བཙོན་ཁང་ནང་དུ་ཁྲིམས་དམ་པ་ལ་ཚད་ཞིག་མི་འདུག་ཉི་མ་གཅིག་རིང་ཐེངས་གཉིས་རེའི་ལུས་གཤེར་དང་ཐ་ན་ཆབ་ཁང་ནང་དུ་འགྲོ་བའི་སྐབས་སུ་ཡིན་ནའང་བཙོན་སྲུང་རྣམས་ཀྱིས་རྗེས་འདེད་བྱེད་ཀྱི་འདུག ཉིན་རྒྱབ་ཆུ་ཚོད་གསུམ་པའི་སྐབས་སུ་བཙོན་པ་རྣམས་དང་ལྷན་ཉིན་གུང་ཟ་མ་ལ་མཉམ་རོལ་བྱས། ཟ་མ་ཧ་ཅང་སྐྱོ་བོ་རེད་འདུག་ཟུར་དུ་ཡོད་པའི་བཙོན་པ་ཞིག་ནས་ཟ་མ་ལ་གཅེར་བཞིན་ངུ་སྐད་དང་སྦྲག་ནས་འདི་ལྟར་ཟེར། ང་ནི་ཤ་སྲེག་མ་ཟ་རྒྱུ་ལ་ཧ་ཅང་དགའ་བོ་ཡོད། ཤ་སྲེག་མ་ཁ་ལ་མ་རག་ནས་མི་ལོ་ཉི་ཤུ་ཏག་ཏག་འགྲོ་སོང་ཟེར། ང་ནི་མིག་ནས་མཆི་མ་ཤོར་གྲབ་བྱས་སོང་བས་ཟ་མ་བཟའ་མཚམས་བཞག་ནས་ཆབ་ཁང་ནང་དུ་འཛུལ་ནས་བཙོན་པ་འདི་རྣམས་ལ་སྙིང་རྗེ་ནས་ཐེངས་མ་གཅིག་ངུས་ཞིང་མར་ཡོང་ནས་གཞི་ནས་ཟ་མ་ཟོས་པ་ཡིན། སྟབས་ལེགས་པ་ཞིག་ལ་ལོ་གཉིས་ཡར་སྔོན་ནས་ཡོད་པའི་ངོས་ཀྱི་དགེ་ཕྲུག་བཙོན་པ་འགའ་བཙོན་ཁང་ལོ་ཚད་རྫོགས་ནས་བཙོན་གྲོལ་ཐོབ་འདུག དེ་རིང་ཡང་སྐྱར་ཨ་རིའི་ཉིའུ་ཡོག་ནས་ཡིན་པའི་བཙོན་པ་ཕོ་གསར་ཞིག་ནས་སྐྱབས་འགྲོའི་སྡོམ་པ་ཞུས་སོང་བས་ཆོས་མིང་ལ་ཀརྨ་དཔལ་བཟང་ཞེས་བཏགས། ཡ་མཚན་དགོས་པ་ཞིག་ལ་བཙོན་པ་རྙིང་པ་གཉིས་ཀྱིས་གནམ་ཆོས་འོད་ཆོག་འདི་ཕལ་ཆེར་བོད་སྐད་སྒྲ་གདངས་ཐོག་ནས་བློ་ལ་འདོན་འགྲོ་གི་འདུག སྤྱོད་འཇུག་ལས། སྡུག་བསྔལ་མེད་པས་ངེས་འབྱུང་མེད།། ཅེས་པའི་ཚིག་དུམ་འདི་དེ་རིང་ཡང་སྐྱར་སེམས་ལ་འཁོར་བཅུགས་སོང་། ཆུ་ཚོད་བཞི་པའི་སྐབས་སུ་ང་དང་ངོས་ཀྱི་དགེ་ཕྲུག་ཀརྨ་ཤེས་རབ་གཉིས་འགྲོ་གྲབ་བྱས་དུས་བཙོན་པ་ཚང་མ་སྒོ་ཁར་དོན་ནས་ལག་འཇུ་དང་ཐལ་སྦྱར་འཐམ་འཁྱུད་སོགས་བྱེད་ཀྱི་འདུག་པ་མ་ཟད་མང་པོ་ཞིག་ངུས་སོང་། ངེད་གཉིས་ཀྱང་མིག་ཆུ་ཤོར་གྲབ་བྱེད་བཞིན་གནས་སྐབས་སྙིང་ནས་བརྩེ་བའི་བཙོན་པ་རྣམས་དང་མི་འདོད་བཞིན་དུ་གྱེས་བྲལ་བྱེད་དགོས་བྱུང་། རླངས་འཁོར་ནང་ནས་བཙོན་པ་རྣམས་ཀྱི་གནས་སྟངས་སྡུག་གཏམ་བྱེད་བཞིན་བོད་རིགས་ཨ་མ་ཡེ་ཤེས་དང་དཀོན་མཆོག་གཉིས་ནང་དུ་འབྱོར། ཨ་མ་ཡེ་ཤེས་དང་དཀོན་མཆོག་ལགས་གཉིས་ནི་ཨ་རི་ལ་བོད་པ་ཐོག་མ་དེ་རེད་ཅེས་བཤད་ཀྱང་ཕལ་ཆེར་མི་ཆོག་རྒྱུ་མེད་སྙམ། ལོ་བཞིའི་ཡར་སྔོན་ཨ་མ་ཡེ་ཤེས་ལགས་ཀྱི་སྤུན་མཆེད་ཞིག་འདས་གྲོངས་སུ་སོང་ནས་སྐབས་དེ་དུས་ངས་བོད་ལུགས་ལྟར་འཕོ་འདེབས་དང་། དུར་སྐྱལ། ཞེ་དགུ་འདོན་རྒྱུ་སོགས་ཚང་མ་བྱས་པས་དེ་ནས་བཟུང་སྟེ་ང་ཚོ་ཕན་ཚུན་མི་ཚང་གཅིག་ནང་བཞིན་ཧ་ཅང་འབྲེལ་བ་ཡག་པོ་བྱུང་། སང་ཉིན་ཡང་སྐྱར་ཉིའུ་ཡོག་ལ་འགྲོ་དགོས་ཡོད་པས་དོ་ནུབ་ཨ་མ་ཡེ་ཤེས་ནང་དུ་མོ་རང་གི་འདོད་པ་ལྟར་གུ་རུ་སྣང་སྲིད་ཟིལ་གནོན་གྱི་ཚོགས་བསྡུས་ཞིག་བཏོན་ནས་ཁོང་ཚོའི་ནང་མི་སྤུན་མཆེད་འགའ་དང་ལྷན་དགོང་ཟས་ལ་མཉམ་རོལ་དང་ཕན་ཚུན་སྐྱིད་སྡུག་གི་ཁ་བརྡ་བྱས་པས་ཧ་ཅང་སྐྱིད་པོ་བྱུང་། 
བྲེལ་ཟིང་ངང་དེ་རིང་གི་ཉིན་ཐོ་དེ་མ་ཆད་ཙམ་བཏབས་ཡོད་པས་ཡིག་ནོར་ཡོད་ན་དགོངས་ཡངས་ཞུ།། 

Tuesday, June 16, 2015

འབྲུག་དང་རྒྱ་ནག་གཉིས་ཀྱི་རྐང་རྩེད་པོ་ལོའི་འགྲན་བསྡུར་ལ་ལྟས་པའི་ཚོར་སྣང་།

འབྲུག་གི་རྐང་རྩེད་པོ་ལོའི་ཐང་ཆེན་གྱི་ཟུར་ཞིག
ཁ་སང་དེ་རིང་ཚ་གྲང་ཁོད་མི་སྙོམས་པའི་ཉིའུ་ཡོག་གི་གནམ་གཤིས་དེས་རྐྱེན་བྱས་ནས་གཟུགས་པོར་ཉིན་ཤས་གོང་ནས་ཚ་གྲང་འཐབ་ཅིང་ཅུང་མ་བདེ་བ་བྱུང་བས་ཉིའུ་རྗེར་སེའི་ཉིན་གཉིས་ཆོས་ཁྲིད་དེ་གནས་སྐབས་ཕྱི་འཐེན་བྱས་ནས་ཡུན་རིང་མ་ཐུག་པའི་ངོས་ཀྱི་ཚ་བོའི་ནང་དུ་ཉིན་གསུམ་རིང་ལྷོད་དལ་བྱས་ནས་ནང་དུ་བསྡད། དེ་རིང་ནི་འབྲུག་དང་རྒྱ་ནག་གཉིས་ཀྱི་རྐང་རྩེད་པོ་ལོའི་འགྲན་བསྡུར་དེ་འབྲུག་གི་རྒྱལ་ས་ཐིམ་བུ་རུ་གྲ་བསྒྲིག་བྱས་འདུག་སྟབས་ངས་ཀྱང་དྲྭ་ཐོག་ནས་ལྟད་མོ་དེར་ཞིབ་ལྟ་ཞིག་བྱས། རྩེད་མོའི་རྒྱལ་ཕམ་གྱི་ཨང་ཀི་གྲངས་ཀ་དང་། མི་ཡི་རྩེད་རྩལ་སོགས་ལ་བལྟས་ན་འབྲུག་རྒྱལ་གོང་མ་རྣམས་ཀྱིས་འཛམ་གླིང་དེང་དུས་ཀྱི་ཚན་རྩལ་རྣམས་ལ་མཐའ་གཅིག་ཏུ་ལྟས་ངན་བཅོ་བརྒྱད་དུ་རྩིས་ནས་འབྲུག་ལ་རྒྱལ་སྲུང་མཐའ་འགོགས་ཞེས་པའི་ལས་འགུལ་གྱིས་ནུབ་གླིང་ཡར་ཐོན་ཅན་གྱི་རྒྱལ་ཁབ་དང་མི་རིགས་སོགས་ལ་འགོས་ནད་ཅན་ལ་འཛེམས་པ་ནང་བཞིན་མགོ་བོ་བཏུམས་ནས་བསྡད་པའི་འཇུག་འབྲས་ཞིག་དེ་རིང་རྐང་རྩེད་པོ་ལོའི་ཐང་ཆེན་དུ་ངོམ་སོང་། མཐའ་མའི་མཇུག་འབྲས་ཀྱི་རྩེད་མོ་རུ་རྒྱ་ནག་གིས་པོ་ལོ་དྲུག་ཐམ་པ་བླུགས་ཀྱང་འབྲུག་པས་གཅིག་ཀྱང་བླུགས་མ་ཐུབ་པས་གྲངས་ཀའི་ཁྱད་པར་ལ་དྲྭ་ཐོག་ཀྱི་མི་མང་པོ་ཞིག་ནས་ཧ་ལས་ཧོན་འཐོར་ནས་ཡི་གེ་འབྲི་བ་དང་མཆན་འདེབས་པ་སོགས་བྱེད་བཞིན་འདུག ང་ནི་རྩེད་མོའི་ཐོབ་ཤོར་དེ་ལ་ཧ་ལས་མ་སོང་། གང་ལ་ཧ་ལས་སོང་ཟེར་ན་པོ་ལོའི་ཐང་ཆེན་གྱི་རྭ་སྐོར་གྱི་ཁྱབ་སྒྲག་ཡོངས་རྫོགས་རྒྱ་ཡིག་ལས་བོད་ཡིག་གམ་རྫོང་ཁའི་ཡི་གེ་འབྲུག་གཅིག་ཀྱང་མཐོང་རྒྱུ་མེད་པ་དེ་ཡིན། ངས་འདིར་དྲྭ་གྲོགས་རྣམས་ལ་དྲི་བ་ཁ་ཤས་ཞིག་ཡོད། ༡ ངོ་མ་བྱས་ན་རྩེད་མོ་རྩེ་ཡུལ་དེ་འབྲུག་གི་རྒྱལ་ས་ཐིམ་བུ་ཡིན་སྟབས་བོད་ཡིག་གམ་རྫོང་ཁའི་ཡི་གེ་བེད་སྤྱོད་གཏོང་དགོས་ན་ག་རེ་བྱས་ནས་མ་གཏང་བ་རེད། ༢ ཡང་ན་འབྲུག་པས་རྒྱ་ཡིག་ཤེས་ཀྱི་ཡོད་རེད་དམ། ༣ གལ་སྲིད་བོད་ཡིག་གམ་རྫོང་ཁའི་ཡི་གེ་བེད་སྤྱོད་མ་གཏང་ཡང་འཛམ་གླིང་སྤྱི་ལ་ཁྱབ་པའི་དབྱིན་ཡིག་ག་རེ་བྱས་ནས་བེད་སྤྱོད་མ་གཏང་བ་རེད། ༤ ཡང་ན་འབྲུག་ལ་སྦྱར་བྱང་དེ་རྣམས་པར་སྐྲུན་བྱེད་ཐུབ་པའི་དེང་དུས་ཀྱི་འཕྲུལ་ཆས་རྣམས་མེད་རེད་དམ་ཡང་ན་གཞན་ཞིག་རེད། ངས་གོ་ཚུལ་ཞིག་ལ་ལོ་འགའི་ཡར་སྔོན་ཆེས་སྙན་གྲགས་ཅན་གྱི་རྐང་རྩེད་པོ་ལོ་ཞིག་ར་ཤི་ཡ་ལ་རྩེད་པའི་སྐབས་སུ་ར་ཤི་ཡ་ནས་ཕྱི་རྒྱལ་སུ་གང་གི་ཡིག་རིགས་བེད་སྤྱོད་མ་གཏང་ནས་ར་ཤི་ཡའི་ཁོ་རང་ཚོའི་ཡི་གེ་བེད་སྤྱོད་གཏོང་དགོས་པའི་རེ་སྐུལ་ལྟར་ར་ཤི་ཡའི་ཡི་གེ་བེད་སྤྱོད་གཏང་བ་གོ་བྱུང་། དེ་གལ་སྲིད་བདེན་པ་ཡིན་ན་འབྲུག་པས་ག་རེ་བྱས་ནས་རང་གི་ཡི་གེ་བེད་སྤྱོད་མ་གཏང་བ་རེད། དེ་རིང་གི་ལྟད་མོ་དེར་བལྟ་བའི་སྐབས་སུ་ངས་མཐའ་སྡོམ་ཚོར་སྣང་འདི་འདྲ་ཞིག་སླེབས་སོང་། རྒྱ་ནག་རྩེད་རིག་པ་རྣམས་ཀྱིས་གཅིག་ནས་དྲུག་བར་རེ་རེ་བཞིན་བླུགས་པའི་སྐབས་སུ་བཟང་སྤྱོད་ཡིན་མདོག་གིས་པོ་ལོ་བླུགས་མཁན་རྣམས་ཀྱིས་ནམ་རྒྱུན་ལྟར་འཐམ་འཁྱུད་དང་རྒྱུགས་ཤར། བལྟ་མཁན་རྣམས་ཀྱིས་ཀི་སྒྲ་དང་ཐལ་རྡེབ་སོགས་ཆེས་ཉུང་བ་འདི་དང་། རྩེད་རྭའི་ནང་ལོགས་ཡོངས་རྫོགས་རྒྱ་ཡིག་གིས་ཁེངས་སྟངས་འདིར་ཞིབ་འདིང་ཞིག་རྒྱབ་ན་ད་ལྟའི་རྩེད་མོའི་གོ་སྐབས་འདི་བརྒྱུད་ནས་རྒྱ་ནག་གཞུང་གི་རྟིང་དཔོག་དཀའ་བའི་སྲིད་དོན་ནག་པོ་དེ་ལྷ་ལུང་ནང་དུ་འདྲེ་ལག་ནང་བཞིན་འབྲུག་ལའང་བརྐྱངས་ཚར་འདུག་བསམ།

Monday, June 8, 2015

མངའ་སྡེ་ཀན་སེའུ་སི་ལ་སླེབས་པའི་ཚོར་སྣང་།


ཉེ་བའི་ཆར་བདུན་ཕྲག་གཅིག་རིང་ཀན་སེའུ་སེའི་མངའ་སྡེའི་ནང་དུ་བདུན་ཕྲག་གཅིག་རིང་ངོས་ཀྱི་དགེ་ཕྲུག་ཞིག་གིས་སྔ་ནས་གྲ་སྒྲིག་བྱས་པ་ནང་བཞིན་འདི་ཟླའི་སྤྱི་ཚེས་གཉིས་རེས་གཟའ་མིག་དམར་ཉིན་བདེ་འབྱོར་བྱུང་། ཁ་སང་ནས་འགོ་འཛུགས་ཀྱིས་ཉིན་གསུམ་རིང་བདེན་པ་བཞིའི་གཙོས་ནང་ཆོས་ངོ་སྤྲོད་བྱས། ང་མངའ་སྡེ་འདིར་སླེབས་པ་ཐེངས་མ་གཉིས་པ་ཡིན། མངའ་སྡེ་འདི་ནི་ཨ་རིའི་མངའ་སྡེ་རྣམས་ཀྱི་ནང་ནས་ཕལ་ཆེར་མི་གྲངས་ཉུང་ཞིང་དཔལ་འབྱོར་སྐྱོ་ཤོས་ཡིན་ཚོད་འདུག གང་ལྟར་ལུང་པ་འདིར་སླེབས་པའི་སྐབས་སུ་ང་ནི་རྒྱ་གར་ལ་སླེབས་པའི་ཚོར་སྣང་བྱུང་། གང་ཡིན་ཟེར་ན་ད་ལྟའི་དུས་ཚོད་ལ་ཧ་ཅང་ཚ་བ་ཆེན་པོ་རེད་འདུག ཁང་མིག་རེའི་ནང་དུ་གྲང་གློག་རེ་མེད་ན་འདུག་བཟོད་མེད། སང་ཉིན་ནས་བཟུང་སྟེ་སྔ་ལོར་ངོ་ཤེས་བྱུང་བའི་བོད་པའི་མི་ཚང་ཞིག་འདུག་པས་དེར་ཉིན་གཅིག་རིང་ཕུར་པའི་ཚོགས་མཆོད་དང་ཞབས་བརྟེན་བྱེད་དགོས་ཡོད། ལུང་པ་འདིར་གནམ་གཤིས་དྲོ་གྲང་མི་སྙོམས་པ་མ་ཟད་རླུང་འཚུབ་དང་ཆུ་ལོག་གི་གནོད་སྐྱོན་ཧ་ཅང་ཆེ། མངའ་སྡེ་འདིར་ཁང་པ་ཧ་ཅང་གོང་ཚད་ཆུང་བ་མ་ཟད་ཐ་ན་ཟས་རིན་དང་མགྲོན་ཁང་གླ་ཆ་སོགས་ཀྱང་ཧ་ཅང་རིན་གོང་དམའ་བོ་རེད་འདུག མངའ་སྡེ་འདི་ནི་ཨ་རིའི་རྒྱལ་ཁབ་དཀྱིལ་མ་ཞིག་ཏུ་ཡོད། མི་རྣམས་སོ་སོའི་ཆོས་ལུགས་དད་འདུན་ཧ་ཅང་ཆེ། ནང་ཆོས་ཀྱི་ཆོས་ཚོགས་འགའ་ཤས་ཡོད་པའི་ནང་བོད་བརྒྱུད་ནང་བསྟན་ཆོས་ལུགས་ཀྱི་ཆོས་ཚོགས་ཀྱང་ཁ་ཤས་ཞིག་ཡོད་ཚོད་སྣང་། གང་ལྟར་ལུང་པ་ཁུག་ཀྱོག་ཡིན་པའི་སྐུ་དྲིན་གྱིས་ཕལ་ཆེར་མི་རྣམས་ལ་རང་བཞིན་གྱིས་གཉོམ་ཆུང་ཞིང་གདོང་ལ་བཅོས་མིན་གྱི་འཛུམས་མདངས་མཐོང་རྒྱུ་འདུག བདུན་ཕྲག་འདིའི་རིང་ཧ་ཅང་སྐྱིད་པོ་བྱུང་ངོས་ཀྱི་ཆོས་གྲོགས་དང་བོད་པའི་ཁྱིམ་ཚང་བླ་མ་ཀུན་བཟང་སོགས་ལ་ཐུགས་རྗེ་ཆེ་ཞུ་འདོད་བྱུང་། སང་ཉིན་ཉིའུ་ཡོག་ལ་འགྲོ་དགོས་ཡོད་། གནང་ཉིན་ནས་བཟུང་སྟེ་ཉིའུ་ཡོག་དགེ་ཕྲུག་ཀརྨ་ཆོས་སྒྲོན་ནས་གོ་སྒྲིག་བྱས་པ་ནང་བཞིན་ལྷོ་ཨ་མི་རི་ཀའི་མི་རིགས་རྣམས་ལ་ཕར་ཕྱིན་དྲུག་དང་། བྱམས་པ་དང་སྙིང་རྗེའི་སྐོར་ཆོས་བཤད་བྱེད་དགོས། སྤྱི་ཚེས་བཅུ་གསུམ་ཉིན་དགེ་ཕྲུག་ཀརྨ་རྡོ་རྗེས་གོ་སྒྲིག་འོག་ཉིའུ་རྗེར་ཆོས་ཚོགས་ལ་བདེ་ཆེན་ཞིང་སྒྲུབ་འཚོགས་དགོས། སྤྱི་ཚེས་བཅུ་དགུ་ནས་ཉེར་གཅིག་བར་བྷོ་སི་ཊོན་དགེ་ཕྲུག་ཀརྨ་ཤེས་རབ་གོ་སྒྲིག་འོག་བཙོན་པ་རྣམས་ལ་ཆོས་བཤད་ནས་ཉེར་གཅིག་ཉིན་རྒྱབ་ཉིའུ་ཡོག་ལ་འབྱོར། དེ་ནས་ཉིན་ཤས་རིང་ངལ་གསོ་དང་ས་གནས་ཉིའུ་ཡོག་སྤུན་མཆེད་རྣམས་དང་ཐུག་འཕྲད་ཀྱིས་སྤྱི་ཚེས་ཉེར་བརྒྱད་ཉིན་ཀི་ལི་ཧྥོ་ལ་ཡོང་དགོས་ཡོད། 

Wednesday, June 3, 2015

ཆོས་ཚོགས་གསར་པར་རབ་གནས་བྱས་པའི་ཉིན་མོ།

ཆོས་ཚོགས་རབ་གནས་བྱེད་བཞིན་པ།
ཁ་སང་གི་ཉིན་མོ་འདི་ནི་གཟའ་ཉི་མར་གཟའ་སྐར་སོགས་འཕྲོད་སྦྱོར་དགེ་བའི་ཉིན་འཇམ་དབྱངས་ཆོས་འཁོར་གླིང་ཆོས་ཚོགས་གསར་པར་རབ་གནས་བྱས། ཞོགས་པར་དགེ་ཕྲུག་འགའ་དང་ལྷན་ཆོས་ཚོགས་ཕྱི་ལོགས་སུ་དར་ཆེན་སྒྲེང་འཛུགས་དང་རླུང་རྟ་འདོགས་པ་སོགས་བྱས་ནས་ཉིན་རྒྱབ་ཆུ་ཚོད་གཉིས་པའི་སྐབས་སུ་མི་མང་ལ་འཚམས་འདྲིའི་ཕེབས་བསུ་དང་སྦྲག་ས་གཞི་དང་ཁང་པ་གནས་ཀྱི་བདག་པོ་ལྷ་སྲིན་སྡེ་བརྒྱད་སོགས་ལ་འཕྲིན་བཅོལ་དང་སྡེ་བརྒྱད་གསེར་སྐྱེམས་གཏངས། དེ་ནས་འགོ་བའི་ལྷ་ལྔར་གཙོས་ཁང་པ་ཕྱི་ནང་ཡོངས་ལ་ཁྲུས་གསོལ་དང་རབ་གནས་བརྟེན་བཞུགས་སོགས་གང་ལེགས་བྱས། ངོས་ཀྱི་དགེ་ཕྲུག་གསར་རྙིང་གཉིས་གཙོས་མི་གྲངས་བརྒྱད་བཅུ་ཙམ་ཞིག་ཡོད་སྐད་འདུག དེ་རིང་ནི་ནམ་མཁར་ཉི་འོད་ཀྱི་དྲོ་སྐྱིད་སྟེར་ཞིང་ས་གཞིར་བཀྲ་ཤིས་ཀྱི་མེ་ཏོག་བཞད་ནས་མི་རྣམས་ངོས་ཀྱི་ཆོས་ཚོགས་ལ་ལྟད་མོར་འཚང་ཁ་ཤིག་ཤིག་རེད་འདུག ངོས་ཀྱི་རིང་ནས་འདྲིས་པའི་གྲོགས་པོ་མེའུ་ཀོ་ནས་མཛུབ་གནོན་སྒྲ་བརྙན་དང་མཉམ་དུ་ངས་ཀྱང་ཨ་མི་དྷེ་ཝའི་བསྙེན་དབྱངས་བྱས་པས་མི་རྣམས་དགའ་སྤྲོའི་ཐལ་སྒྲ་རྒྱུན་ཆད་མི་འདུག ཉི་རའི་ནང་དུ་ཟ་འཐུང་ལ་ལོངས་སྤྱོད་བཞིན་ཕན་ཚུན་ངོ་ཤེས་དང་གྲོགས་པོ་གྲོགས་མོ་སོགས་མཉམ་དུ་ཁ་བརྡ་བྱེད་བཞིན་དེ་རིང་གི་སྐྱིད་པའི་ཉི་མ་དགེ་གྲོགས་རྣམས་དང་ལྷན་ཡོངས་སུ་གཏངས། ཆུ་ཚོད་བཞི་པའི་སྐབས་སུ་ཆོས་ཚོགས་ཀྱི་ཚོགས་གཙོ་ཧེའི་ཌེའི་ནས་ཐུགས་རྗེ་ཆེ་ཞེས་པའི་སྐད་ཆ་དང་སྦྲག་ཕེབས་རྫོངས་བྱས། 

དེ་རིང་བཀྲ་ཤིས་གནམ་ལ་གཟའ་སྐར་བཟང་།། 
དེ་རིང་བཀྲ་ཤིས་ས་ལ་དུས་སྟོན་བཟང་།། 
དེ་རིང་བཀྲ་ཤིས་དུས་ཆེན་སུམ་འཛོམས་ཉིན།། 
དེ་རིང་བཀྲ་ཤིས་ཆོས་ཚོགས་རབ་གནས་བྱས།། 

ལྷ་རྣམས་མཁའ་ནས་མེ་ཏོག་ཆར་ཆེན་འབེབས།། 
ཀླུ་རྣམས་ཀུན་གྱིས་ས་གཞི་འབྱོར་པས་བཀང་། 
བར་དུ་སྐྱེ་དགུ་ཐམས་ཅད་བདེ་དང་ལྡན།། 
མཐར་ཐུག་མངོན་སངས་རྒྱས་པའི་བཀྲ་ཤིས་ཤོག།  

Tuesday, May 26, 2015

གཟའ་ཟླ་བའི་བདེ་ཆེན་ཞིང་སྒྲུབ།།

Add caption
ཁ་སང་གི་ཉིན་མོ་འདི་ནི་གཟའ་ཟླ་བའི་འཆར་ཅན་ལྟར་དུ་ཡོད་པའི་བདེ་ཆེན་ཞིང་སྒྲུབ་དེ་ཡིན། ད་རེས་ཀྱི་བདེ་ཆེན་ཞིང་སྒྲུབ་ནི་ངོས་ཀྱི་ཆོས་ཚོགས་གསར་པ་འཇམ་དབྱངས་ཆོས་འཁོར་གླིང་ལ་ཐེངས་མ་དང་པོ་ཡིན་པས་མི་གྲངས་ཉི་ཤུ་རྩ་གྲངས་ཞིག་སླེབས་འདུག་པས་ངས་ཁོར་ཡུག་སྲུང་སྐྱོབ་དང་འབྲེལ་བའི་འབྱུང་བཞིའི་བྱིན་རླབས་བྱེད་སྟངས་དང་། ཕྱི་ཡི་འབྱུང་བཞི། ས། ཆུ། མེ། རླུང་། ནང་གི་འབྱུང་བཞི། ཤ ཁྲག དྲོད། དབུགས་བཅས་ཕྱི་ནང་གི་འབྱུང་བཞི་རྟེན་ཅིང་འབྲེལ་བར་འབྱུང་ཚུལ་དང་ནང་གི་འབྱུང་བཞི་ཁོད་མ་སྙོམས་ན་མི་རྣམས་ཀྱི་ཉོན་མོངས་དུག་ལྔ་འཁྲུགས་ཤིང་དེའི་དབང་གིས་ཕྱི་ཡི་ཁོར་ཡུག་ལ་གཏོར་སྐྱོན་ཡོང་བ་དང་དེས་རྐྱེན་པས་འཛམ་གླིང་ལ་འབྱུང་བའི་གོད་ཆགས་རྒྱུན་ཆད་མེད་པར་ཡོང་གི་ཡོད། ཀོང་སྤྲུལ་བློ་གྲོས་མཐའ་ཡས་ཀྱིས་བོད་ཡུལ་བདེ་བའི་སྨོན་ལམ་ལས། 
སྙིགས་དུས་འགྲོ་རྣམས་བསམ་སྦྱོར་ལོག་པ་དང་།། 
ཕྱི་ནང་འབྱུང་བ་འཁྲུག་པའི་རྒྱུ་རྐྱེན་གྱིས།། 
སྔར་མ་གྲགས་པའི་མི་ཕྱུག་དལ་ཡམས་ནད།། 
གཟའ་ཀླུ་རྒྱལ་གདོན་ནག་སོགས་འབྱུང་པོའི་གཟེར།། 

ཞེས་གསུངས་པ་ལྟར་ངས་ཀྱང་དེ་རིང་དེའི་སྐོར་འགྲེལ་བཤད་གང་ཤེས་བྱས་པས་མི་མང་ཧ་ཅང་དགའ་བོ་བྱུང་སོང་། 

Thursday, May 21, 2015

ཆོས་ཚོགས་གསར་པར་སྤོས་པའི་ཉིན་མོ།།


ད་ནུབ་གཟའ་ཟླ་བའི་བདེ་ཆེན་ཞིང་སྒྲུབ་སྐབས་སུ་ད་ལྟ་བེད་སྤྱོད་བྱེད་བཞིན་པའི་ཁང་པ་ལོ་གཅིག་གི་གླ་ཆ་དང་། གསར་དུ་ཉོས་པའི་ཁང་པའི་སྦྱིན་བདག་ཆེན་མོ་རྡེའུ་ར་ལ་བླ་སློབ་ཡོངས་ནས་བཀའ་དྲིན་རྗེས་དྲན་དང་དགེ་བསྔོ་སོགས་གང་དྲག་བྱས། ད་ལྟའི་ཆོས་ཚོགས་གསར་རྙིང་གཉིས་ཀའི་སྦྱིན་བདག་མི་གཅིག་རང་ཡིན་པ་མ་ཟད་རྒྱ་གར་ལྷོ་ཕྱོགས་ཀྱི་བདེ་ཆེན་ཞིང་སྒྲུབ་འཚོགས་ཁང་སྦྱིན་བདག་སོགས་ཀྱང་ཡིན།
དེ་རིང་ཞོགས་པ་ཆུ་ཚོད་བཅུ་པའི་སྐབས་སུ་མི་མང་ལྷན་ངོས་ཀྱི་ཆོས་ཚོགས་རྙིང་པའི་ནང་གི་ཅ་དངོས་ཡོངས་རྫོགས་ཆོས་ཚོགས་གསར་པར་གནས་སྤོ་བྱས། ང་ནི་ཆུང་ནས་ད་བར་བློ་ཕུག་ཆོས་ལ་གཏད་ནས་པདྨ་དབང་གི་ལྷ་སངས་རྒྱས་འོད་དཔག་མེད་ལ་འདི་ཕྱི་གཉིས་ཀྱི་སྐྱབས་གནས་སུ་བཅོལ་ནས་བརྒྱུད་འདེབས་ནས་གསུངས་པ་ལྟར།
གསོལ་བ་འདེབས་སོ་བྱིན་རླབས་དངོས་གྲུབ་སྩོལ།།
གདོད་མའི་སངས་རྒྱས་འགྲུབ་པར་བྱིན་གྱིས་རློབས།།

ཞེས་པའི་དོན་ལ་སྦར་འཇུ་བྱས་ནས་ངེས་ལེགས་གཏན་བདེའི་ཐར་པའི་གོ་འཕངས་ལ་རེ་ཆེན་བྱས་པ་ལས། ཚེ་འདིར་བཙན་ཕྱུག་དར་གསུམ་སོགས་མངོན་མཐོའི་ལེགས་ཚོགས་ལ་རེ་བ་ཆེར་མ་བྱས་ཀྱང་སྟོན་ཐོག་ལེགས་ན་འཇག་སྐྱ་ཞོར་དུ་འབྱུང་བའི་དཔེ་ལྟར་ད་རེས་སྦྱིན་བདག་སྐུ་དྲིན་ཅན་ནས་ཨ་སྒོར་འབུམ་དྲུག་ལྷག་གིས་ཁང་པ་ཞིག་ཉོས་ནས་སྤྲད་བྱུང་། དེ་ནི་མི་ཚེ་ས་མཐར་འཁྱར་བའི་སྤྲང་བན་ང་ལ་ལྟོས་ན་རྨི་ལམ་ནང་བཞིན་ལེགས་ཕྱོགས་ཀྱི་འགྱུར་བ་ཆེ་ཤོས་ཞིག་ཡིན། ཁ་སང་ཉེ་ཆར་ཨ་སྒོར་ཁྲི་གསུམ་མ་ཟིན་ཙམ་གྱིས་ཁང་པ་བཟོ་བཅོས་དང་རྙིང་རྗེ་གསར་བཅོས་སོགས་བྱས་པས་མི་ཚང་མ་ཡིད་སྨོན་རང་དབང་མེད་པར་ཤོར་བའི་འཇམ་དབྱངས་ཆོས་འཁོར་གླིང་གཏན་ཇག་གི་ཆོས་ཚོགས་ཞིག་ཏུ་གྱུར། ད་ནས་བཟུང་སྟེ་གཟའ་ཟླ་བའི་བདེ་ཆེན་ཞིང་སྒྲུབ་དང་ཆོས་ཕྱོགས་ཀྱི་བྱེད་སྒོ་ཁག་ཚང་མ་ཆོས་ཚོགས་གསར་པའི་ནང་དུ་བྱེད་རྒྱུའི་གཏན་ཁེལ་ཟིན། ས་གནས་འདིར་ནང་པའི་ཆོས་ཚོགས་ཉུང་བ་མ་ཟད་བོད་ཀྱི་ཆོས་ཚོགས་ནི་ང་གཅིག་པུ་ཡིན་པས་ས་གནས་འདིའི་མི་མང་ནས་ང་ལ་དགའ་མོས་དང་རྒྱབ་སྐྱོར་ཧ་ཅང་ཆེ། ངས་ཀྱང་ས་གནས་འདིར་ནང་ཆོས་གཅིག་པུ་མ་ཡིན་པར་འབྱུང་བཞིའི་བྱིན་རླབས་དང་ཁོར་ཡུག་སྲུང་སྐྱོབ་སོགས་ལ་གང་དྲག་བྱས་པས་གྲུབ་འབྲས་མི་དམན་ཙམ་ཐོན་བྱུང་།

Friday, May 15, 2015

བོད་པ་ཚང་ལ་ཟླ་ཐོ་བེད་སྤྱོད་གཏོང་བའི་ལུགས་སྲོལ་ཡོད་དམ།

བོད་པའི་སྤྱི་ཚོགས་ནང་གི་ཞེན་ཆ་གཅིག་ནི་ཟླ་ཐོ་བེད་སྤྱོད་མི་གཏོང་བ་དེ་ཡིན། 
སྔ་ས་ནས་གྲ་སྒྲིག་གང་ཡང་མེད་པར་རང་སྣང་གང་ཤར་དུས་ཚོད་ངེས་ཅན་ལ་ལས་ཀ་འགོ་འཛུགས་པ་དང་མགྲོན་ལ་འགྲོ་བ་སོགས་ཡིན། དེ་ནི་ལོ་རབས་བརྒྱ་ཕྲག་འགའ་ཡི་གོང་འཛམ་གླིང་རྣ་ཐོས་མིག་མཐོང་མེད་པར་ལུང་པ་ཁུག་སྐྱོག་ཞིག་ནང་གཞན་སུ་ལའང་ལྟོས་མ་དགོས་པར་རང་དང་འདྲ་བའི་དུད་འགྲོ་ཁ་ཤས་ཞིག་མཉམ་དུ་མི་ཚེ་བསྐྱལ་བ་དེས་དྲི་ངན་དེ་འགོས་པ་ཡིན། 
ང་ནི་ཆོས་ཚོགས་ཀྱི་བདག་པོ་ཞིག་ཡིན་པའི་དབང་གིས་ཁྲིམས་ལུགས་ལྟར་ཡུལ་མི་འདི་རྣམས་ལ་སྒོ་གང་ཐད་ནས་བསྟུན་དགོས་སྟབས་སྔ་ན་མེད་པའི་ཡར་རྒྱས་བཟང་བསྐྱེད་ཐོབ་པ་དེ་ནི་ཟླ་ཐོ་བེད་སྤྱོད་གཏོང་མཁས་པ་ཞིག་བྱུང་བ་དེ་ཡིན། དེ་ནི་ལེ་ལོ་ཅན་ང་ལ་ལྟོས་ན་ཧ་ཅང་སྟབས་བདེ་བ་མ་ཟད་ངོས་ཀྱི་འབྲེལ་ཡོད་རང་གཞན་གཉིས་ཀར་ཕན་པོ་ཞིག་བྱུང་། དཔེར་ན་ལུང་པ་འདིའི་ནང་གི་མི་ཚང་དཀྱུས་མའི་ཕོ་ཧྲེང་མོ་ཧྲེང་ཁེར་རྐྱང་ཞིག་ཡིན་ཀྱང་ཕལ་ཆེར་ལོ་གཅིག་གི་གལ་ཆེའི་ལས་ཀ་ཚང་མ་ཟླ་བ་དང་ཉིན་མ་ཆུ་ཚོད་སོགས་རྟགས་རྒྱབ་ནས་ཟླ་ཐོའི་ནང་དུ་བཀོད་ཅིང་གྱང་ངོས་སུ་བཀལ་བ་མཐོང་རྒྱུ་ཡོད། མི་དཀྱུས་མ་ཞིག་ལ་ཐུག་འཕྲད་དགོས་ནའང་ཉུང་མཐར་བདུན་གཅིག་གོང་ནས་དུས་ཆད་མ་བྱས་ན་ལས་སླ་བོར་ཐུག་མི་ཐུབ། ཁྱིམ་ཚང་རེའི་ནང་དུ་ལོ་ཐོ་གྱང་ངོས་སུ་མཐོང་རྒྱུ་ཡོད་པ་ནི་ལུང་པ་འདིའི་ཁྱད་ཆོས་ཞིག་ཡིན། རང་རེ་བོད་པ་ཚང་གི་ནང་དུ་སོང་ན་གྱང་ངོས་སུ་ལོ་ཐོ་རེ་མཐོང་རྒྱུ་ཡོད་ཀྱང་དེ་ནི་ལོ་ཐོའི་ནང་གི་ཐང་སྐུ་དང་བླ་པར་སོགས་ལ་དད་ནས་གཙང་སར་བཀལ་བ་ཙམ་ལས་སོ་སོའི་ལོ་རེའི་ནང་མཛད་འཆར་ཁག་བེད་སྤྱོད་གཏོང་མཁན་ཧ་ཅང་ཉུང་ཉུང་ཡིན། 

བོད་པ་རྣམས་ཀྱིས་ད་ནས་བཟུང་སྟེ་སོ་སོའི་ལས་འཆར་ཁག་ཟླ་ཐོའི་ནང་བཀོད་ནས་དུས་ཚོད་ལ་བསྲི་ཚགས་དང་། ལས་རོགས་ལ་སུན་པོ་མ་བཟོ་རོགས་ཞེས་འབོད་སྐུལ་གྱིས་དེ་རིང་གི་ཉིན་ཐོ་དེ་མཇུག་བསྡུས་པ་ཡིན། 

སྔ་ནས་གྲ་སྒྲིག་མེད་པའི་བོད་པ་ཚང་།
དུས་ཚོད་བསྲི་ཚགས་མི་ཤེས་བོད་པ་ཚང་། 
རང་སྣང་གང་ཤར་བྱེད་མཁན་བོད་པ་ཚང་།
ཟླ་ཐོ་བེད་སྤྱོད་མེད་པའི་བོད་པ་ཚང་། 

Monday, May 11, 2015

ཨ་མའི་དུས་ཆེན་ཉིན་མོ།

ཨ་མ་ཀུན་བཟང་དབང་མོ་མཉམ་དུ་སྨན་ཁང་ནང་དུ།
འདི་ཟླའི་སྤྱི་ཚེས་བདུན་ནས་བཟུང་དེ་རིང་སྤྱི་ཚེས་བཅུའི་བར་པོར་ལེན་ཌི་དང་སེའི་ཨ་ཏྲོའུ་སོགས་མངའ་སྡེ་འགའ་རུ་འགྲུལ་བཞུད་ལ་སོང་། སྤྱི་ཚེས་བརྒྱད་ཉིན་མོ་དཔལ་རྒྱལ་དབང་ཀརྨ་པ་བཅུ་བདུན་པ་ཆེན་པོ་མཆོག་གི་མདུན་ནས་གྲུབ་རྒྱལ་ལུགས་ཀྱི་སྨིན་བྱེད་ཀྱི་ཚེ་དབང་ཟབ་མོ་ཐོབ་པའི་ཤིན་ཏུ་བསྐལ་བཟང་གི་ཉིན་མོ་ཞིག་ཏུ་གྱུར། དགོང་མོ་དད་ལྡན་ཤེས་རབ་སྐལ་ལྡན་ནང་མི་དང་ལྷན་མགྲོན་ཁང་ནང་དུ་བསྡད། སྤྱི་ཚེས་དགུའི་ཞོགས་པ་ཆུ་ཚོད་དགུ་པའི་སྐབས་སུ་སྔ་ནས་དུས་ཆད་བྱས་པ་ལྟར་མགྲོན་གཉེར་དིལ་ཡག་སྒྲུབ་དཔོན་རིན་པོ་ཆེ་བརྒྱུད་རྒྱལ་དབང་ཀརྨ་པའི་གཟིམས་ཆུང་མཇལ་བཅར་ཞུས། ལོ་བཞིའི་ཡར་སྔོན་ངོས་ནས་ཞུ་བསྐུལ་ལྟར་ཀརྨ་པ་སྐུ་ཉིད་ནས་བརྩམ་གནང་བའི་ངོས་ཀྱི་རྩ་བའི་བླ་མ་སྐྱབས་རྗེ་གྲུབ་དབང་སངས་རྒྱས་བསྟན་འཛིན་རིན་པོ་ཆེའི་གསོལ་འདེབས་ལྡེབ་མ་གཅིག་ཅན་དེའི་ལྗགས་ལུང་ཞུས། རྗེས་མར་ཨ་རི་ལ་ཕེབས་སྐབས་ང་ཡི་ཆོས་ཚོགས་ལ་གདན་འདྲེན་སྔ་ཞུས་ཀྱང་བྱས་པས་ཞལ་བཞེས་བཟང་པོ་ཐོབ། 


ཉིན་གུང་ཤེས་རབ་ནང་མི་དང་ལྷན་པོར་ལེན་ལ་ཡོང་ངལ་གསོ་བྱས་ནས་ནང་དུ་བསྡད། དེ་རིང་ནི་སྤྱི་ཚེས་བཅུ་ཉིན་ཆོས་གྲོགས་ཚེ་བརྟན་དབང་ཕྱུག་དང་ཤེས་རབ་སྐལ་ལྡན་གཉིས་ལྷན་དུ་པོར་ལེན་ཌིའི་མཛེས་ལྗོངས་དང་མེ་ཏོག་ལྡུམ་ར་སོགས་ལ་སྤྲོ་སང་ལ་ཁྱུག་ཙམ་མཉམ་དུ་སོང་བས་དཔེ་མེད་སྐྱིད་པོ་བྱུང་། དགོང་མོ་ཆུ་ཚོད་བརྒྱད་པའི་སྐབས་པོར་ལེན་ཌི་གནམ་ཐང་བརྒྱུད་ནས་ཀི་ལི་ཧྥོ་ཉའི་གནམ་ཐང་ཆུ་ཚོད་བཅུ་པའི་སྐབས་སུ་འབྱོར། གནམ་ཐང་དུ་དད་ལྡན་མ་ཨ་མ་ཀུན་བཟང་དབང་མོ་ནས་ལག་ཁ་གཏག་གིས་སྒུག་འདུག། ཨ་མ་ཀུན་བཟང་དབང་མོ་ནི་ད་ལོར་དགུང་གྲངས་བརྒྱད་བཅུ་གྱ་བཞི་ཡིན། ཕར་ལྟས་ཚོད་ལ་ལོ་གྲངས་བརྒྱད་བཅུའི་ནང་ལ་སླེབས་པ་འདྲ་བོ་གཏན་ནས་མེད། ཕ་ཡུལ་ཉི་ཧོང་ནས་ཡིན་ཀྱང་ཆུང་ནས་ཨ་རིར་འབྱོར་ནས་སློབ་སྦྱོང་དང་འཚར་སློང་བྱུང་ས་ཕལ་ཆེར་ཨ་རིར་ཡིན། མོ་རང་དངོས་མིང་དུ་susan schek ཟེར། ངོས་ཀྱི་ཆོས་ཚོགས་མཆོད་དཔོན་དང་མ་ཟད་ང་ས་ཆ་གང་དུ་འགྲོ་དགོས་ཀྱང་རླངས་འཁོར་ཁ་ལོ་བ་ཡང་ཡིན། སྙིང་ཐིག་སྔོན་འགྲོའི་ཐོག་ནས་འབུམ་ལྔ་ཆ་ཚང་བསག་གྲུབ་པ་མ་ཟད་ང་ལ་འཕྲད་ནས་བཟུང་སངས་རྒྱས་འོད་དཔག་མེད་ཡི་དམ་དུ་བསྙེན་ནས་འོད་དཔག་སྔགས་རིང་ཐོག་ནས་བསྙེན་ཚད་འབུམ་གསུམ་གྲུབ་ཚར། ང་ལ་ར་གན་གསེར་རློམ་གྱིས་དད་འདུན་ཧ་ཅང་ཆེ། ངས་ནི་མོ་རང་གི་ང་ལ་བརྩེ་བས་སྐྱོངས་སྟངས་སོགས་གང་ལ་བལྟས་ཀྱང་ལས་ཀྱིས་བསྐོས་པའི་ཨ་མ་ཡི་ཚོར་སྣང་རྒྱུན་ཆད་མེད། དེ་རིང་ནི་འཛམ་གླིང་ཨ་མའི་དུས་ཆེན་དེ་ཡིན་སྟབས་ཁ་སང་ནས་གྲ་སྒྲིག་བྱས་ནས་མོ་རང་ལ་ཆེད་དུ་ཉོས་པའི་ཀརྨ་པའི་ལས་རྟགས་ཡོད་པའི་དངུལ་ལེན་ནང་འཇམ་དེ་དང་མཉམ་དུ་མེ་ཏོག་ཆག་པ་ཞིག་བཅས་སྤྲད་པས་མོ་རང་ཧ་ཅང་དགའ་བོ་བྱུང་། དེ་ནས་ངེད་མ་བུ་གཉིས་ངོས་ཀྱི་བྱེས་བསྒྲོད་ཉིན་གསུམ་རིང་ཁ་བརྡ་བྱེད་ཞོར་རླངས་འཁོར་མོན་ཊོའུ་རེའུ་སོགས་ལ་ཁ་སྐོར་ནས་ཆོས་ཚོགས་ལ་ཡོང་བས་དགོང་མོ་ཆུ་ཚོད་དང་པོའི་སྐབས་སུ་གཞི་ནས་འབྱོར།

ལུས་ཀྱི་སྐྱེད་མ་དམར་པོའི་རླུང་འཚུབས་ཀྱིས་ཁྱེར་ཡང་།། 

ལས་ཀྱི་བསྐོས་པའི་དྲིན་ཅན་ཨ་མ་ཞིག་རྙེད་སོང་། 
ཤི་གསོན་གཉིས་ཀྱིས་བསྐྱངས་བའི་ས་མཐའ་ཡི་བུ་ཆུང་།།
དེ་རིང་ཨ་མའི་དུས་ཆེན་བསུ་བ་རུ་སླེབས་ཡོད།། 


དམར་པོའི་འཐབ་རྩོད་ཁྲོད་ཀྱི་ཨ་མ་ཡི་འོ་རྒྱལ།།
ཟླ་གསུམ་ཙམ་ལས་མ་ལོན་བུ་ཆུང་ང་སྐྱུར་ནས།། 
སྡུག་གི་མུན་པའི་ཀློང་ནས་གསོན་བྲལ་དེ་བྱས་དུས།། 
ངུས་པའི་་གདོང་གི་མིག་ཆུ་ད་དུང་ཡང་སྐམ་མེད།། 

མ་མེད་ས་མཐའི་བུ་ཆུང་ཁེར་རྐྱང་དུ་གྱུར་དུས།། 
ངོ་གདོང་གཉེར་མས་ཁེངས་བའི་བོད་མོ་འགའ་མཐོང་དུས།། 
དྲིན་ཅན་ཨ་མའི་ཞལ་རས་ལྷང་ལྷང་དུ་དྲན་ནས།། 
སྐྱོ་བའི་མིག་ཆུ་ཤོར་བ་ཉུང་ཉུང་ཞིག་མིན་ནོ།། 

ས་སྟེང་ཨ་མའི་དུས་ཆེན་རེ་རེ་ཡི་སྐབས་སུ།། 
ས་མཐའི་བུ་ཆུང་སེམས་ལ་རྨ་ཁ་རེ་བཟོས་སོང་།
བརྩེ་བའི་སྙིང་གི་ནོར་བུ་དྲིན་ཅན་གྱི་ཨ་མ།། 
ད་ལྟ་འཛམ་གླིང་ས་ཆ་གང་འདྲ་རུ་བཞུགས་ཡོད།། 

 དེ་རིང་གི་ཉིན་ཐོ་མ་ཆད་ཙམ་གཏང་ནས་ཉལ་སར་སོང་ནས་གཉིད་དུ་ཡུར།

Saturday, April 25, 2015

བཀྲ་མ་ཤིས་པའི་གཏམ་ངན་ཉིན་མོ།

ས་ཡོམ་ཁྲོད་ཀྱི་བལ་པོའི་ནང་མི།
ད་ནངས་ཞོགས་པ་ཡར་ལངས་པའི་སྐབས་སུ་བཀྲ་མ་ཤིས་པའི་གཏམ་ངན་ཞིག་ལ་བལ་ཡུལ་ལ་ས་ཡོམ་ཤུགས་ཆེན་པོ་རྒྱབ་ནས་མི་བརྒྱ་ཕྲག་མང་པོའི་ཕུང་པོ་དྲྭ་རྒྱའི་རྒྱུད་ལམ་ནང་དུ་མཐོང་རྒྱུ་ཡོད་པ་དེ་རེད། གནས་ཚུལ་དེ་མཐོང་ཐོས་བྱུང་མ་ཐག་བལ་ཡུལ་ཕྱོགས་ལ་ཡོད་པའི་ངོས་ཀྱི་ཆོས་གྲོགས་དང་སློབ་མ་སོགས་ལ་ཁ་པར་གཏང་ཡང་ཁ་པར་འགྲོ་གི་མི་འདུག། ཆར་འཕྲིན་ཐོག་ནས་མི་ཁ་ཤས་ལ་འབྲེལ་བ་བྱས་པས་ངོས་ཀྱི་ངོ་ཤེས་འགའ་ལ་སྐྱོན་གང་ཡང་བྱུང་མི་འདུག་ད་དུང་ཁ་ཤས་ལ་འབྲེལ་བ་བྱེད་ཐུབ་མ་སོང་། 
ང་ནི་བལ་ཡུལ་ལ་ཧ་ཅང་དགའ། གང་ཡིན་ཟེར་ན་༡༩༩༧ ལོར་སྤྲིན་དཀར་པོ་དེ་ཐོད་ལ་བླངས། ས་ནག་པོ་དེ་འདོམས་ཀྱིས་འཇལ་ནས་སྟོད་གངས་རིའི་བརྒྱུད་མི་འདོད་བཞིན་དུ་གཞན་ཡུལ་ས་མཐར་འཁྱར་བའི་སྐབས་སུ་འཆི་གསོས་ཀྱི་ངལ་གསོའི་ས་ཚིག་ཞིག་ཡིན། མ་ཟད་གདོང་དམར་བོད་པ་ཚང་དབུ་འཕངས་དགུངས་བས་མཐོ་ཞིང་ཨེ་ཤ་ཡའི་སུམ་གཉིས་ལ་དབང་བསྒྱུར་བྱེད་པའི་དུས་རབས་བརྒྱད་པའི་སྐབས་སུ་བལ་བོད་གཉིས་ནི་གཉེན་ཚན་གྱི་འབྲེལ་བ་ཡོད་པ་ཅན་ཞིག་ཡིན། ང་རང་ཉིད་ལ་ལྟོས་ན་ཉིས་སྟོང་གཅིག་ནས་བཞིའི་བར་བལ་ཡུལ་བོད་དགོན་འགའ་རུ་ནང་ཆོས་དཔེ་ཁྲིད་ཀྱི་དགེ་རྒན་བྱས་ནས་བསྡད་པའི་རིང་བལ་ཟས་བརྒྱ་གོ་གཅིག་ཆོད་འབྲས་ལྡ་ལི་ལའང་དགའ་མོས་ཆེ་ཙམ་བྱུང་། ཕར་ལྟས་ཚོད་ལ་བྱང་ཐང་རྔ་མོང་ཁ་ནས་སྐྱུག་པའི་བཙོ་ཆུ་དང་འདྲ་ན་ཡང་ཁ་རུ་ཟ་བའི་སྐབས་སུ་བལ་ཟས་ཡོངས་ཀྱི་ནང་ནས་བྲོ་བ་ཞིམ་ཤོས་དེ་ཡིན། བལ་པོའི་ལག་ཁྱེར་རྫུན་བཟོ་བྱས་ཤིང་རླུང་རྟ་དར་བའི་སྐབས་སུ་ཨེ་ཤ་ཡའི་རྒྱ་རིགས་ཀྱི་ཡུལ་གྲུ་འགའ་ཉུལ་ནས་ཚུར་འཁོར་བའི་སྐབས་སུ་བན་རྒན་གྱི་སྒོར་ཁུག་འཐུག་པོའང་ཆག་མྱོང་། རླུང་རྟ་ཆག་པའི་སྐབས་སུ་གནམ་ཐང་ནས་ལག་ཁྱེར་རྫུན་མའི་རྐུབ་རྡོལ་ནས་བལ་སྒོར་ཁྲི་ཚོ་མང་པོའི་རྫུན་འཇལ་བྱེད་པའང་ཐེངས་གཅིག་ཙམ་ག་ལ་ཚད། 
གང་ལྟར་ཀྱང་དེ་རིང་བལ་པོར་ལོ་རྒྱུས་ཐོག་བྱུང་མ་མྱོང་བའི་རང་བྱུང་གི་གོད་ཆག་ཆེན་པོ་བྱུང་བ་ལ་བོད་ཀྱི་གཏམ་དཔེར། ཁྱིམ་ཚེས་ལ་རྐུ་མ་རྒྱུག་ན་ཀི་མཉམ་རྒྱག་གི་དཔེ་ལྟར་ང་རང་ཉིད་བོད་རིགས་ཞིག་ཡིན་པའི་ཆ་ནས་སེམས་ཕམ་ཧ་ཅང་ཆེན་པོ་བྱུང་། དེ་རིང་ནས་བཟུང་སྟེ་ཞེ་དགུ་མ་ཡོལ་བར་ངོས་ཀྱི་ཆོས་ཚོགས་འཇམ་དབྱངས་ཆོས་འཁོར་གླིང་ནས་གཟའ་ཟླ་བའི་འཆར་ཅན་བདེ་ཆེན་སྒྲུབས་སྐབས་སུ་དམིགས་བསལ་བསྔོ་སྨོན་དང་བྱང་ཆོག་སོགས་བྱེད་རྒྱུ་ཡིན། 

རང་བྱུང་འབྱུང་བའི་གོད་ཆག་ཟློག་མེད་འདིས།། 
ཉམ་ཆུང་མི་རྣམས་སྡུག་གི་གནས་ལ་སྦྱར།། 

ཀྱེ་མ་ཀྱེ་ཧུད་བལ་པོའི་སྡུག་བསྔལ་འདི།། 
སངས་རྒྱས་འོད་དཔག་མེད་ཀྱིས་གཟིགས་ལགས་སམ།། 

རིང་ནས་བསྙེན་པའི་ལྷ་མཆོག་ཁྱེད་རྣམས་ཀྱིས།། 
ལྷང་ལྷང་གདུང་བའི་གསོལ་འདེབས་གསན་ལགས་ན།།

འཇིགས་རུང་ས་ཡོམ་ཁྲོད་ཀྱི་ཚེ་འདས་རྣམས།།
འཁྲུལ་སྣང་བར་དོའི་སྡུག་བསྔལ་ལས་གྲོལ་ནས།། 

པདྨའི་འོད་ལས་གྲོལ་བའི་ཞིང་ཁམས་སུ།། 

སྐྱེས་ནས་ཕྱིར་མི་ལྡོག་པའི་ས་ཐོབ་ཤོག།

Friday, April 3, 2015

དབྱིན་ཇིའི་མི་རྒན་ཞིག་དང་མཉམ་དུ་གླེང་མོལ་བྱས་པ།།


ཁ་སང་ནི་སྔ་ནས་དུས་ཆད་བྱས་པ་ལྟར་ངོ་ཤེས་མི་ཚང་ཞིག་གིས་ཉིན་གུང་ཟ་མར་མགྲོན་འབོད་བྱས། མི་ཚང་དེའི་དགའ་ཉེ་སྤུན་མཆེད་སོགས་མི་གྲངས་བདུན་བརྒྱད་ཙམ་ཞིག་འཛོམས་འདུག ཕན་ཚུན་འཕྲད་མ་ཐག་རང་གིས་མིང་ནས་འབོད་ཅིང་ངོ་སྤྲོད་བྱེད་ཞོར་ལག་འཇུ་དང་འཐམ་འཁྱུད་སོགས་བྱེད་པ་ནི་ཡུལ་ལུང་འདིའི་ལུགས་སྲོལ་རང་ཡིན་པས་ངས་ཀྱང་དེ་བཞིན་བྱས། དེ་རིང་གི་གནམ་གཤིས་ཧ་ཅང་བཟང་བས་འབྱོར་ལྡན་མི་ཚང་འདིའི་ཁང་པའི་ཐོག་ཁར་ཉི་རའི་ནང་དུ་ཟས་རིགས་འདྲ་མིན་གྱིས་གཡོས་སྦྱོར་བྱས་པའི་ཟས་སྣ་རྣམས་ཟ་ཆོག་ཆོག་བྱས་ནས་གཤམས་འདུག
ཟས་ལ་རོལ་བཞིན་པའི་སྐབས་སུ་ང་ནི་སྐུ་མགྲོན་དམིགས་བསལ་བ་ཡིན་ཙང་ཚང་མས་ངོས་ཀྱི་སྐོར་སྐད་ཆ་འདྲི་བཤད་ལ་འཚང་ཁ་ཤིག་ཤིག་བྱེད་ཀྱི་འདུག།


ཟུར་དུ་ཡོད་པའི་མི་རྒན་ཞིག་ནས་གོ་མ་བརྡ་ཡིས་ལྐོབ་ལབ་ཀྱིས་ང་ལ་འདི་ལྟར་ཟེར། ང་ནང་པའི་ཆོས་ལ་དོ་སྣང་བྱས་ནས་ལོ་མང་པོར་འགྲོ་སོང་། དང་པོ་ང་ཐེག་ཆེན་གྱི་ཆོས་བྱེད་མཁན་ཞིག་དང་འབྲེལ་བ་བྱུང་དེ་ནས་བཟུང་སྟེ་བོད་པའི་བླ་མ་འགའ་ཡི་མདུན་ནས་སྐྱབས་འགྲོའི་སྡོམ་པ་ཞུས་པ་ཡིན། ཁྱད་མཚར་ཞིག་ལ་ལོ་ལྔ་ཡི་གོང་ནས་བཀའ་གདམས་གསར་མ་པ་ཡིན་ཟེར་བའི་ཚོགས་པ་ཞིག་དང་འབྲེལ་བ་བྱུང་། ཉིན་གཅིག་དབྱིན་ཇིའི་གྲྭ་པ་གཉིས་དང་བོད་པའི་བླ་མ་གཅིག་བཅས་དགེ་འདུན་པ་འགའ་ཡིས་བྱེ་མའི་རྡུལ་མཚོན་གཤམས་སྟོན་གྱི་མཛད་སྒོ་ཞིག་གི་ཞོར་དུ་མི་མང་ལ་སངས་རྒྱས་སྨན་བླའི་དབང་ཞིག་གནང་བྱུང་བས་ངས་ཀྱང་དབང་དེ་ཞུས་པ་ཡིན། ཁོང་ཚོའི་བྱེད་སྟངས་དེ་བོད་པའི་བླ་མ་གཞན་ལས་ཁྱད་པར་ཆེན་པོ་འདུག དབང་གྲལ་ལ་བསྡད་ཚར་བའི་སྐབས་སུ་མི་རེ་རེ་བཞིན་དུ་པར་བླངས་བ་མ་ཟད་ཁ་བྱང་ཡང་སྤྲད་དགོས་འདུག གང་ལྟར་དབང་དེ་ཞུས་ཚར་ནས་བཟུང་སྟེ་ང་ལ་བཀྲ་མ་ཤིས་པ་མང་པོ་བྱུང་ཞེས་ཟེར་ཞོར་དབུགས་རིང་ནར་ནར་བྱེད་བཞིན་མིག་ནས་མཆི་མ་གཏོང་གིན་འདུག ངས་ཁྱོད་རང་ལ་དཀའ་ངལ་ག་རེ་བྱུང་སོང་ཞིབ་ཕྲ་བཤད་རོགས་ཞེས་དྲིས་དུས།
ང་ལ་དོན་མེད་རླངས་འཁོར་རྡབ་སྐྱོན་ཐེངས་མ་ཁ་ཤས་དང་མ་ཟད་ངོས་ཀྱི་གྲོགས་མོ་དང་ཁ་བྲལ་དགོས་བྱུང་། སྡུག་ཤོས་ཞིག་ལ་མཚན་མོར་རྨི་ལམ་ཧ་ཅང་ཞེད་དངངས་ཅན་མང་པོ་རྨིས་ནས་གཉིད་ཁུག་ཐུབ་མི་འདུག དེ་ང་ཡི་དཀའ་ངལ་ཆེ་ཤོས་དེ་ཡིན། ཟླ་གསུམ་ཙམ་གོང་ནས་རྒྱ་གར་ལ་ཡོད་པའི་ངོས་ཀྱི་སྐྱབས་སྡོམ་ཞུ་སའི་བླ་མ་ཆེ་གེ་མོར་དེའི་སྐོར་བཀའ་འདྲི་ཞུས་པ་ཡིན། ཁོང་ནས་ཟེར་ན་ཁྱོད་རང་བཤེས་གཉེན་ལོགས་པར་འཕྲད་པ་རེད་ཟེར། ངོས་ཀྱི་བླ་མ་དེ་ད་ལྟ་རྒྱ་གར་ལ་ཡོད་རེད་ས་གནས་འདིར་ཕེབས་ཐུབ་ཀྱི་མ་རེད། ཁྱེད་རང་ནས་ངོས་ཀྱི་དཀའ་ངལ་དེར་རོགས་པ་བྱེད་རོགས་ཟེར་ནས་མི་རྒན་ཡང་སྐྱར་ངུས་སོང་། ང་ད་ལྟའི་དཀའ་ངལ་འདི་ལས་གྲོལ་ཐུབ་ན་ཕྱིན་ཆད་ནང་པ་བྱེད་ཀྱི་མིན་ཟེར། ཁོ་རང་གི་དངོས་ཡོད་ད་ལྟའི་དཀའ་ངལ་དེ་དང་དེ་ལ་བསྟེན་ནས་ང་ཕྱིན་ཆད་ནང་པ་བྱེད་ཀྱི་མིན་ཅེས་པའི་ཚིག་འདི་གོ་བ་དང་མཉམ་དུ་མི་རྒན་དེར་སྙིང་རྗེ་ཆེན་པོ་ཞིག་རང་དབང་མེད་པར་སྐྱེས་བྱུང་། ངས་ཁོང་གིས་བཀའ་གདམས་གསར་མ་ཟེར་བའི་སྐབས་སུ་ནས་ཆོས་ལུགས་དེ་གང་ཡིན་པ་ལམ་སང་ཤེས་སོང་། གང་ལྟར་ཀྱང་ད་ལྟའི་གནས་སྐབས་སུ་མི་རྒན་ས་གནས་འདིར་གཞན་ལ་སྤོས་ཚར་འདུག་པས་ངས་ཁོང་ལ་མ་འོང་པར་དེའི་སྐོར་གཟབ་གཟབ་གྱིས་དེ་ནི་དགེ་ལུགས་པའི་ཆོས་ལུགས་ཁ་ལ་ཁྱེར་ནས་མི་ཚེ་གདོན་འདྲེར་སྐྱབས་བཅོལ་མཁན་ཤུགས་ལྡན་ཚོགས་པ་རེད་ཟེར་བཤད་པ་ཡིན། ཁོང་ནས་ཀྱང་སྔ་མོ་ནས་ཧ་གོ་ཚར་འདུག ཟ་མ་ཚར་བའི་སྐབས་སུ་ངེད་གཉིས་ང་ཡི་ཆོས་ཚོགས་སུ་སོང་ནས་རིང་ནས་བསྙེན་པའི་ཕུར་པ་རྡོ་རྗེ་གཞོན་ནུའི་སྒོ་ནས་བྱིན་རླབས་བཀའ་སྒོ་གང་དྲགས་བྱས་པ་མ་ཟད་༧གོང་ས་སྐྱབས་མགོན་ཆེན་པོའི་སྐུ་པར་ཞིག་ཀྱང་སྤྲད་པ་ཡིན། མི་རྒན་དགའ་ཐག་ཆོད་ནས་ཁོ་རང་འདུག་སའི་ཁ་བྱང་དང་ཁ་པར་ཨང་གྲངས་བཅས་སྤྲད་བྱུང་། ངས་ཀྱང་ད་ནས་བཟུང་སྟེ་ཆོས་ལུགས་དེའི་སྐོར་ལ་འབྲེལ་མ་བྱེད་ཅེས་བསླབ་བྱ་གང་དྲགས་བྱས་པ་ཡིན།
ཤུགས་ལྡན་དགེ་ལུགས་པའི་དམ་ལྡན་གྱི་སྲུང་མ་ངོ་མ་ཞིག་ཡིན་ན་བླ་མས་སངས་རྒྱས་སྨན་བླའི་བཀའ་དབང་གྱི་གྲལ་དུ་ཡོད་པའི་ཆེས་ཉམ་ཆུང་གི་མི་རྒན་འདི་ཉིད་ལ་སྙིང་རྗེའི་ངང་ནས་སྲུང་སྐྱོབས་དང་གྲོགས་བྱེད་དགོས།
རྗེ་བདག་ཉིད་ཆེན་པོའི་ཞལ་ནས་ཀྱང་།

གང་ཚེ་ཐེག་པ་མཆོག་ལ་ཆོས་སྤྱོད་བཅུས།།
ཚུལ་བཞིན་སྒྲུབ་ལ་བརྩོན་པ་དེ་ཡི་ཚེ།།
མཐུ་ལྡན་རྣམས་ཀྱིས་རྟག་ཏུ་གྲོགས་བྱེད་ཅིང་།
བཀྲ་ཞིས་རྒྱ་མཚོའི་ཕྱོགས་ཀུན་ཁྱབ་གྱུར་ཅིག། 
ཅེས་གསུངས་ཡོད། དམ་ལྡན་གྱི་སྲུང་མ་ཚད་ལྡན་ཞིག་ཡིན་ན་བླ་མའི་དབང་གྲལ་དུ་སྙེགས་པའི་རྡོ་རྗེའི་སློབ་མ་རྣམས་ལ་ཉིན་མཚན་དུས་དྲུག་ཀུན་ཏུ་སྡོང་གྲོགས་བྱེད་ཀྱི་ཡོད།
སེམས་སྐྱོ་དགོས་པ་ཞིག་ལ་དབང་གྲལ་ནང་ནས་མི་སྐྱོ་ཤོས་ཉམ་ཆུང་ཤོས་མི་རྒན་དེ་ལ་ཤུགས་ལྡན་གྱིས་ཐུབ་ཚོད་དང་བརྙས་བཅོས་བྱེད་སྟངས་འདི་ལ་ལྟོས་དང་ཤུགས་ལྡན་ནི་གང་ཡིན་པ་བཤད་མ་དགོས་པར་ཤེས་ཐུབ། ལར་ནི་ཤུགས་ལྡན་ཞེས་པའི་མིང་རྫིག་པོའི་སྔོ་ལོ་འདི་མ་འཕྱར་བའི་གོང་ནས་༧གོང་ས་ལྔ་པ་ཆེན་པོའི་གཟུ་དཔང་ལས། རྒྱུ་སྨོན་ལམ་ལོགས་པ། ངོ་བོ་དམ་སྲི་འབྱུང་པོ། བྱེད་ལས་བསྟན་འགྲོར་འཚེ་བ་ཅན་ཡིན་ཅེས་བསླུ་མེད་རྡོ་རྗེའི་མགུར་ནས་ཐ་ཚིག་གཉེན་པོར་བསྒྲགས་པ་འདིར་ཡིད་ཆེས་འཕར་མ་ཞིག་རྙེད་བྱུང་། དེ་རིང་གི་ཉིན་ཐོ་དེ་ཙམ་ཡིན་གཟིམས་མལ་བདེ།


Sunday, March 29, 2015

གློག་བརྙན་འཁྲབ་སྟོན་ནང་ཞུགས་པའི་ཉིན་མོ།།

གྲགས་ཅན་གློག་བརྙན་འཁྲབ་སྟོན་པ་karl pilkington
ཁ་སང་གི་ཉིན་མོ་འདི་ནི་ངོས་ལ་ལྟོས་ན་མི་ཚེའི་ནང་གི་དམིགས་བསལ་གྱི་ཉིན་མོ་ཞིག་ཡིན། གང་ཡིན་ཟེར་ན་འདས་པའི་ཟླ་གཅིག་གོང་ནས་ང་ལ་ཁ་པར་ཞིག་སླེབས་བྱུང་། དེ་ནི་དབྱིན་ལན་ནས་རེད་འདུག ཁོང་ནས་ཟེར་ན་ཁྱོད་རང་མཁན་པོ་ཀར་བསྟན་ཡིན་ནམ་ཟེར། ངས་ཀྱང་ང་ཡིན་ཅེས་བཤད་ནས་བརྗོད་བྱ་དངོས་གཞི་གླེང་མོལ་བྱས་དུས་ཁྱེད་རང་ངས་གུ་གུལ་དྲ་རྒྱའི་ལམ་ནས་རྙེད་བྱུང་། the moaning of life ཞེས་པའི་གློག་བརྙན་ཚོགས་པ་ནས་ཁྱེད་རང་ལ་འདོད་པ་ཡོད་ན་སེམས་ཅན་ཁ་ཤས་ཚེ་ཐར་གཏང་ནས་ཞོར་དུ་གཟུགས་མཐོང་བརྙན་འཕྲིན་ཞིག་ལེན་འཆར་ཡོད་ཅེས་དྲི་བ་གཏང་བྱུང་ངས་ཀྱང་དེ་བཞིན་ཁས་བླངས་པས་ཁ་སང་ཕོ་གསར་ན་གཞོན་བཞི་དང་གློག་བརྙན་འཁྲབ་སྟོན་པ་གྲགས་ཅན་karl pilkington བཅས་མི་གྲངས་ལྔ་ང་ཡི་ཆོས་ཚོགས་སུ་སླེབས་བྱུང་། ཁོ་རང་ཚོའི་སྔ་ནས་འཆར་གཞི་ལྟར་རིན་ཐང་ཚད་མཐོར་སྙེགས་པའི་བརྙན་པར་འཕྲུལ་ཆས་དང་གཞན་པར་ཆས་སོགས་གང་རྫིག་ཁུར་འདུག ང་ནི་མི་ཚེ་དེར་གློག་བརྙན་འཁྲབ་སྟོན་པ་ཞིག་བྱེད་རྒྱུ་ཕར་ཞོག་ཐ་ན་རྨི་ལམ་ལའང་རྨིས་མྱོང་མེད་ཀྱང་དེ་རིང་མི་འདོད་བཞིན་དུ་འཛམ་གླིང་ནང་སྐད་གྲགས་ཅན་གྱི་གློག་བརྙན་འཁྲབ་སྟོན་པའི་མཉམ་དུ་སྟེས་དབང་གིས་ཁེལ་བྱུང་། དེ་རིང་ང་ཚོའི་གློག་བརྙན་འདིའི་དབྱིན་ཇིའི་རྒྱལ་ཁབ་གཞུང་གི་གཟུགས་མཐོང་བརྙན་འཕྲིན་ཐོག་ཏུ་ཐད་གཏོང་བྱེད་སྐབས་མི་ས་ཡ་དྲུག་གིས་མཐོང་གི་རེད་ཟེར། ངས་བསམ་པར་ཚེ་འཇུག་ཆོས་པ་རྣམ་དག་ཞིག་བྱེད་བསམ་ཡང་། ད་ཡིན་ན་བན་རྒན་འཆི་ཁར་གློག་བརྙན་འཁྲབ་སྟོན་པ་ཞིག་འགྱུར་གྲབ་འདུག
གང་ལྟར་ཀྱང་རྒྱལ་སྲས་ཞི་བ་ལྷས། 
རྩོམ་པ་ཐམས་ཅད་དགའ་ཕྱིར་ཏེ།། 
དེ་ནི་རིན་གྱིས་ཉོས་ནའང་དཀོན།། 
གསུངས་པ་ལྟར་དེ་རིང་ནི་སོ་སོའི་འདོད་བློ་བབས་མིན་ལ་མ་ལྟོས་པར་ཐག་རིང་ནས་ཆེད་དུ་སླེབས་པའི་ལོ་ཆུང་ན་གཞོན་འདི་རྣམས་ཀྱི་འདོད་བློ་ཡོངས་སུ་ཁེངས་སོང་བས་དེ་ཡང་ཆོས་ཀྱི་ཆ་ཤས་ཞིག་ཡིན་བསམ་ནས་བློ་བདེའི་ངང་གནས་ཡོད། 

ཉིན་རྒྱབ་ཏུ་ཁོང་ཚོའི་མངོན་འདོད་ལྟར་འབུ་དང་སྡིག་སྲིིན་སོགས་སྲོག་ཆགས་ཁ་ཤས་བསླུས་ནས་ཚེ་ཐར་གཏངས། དེ་ནས་རྒྱ་མཚོའི་འགྲམ་ནས་རྐང་འཁོར་ཞོན་བཞིན་ཡར་འགྲོ་མར་འགྲོ་ཁྱུག་ཙམ་རེ་བྱས། གང་ལྟར་དེ་རིང་ཉིན་གང་པོར་ཁོ་རང་ཚོའི་འདོད་པ་ལྟར་བྱ་བྱེད་འདྲ་མིན་ཐོག་ནས་བརྙན་པར་ལེན་པ་བྱས་ནས་དགོང་མོ་ཆུ་ཚོད་བཅུ་པའི་སྐབས་སུ་གཞི་ནས་ཆོས་ཚོགས་སུ་འབྱོར་སོང་། 

Thursday, March 26, 2015

སྐྱིད་པའི་ཉི་མ་ཆོས་ཀྱིས་འདས་པའི་ཉིན་མོ།།

Add caption
ཁ་སང་གི་ཞོགས་པ་ནི་༧གོང་ས་སྐྱབས་མགོན་ཡིད་བཞིན་ནོར་བུའི་བླ་གཟའ་དང་། ངོས་ཀྱི་ཆོས་ཚོགས་སུ་འཆར་ཅན་ལྟར་དུ་ཡོད་པའི་ཆུ་ཚོད་བདུན་ནས་བརྒྱད་བར་དགོང་མོའི་སྒོམ་ཐུན་དེ་ཡིན། ཞོགས་པ་ནས་བཟུང་རྒྱུན་ཁྱེར་གྱི་ཁ་འདོན་རྣམས་ཚར་བར་བྱས། གནམ་གཤིས་ཧ་ཅང་བཟང་བས་གྲོགས་བསྟན་འཛིན་ནམ་མཁའ་དང་ལྷན་མཚོ་འགྲམ་ཁྱུག་ཙམ་ཉུལ། ནང་དུ་འབྱོར་ནས་སྔར་བཞིན་ཁ་འདོན་དང་དཔེ་བལྟས་སྒོམ་སོགས་གང་ཤེས་བྱས་ནས་ནང་དུ་གཅིག་པུར་བསྡད་པས་ཧ་ཅང་སྐྱིད་པོ་བྱུང་། 
ང་ནི་དུས་ཚོད་ཡོད་ན་ང་རང་གཅིག་པུར་ཆོས་ཚོགས་རྒྱབ་ཀྱི་ཉི་རའི་ནང་དུ་ཇ་འཐུང་བཞིན་དཔེ་བལྟས་བྱེད་རྒྱུ་ལས་སྐྱིད་གཅིག་མེད། 
ངོས་ཀྱི་དགེ་ཕྲུག་རྣམས་ནས་ཁྱེད་རང་གཅིག་པུར་འདུག་དུས་སུན་གི་མི་འདུག་བས། དེ་ལས་དེ་རིང་ང་དང་མཉམ་དུ་རྒྱ་མཚོའི་འགྲམ་དུ་འཁྱམས་ཉུལ་ལ་འགྲོ་ཞེས་ཟེར་མཁན་མི་ཉུང་བ་ཡོད། 
ང་མཚོ་འགྲམ་ཉུལ་རྒྱུ་ལ་དགའ་ཡང་། དེ་བས་ཆེས་དགའ་ཤོས་ནི་གཅིག་པུར་འདུག་ནས་ལོ་མང་རིང་དཀའ་བས་སྒྲུབས་པའི་དམ་ཆོས་རིན་པོ་ཆེ་འདི་ལ་ཐོས་བསམ་སྒོམ་གསུམ་གྱིས་མཇུག་སྐྱོང་རྒྱུ་འདི་དེ་བས་ཀྱང་དགའ། 

ཁྱོད་ཀྱིས་བལྟས་ན་ང་ལ་སུན་སྣང་སྐྱེ།། 

ང་ཡིས་བལྟས་ན་ཁྱེད་ལ་སུན་སྣང་སྐྱེ།། 
གང་ལྟར་གནས་སྐབས་མཐར་ཐུག་བདེ་བ་ལ།།
འཐོབ་བྱར་བཟུང་བ་ཙམ་ལས་ཁྱད་པར་མེད།། 

ང་ནི་གཅིག་པུར་འདུག་ལ་དགའ་བས་ན།། 
སྐྱིད་པའི་ཉི་མ་ཆོས་ཀྱིས་འདའ་བར་ཤོག།།
ཁྱེད་ནི་མང་པོའི་ནང་དུ་དགའ་བས་ན།། 
སྐྱིད་པའི་ཉི་མ་གྲོགས་ཀྱིས་འདའ་བར་ཤོག།




Saturday, March 14, 2015

སྙིང་ནས་བརྩེ་བའི་གླིང་ཚ་མ་བུ་གསུམ་ལ།

ཁྱེད་མ་བུ་གསུམ་གྱི་སྙིང་སྟོབས་དང་ཆོད་སེམས་འགྱུར་བ་མེད་པ་ལ་གུས་རང་ནས་ཀྱང་ཡི་རངས་བླ་མེད་ཞུ་བ་དང་ཆབ་གཅིག་ཡུལ་དུས་སྐལ་ནས་ཁྱེད་མ་སྨད་གསུམ་ལག་ཏུ་སྒོར་མོ་བཞག སྐེ་ལ་ཁ་གཏགས་གཡོགས། ཁ་རུ་ཟ་མ་སྤྲད་པ་སོགས་ནོར་ཟང་ཟིང་གི་ཕེབས་རྫོང་ཁོ་བོས་མ་འགྲུབ་ཀྱང་། ངོས་ཀྱང་མི་ཚེ་འདིར་གསང་སྔགས་ཟབ་མོའི་ཆོས་ལ་ཡིད་ཆེས་ཡོད་མཁན་མ་ཟད་ཉམས་ལེན་བྱེད་མཁན་ཞིག་ཡིན་པའི་ཆ་ནས་ཉིན་ལྟར་ཁྱེད་མ་བུ་གསུམ་གྱི་ཕེབས་ལམ་དུ་བར་ཆད་མེད་པའི་སྨོན་ལམ་འདི་འདྲ་བ་ཞིག་གི་སྐྱེལ་རྫོང་བྱེད་ཀྱི་ཡོད།  
སྟག་གཟིག་དོམ་དྲེད་དུག་སྦྲུལ་མཆེ་བ་ཅན༔
འབྲོག་ཆེན་འཇིགས་པའི་འཕྲང་ལ་འགྲིམ་པའི་ཚེ༔
ཡིད་གཉིས་ཐེ་ཚོམ་མེད་པར་གསོལ་བ་འདེབས༔
ཨོ་རྒྱན་དཔའ་བོའི་གིང་དང་སྲུང་མར་བཅས༔
གདུག་པའི་སེམས་ཅན་སྤྲོད་པར་ཐེ་ཚོམ་མེད༔
ཨོ་རྒྱན་པདྨ་འབྱང་གནས་ལ་གསོལ་བ་འདེབས༔ 
བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔


 ལམ་སྲང་འཇིགས་པའི་འཕྲང་ལ་འགྲིམ་པའི་ཚེ༔ 
བསད་ཁྱེར་ཇག་པ་ཆོམ་པོས་ཉེན་པ་ན༔ 
ཡིད་གཉིས་ཐེ་ཚོམ་མེད་པར་གསོལ་བ་འདེབས༔ 
ཨོ་རྒྱན་ཕྱག་རྒྱ་བཞི་ཡི་དགོངས་པར་ལྡན༔ 
ཙོ་ར་མི་རྒོད་རྔམས་སེམས་རླག་པར་བྱེད༔ 
ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ 
བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཞེས་པ་འདི་ཉིད་ཁྱེད་མ་བུ་གསུམ་ནས་ཀྱང་འགྲོ་ཞོར་ཁ་འདོན་དུ་གནང་ན་ཧ་ཅང་དགེ་མཚན་ཆེ། ལྷག་པར་དུ་བུ་ཚེ་བརྟན་རྡོ་རྗེ་ལགས་ནས་དུས་ཚོད་དང་ཆ་རྐྱེན་འཛོམས་སྐབས་ཁྱེད་མ་བུ་གསུམ་གྱི་གནས་སྟངས་སྐོར་ཉིན་ཐོར་བྱས་ནས་གཏང་ན་དེ་ལས་ཀྱང་ཡག་པོ་འདུག མ་བུ་གསུམ་གྱི་བཞེད་དོན་ལྷུན་གྱིས་འགྲུབ་པའི་སྨོན་ལམ་བཅས་དྲ་གྲོགས་ཀརྨ་ཡེ་ཤེས་དེས་ཨ་རིའི་བྱང་ཕྱོགས་ཀི་ལི་ཧྥོ་ཉ་ནས་གུས་པས་ཕུལ།།